တမန်တော်ပေါလု ဒီလိုရေးခဲ့တယ်– “မှန်တာကို လုပ်ချင်တဲ့အခါ မကောင်းတာလုပ်ချင်စိတ်က ကျွန်တော့်ဆီမှာ ရှိနှင့်နေတယ်။” (ရောမ ၇:၂၁) အဲဒီလို ခံစားဖူးသလား။ ခံစားဖူးရင် မကောင်းတာကို လုပ်ချင်တဲ့စိတ် ပေါ်လာတဲ့အခါ တွန်းလှန်နိုင်အောင် ဒီဆောင်းပါးက ကူညီပေးနိုင်ပါတယ်။

•  သိထားသင့်ရာ

•  လုပ်ဆောင်နိုင်ရာ

•  ရွယ်တူတွေအဆို

 သွေးဆောင်မှုနဲ့ ရွယ်တူချင်းဖိအားက တွဲပြီး လာတတ်တယ်။ “မကောင်းတဲ့ အပေါင်းအသင်းဟာ ကိုယ်ကျင့်တရားကို ပျက်စီးစေတတ်တယ်” လို့ ကျမ်းစာက ဆိုတယ်။ (၁ ကောရိန္သု ၁၅:၃၃၊ အောက်ခြေမှတ်ချက်) တခြားသူတွေ ဒါမှမဟုတ် မီဒီယာရဲ့ ဖိအားကြောင့် သွေးဆောင်မှု ဖြစ်ပေါ်စေတဲ့ စိတ်ဆန္ဒတွေ ပေါ်လာနိုင်တယ်။ အဲဒီလိုနဲ့ “လူအများနောက် လိုက်ပြီး မကောင်းတာ” လုပ်မိသွားနိုင်တယ်။—ထွက်မြောက်ရာ ၂၃:၂။

 “ဖိအားတွေက နှစ်သက်စရာ၊ လက်ခံချင်စရာ ကောင်းတယ်။ လူတွေရဲ့ သဘောကျလက်ခံမှုကို ရချင်တာနဲ့ပဲ သူတို့လုပ်သလို လုပ်မိသွားနိုင်တယ်။”—ဂျေရမီ။

 စဉ်းစားကြည့်ပါ။ တခြားသူတွေ ကိုယ့်ကို ဘယ်လို ထင်သွားမလဲဆိုတာကို အာရုံစိုက်လွန်းရင် သွေးဆောင်မှုက ဘာကြောင့် ပိုပြင်းထန်နိုင်သလဲ။—ပညာအလိမ္မာ ၂၉:၂၅။

 အဓိကအချက်။ ရွယ်တူတွေရဲ့ ဖိအားကြောင့် ကိုယ့်စံနှုန်းတွေကို အလျှော့ပေးလိုက်တဲ့အထိ သွေးဆောင်မခံပါနဲ့။

 ကိုယ့်ခံယူချက်တွေကို သိထားပါ။ ကိုယ် ဘာကို ယုံကြည်လက်ခံသလဲဆိုတာ မသိထားရင် တခြားသူတွေ ကြိုးဆွဲတိုင်းကတဲ့ ရုပ်သေးရုပ် ဖြစ်သွားပါလိမ့်မယ်။ “အရာရာကို မှန်မမှန် အသေအချာ စစ်ဆေးပါ။ ပြီးတဲ့နောက် ကောင်းမွန်ရာကို စွဲကိုင်ထားပါ” ဆိုတဲ့ ကျမ်းစာသတိပေးချက်ကို လိုက်နာတာက ပိုအကျိုးရှိပါတယ်။ (၁ သက်သာလောနိတ် ၅:၂၁) ကိုယ့်ခံယူချက်ကို ကောင်းကောင်းသိထားရင် ကိုယ့်ခံယူချက်အတိုင်း မားမားမတ်မတ် ရပ်တည်နိုင်မယ်။ သွေးဆောင်မှုကို တွန်းလှန်နိုင်မယ်။

 စဉ်းစားကြည့်ပါ။ ဘုရားချမှတ်ထားတဲ့ စံနှုန်းတွေက ကောင်းကျိုးပြုကြောင်း ဘာကြောင့် ယုံကြည်စိတ်ချသလဲ။

 “ကိုယ့်ယုံကြည်ချက်အတိုင်း နေထိုင်ပြီး သွေးဆောင်မှုတွေကို အလျှော့မပေးတဲ့အခါ တခြားသူတွေက ကျွန်မကို ပိုလေးစားလာတာ တွေ့ရတယ်။”—ကင်ဘာလေ။

 ကျမ်းစာ စံနမူနာ။ ဒံယေလ။ ဒံယေလဟာ ဆယ်ကျော်သက်အရွယ်ကတည်းက ဘုရားပညတ်တွေကို လိုက်နာမယ်ဆိုပြီး “စိတ်ပိုင်းဖြတ်ထားတယ်။”—ဒံယေလ ၁:၈။

 ကိုယ့်အားနည်းချက်ကို သိပါ။ “လူငယ်တွေမှာဖြစ်တတ်တဲ့ အလိုဆန္ဒတွေ၊” အထူးသဖြင့် လူငယ်အရွယ်မှာ ပြင်းပြတတ်တဲ့ ဆန္ဒတွေအကြောင်း ကျမ်းစာမှာ ပြောထားတယ်။ (၂ တိမောသေ ၂:၂၂) လိင်ဆန္ဒလောက်ပဲ မဟုတ်ဘူး။ လူရာဝင်၊ လူပေါင်းဆန့်ချင်တဲ့ ဆန္ဒ၊ အချုပ်အနှောင်မရှိ လွတ်လွတ်လပ်လပ် နေချင်တဲ့ ဆန္ဒတွေလည်း ပါဝင်တယ်။

