သူငယ်ချင်းတစ်ယောက် စကားပြောချင်တဲ့အခါ သင် နားထောင်ပေးချင်တယ်။ ဒါနဲ့ အခုတလော သူငယ်ချင်းတစ်ယောက်နဲ့ စကားအကြာကြီး ပြောဖြစ်တယ်။ ပြဿနာက အဲဒီသူငယ်ချင်းဟာ လိင်ခြားသူ ဖြစ်နေတာပဲ။ ‘ငါတို့က သူငယ်ချင်းတွေပါ’ လို့ သင်တွေးမိနိုင်တယ်။ သူလည်း အဲဒီလိုပဲ ယူဆမှာပါလို့ သင်ထင်နေတယ်။ ဒါနဲ့ပတ်သက်ပြီး သတိထားဖို့လိုသလား။

•  ဘာဖြစ်နိုင်သလဲ

•  ဘာကြောင့်အရေးကြီးတာလဲ

•  လုပ်ဆောင်နိုင်ရာ

•  အကြံပြုချက်များ

 လိင်ခြားသူတွေနဲ့ သူငယ်ချင်းဖြစ်တာ မမှားပါဘူး။ ဒါပေမဲ့ တစ်ယောက်သောသူကို တခြားသူတွေထက်ပိုပြီး ခင်နေတယ်ဆိုရင်ကော။ အဲဒီလိုဖြစ်နေရင်တော့ သင့်ဘက်က သူငယ်ချင်းအဆင့်ထက် ပိုချင်နေပြီလို့ သူကောက်ချက်ချသွားနိုင်တယ်။

 ဒါဟာ သင်ရည်ရွယ်သလို ဟုတ်ရဲ့လား။ မရည်ရွယ်ဘဲနဲ့ ဖြစ်သွားနိုင်ချေရှိတဲ့ အရာတချို့ကို သုံးသပ်ကြည့်ပါ။

•   တစ်ယောက်သောသူကို သင် သိပ်အရေးပေးမိတယ်။

   “သူတစ်ပါးရဲ့ ခံစားချက်တွေကို သင်မထိန်းချုပ်နိုင်ဘူးဆိုတာ မှန်ပါတယ်။ ဒါပေမဲ့ သင်က ငါတို့ သူငယ်ချင်းတွေပါလို့ ပြောပြီး အချိန်တိုင်း ဖုန်းဆက်၊ စကားပြောနေမယ်ဆိုရင်တော့ မီးကို လောင်စာဖြည့်ပေးသလို ဖြစ်တာမို့ မလုပ်သင့်ဘူး။”​—စေရာ။

•   တစ်ယောက်သောသူပို့တဲ့ မက်ဆေ့ချ်ကို သင် အမြဲစာပြန်တယ်။

   “ကျွန်တော့်ဘက်က စပြီး မက်ဆေ့ချ်ပို့တာ မဟုတ်ပေမဲ့ ကောင်မလေးတစ်ယောက် ပို့တဲ့ မက်ဆေ့ချ် အတော်များများကို အမြဲ ပြန်ပို့ဖြစ်တယ်။ နောက်ပိုင်းကျတော့ သူ့ကို သူငယ်ချင်းတစ်ယောက်ထက် မပိုပါဘူးဆိုတာကို ရှင်းပြဖို့ တော်တော် ခက်သွားတယ်။”​—ရစ်ချတ်။

•   တစ်ယောက်သောသူရဲ့ စိတ်ဝင်စားမှုရအောင် သင်လုပ်မိတယ်။

   ‘တချို့က အီစီကလီလုပ်တာကို ကစားပွဲတစ်ခုလို့ ထင်ကြတယ်။ ခပ်ပေါ့ပေါ့ သဘောထားပြီး သူတစ်ပါးရဲ့ ခံစားချက်ကို ကစားကြတယ်။ ဒါမျိုး ခဏခဏတွေ့ဖူးတယ်။ တစ်ဖက်သားက အမြဲနာကျင်ရတာပဲ။”​—တာမရာ။

 အဓိကအချက်– တစ်ချိန်လုံး ဆက်သွယ်နေတာ၊ သိပ်အရေးပေးလွန်းတာဟာ သင့်ဘက်က သူငယ်ချင်းတစ်ယောက်ထက် ပိုနေပြီဆိုတဲ့ လက္ခာဏာတွေ ပြနေတာပါပဲ။

