“အညံ့ခံကြ။ ငါဟာ ဘုရားသခင်ပဲ ဆိုတာကို သိမှတ်ကြ။ လူမျိုးတွေအလယ်မှာ ငါ့ကို ချီးမြှောက်ကြလိမ့်မယ်။ ကမ္ဘာမြေပေါ်မှာ ချီးမြှောက်ကြလိမ့်မယ်။”—ဆာလံ ၄၆:၁၀၊ ကမ္ဘာသစ်ဘာသာပြန်ကျမ်း။

 “ငြိမ်ဝပ်လျက်နေကြလော့။ ငါကား ဘုရားသခင် ဖြစ်သည်ဟု သိမှတ်ကြလော့။ လူမျိုးတို့တွင် ငါသည် ဘုန်းပွင့်မည်။ မြေကြီးပေါ်မှာ ဘုန်းပွင့်မည်။”—ဆာလံ ၄၆:၁၀၊ ယုဒသန်ကျမ်း။

 ဘုရားသခင်က မိမိကို ဝတ်ပြုကိုးကွယ်ဖို့၊ မိမိသာလျှင် မြေကြီးကို အုပ်စိုးပိုင်ထိုက်ကြောင်း အသိအမှတ်ပြုဖို့ လူတိုင်းကို တိုက်တွန်းတယ်။ ဘုရားသခင်ရဲ့ တန်ခိုးတော်နဲ့ အုပ်စိုးပိုင်ခွင့်ကို ငြင်းလို့ မရဘူး၊ ထာဝစဉ် အသက်ရှင်ချင်သူတိုင်း အဲဒီအခွင့်အာဏာကို အသိအမှတ်ပြုကြရမယ်။—ဗျာဒိတ် ၄:၁၁။

 “အညံ့ခံကြ။ ငါဟာ ဘုရားသခင်ပဲ ဆိုတာကို သိမှတ်ကြ။” ဘာသာပြန်ကျမ်းတချို့က ဒီကျမ်းချက်အစပိုင်းကို “ငြိမ်ဝပ်လျက်နေကြလော့” လို့ ပြန်ဆိုထားတယ်။ ဒါက ဘုရားကျောင်းမှာ ကြည်ညိုလေးစားစိတ်နဲ့ နှုတ်ဆိတ်နေရမယ်ဆိုပြီး နားလည်မှု လွဲစေတယ်။ တကယ်တော့ “အညံ့ခံကြ။ ငါဟာ ဘုရားသခင်ပဲ ဆိုတာကို သိမှတ်ကြ” လို့ ပြန်ဆိုထားတဲ့ ဟီဘရူးစကားစုက လူအားလုံးအတွက် ယေဟောဝါ a ဘုရားရဲ့ တိုက်တွန်းချက်၊ ဘုရားကို ဆန့်ကျင်နေမယ့်အစား ဘုရားကိုသာ ကိုးကွယ်ဝတ်ပြုထိုက်ကြောင်း အသိအမှတ်ပြုခိုင်းနေတာပါ။

 ဆာလံ အခန်းကြီး ၂ မှာလည်း အလားတူ နှိုးဆော်ထားတယ်။ ဆန့်ကျင်သူတွေကို အရေးယူမယ်လို့ ဘုရား ကတိပေးထားတယ်။ ဘုရားသခင်ရဲ့ အခွင့်အာဏာကို အသိအမှတ်ပြုသူတွေကတော့ ဘုရားသခင်ဆီက လမ်းပြမှု၊ ခွန်အား၊ ဉာဏ်ပညာကိုပဲ အားထားကြတယ်။ အထူးသဖြင့် အခက်အခဲ ကြုံတဲ့အခါ “ဘုရားဆီမှာ ခိုလှုံ” တဲ့အတွက် ပျော်ရွှင်ဝမ်းမြောက်ပြီး ဘေးကင်းလုံခြုံကြတယ်။—ဆာလံ ၂:၉-၁၂။

