“မှောင်မိုက်တဲ့ ချိုင့်ဝှမ်းထဲ လျှောက်ရပေမဲ့ ကိုယ်တော် ရှိနေလို့ ဘာအန္တရာယ်မှ မကြောက်ဘူး။ နှင်တံနဲ့ တောင်ဝှေးတော်ကြောင့် ကျွန်တော် စိတ်အေးလက်အေး ဖြစ်နေတယ်။”—ဆာလံ ၂၃:၄၊ ကမ္ဘာသစ် ဘာသာပြန်ကျမ်း။

 “သေမင်း၏ အရိပ် လွှမ်းမိုးသော ချိုင့်ထဲသို့ လျှောက်သွားရသော်လည်း ဘေးအန္တရာယ်ကို မကြောက်ပါ။ အကြောင်းမူကား ကိုယ်တော်သည် အကျွန်ုပ်နှင့်အတူ ရှိတော်မူသည် ဖြစ်၍ လှံတံတော်နှင့် တောင်ဝှေးတော်သည် အကျွန်ုပ်ကို ချမ်းသာစေပါ၏။”—ဆာလံ ၂၃:၄၊ ယုဒသန်ကျမ်း။

 ဘုရားသခင်က မိမိကို ဝတ်ပြုသူတွေ၊ ခက်ခဲတဲ့ အခြေအနေ ခံရပ်နေရသူတွေကို ကာကွယ် စောင့်ရှောက်ပေးတယ်။ ဒီကျမ်းပိုဒ်မှာ မိမိလူတွေကို ဘုရားသခင် စောင့်ရှောက်ပေးပုံကို သိုးထိန်းတစ်ဦး မိမိသိုးကို စောင့်ရှောက်ပေးပုံနဲ့ တင်စားထားတယ်။ b မှောင်မိုက်တဲ့ ချိုင့်ဝှမ်း ဒါမှမဟုတ် အသက်ဘေးအဖြစ် ဖော်ပြထားတဲ့ ကြောက်စရာ အခြေအနေမျိုး ရင်ဆိုင်ရတဲ့အခါ ကူကယ်ရာ မဲ့နေတယ်လို့ သူတို့ မခံစားကြဘူး။ ဘုရားသခင် အတူရှိနေတဲ့အတွက် ဘေးကင်းလုံခြုံတယ်လို့ ခံစားရကြတယ်။

 ကျမ်းစာခေတ်တုန်းက သိုးထိန်းဟာ နှင်တံ ဒါမှမဟုတ် တုတ်ကို သုံးပြီး သိုးတွေကို သားရဲရန်ကနေ ကာကွယ်ပေးတတ်တယ်။ ထိပ်မှာ အကောက်ပါတဲ့ တောင်ဝှေးနဲ့လည်း သိုးတွေကို လမ်းပြတယ်၊ အန္တရာယ်တောကနေ ဆွဲယူလေ့ရှိတယ်။ ယေဟောဝါဘုရားက မေတ္တာရှိတဲ့ သိုးထိန်းလိုပဲ မိမိကို ဝတ်ပြုကိုးကွယ်သူတွေကို ကာကွယ် လမ်းပြပေးတယ်။ ဘဝဒုက္ခကြုံရချိန်၊ အမှောင်မိုက်ဆုံးအချိန်မှာတောင် နည်းအမျိုးမျိုးနဲ့ ဂရုစိုက်ပေးတယ်။

•   သမ္မာကျမ်းစာအားဖြင့် လမ်းညွှန်ပေးတယ်။ နှစ်သိမ့်ပေးတယ်။—ရောမ ၁၅:၄။

•   ဆုတောင်းချက်တွေကို နားထောင်တယ်။ စိတ်ငြိမ်သက်မှု ပေးတယ်။—ဖိလိပ္ပိ ၄:၆၊ ၇။

•   ဝတ်ပြုသူချင်းတွေကို သုံးပြီး အားပေးထောက်မတယ်။—ဟီဘရူး ၁၀:၂၄၊ ၂၅။

•   လက်ရှိ ခံစားနေရတဲ့ ဒုက္ခတွေကို ဖယ်ရှားပေးတော့မှာ ဖြစ်လို့ အနာဂတ် မျှော်လင့်ချက် ရှိစေတယ်။—ဆာလံ ၃၇:၂၉။ ဗျာဒိတ် ၂၁:၃-၅။