•   တစ်ဖက်သားကို ထိခိုက်နာကျင်စေလို့ပါ။

   သမ္မာကျမ်းစာပြောဆိုရာ– “မျှော်လင့်သောအရာသည် ဖင့်နွှဲလျှင် စိတ်နှလုံးကို ပူပန်စေတတ်၏။” (သုတ္တံ ၁၃:၁၂) တစ်ယောက်ယောက်က သူငယ်ချင်းထက်ပိုတဲ့ လက္ခဏာတွေ သင့်ကိုအမြဲပြနေတယ်ဆိုရင် သင့်ဘက်က ဘာကို မျှော်လင့်မိနိုင်သလဲ။

   “‘ကြိုးရှည်ရှည်နဲ့ လှန်ထားတယ်’ ဆိုတဲ့စကား ရှိတယ်။ တစ်ဖက်သားကို လွှတ်လည်းမလွှတ်ပေး၊ ဆွဲလည်းမဆွဲသေးဘဲ ဆန့်တငန့်ငန့် ဖြစ်အောင် လုပ်ထားတဲ့ သဘောပေါ့။ လူနှစ်ဦးရဲ့ ဆက်ဆံရေးမှာလည်း အလားတူ ဖြစ်နိုင်တယ်။ တစ်ဖက်သားနဲ့ ရည်းစား မဖြစ်ချင်ပေမဲ့ သူ့ကို ကြိုးရှည်ရှည်နဲ့ လှန်ထားမယ်ဆိုရင် သူ့ကို ထိခိုက်နာကျင်စေနိုင်တယ်။”​—ဂျက်စီကာ။

•   သင့်ကို နာမည်ပျက်စေနိုင်လို့ပါ။

   သမ္မာကျမ်းစာပြောဆိုရာ– “ကိုယ့်အရေးကိစ္စကိုသာ အာရုံမစိုက်ဘဲ သူတစ်ပါး၏ အရေးကိစ္စကိုလည်း အာရုံစိုက်ကြလော့။” (ဖိလိပ္ပိ ၂:၄) ကိုယ့်အကျိုးပဲ ကြည့်တတ်တဲ့ လူစားမျိုးကို သင်ဘယ်လို သတ်မှတ်မလဲ။ အဲဒီအကျင့်က သူ့ကို ဘယ်လို နာမည်ပျက်စေနိုင်သလဲ။

   “ကောင်မလေးတွေနဲ့ အီစီကလီလုပ်တတ်တဲ့ ကောင်လေးတွေကို ကျွန်မ လုံးဝမကြိုက်ဘူး။ အီစီကလီ လုပ်တတ်တဲ့ အကျင့်ဟာ အိမ်ထောင်ပြုပြီးနောက် သစ္စာဖောက်သွားနိုင်တယ်ဆိုတဲ့ နိမိတ်ပဲ။ ပြီးတော့ တစ်ဖက်သားကို အသုံးချပြီး ကိုယ့်ကိုယ်ကိုယ် အဟုတ်ကြီးထင်အောင် လုပ်တာဖြစ်လို့ တစ်ကိုယ်ကောင်းသိပ်ဆန်တယ်။”​—ဂျူလီယာ။

 အဓိကအချက်– ရည်းစားဖြစ်ဖို့ မရည်ရွယ်ဘဲနဲ့ သူငယ်ချင်းအဆင့်ထက်ပိုတဲ့ လက္ခဏာတွေ ပြနေတဲ့သူဟာ တစ်ဖက်သားကို ထိခိုက်နာကျင်စေနိုင်သလို ကိုယ်တိုင်လည်း နစ်နာတယ်။

•   သမ္မာကျမ်းစာက “ငယ်ရွယ်သောသူတို့ကို ညီများကဲ့သို့၊” “ငယ်ရွယ်သောအမျိုးသမီးတို့ကို နှမများကဲ့သို့” ဆက်ဆံရမယ်လို့ ပြောထားတယ်။ (၁ တိမောသေ ၅:၁၊ ၂) အဲဒီစံနှုန်းကိုသာ လက်ကိုင်ထားမယ်ဆိုရင် လိင်ခြားသူတွေနဲ့ သင့်ရဲ့ခင်မင်မှုကို ထိန်းသိမ်းထားနိုင်ပါလိမ့်မယ်။

