မာဂဒလမာရိ​ဟာ ကောင်းကင်ကို မော့ကြည့်ပြီး မျက်ရည်တွေ​ကို သုတ်​လိုက်တယ်။ သူ ချစ်မြတ်နိုး​ရတဲ့ သခင်ဟာ သစ်တိုင်​မှာ ချိတ်ဆွဲ​ခံ​နေ​ရတယ်။ နွေဦး​ရဲ့ မွန်းတည့်​ချိန် ဖြစ်ပေမဲ့ “တစ်ပြည်လုံး အမှောင်​ကျသွား​တယ်။” (လုကာ ၂၃:၄၄၊ ၄၅) မာဂဒလမာရိ​ဟာ အပေါ်ဝတ်ရုံ​ကို ပခုံး​ပေါ် သေချာ ဆွဲတင်​လိုက်ပြီး အနားက အမျိုးသမီးတွေ​နား တိုး​သွား​လိုက်တယ်။ နေကြတ်​တယ်​ဆိုရင် မိနစ်​အနည်းငယ်​လောက်​ပဲ ကြာ​တဲ့​အတွက် ၃ နာရီ​ကြာ​တဲ့​အထိ အမှောင်​ကျသွား​တာ​က နေကြတ်​တာ မဖြစ်နိုင်ဘူး။ ညဘက်မှာ​သာ ကြားရ​တတ်တဲ့ တိရစ္ဆာန်တွေရဲ့ အော်မြည်သံ​တွေကို​တောင် မာရိနဲ့ တခြားသူတွေ ကြားရ​နိုင်တယ်။ စောင့်ကြည့်​နေ​သူတချို့​က “ကြောက်လန့်​သွားပြီး ‘သေချာတယ်၊ သူဟာ ဘုရားသခင်ရဲ့ သား​ပဲ’ လို့ ပြော​ကြတယ်။” (မဿဲ ၂၇:၅၄) သားတော် ရက်ရက်စက်စက် အသတ်ခံရ​လို့ ယေဟောဝါ ဝမ်းနည်း ဒေါသ​ထွက်​ကြောင်း ဖော်ပြတာ ဖြစ်မယ်လို့ ယေရှုရဲ့ နောက်လိုက်​တွေ​နဲ့ တခြားသူတွေ ယူဆ​မိ​နိုင်တယ်။

မြင်ရတဲ့ မြင်ကွင်း​ကြောင့် စိတ်ထိခိုက်​ကြေကွဲ​ရပေမဲ့ မာဂဒလမာရိ​ဟာ အဲဒီကနေ ထွက်​မသွား​ဘူး။ (ယောဟန် ၁၉:၂၅၊ ၂၆) ယေရှု အလွန်အမင်း နာကျင်​နေမှာ သေချာတယ်။ ယေရှုရဲ့ မိခင်လည်း နှစ်သိမ့်မှုနဲ့ ထောက်မမှု လိုအပ်​နေတယ်။

မာဂဒလမာရိ​အတွက် ယေရှု လုပ်ဆောင်​ပေးခဲ့တာ​တွေ​ကြောင့် ယေရှု​အတွက်လည်း သူ အတတ်နိုင်ဆုံး လုပ်​ပေးချင်တယ်။ မာဂဒလမာရိ​ဟာ တစ်ချိန်က မနှစ်မြို့​စရာ​ကောင်း​သူ၊ သနားစရာ​ကောင်း​သူ ဖြစ်ခဲ့ပေမဲ့ အဲဒါတွေ​အားလုံးကို ယေရှု ပြောင်းလဲ​ပေးခဲ့တယ်။ မာဂဒလမာရိ​ရဲ့ ဘဝဟာ ဂုဏ်​သိက္ခာ​နဲ့ ရည်ရွယ်ချက် ရှိ​လာတယ်။ ယုံကြည်ခြင်း ခိုင်ခံ့​သူ တစ်ယောက်လည်း ဖြစ်လာတယ်။ ဘယ်လို​နည်းနဲ့လဲ။ သူ့ရဲ့ ယုံကြည်ခြင်း​ကနေ ဘာသင်ယူနိုင်သလဲ။