 “လူမျိုးတွေအလယ်မှာ ငါ့ကို ချီးမြှောက်ကြလိမ့်မယ်။ ကမ္ဘာမြေပေါ်မှာ ချီးမြှောက်ကြလိမ့်မယ်။” ရှေးအချိန်က ယေဟောဝါဘုရားသခင်ဟာ အစွမ်းတန်ခိုး သုံးပြီး မိမိလူမျိုးကို ကာကွယ်တဲ့အခါ ချီးမြှောက်ခံခဲ့ရတယ်။ (ထွက်မြောက်ရာ ၁၅:၁-၃) မကြာခင် ကမ္ဘာပေါ်ရှိ လူတိုင်း ဘုရားသခင်ရဲ့ အခွင့်အာဏာကို လက်အောက်ခံပြီး ဘုရားကိုပဲ ဝတ်ပြုကိုးကွယ်ကြတဲ့အခါ ကမ္ဘာမြေတစ်ခွင် ချီးမြှောက်ခံရလိမ့်မယ်။—ဆာလံ ၈၆:၉၊ ၁၀။ ဟေရှာယ ၂:၁၁။

 ဆာလံ ၄၆ ဟာ “လူမျိုးတော်ကို ကာကွယ်ပေးတဲ့ ဘုရားသခင်ရဲ့ တန်ခိုးတော်ကို ချီးမွမ်းတဲ့သီချင်း” ဖြစ်တယ်လို့ စာအုပ်တစ်အုပ်က ဆိုတယ်။ ဆာလံ ၄၆ ကို သီဆိုကြတဲ့အခါ လူမျိုးတော်ကို ယေဟောဝါ ကာကွယ်ပေးမယ်၊ ကူညီမယ်ဆိုတာ ယုံကြည်စိတ်ချကြောင်း ချီးမွမ်းနေတာ ဖြစ်တယ်။ (ဆာလံ ၄၆:၁၊ ၂) မိမိတို့နဲ့အတူ ယေဟောဝါ အမြဲ ရှိနေကြောင်း အမှတ်ရစေတဲ့ စကားတွေပါ။—ဆာလံ ၄၆:၇၊ ၁၁။

 ယေဟောဝါဘုရားရဲ့ ကာကွယ်ပေးနိုင်စွမ်းကို ပိုယုံကြည်ကိုးစားနိုင်ဖို့၊ ဘုရားရဲ့ အံ့မခန်းဖွယ် လုပ်ရပ်တွေကို ပြန်သတိရဖို့ ဆာလံဆရာ ဖိတ်ခေါ်နေတာပါ။ (ဆာလံ ၄၆:၈) စစ်ပွဲကို အဆုံးတိုင်စေမယ့်အကြောင်း အထူးသတိပြုစေတယ်။ (ဆာလံ ၄၆:၉) ကျမ်းရေးချိန်က ဘုရားလူမျိုးကို ရန်သူတွေလက်ကနေ ကာကွယ်ပေးခြင်းအားဖြင့် ယေဟောဝါဟာ စစ်ပွဲကို အဆုံးတိုင်စေခဲ့တယ်။ ဒါပေမဲ့ ကမ္ဘာချီ စစ်ပွဲကို အဆုံးတိုင်စေတဲ့အခါ အဲဒီကတိ အကြီးစား ပြည့်စုံလာပါလိမ့်မယ်။—ဟေရှာယ ၂:၄။

 အခုအချိန်မှာ ယေဟောဝါဘုရားဟာ မိမိလူမျိုးကို ကူညီပေးနေပါသလား။ ကူညီနေပါတယ်။ တမန်တော် ပေါလုက ကူညီမစရှင် ယေဟောဝါကို အားထားဖို့ ခရစ်ယာန်တွေကို အခိုင်အမာ တိုက်တွန်းတယ်။ (ဟီဘရူး ၁၃:၆) ဆာလံ ၄၆ မှာ ပါတဲ့ စကားတွေက ဘုရားသခင်ရဲ့ ကာကွယ်ပေးနိုင်စွမ်းကို ယုံကြည်စိတ်ချစေတယ်။ ဘုရားသခင်ကို ကျွန်တော်တို့ရဲ့ ‘ခိုလှုံရာ၊ အစွမ်းခွန်အား’ အဖြစ် ရှုမြင်ဖို့ ကူညီပေးတယ်။—ဆာလံ ၄၆:၁။

 ဆာလံကျမ်း ခြုံငုံသုံးသပ်ချက်ကို သိဖို့ ဒီဗီဒီယိုအတိုကို ကြည့်ပါ။