 စဉ်းစားကြည့်ပါ။ “ကိုယ့်အလိုဆန္ဒရဲ့ ဆွဲငင်ဖြားယောင်းမှုကို ခံရတာကသာ လူတိုင်းအတွက် စမ်းသပ်မှုပါ” ဆိုပြီး ကျမ်းစာက ဆိုတယ်။ (ယာကုပ် ၁:၁၄) သင်အဖြစ်ချင်ဆုံး အလိုဆန္ဒက ဘာလဲ။

 “ကိုယ့်အတွက် သွေးဆောင်မှုအဖြစ်ဆုံးက ဘာလဲဆိုတာ ရိုးရိုးသားသား ဆန်းစစ်ပါ။ ဒီသွေးဆောင်မှုကို တွန်းလှန်နိုင်ပုံကိုလည်း လေ့လာထားပါ။ အသုံးဝင်တဲ့ အချက်တွေ ချရေးထားပါ။ ဒါဆိုရင် သွေးဆောင်ခံရတဲ့အခါ တွန်းလှန်နိုင်ပါလိမ့်မယ်။”—စဲလ်ဗီယာ။

 ကျမ်းစာ စံနမူနာ။ ဒါဝိဒ်။ ဒါဝိဒ်ဟာ တခြားသူတွေ ဖိအားပေးလို့ လုပ်ခဲ့တာမျိုး ရှိသလို ကိုယ့်စိတ်အလိုဆန္ဒကြောင့် လုပ်ခဲ့မိတာလည်း ရှိတယ်။ ဒါပေမဲ့ အမှားကနေ သင်ခန်းစာယူပြီး ဆက်မမှားအောင် ကြိုးစားခဲ့တယ်။ “ကျွန်တော့်ရင်ထဲမှာ စင်ကြယ်တဲ့စိတ်နှလုံးကို ဖန်ဆင်းပေးပါ။ မယိမ်းယိုင်တတ်တဲ့ စိတ်သဘောအသစ်ကို ထည့်သွင်းပေးပါ” ဆိုပြီး ယေဟောဝါဘုရားထံ ဆုတောင်းခဲ့တယ်။—ဆာလံ ၅၁:၁၀။

 ချုပ်တည်းပါ။ “အဆိုးနဲ့ တုံ့ပြန်ပြီး အရှုံးမခံပါနဲ့” လို့ ကျမ်းစာက ဆိုတယ်။ (ရောမ ၁၂:၂၁) ဒါကြောင့် သွေးဆောင်မှုရဲ့ သားကောင် ဖြစ်စရာမလိုပါဘူး။ မှန်တာလုပ်ဖို့ ရွေးချယ်နိုင်ပါတယ်။

 စဉ်းစားကြည့်ပါ။ မှားတာ လုပ်ဖို့ သွေးဆောင်ခံရတဲ့အခါ မှန်တာကိုပဲ လုပ်ဖြစ်အောင် ဘယ်လို ချုပ်တည်းနိုင်သလဲ။

 “သွေးဆောင်ခံရတဲ့အတိုင်း လုပ်လိုက်ရင် ဘာအကျိုးဆက်ဖြစ်မလဲလို့ စဉ်းစားတယ်။ စိတ်သက်သာရာ ရမလား။ ခဏတဖြုတ်တော့ ရနိုင်ပါတယ်။ ရေရှည်ကော။ ရေရှည်မှာတော့ စိတ်ဆင်းရဲနေနိုင်တယ်။ ဒါကြောင့် သွေးဆောင်မှုအတိုင်း လိုက်လုပ်ဖို့ မတန်ဘူး။”—ဆိုဖီယာ။

 ကျမ်းစာ စံနမူနာ။ ပေါလု။ ပေါလုဟာ မကောင်းတာကို လုပ်ချင်တဲ့ ဆန္ဒရှိတယ်လို့ ဝန်ခံခဲ့ပေမဲ့ ချုပ်တည်းခဲ့တယ်။ “ကျွန်တော့်ကိုယ်ခန္ဓာကို ဆုံးမပြီး၊ ကြပ်မတ်ပြီး ကျွန်တစ်ယောက်လိုဖြစ်အောင် ထိန်းချုပ်ထားတယ်” လို့ ရေးခဲ့တယ်။—၁ ကောရိန္သု ၉:၂၇၊ အောက်ခြေမှတ်ချက်။

 အဓိကအချက်။ သွေးဆောင်မှုကို ဘယ်လို ဖြေရှင်းမလဲဆိုတာ ဆုံးဖြတ်ရမယ့်သူက သင်ကိုယ်တိုင်ပါပဲ။

 သွေးဆောင်မှုတွေဟာ ခဏယာယီပဲဆိုတာ သတိရပါ။ အသက် ၂၀ အရွယ် မီလီဆာ ဒီလိုပြောတယ်– “အထက်တန်းကျောင်း တက်တုန်းက သွေးဆောင်မှုကြီးလို့ ယူမှတ်ခဲ့တာတွေဟာ အခုအချိန်မှာ ဘာမှ မဟုတ်တော့ဘူး။ ဒါကို သိထားတော့ အခုလောလောဆယ် ကြုံနေရတဲ့ သွေးဆောင်မှုတွေကို ကျော်လွှားနိုင်တယ်လို့ ယုံကြည်စိတ်ချတယ်။ နောက်ပိုင်း နောက်ကြောင်းပြန်ကြည့်ခဲ့ရင် သွေးဆောင်မှုတွေကို တွန်းလှန်ခဲ့လို့ ငါ့ဘဝ ဒီလိုကောင်းမွန်နေတာလို့ ပြောနိုင်မှာ။”