ကျမ်းစာမှာ မာဂဒလမာရိ​ရဲ့ ဇာတ်လမ်းကို ဆုကျေးဇူး​နဲ့ စ​ထားတယ်။ ထိတ်လန့်စရာ အိပ်မက်ဆိုး​လို အခြေအနေကနေ သူ့ကို ယေရှု လွတ်မြောက်​ပေးခဲ့တယ်။ အဲဒီခေတ်​တုန်း​က နတ်ဆိုး​တွေ အတော်​လွှမ်းမိုးတယ်။ လူတွေကို ထိခိုက်အောင် လုပ်တယ်။ လူတချို့ကို ဝင်​ပူး​ပြီး ထိန်းချုပ်​တယ်။ မာဂဒလမာရိ​ကို နတ်ဆိုး​တွေ ဘယ်လောက် ဒုက္ခ​ပေးခဲ့သလဲ​ဆိုတာကိုတော့ မသိရဘူး။ ကြမ်းကြုတ်​တဲ့ နတ်ဆိုး​ခုနစ်ကောင်​ရဲ့ နှောင့်ယှက်ခြင်း ခံခဲ့ရတယ်​ဆိုတာပဲ သိရတယ်။ နတ်ဆိုးတွေရဲ့ နှောင့်ယှက်မှု​ကနေ လွတ်​အောင် ယေရှု လုပ်ပေးခဲ့တယ်။—လုကာ ၈:၂။

နောက်ဆုံးမှာတော့ မာရိဟာ ကျွန်တော်တို့ စဉ်းစားမိ​နိုင်တာ​ထက် ပို​သာလွန်​တဲ့ လွတ်မြောက်မှု ခံစားခဲ့ရ​ပြီး ကျန်တဲ့​အသက်တာ တစ်လျှောက်လုံး ဘဝ​သစ်​နဲ့ နေထိုင်ခဲ့ရတယ်။ ကျေးဇူးတင်​လေးမြတ်မှု​ကို သူ ဘယ်လို ပြခဲ့သလဲ။ သူဟာ ယေရှုရဲ့ သစ္စာရှိ နောက်လိုက် ဖြစ်လာတယ်။ လိုအပ်​နေတာ​တွေ သူ မြင်တဲ့အခါ အရေးတယူ လုပ်ဆောင်ပေး​တယ်။ ယေရှုနဲ့ တမန်တော်တွေဟာ အစားအစာ၊ ဝတ်စရာ​နဲ့ ညအိပ်​စရာ​နေရာ လိုအပ်​ခဲ့တယ်။ သူတို့က လူ​ချမ်းသာ​တွေ မဟုတ်ဘူး။ အဲဒီအချိန်မှာ လောကီ​အလုပ်​လည်း မလုပ်ကြဘူး။ သူတို့တွေ ဟောပြောခြင်းနဲ့ သွန်သင်ခြင်း​ကို အာရုံစိုက် လုပ်ဆောင်ဖို့ ရုပ်​ဝတ္တု​ပစ္စည်း ထောက်ပံ့မှု လိုအပ်​ခဲ့တယ်။

မာရိနဲ့ တခြား​အမျိုးသမီးတွေဟာ အဲဒီ​လိုအပ်ချက်တွေကို ဖြည့်ဆည်း​ပေးခဲ့​ကြတယ်။ အမျိုးသမီးတွေဟာ ‘ကိုယ့်​ပစ္စည်း​တွေ သုံးပြီး အလုပ်အကျွေး​ပြု​ကြတယ်။’ (လုကာ ၈:၁၊ ၃) အမျိုးသမီး​တချို့က ချမ်းသာတဲ့​သူတွေ ဖြစ်နိုင်တယ်။ အမျိုးသမီးတွေ​က အစားအစာ ပြင်ဆင်​ပေးတယ်၊ အဝတ်​လျှော်​ပေးတယ်၊ ရွာ​တွေ​မှာ တည်းခိုဖို့ နေရာ​စီစဉ်​ပေးတယ်လို့​တော့ ကျမ်းစာမှာ မဖော်ပြထားဘူး။ ဒါပေမဲ့ အယောက် ၂၀ လောက် ရှိ​မယ့် ခရီးသွား​အုပ်စု​ကို လိုလိုလားလား ကူညီ​လုပ်ဆောင်​ပေးခဲ့​ကြတယ်။ အဲဒီ​အမျိုးသမီးတွေရဲ့ ကြိုးစား​အားထုတ်မှု​ကြောင့် ယေရှုနဲ့ တမန်တော်တွေဟာ ဟောပြောခြင်း​လုပ်ငန်းကို အပြည့်အဝ အာရုံစိုက် လုပ်နိုင်​ခဲ့​ကြတယ်။ ယေရှုရဲ့ ကျေးဇူးတွေကို ဘယ်တော့မှ ဆပ်​လို့ ကုန်​မှာ မဟုတ်ဘူးဆိုတာ မာရိ သိတယ်။ ဒါပေမဲ့ သူ လုပ်နိုင်တာ​ကို အတတ်နိုင်ဆုံး လုပ်ပေး​ချင်​ခဲ့တယ်။