   “ကျွန်မ အိမ်ထောင်ပြုခဲ့ရင် သူများယောက်ျားကို အီစီကလီလုပ်မှာ မဟုတ်ဘူး။ ဒါကြောင့် လိင်ခြားသူကို တည်တည်ငြိမ်ငြိမ် ဆက်ဆံတတ်အောင် တစ်ကိုယ်ရည်ဘဝကတည်းက လေ့ကျင့်ထားတာ အကျိုးရှိပါတယ်။”​—လေအာ။

•   “စကားများသောအားဖြင့် အပြစ်ပါတတ်၏။ မိမိနှုတ်ကို ချုပ်တည်းသောသူမူကား ပညာရှိ၏” လို့ ကျမ်းစာက ဆိုထားတယ်။ (သုတ္တံ ၁၀:၁၉) အဲဒီလမ်းညွှန်ချက်က စကားပြောတာသာမက မက်ဆေ့ချ်ပို့တာနဲ့လည်း သက်ဆိုင်တယ်။ မက်ဆေ့ချ်ပို့တဲ့ အကြိမ်ပေါင်း၊ ပို့တဲ့အကြောင်းအရာတွေကအစ အကျုံးဝင်ပါတယ်။

   “ချိန်းတွေ့ဖို့ ရည်ရွယ်ချက်မရှိဘဲ မိန်းကလေးတစ်ယောက်ကို နေ့တိုင်း မက်ဆေ့ချ်ပို့နေစရာ အကြောင်းမရှိဘူး။”​—ဘရိုင်ယန်။

•   “အထက်မှ ဉာဏ်ပညာမူကား ဦးစွာ စင်ကြယ်၏” လို့ ကျမ်းစာက ဆိုတယ်။ (ယာကုပ် ၃:၁၇) လူတစ်ယောက်ကို ပွေ့ဖက်လိုက်တာဟာ ဖြူစင်တဲ့စိတ်နဲ့ ဖြစ်နိုင်သလို သူငယ်ချင်းထက် ပိုနေပြီဆိုတဲ့ လက္ခဏာလည်း ဖြစ်သွားနိုင်တယ်။

   “ကျွန်မက ကောင်လေးတွေနဲ့ ဖော်ဖော်ရွေရွေ စကားပြောပေမဲ့ လူရောစိတ်ပါ ခပ်ခွာခွာပဲနေတယ်။” ​—မာရီယာ။

 အဓိကအချက်– လိင်ခြားသူနဲ့ သင့်ရဲ့ပြုမူနေထိုင်ပုံကို အသေအချာ ဆန်းစစ်ပါ။ ဂျနီဖာဆိုတဲ့ မိန်းကလေးက “မိတ်ဆွေကောင်းဆိုတာ လွယ်လွယ်ရတဲ့အရာ မဟုတ်ဘူး။ ဒါကြောင့် အဓိပ္ပာယ်ကောက်လွဲသွားနိုင်တဲ့ လက္ခဏာတွေ ပြမိလို့ မိတ်ပျက်ရတာမျိုး မဖြစ်ချင်ဘူး” လို့ပြောတယ်။

•   တခြားသူတွေ ဘယ်လို ကောက်ချက်ချနေသလဲဆိုတာ ဂရုစိုက်ပါ။ တစ်ယောက်ယောက်က “နင်က သူနဲ့ ရည်းစားဖြစ်နေတာလား” လို့ မေးလာရင်တော့ သင်တို့နှစ်ယောက် သိပ်ရင်းနှီးနေကြပြီဆိုတာကို ဖော်ပြနေတာပဲ။

•   လိင်ခြားသူ သူငယ်ချင်းတွေကို တစ်ပြေးညီ ဆက်ဆံပါ။ တစ်ယောက်ယောက်ကို တခြားသူတွေထက် ပိုအရေးပေးမိတာမျိုး မလုပ်မိပါစေနဲ့။

•   မက်ဆေ့ချ်ပို့တဲ့အခါ ပို့တဲ့အကြိမ်၊ ပို့တဲ့အကြောင်းအရာ၊ ပို့တဲ့အချိန်ကအစ သတိထားပါ။ “လိင်ခြားသူတစ်ယောက်ကို ညသန်းခေါင်ကြီး မက်ဆေ့ချ်ပို့စရာ အကြောင်းမရှိဘူး” လို့ အလီဆာဆိုတဲ့ မိန်းကလေးက ပြောတယ်။