အီ​ဟဲဗ် စာ​မီလ်​ဟာ အသက် ၅၂ နှစ်​ရှိတဲ့ အီဂျစ်​နိုင်ငံသား တစ်ယောက်​ဖြစ်ပြီး ယေဟောဝါ​သက်သေ တစ်ယောက်လည်း ဖြစ်တယ်။ ယေဟောဝါသက်သေတွေရဲ့ ဝတ်ပြုမှု​ကို အီဂျစ်​အစိုးရက ကန့်သတ်​ထားပြီး သက်သေခံ​အများစုကို “ရာဇဝတ်မှု ကျူးလွန်​သူတွေလို” ဆက်ဆံ​ကြတယ်လို့ မစ္စတာ စာ​မီလ် ပြောတယ်။ ဝက်ဘ်ဆိုက်​မှာ အခြေအနေကို အရှိအတိုင်း ဖော်ပြတဲ့ ဆောင်းပါး​တစ်ပုဒ်​ကို သူ​ဖတ်​လိုက်ရ​တော့ တကယ်​စိတ်သက်သာမှု ရသွားတယ်။

“ဒေါက်တာ ရီ​ဟ​မ် အေ​တက်​ဖ် ရေးသားတဲ့ ယေဟောဝါသက်သေတွေ​အကြောင်း” ဆိုတဲ့ ဆောင်းပါးကို ၂၀၁၆၊ ဩဂုတ် ၁၉ မှာ ရှ​ဘက်​ဘ် မ​စ်​ဆာ ဆိုတဲ့ အီဂျစ် အွန်လိုင်း​သတင်းမှာ ဖော်ပြခဲ့တယ်။ ကိုင်​ရို​တက္ကသိုလ်က လက်ထောက် ပါမောက္ခ​လည်း​ဖြစ်၊ သတင်းထောက်​လည်း​ဖြစ်သူ ဒေါက်တာ အေ​တက်​ဖ်​က အီဂျစ်​နိုင်ငံမှာ ယေဟောဝါသက်သေတွေ​နဲ့ ပတ်သက်ပြီး အထင်လွဲ​နေတာကို ထောက်ပြခဲ့တယ်။ သူက ယေဟောဝါ​သက်သေ​တချို့​နဲ့ အကျွမ်းဝင်​ရုံ​မ​က သူတို့​အကြောင်းကို လေ့လာ​ထားတဲ့​အတွက် “ယေဟောဝါ​သက်သေတွေဟာ ကိုယ်ချင်းစာနာ​တတ်​ပြီး တခြား​သူတွေရဲ့ ယုံကြည်ချက်ကို လေးစား​မှန်း ကျွန်မ ကောင်းကောင်း​သိတယ်” လို့​ပြောတယ်။

“ယေဟောဝါသက်သေတွေ​အကြောင်း ဘာမှ​မသိတဲ့​သူတွေ၊ မဟုတ်မမှန်​တဲ့ သတင်းကို​ရပြီး ဘု​မသိ ဘ​မသိ မုန်း​နေတဲ့” သူတွေကို ဦးတည်​ရေး​တာ​လို့ ဒေါက်တာ အေ​တက်​ဖ် ဖော်ပြ​ထားတယ်။ သူ့​ဆောင်းပါး​ထဲမှာ ယေဟောဝါသက်သေတွေရဲ့ ယုံကြည်ချက်တွေကို အကျဉ်းချုပ်​ဖော်ပြ​ထားပြီး “ယေဟောဝါသက်သေတွေရဲ့ ဝက်ဘ်ဆိုက်၊ www.pr418.com မှာ အသေးစိတ် အချက်အလက်​တွေကို တွေ့နိုင်တယ်” လို့​လည်း ဖော်ပြ​ထားတယ်။

ဒေါက်တာ အေ​တက်​ဖ် က ယေဟောဝါ​သက်သေတွေကို အကဲဖြတ်​ပြီး သူသိ​ရှိလာ​တာ​တွေ​နဲ့ သက်သေခံတွေ​အပေါ် အီဂျစ်​နိုင်ငံသားတွေ ရှုမြင်ပုံဟာ တခြား​စီ​ပဲ​ဆိုတာ သတိပြုမိ​ခဲ့တယ်။ သူ ဒီလို ဖော်ပြတယ်– “သက်သေခံတွေကို ဘာကြောင့် ပိတ်ပင်​ထားသလဲဆိုတာ​ကို ကျွန်မ နားမလည်​နိုင်ဘူး။ သူတို့ဟာ နိုင်ငံရေးမှာ ကြားနေသူ​တွေ​ဖြစ်တယ်။ . . . မေတ္တာနဲ့ ငြိမ်သက်မှု တိုးပွား​စေတဲ့ သူတွေ​ပဲ။” “အဲဒီ​အကြောင်းရင်း​တွေ​ကြောင့် သူတို့ကို ပိတ်ပင်​ထားတာလား။ ဒါမှမဟုတ် သူတို့ရဲ့ ကျမ်းစာ​သွန်သင်ချက်တွေဟာ ချာ့ချ်​သွန်သင်​ပေးတာ​တွေ​နဲ့ မတူ​လို့ ပိတ်ပင်​ထားတာလား” ဆိုပြီး ဒေါက်တာ အေ​တက်​ဖ်​က သူ့​ဆောင်းပါး​မှာ ကျိုးကြောင်း​ဆင်ခြင် ပြခဲ့တယ်။

