ရောမ။ အီတလီ​နိုင်ငံ၊ စစ်​စ​လီ​ကျွန်း၊ မီ​နေ​ယို​မြို့ (ကာ​ရာ ဒီ မီ​နေ​ယို) ဒုက္ခသည်​စခန်း​ဟာ ဥရောပ​ရဲ့ အကြီးဆုံး ဒုက္ခသည်​စခန်း ဖြစ်တယ်။ အီရီ​ထ​ရီး​ယား၊ နိုင်ဂျီးရီးယား၊ ဆို​မာလီ​ယာ၊ ဆီးရီးယား စတဲ့ နိုင်ငံ ၄၀ ကျော်​က လူထောင်ပေါင်း​များစွာ နိုင်ငံရေး​ခိုလှုံ​ခွင့် ရဖို့ ထွက်ပြေး​လာ​ခဲ့​ကြတယ်။

လွန်ခဲ့တဲ့ ငါးနှစ်​အတွင်း ယေဟောဝါသက်သေတွေ​က ကြိုဆို​ရေး​စခန်း​ကို လည်ပတ်​ပြီး (အထက်ပါ​ပုံ) စိတ်ဝင်စားသူ​တိုင်း​ကို ကျမ်းစာ​အကြောင်း အခမဲ့ သင်ပေး​ကြတယ်။ ကာ​ရာ ဒီ မီ​နေ​ယို အုပ်ချုပ်ရေး​ရုံး​နဲ့ ပူးပေါင်း​ဆောင်ရွက်မှု​ကြောင့် ယေဟောဝါသက်သေများရဲ့ ဝတ်ပြု​အစည်းအဝေးကို တက်ရောက်​လို​သူ ဒုက္ခသည်​တွေ​အတွက် ကြို​ပို့​ယာဉ် ၅၀ စီစဉ်​နိုင်ခဲ့ကြ​တယ်။ လူများစွာဟာ နိုင်ငံတော်​ခန်းမ​လို့​ခေါ်တဲ့ ဝတ်ပြုရာ​နေရာတွေကို အပတ်​တိုင်း သွားရောက်​နိုင်ကြပြီ။ ကာ​ရာ ဒီ မီ​နေ​ယို​စခန်း​က ဒုတိယ ဒါရိုက်တာ မ​စ္စ အီဗာ​နာ ဂါ​လ​န်​တီ​က ယေဟောဝါသက်သေတွေ​နဲ့​အတူ လုပ်ဆောင်​ရတဲ့ အတွေ့အကြုံကို ဒီလို​ပြောပြတယ်– “ဧည့်သည်တွေ​အတွက် သူတို့ လုပ်ဆောင်​ပေးခဲ့တာ​တွေ၊ ဆက်လုပ်​ဆောင်​နေတာတွေကို ကျွန်မ အသိအမှတ်​ပြုတယ်၊ လေးစားတယ်လို့ ပြော​ချင်​ပါတယ်။ ကိုယ်​အကျွမ်း​မဝင်​တဲ့​နေရာ​ဒေသ​ကို ရောက်နေတဲ့ ဒုက္ခသည်​တွေဟာ [ယေဟောဝါသက်သေတွေရဲ့] ကြိုဆိုမှု ခံရလို့ ဝမ်းနည်း​စိတ်​တွေ ပျောက်​ပြီး စိတ်ပျက်​စ​ရာ အခြေအနေတွေကို မေ့ထား​နိုင်ကြတယ်​လို့ ကျွန်မ ယူဆ​ပါတယ်။”

၂၀၁၁ ခုနှစ်မှာ စခန်း​ကို ရောက်လာတဲ့ နိုင်ဂျီးရီးယား​လူမျိုး ဟ​မ်ဖ​ရီ အို​ဆီ​ဂီ​ဒီ​ဟာ ယေဟောဝါသက်သေတွေ​နဲ့ ကျမ်းစာ စ​လေ့လာပြီး ၂၀၁၄ နိုဝင်ဘာလ​မှာ နှစ်ခြင်းခံခဲ့တယ်။ သူ ဒီလို​ပြောပြတယ်– “ကျမ်းစာက ကျွန်တော့်​ဘဝကို တကယ်ပဲ ပြောင်းလဲ​စေတယ်။ ကျွန်တော် မူးယစ်​ဆေး ဖြတ်လိုက်​ပြီ။ လိင်​အကျင့်​ယိုယွင်းတာကို​လည်း ဖြတ်​နိုင်ပြီ။ စခန်း​ကို ရောက်လာတဲ့​အခါ ယေဟောဝါသက်သေတွေ​က ကျွန်တော် လိုအပ်တာတွေကို ကူညီပေး​ကြတယ်။ ဘုရားနဲ့ ရင်းနှီး​လာအောင်​လည်း ကူညီပေး​ကြတယ်။ ယေဟောဝါသက်သေတွေရဲ့ ဝတ်ပြုရာ​အစည်းအဝေးတွေ တက်​နိုင်အောင် ကြို​ပို့​ယာဉ် စီစဉ်​ပေးတဲ့ စခန်း​က တာဝန်​ရှိသူတွေကို​လည်း ကျေးဇူးတင်ကြောင်း ပြော​ချင်​ပါတယ်။” အခု မစ္စတာ အို​ဆီ​ဂီ​ဒီ​ဟာ အီတလီ​နိုင်ငံ၊ ပါ​လဲ​မို​မြို့မှာ နေထိုင်ပြီး အလုပ်လုပ်​နေပါ​ပြီ။ သူ့ကို ကူညီ​ပေးခဲ့တဲ့ ကျမ်းစာ​သတင်းစကားကို ဒုက္ခသည်​တွေ အပါအဝင် တခြား​သူတွေကို ဝေမျှ​နေပါ​ပြီ။

အီတလီ​နိုင်ငံက ယေဟောဝါသက်သေများရဲ့ ပြောရေးဆိုခွင့်​ရှိသူ ခရစ်ရှန် ဒီ ဘ​လာ​ဆီ​ယို ဒီလို​ပြောတယ်– “ကျွန်တော်တို့ရဲ့ အဓိက​အလုပ်​က သမ္မာကျမ်းစာ သွန်သင်ပေး​ချက်​တွေကို လူတွေ နားလည်​သဘောပေါက်​လာအောင် ကူညီပေး​ဖို့​ပါ။ ကာ​ရာ​စခန်း​က တာဝန်​ရှိသူတွေနဲ့ ပူးပေါင်း​လုပ်ဆောင်မှု​ကြောင့် ဒုက္ခသည်​များစွာဟာ ကျမ်းစာ​ပညာပေး​အစီအစဉ်​ကနေ အကျိုး​ခံစားခဲ့​ကြတယ်။ ဒီ​ပညာပေး​အစီအစဉ်​ကြောင့် လူများစွာဟာ စိတ်ပိုင်း၊ ဘုရားရေးရာ​ပိုင်း အကူအညီ​တွေ ရရှိ​ကြတယ်။”

Media Contacts:

International: David A. Semonian, Office of Public Information, +1-845-524-3000

Italy: Christian Di Blasio, +39-06-872941