ဒီနေ့​ခေတ်မှာ တခြားသူတွေ​အတွက် နိမ့်ကျတဲ့​အလုပ် လုပ်ကိုင်​ပေးသူ​တွေကို လူတွေ အထင်သေး​ကြတယ်။ ဒါပေမဲ့ ဘုရားကတော့ အဲဒီလို မမြင်​ဘူး။ ယေရှုနဲ့ တမန်တော်တွေကို မာရိ အတတ်နိုင်ဆုံး ထောက်မ​ကူညီပေး​နေတာကို တွေ့တဲ့​အခါ ဘုရား ဘယ်လောက် သဘောကျ​နှစ်သက်​မယ်​ဆိုတာ စဉ်းစား​ကြည့်ပါ။ ဒီနေ့လည်း သစ္စာရှိ ခရစ်ယာန်​များစွာဟာ တခြားသူတွေ​အကျိုးအတွက် နိမ့်ကျတဲ့ အလုပ်တွေကို ပျော်ပျော်ရွှင်ရွှင် လုပ်နေကြပါတယ်။ တစ်ခါတလေ လက်တွေ့ကျတဲ့ အကူအညီ ဒါမှမဟုတ် ကြင်နာတဲ့ စကား​တစ်ခွန်း​တောင် ဖြစ်နိုင်တယ်။ အဲဒီလို ကူညီ​ထောက်ပံ့မှု​တွေကို ယေဟောဝါ တန်ဖိုး​ထားတယ်။—ပညာအလိမ္မာ ၁၉:၁၇။ ဟီဘရူး ၁၃:၁၆။

အေဒီ ၃၃၊ ပသခါပွဲ တက်ဖို့ ယေရှုနဲ့​အတူ ဂျေရုဆလင်​မြို့ကို သွား​ကြ​တဲ့ အမျိုးသမီးတွေ​ထဲမှာ မာဂဒလမာရိ​လည်း ပါတယ်။ (မဿဲ ၂၇:၅၅၊ ၅၆) ယေရှု အဖမ်း​ခံရပြီး တစ်ညလုံး စစ်ဆေး​မေးမြန်း​ခံရတယ်​ဆိုတာ ကြားတဲ့​အခါ အတော် စိတ်မကောင်း​ဖြစ်ခဲ့မှာ သေချာတယ်။ ကြားရတဲ့ သတင်းတွေ ပို​ဆိုး​လာတယ်။ ဘုရင်ခံ ပုန္တိပိလတ်​ဟာ ဂျူးဘာသာရေး ခေါင်းဆောင်တွေ​နဲ့ သူတို့ရဲ့ ဩဇာခံ လူအုပ်ရဲ့ ဖိအားပေး​မှု​ကြောင့် ယေရှုကို သစ်တိုင်တင် ကွပ်မျက်​ဖို့ စီရင်ချက် ချ​လိုက်တယ်။ သွေးအလိမ်းလိမ်း​နဲ့ ပင်ပန်း​နွမ်းလျ​နေတဲ့ သခင်ဟာ ကိုယ့်ကို တင်ပြီး ကွပ်မျက်​မယ့် သစ်တိုင်ကို ထမ်း​ပြီး လမ်းပေါ် ကြိုးစား​လျှောက်​နေရတာ​ကို မာရိ မြင်တွေ့ခဲ့​ရပါလိမ့်မယ်။—ယောဟန် ၁၉:၆၊ ၁၂၊ ၁၅-၁၇။

