၂၀၂၃ ခုနှစ်၊ စက်တင်ဘာ ၂၀ ကနေ ၂၄ ရက်အထိ ကိုးကြိမ်မြောက် နိုင်ငံတကာ စာအုပ်ပြပွဲကို အီကွေဒေါနိုင်ငံ၊ ဂိုင်ရာခေးလ်မြို့မှာ ကျင်းပခဲ့တယ်။ ဂိုင်ရာခေးလ် အိတ်စ်ပိုပလာဇာမှာ ကျင်းပတဲ့ပြပွဲကို ဧည့်သည် ၃၀,၀၀၀ ကျော် လာရောက်လည်ပတ်ခဲ့တယ်။ ညီအစ်ကိုတွေက “ရှေးအကျဆုံး ခေတ်မီစာအုပ်” ဆိုတဲ့ ခေါင်းစဉ်နဲ့ ပြခန်းတစ်ခု စီစဉ်ခဲ့တယ်။ ကျမ်းစာသတင်းစကားဟာ ဘယ်အသက်အရွယ်မဆိုအတွက် လက်တွေ့အကျိုးပြုပုံကို ပြခန်းမှာ အသားပေးဖော်ပြထားတယ်။ မန်ဒရင်းတရုတ်စကား၊ အင်္ဂလိပ်၊ ပေါ်တူဂီ၊ ကွီချွာ (ချင်ဘိုရာဇို)၊ ကွီချွာ (အမ်ဘာဘူရာ)၊ စပိန်ဘာသာစကားတွေနဲ့ စာပေတွေ ပြသထားတယ်။ ပြခန်းမှာ ညီအစ်ကို/မ ၁၅၀ လောက် ပါဝင်ကူညီခဲ့ကြတယ်။ စိတ်ဝင်စားသူတွေကို ပုံနှိပ်စာပေ ၇၀၀ ကျော်ဝေငှခဲ့ကြပြီး အတော်များများကိုတော့ jw.org မှာ အကြောင်းအရာ အမျိုးမျိုး ရှာဖွေနိုင်ပုံကို ပြပေးခဲ့ကြတယ်။

ဆယ်ကျော်သက်ကလေးတွေရှိတဲ့ ဖခင်တစ်ယောက် ကျွန်တော်တို့ ပြခန်းကို ရောက်လာပြီး ကလေးတွေရင်ဆိုင်နေရတဲ့ အချက်အခဲတွေအတွက် စိုးရိမ်ကြောင်း ပြောပြတယ်။ ညီအစ်ကိုတွေက ကျမ်းစာအခြေခံမူတွေဟာ အမြဲအသုံးဝင်ကြောင်း၊ လူငယ်တွေရင်ဆိုင်နေရတဲ့ ပြဿနာတွေကို ဖြေရှင်းနိုင်အောင် ကူညီပေးနိုင်ကြောင်း ရှင်းပြတယ်။ လူငယ်များအမေး—တာသွားသည့်အဖြေ၊ အတွဲ ၁ နဲ့ ၂ စာအုပ်တွေကို သူလက်ခံပြီး “ဒီပြပွဲမှာ အဖိုးတန် အချက်အလက်တွေပါတဲ့ စာအုပ်တွေရမယ်လို့ မမျှော်လင့်ထားဘူး” လို့ပြောခဲ့တယ်။

ကျွန်တော်တို့ရဲ့ပြခန်းကို အမျိုးသမီးတစ်ယောက်ရောက်လာပြီး ကျမ်းစာတစ်အုပ် ရနိုင်မလားလို့ မေးတယ်။ သူက လုံခြုံရေးတင်းကြပ်တဲ့ ရပ်ကွက်မှာနေတော့ ယေဟောဝါသက်သေတွေနဲ့ တွေ့ရခဲတယ်လို့ ပြောပြတယ်။ ညီအစ်မက သူ့ကို ကျမ်းစာတစ်အုပ်ပေးပြီး အခမဲ့ကျမ်းစာသင်အံမှု အစီအစဉ်ကို ရှင်းပြတယ်။ ပြီးတဲ့နောက် သူက jw.org ကိုသုံးပြီး သူ့ဆီလည်ပတ်ဖို့ တောင်းခံတဲ့ဖောင်ကို ဖြည့်လိုက်တယ်။

ပြပွဲမှာ ပါဝင်ခဲ့တဲ့ ညီအစ်ကို ဒီယေဂို ဒီလိုပြောတယ်– “jw.org တံဆိပ်ကို လူအတော်များများ တွေ့ဖူးကြပေမဲ့ ကျွန်တော်တို့ပြောတဲ့ ကျမ်းစာသတင်းစကားကို မသိကြတဲ့သူတွေလည်း ရှိတယ်။ ကျွန်တော်တို့ရဲ့ ပြခန်းကြောင့် ကျမ်းစာဟာ ဒီနေ့ခေတ်အတွက် ဘယ်လောက်တန်ဖိုးရှိတယ်ဆိုတာကို သူတို့တွေ သိမြင်အောင် အထောက်အကူပြုမယ်လို့ ကျွန်တော် ယုံကြည်တယ်။”

အီကွေဒေါနိုင်ငံက ညီအစ်ကို/မတွေဟာ ကမ္ဘာ့ရှေးအကျဆုံးခေတ်မီစာအုပ် ကျမ်းစာမှာတွေ့ရတဲ့ “လက်တွေ့ကျဉာဏ်ပညာ” ကို တခြားသူတွေ ပိုမိုသိရှိအောင် ကူညီပေးနိုင်တဲ့အတွက် ကျွန်တော်တို့ ဝမ်းသာပါတယ်။ —ပညာအလိမ္မာ ၃:၂၁။