 သိုးထိန်းဘဝကနေ ရှေးခေတ် အစ္စရေးဘုရင် ဖြစ်လာတဲ့ ဒါဝိဒ်က ဆာလံ ၂၃ ကို ရေးသားခဲ့တာပါ။ (၁ ရှမွေလ ၁၇:၃၄၊ ၃၅။ ၂ ရှမွေလ ၇:၈) ယေဟောဝါဟာ မိမိလူတွေကို ဦးဆောင်တဲ့၊ ကျွေးမွေးတဲ့၊ လန်းဆန်းစေတဲ့ သိုးထိန်း ဖြစ်တယ်ဆိုတဲ့ ပုံဖော်ချက်နဲ့ ဒီဆာလံကို အစချီထားတယ်။—ဆာလံ ၂၃:၁-၃။

 ဆာလံ ၂၃ မှာ ဒါဝိဒ်က ဘုရားသခင်ရဲ့ ကာကွယ်ပေးမှုအကြောင်း ပြောတဲ့အခါ ဘုရားနဲ့ နှစ်ကိုယ်ကြား စကားပြောနေသလိုမျိုး “ကိုယ်တော်” ဆိုတဲ့ နာမ်စားကို သုံးထားတယ်။ ဒါက ဒါဝိဒ်ဟာ ယေဟောဝါနဲ့ ရင်းနှီးတဲ့ ဆက်ဆံရေး ရှိကြောင်း ဖော်ပြတယ်။ ဒါဝိဒ်က မိမိ ခံစားနေရတဲ့ ဒုက္ခကို ဘုရား သိတယ်၊ စောင့်ရှောက်ပေးတယ်ဆိုတာ စိတ်ချတယ်။ ဒါကြောင့် ဘာအန္တရာယ်ပဲ လာလာ သူ မကြောက်ဘူး။

 ဆာလံ ၂၃၊ အခန်းငယ် ၅ နဲ့ ၆ မှာ သိုးထိန်းနဲ့ သိုး တင်စားချက်ကနေ အိမ်ရှင်နဲ့ ဧည့်သည် တင်စားချက်ဆီ ပြောင်းသွားတယ်။ ရက်ရောလှတဲ့ အိမ်ရှင်လိုပဲ ယေဟောဝါက ဒါဝိဒ်ကို ဂုဏ်အသရေရှိ ဧည့်သည်လို ဆက်ဆံတယ်။ ဘုရားရဲ့ စောင့်ရှောက်မှုကို ဒါဝိဒ်ရဲ့ ရန်သူတွေ မတားဆီးနိုင်ခဲ့ဘူး။ ဆာလံ ၂၃ ရဲ့ အဆုံးမှာ ဘုရားသခင်ရဲ့ ကောင်းမြတ်ခြင်း ကျေးဇူးနဲ့ မေတ္တာကို အသက်ထက်ဆုံး ခံစားရမယ်ဆိုတာ ယုံကြည်ကြောင်း ဒါဝိဒ် ဖော်ပြတယ်။

 ဆာလံ ၂၃ မှာ ပါတဲ့ ဥပစာစကားတွေက ဘုရားသခင်ဟာ မိမိကို ဝတ်ပြုကိုးကွယ်သူတွေကို မေတ္တာပါပါ စောင့်ရှောက်ပေးနေတယ်ဆိုတာ ဖော်ပြတယ်။—၁ ပေတရု ၂:၂၅။