သစ်တိုင်တင်​တဲ့​နေရာ ရောက်တော့ နေ့ခင်း​ကြောင်တောင် အမှောင်​ကျသွား​ပြီးနောက် မာဂဒလမာရိ​နဲ့ တခြား​အမျိုးသမီးတွေဟာ “ယေရှုရဲ့ သစ်တိုင်​နား​မှာ” ရပ်နေကြတယ်။ (ယောဟန် ၁၉:၂၅) အဆုံး​ထိ အဲဒီ​နား​မှာ ရှိနေတဲ့ မာရိဟာ ယေရှု​က မိခင်​ကို စောင့်ရှောက်​ဖို့ ချစ်​ရတဲ့ တမန်တော် ယောဟန်ဆီ အပ်​နေတာကို မြင်ခဲ့၊ ကြားခဲ့​ရတယ်။ ယေရှု ဝေဒနာ အပြင်းအထန် ခံစား​ရပြီး ခမည်းတော်ကို အော်ခေါ် ဆုတောင်းတာကို​လည်း ကြားခဲ့​ရတယ်။ ယေရှု မသေဆုံးခင်​လေးမှာ ပြောခဲ့တဲ့ “အဖ ခိုင်းသမျှ ကျွန်တော် လုပ်ပြီးပါပြီ” ဆိုတဲ့ နောက်ဆုံး အောင်ပွဲခံ​စကားကိုလည်း ကြားခဲ့​ရတယ်။ မာရိ တော်တော် စိတ်ထိခိုက်​ခဲ့တယ်။ ယေရှု သေဆုံး​ပြီးနောက်​လည်း မာရိ အဲဒီမှာ ရှိနေမှန်း ထင်ရှားတယ်။ ယောသပ်​လို့ ခေါ်တဲ့ အရိမသဲ​မြို့သား သူဌေး​က ယေရှုရဲ့ အလောင်းကို ချပြီး သင်္ချိုင်းဂူ​အသစ်​ထဲ ထည့်​ပြီး​တဲ့အချိန်​အထိ မာရိ ရှိနေခဲ့တယ်။—ယောဟန် ၁၉:၃၀။ မဿဲ ၂၇:၄၅၊ ၄၆၊ ၅၇-၆၁။

ညီအစ်ကို၊ ညီအစ်မ​တွေ အပြင်းအထန် ဆင်းရဲဒုက္ခ ရောက်တဲ့အခါ ကျွန်တော်တို့ ဘာလုပ်​ပေးနိုင်​သလဲ​ဆိုတာ မာရိရဲ့ စံနမူနာ​ကနေ သိနိုင်တယ်။ ဆင်းရဲဒုက္ခ မကြုံ​ရအောင် ကျွန်တော် မတားဆီး​နိုင်ဘူး။ သူတို့ ခံစား​နေရတဲ့ နာကျင်မှု​တွေကို မဖယ်ရှား​ပေးနိုင်​ဘူး။ ဒါပေမဲ့ သနား​စာနာမှု​နဲ့ ရဲစွမ်းသတ္တိ တင်ပြ​နိုင်ကြတယ်။ အခက်အခဲ ကြုံရ​ချိန်မှာ ကူညီပေး​တတ်တဲ့ မိတ်ဆွေ​တစ်ယောက် ရှိနေရင် တကယ် အကူအညီ ဖြစ်ပါတယ်။ လိုအပ်​နေချိန်မှာ မိတ်ဆွေတွေကို သစ္စာ​ရှိရှိ ကူညီ​ပေးတာ​က ယုံကြည်ခြင်း ခိုင်ခံ့​သူ ဖြစ်ကြောင်း ဖော်ပြရာ​ရောက်​ပြီး နှစ်သိမ့်မှု ခံစား​ရစေ​နိုင်တယ်။—ပညာအလိမ္မာ ၁၇:၁၇။

ယေရှုရဲ့ အလောင်းကို သင်္ချိုင်းဂူ​ထဲ ထည့်​ပြီးနောက်မှာ နောက်ပိုင်း ယေရှုရဲ့ အလောင်းကို လိမ်းပေး​ဖို့ အမွှေးနံ့သာ​တွေ ဝယ်​တဲ့ အမျိုးသမီးတွေ​ထဲမှာ မာရိလည်း ပါတယ်။ (မာကု ၁၆:၁၊ ၂။ လုကာ ၂၃:၅၄-၅၆) ဥပုသ်​နေ့ ပြီး​လို့ နောက်​တစ်နေ့မှာ မာရိဟာ စောစော ထ​တယ်။ တခြား​အမျိုးသမီးတွေနဲ့​အတူ အမှောင်​ထဲမှာ ယေရှုရဲ့ သင်္ချိုင်းဂူ​ဆီ မာရိ လမ်းလျှောက်သွား​နေတာကို မြင်ယောင်​ကြည့်ပါ။ သင်္ချိုင်း​ဂူဝမှာ ပိတ်​ထားတဲ့ ကျောက်တုံး​ကြီး​ကို ဘယ်လို လှိမ့်ဖယ်​မလဲ​လို့ လမ်း​သွား​နေရင်း စဉ်းစား​ခဲ့​ကြတယ်။ (မဿဲ ၂၈:၁။ မာကု ၁၆:၁-၃) ဒါပေမဲ့ သူတို့ နောက်ကြောင်း ပြန်​မလှည့်​ခဲ့​ကြဘူး။ သူတို့ လုပ်နိုင်တာ​ကို အတတ်နိုင်ဆုံး လုပ်ပြီး ကျန်တာ​ကို ယေဟောဝါ​လက်ထဲ အပ်​ထားဖို့ သူတို့ရဲ့ ယုံကြည်ခြင်းက လှုံ့ဆော်​ပေးခဲ့တယ်။

