•   ဘာကြောင့်ဖြစ်ရတာလဲ

•  သင်လုပ်နိုင်တဲ့ အချက် သုံးချက်

•  ရွယ်တူချင်းတွေ ပြောဆိုရာ

 ကြီးကောင်ဝင်ချိန်၊ လူပျို၊ အပျိုပေါက် ဖြစ်လာချိန်မှာ စိတ်ခံစားမှု တက်လိုက် ကျလိုက်ဖြစ်တာက သဘာဝပါ။ သင် ဆယ်ကျော်သက်အရွယ်ကို ဖြတ်သန်းနေချိန်မှာ အဆင်ပြေနေတယ်ဆိုရင်တောင် သင့်ရဲ့ စိတ်ခံစားချက်က အပြောင်းအလဲမြန်ပြီး ခန့်မှန်းရခက်တာကို တွေ့ရလို့ အံ့သြမိပါလိမ့်မယ်။

 သင့်ရဲ့ စိတ်ခံစားချက် အပြောင်းအလဲကြောင့် စိတ်ရှုပ်နေသလား၊ အဲဒီခံစားချက်တွေက မလုံခြုံမှုနဲ့ မသေချာ မရေရာမှုတွေကြောင့် ဖြစ်သလို ခန္ဓာကိုယ် ကြီးထွားလာချိန်မှာ ဖြစ်လေ့ရှိတဲ့ ဟော်မုန်းအပြောင်းအလဲတွေကြောင့် ဖြစ်တတ်တယ်ဆိုတာကို သတိရပါ။ ဒါပေမဲ့ စိတ်ခံစားချက် အပြောင်းအလဲ ဖြစ်ရတဲ့ အကြောင်းရင်းတွေကို နားလည်ပြီး ရင်ဆိုင်ဖြေရှင်းနိုင်ပါတယ်။

 သိထားသင့်ရာ– လူငယ်ဘဝမှာ ကိုယ့်ရဲ့စိတ်ခံစားချက်ကို ထိန်းချုပ်တတ်အောင် သင်ယူဖို့ အရေးကြီးတယ်။ ဘာကြောင့်လဲဆိုရင် လူကြီးဖြစ်လာတဲ့တစ်နေ့ အခြေအနေအမျိုးမျိုးကို ရင်ဆိုင်ရတဲ့အခါ ဒီအရည်အချင်း လိုအပ်လို့ ဖြစ်တယ်။

 ပြောပါ။ သမ္မာကျမ်းစာမှာ “မိတ်ဆွေစစ်ဆိုတာ အချိန်အခါမရွေး မေတ္တာပြတတ်တယ်။ သူဟာ ဒုက္ခရောက်ချိန်မှာ အားကိုးရတဲ့ ညီအစ်ကိုပဲ” လို့ ပြောထားတယ်။​—သုတ္တံ ၁၇:၁၇။

 “အန်တီတစ်ယောက်လို ရင်းနှီးတဲ့ မိတ်ဆွေတစ်ယောက် ရှိတယ်။ သူက ကျွန်မ ပြောတာတွေကို ဂရုတစိုက်နဲ့ နားထောင်ပေးတယ်။ ဒါကြောင့် ကျွန်မရဲ့ ခံစားချက်တွေအားလုံး ရင်ဖွင့်ပြောပြတယ်။ ကျွန်မရဲ့ ရှုမြင်ပုံတွေက မှန်နေတယ်ဆိုရင် သူက ဂုဏ်ယူအားပေးသလို ကျွန်မ မှားတဲ့အခါမှာလည်း အကောင်းဆုံး ဖြစ်အောင် ပြန်တည့်မတ်ပေးတတ်တယ်။”​—ယိုလန်ဒါ။

 အကြံပြုချက်– သင့်လိုပဲ စိတ်ခံစားချက် အတက်အကျ ဖြစ်နေတဲ့ ရွယ်တူချင်းတွေကိုပဲ ပြောပြမယ့်အစား မိဘတစ်ဦးဦးကို ဒါမှမဟုတ် ယုံကြည်စိတ်ချရတဲ့ လူကြီးတစ်ယောက်ကို ပြောပြပါ။

 စာရေးပါ။ စိတ်ပျက်လက်ပျက် ဖြစ်နေတဲ့ ယောဘက “မကျေနပ်ချက်တွေကို ဖွင့်ချလိုက်တော့မယ်။ ခါးသီးနာကြည်းစိတ်နဲ့ ပြောတော့မယ်” လို့ သမ္မာကျမ်းစာထဲမှာ ဖော်ပြထားတယ်။ (ယောဘ ၁၀:၁) ဒါကြောင့် တစ်ယောက်ယောက်ကို ဖွင့်ပြောတာအပြင် စာနဲ့ ရေးပြီးတော့လည်း ကိုယ့်ရဲ့ စိတ်ခံစားချက်တွေကို “ဖွင့်ချ” နိုင်ပါတယ်။

 “ကျွန်မ သွားတဲ့နေရာတိုင်း မှတ်စုစာအုပ်လေး ယူသွားတယ်။ ကိုယ့်အတွက် စိတ်အနှောင့်အယှက် ဖြစ်တာမျိုး ကြုံရရင် အဲဒါကို ရေးထားလိုက်တယ်။ စာနဲ့ ရေးထားလိုက်တာက စိတ်သက်သာမှု ရစေတဲ့ ဆေးတစ်ခွက်ပဲ။”​—အီလီယန်နာ။

 အကြံပြုချက်– ကိုယ့်ရဲ့ စိတ်ခံစားချက်ကို ချရေးနိုင်ဖို့ စာအုပ်တစ်အုပ် ဆောင်ထားပါ။ ဘာကြောင့် အဲဒီလိုဖြစ်ရတာလဲ၊ အဲဒါကို ဘယ်လို ဖြေရှင်းမလဲ ဆိုတာတွေကို ချရေးပါ။ အဲဒီလိုလုပ်နိုင်ဖို့ ဒီဆောင်းပါးနဲ့ အတူပါတဲ့ လေ့ကျင့်ခန်းစာရွက်က ကူညီပေးပါလိမ့်မယ်။

 ဆုတောင်းပါ။ သမ္မာကျမ်းစာမှာ “ထမ်းထားရတဲ့ဝန်ကို ယေဟောဝါဆီ ပုံအပ်လိုက်ပါ။ကိုယ်တော် ဖေးမလိမ့်မယ်။ ဖြောင့်မတ်သူကို ဘယ်တော့မှ လဲကျခွင့်ပြုမှာ မဟုတ်ဘူး” လို့ ပြောထားတယ်။​—ဆာလံ ၅၅:၂၂။

 “စိတ်ဓာတ်ကျတဲ့အခါတိုင်း ယေဟောဝါဆီ မပြတ် ဆုတောင်းတယ်။ ကိုယ့်ခံစားချက်တွေကို ကိုယ်တော့်ဆီ ဖွင့်ပြောလိုက်တဲ့အခါ ရင်ထဲပေါ့သွားတယ်။”​—ဂျက်စမင်။

 အကြံပြုချက်– စိုးရိမ်ပူပန်စရာတွေကြားက ဘုရားကို ကျေးဇူးတင်စရာ သုံးခုကို ပြန်စဉ်းစားကြည့်ပါ။ ယေဟောဝါဘုရားဆီ ဆုတောင်းတဲ့အခါ အကူအညီ တောင်းခံပါ။ ဒါ့အပြင် သင်ရရှိခဲ့တဲ့ ဆုကျေးဇူးတွေအတွက် ကျေးဇူးတင်ကြောင်း ပြောပါ။