မစ္စတာ စာ​မီလ်​ဟာ ယေဟောဝါသက်သေတွေ​နဲ့ ပတ်သက်တဲ့ ဆောင်းပါးကို သဘောကျ​ပြီး အယ်ဒီတာ​ကို ဒီ​ကျေးဇူးတင်စာ ရေးပို့​ခဲ့တယ်– အီဂျစ်​နိုင်ငံရဲ့ “မီဒီယာတွေ​မှာ ယေဟောဝါသက်သေတွေ​နဲ့ ပတ်သက်တဲ့ ဆောင်းပါး အတော်များများကို ဖတ်ဖူး​ပေမဲ့ သူတို့​အကြောင်း အပြုသဘော​နဲ့​ရေး​တာ နည်းတယ်။ ဒါကြောင့် ဒေါက်တာ ရီ​ဟ​မ် အေ​တက်​ဖ်​ရဲ့ သတ္တိနဲ့ ရိုးသား​ဖြောင့်မတ်မှု​ကို ကျွန်တော် ချီးကျူး​ပါတယ်။” မစ္စတာ စာ​မီလ်​ရဲ့ စာ​ကို ၂၀၁၆၊ ဒီဇင်ဘာ ၁၁ အွန်လိုင်း​သတင်းမှာ တင်​ပေးခဲ့တယ်။

မစ္စတာ စာ​မီလ် ရေး​တဲ့​စာထဲမှာ ချာ့ချ်​တရားဟော​ဆရာတွေ မမှန်​သတင်းဖြန့်​မှု​ကြောင့် ယေဟောဝါသက်သေတွေ မတရား ဆက်ဆံ​ခံ​နေရတာ​ကို စိတ်ထိခိုက်​ကြောင်း ဖော်ပြ​ထားတယ်။ အဲဒီ မမှန်တဲ့ သတင်းတွေ​ကြောင့် သူကိုယ်တိုင် နှိပ်စက်​ခံခဲ့ရ​ကြောင်း ဖော်ပြ​ပြီးနောက် သူက “လူတစ်ယောက်​အကြောင်း သိချင်ရင် အကောင်းဆုံးနည်း​က သူနဲ့ စကားပြော​ဆို​ကြည့်တာ ဖြစ်တယ်။ ဒါကြောင့် ဒေါက်တာ ရီ​ဟ​မ် အေ​တက်​ဖ်​ရေး​တဲ့ ဆောင်းပါး​အတွက် သူ့ကို ကျွန်တော် ကျေးဇူး​တင်တယ်” လို့ ပြော​ထားတယ်။

မစ္စတာ စာ​မီလ်​က “ယေဟောဝါသက်သေတွေ​အပေါ် မတရား ပိတ်ပင်​ထားတာကို ရုပ်သိမ်း​ပေး​စေချင်တယ်။ ဒါမှ ကိုယ့်​နိုင်ငံမှာ လွတ်လွတ်လပ်လပ် ဝတ်ပြု​ကိုးကွယ်​နိုင်မှာ” ဆိုပြီး စိတ်ရင်းမှန်နဲ့ သူ့​စာ​ကို နိဂုံးချုပ်​ထားတယ်။

လွန်ခဲ့တဲ့ ဆယ်စုနှစ်တွေ​တုန်း​က အီဂျစ်​နိုင်ငံမှာ ယေဟောဝါသက်သေတွေ လွတ်လပ်​စွာ ဝတ်ပြု​ကိုးကွယ်​နိုင်ပြီး ဘာသာရေး အဖွဲ့အစည်း​တစ်ခု​အဖြစ် မှတ်ပုံတင်​နိုင်ခဲ့တယ်။ ဒါပေမဲ့ ၁၉၆၀ ပြည့်နှစ်မှာ သူတို့ရဲ့ တရားဝင်​ဖြစ်မှုကို ရုပ်သိမ်း​ခံခဲ့ရတယ်။ အဲဒီ​အချိန်​က​စပြီး အီဂျစ်​နိုင်ငံမှာ​ရှိတဲ့ တခြား​ခရစ်ယာန်​တွေ​ရတဲ့ ဘာသာရေး​နဲ့ လူ့​အခွင့်အရေးတွေ သူတို့ မရ​ကြ​တော့​ဘူး။

ဒေါက်တာ အေ​တက်​ဖ် အသိအမှတ်ပြု​သလိုပဲ အဲဒီ​အချိန်​နောက်ပိုင်း အီဂျစ်​နိုင်ငံမှာ​ရှိတဲ့ ယေဟောဝါ​သက်သေတွေဟာ ငြိမ်သက်​အေးချမ်း​တဲ့ ပြည်သူတွေ​ဖြစ်ကြောင်း၊ အခြေအနေ​တိုင်းမှာ ‘မေတ္တာနဲ့ ငြိမ်သက်မှုကို တိုးပွား​စေတဲ့ သူတွေ’ ဖြစ်ကြောင်း ဆက်တင်ပြ​ခဲ့​ကြတယ်။ တစ်နေ့ကျရင် အီဂျစ်​နိုင်ငံမှာ ယေဟောဝါ​သက်သေတွေဟာ အခြေခံ​အခွင့်အရေးတွေ ပြန်​ရပြီး ဘာသာရေး​လွတ်လပ်ခွင့် ပြန်​ခံစား​ရဖို့ မစ္စတာ စာ​မီလ်​လို​ပဲ တခြား​သူတွေလည်း စောင့်မျှော်နေ​ကြပါတယ်။