မာရိက တခြား​သူတွေရဲ့ ရှေ့​က​အလျင် သင်္ချိုင်း​ကို ရောက်​သွားတာ ဖြစ်မယ်။ သူ ကြောင်​ပြီး ရပ်နေ​လိုက်တယ်။ ကျောက်တုံး​ကြီး​က လှိမ့်ဖယ်​ပြီးသား ဖြစ်နေပြီး ဂူ​ထဲမှာ​လည်း ဘာမှ မရှိဘူး။ သွက်သွက်​လက်လက် ရှိတဲ့ မာရိဟာ ပေတရုနဲ့ ယောဟန်​ကို သူ မြင်ခဲ့တဲ့​အရာ​အကြောင်း ပြောပြဖို့ ပြေး​သွားတယ်။ “သခင့်​ကို သင်္ချိုင်းဂူ​ထဲ​ကနေ ယူသွား​ကြပြီ။ ဘယ်မှာ ထား​လိုက်​မှန်း မသိ​ဘူး” လို့ မာရိ အမော​တကော ပြောပြ​နေတာကို မြင်ယောင်​ကြည့်ပါ။ ပေတရုနဲ့ ယောဟန်လည်း သင်္ချိုင်း​ဆီ အပြေးအလွှား သွားကြတယ်။ သခင် မရှိတော့​တာ သေချာ​သွားပြီး​နောက် အိမ်ကို ပြန်​သွားကြတယ်။ *—ယောဟန် ၂၀:၁-၁၀။

သင်္ချိုင်းဂူ​ဆီ မာရိ ပြန်ရောက်​သွားတဲ့အခါ တစ်ယောက်တည်း အဲဒီမှာ ယောင်​လည်လည် ဖြစ်နေတယ်။ ဘာမှ မရှိတော့တဲ့ သင်္ချိုင်းဂူ​ကို တွေ့​ပြီး ဝမ်းနည်း​နေတဲ့ မာရိဟာ တိတ်ဆိတ်​နေတဲ့ မနက်​စောစော​စီး​စီး​မှာ ငိုချ​လိုက်ပါ​တော့​တယ်။ သင်္ချိုင်းဂူ​ထဲ ကိုယ်ကို ကိုင်းပြီး အထဲ​ကို လှမ်းကြည့်​လိုက်တယ်။ သခင် မရှိတော့ဘူး​ဆိုတာကို အခုထိ မယုံနိုင်​သေး​ဘူး။ ဒါပေမဲ့ သူ သိပ်​အံ့ဩ​သွားတယ်။ အထဲမှာ ဝတ်လုံ​ဖြူ ဝတ်​ထားတဲ့ ကောင်းကင်တမန် နှစ်ပါး ထိုင်​နေတယ်။ “ဘာလို့ ငို​နေတာလဲ” လို့ သူတို့ မေးတယ်။ မာရိက စိတ်ရှုပ်ရှုပ်​နဲ့ “ကျွန်မရဲ့ သခင်​ကို တစ်ယောက်ယောက် ယူသွား​လိုက်ပြီ။ ဘယ်မှာ ထားမှန်း မသိ​ဘူး” လို့ တမန်တော် နှစ်ယောက်ကို ပြောခဲ့တဲ့ စကားကိုပဲ ပြန်​ပြော​လိုက်တယ်။—ယောဟန် ၂၀:၁၁-၁၃။

နောက်လှည့်​ကြည့်လိုက်တဲ့​အခါ လူတစ်ယောက် ရပ်​နေတာကို မာရိ မြင်​လိုက်တယ်။ မာရိ သူ့ကို မမှတ်မိ​ဘူး။ ဒါကြောင့် အဲဒီ​လူကို ဥယျာဉ်စောင့်​လို့ ထင်​သွားတယ်။ အဲဒီ​လူက ကြင်နာတဲ့ လေသံနဲ့ “ဘာလို့ ငို​နေတာလဲ။ ဘယ်သူ့ကို ရှာနေတာလဲ” လို့ မေးတယ်။ မာရိက “ဆရာ၊ အလောင်းကို ယူ​သွားတယ်​ဆိုရင် ဘယ်မှာ ထားသလဲ ပြောပြပါ။ ကျွန်မ ယူသွားမယ်” လို့ ပြန်​ဖြေတယ်။ (ယောဟန် ၂၀:၁၄၊ ၁၅) မာရိ ပြောတာကို စဉ်းစား​ကြည့်ပါ။ အမျိုးသမီး​တစ်ယောက်က ကြံ့ခိုင်​တောင့်တင်း​တဲ့ ယေရှုခရစ်ရဲ့ အလောင်းကို မပြီး ယူသွား​နိုင်​ပါ့မလား။ အဲဒါတွေကို မာရိ တွေး​မနေဘူး။ သူ လုပ်​ရမယ့် အလုပ်ကိုပဲ သိတယ်။

ကျွန်တော်တို့ ခံရပ်နိုင်​တာ​ထက် ပို​ပြင်းထန်တဲ့ ဝမ်းနည်းစရာ​နဲ့ အတားအဆီး​တွေကို ရင်ဆိုင်​ရတဲ့အခါ မာဂဒလမာရိ​ကို အတုယူ​နိုင်ပါတယ်။ ကိုယ့်ရဲ့ အားနည်းချက်​နဲ့ အကန့်အသတ်​တွေကို​ပဲ အာရုံစိုက်​နေရင် ကြောက်​ပြီး ဘာမှ လုပ်နိုင်​တော့​မှာ မဟုတ်ဘူး။ ဒါပေမဲ့ ကျွန်တော်တို့ လုပ်နိုင်တာ​ကို အတတ်နိုင်ဆုံး လုပ်ပြီး ကျန်တာ​ကို ဘုရား​လက်ထဲ အပ်​ထား​လိုက်ရင် ကျွန်တော်တို့ စဉ်းစားမိ​တာ​ထက် ပိုပြီး အောင်မြင်ပြီး​မြောက်​ပါလိမ့်မယ်။ (၂ ကောရိန္သု ၁၂:၁၀။ ဖိလိပ္ပိ ၄:၁၃) အရေးကြီးဆုံး​က ယေဟောဝါရဲ့ နှစ်သက်​လက်ခံမှုကို ရပါလိမ့်မယ်။ မာရိ အဲဒီအတိုင်း လုပ်ခဲ့လို့ အထူးခြားဆုံး​နည်းနဲ့ ဆုချ​ခံခဲ့ရတယ်။

မာရိ​ရှေ့မှာ ရပ်နေသူ​ဟာ ဥယျာဉ်စောင့် မဟုတ်ဘူး။ အရင်က လက်သမား၊ နောက်တော့ သွန်သင်​ပေးတဲ့​ဆရာ ဖြစ်လာပြီး မာရိ ချစ်ခင်​မြတ်နိုး​ရတဲ့ သခင်​ပါ။ ဒါပေမဲ့ မာရိက မမှတ်မိ​လို့ ထွက်သွားဖို့ ခြေလှမ်း​ပြင်​လိုက်တယ်။ ယေရှုဟာ တန်ခိုး​ကြီးတဲ့ ဝိညာဉ်​ပုဂ္ဂိုလ်​အဖြစ် အသက် ပြန်ရှင်​လာပြီ​ဆိုတဲ့ အမှန်တရားကို မာရိ မစဉ်းစား​မိ​ဘူး။ ယေရှု​က လူ့​ခန္ဓာ​နဲ့ ကိုယ်ယောင်​ထင်ရှားပြ​ပေမဲ့ ပူဇော်သက္ကာ​အဖြစ် ပေးလိုက်တဲ့ ခန္ဓာကိုယ်​တော့ မဟုတ်ဘူး။ ဒါကြောင့် ရှင်ပြန်ထမြောက်​ပြီးနောက်ပိုင်း စိတ်လှုပ်ရှားစရာ နေ့တွေမှာ​လည်း ယေရှုကို ကောင်းကောင်း သိကျွမ်းသူ​တွေ​က​တောင် ယေရှုကို မမှတ်မိ​ကြဘူး။—လုကာ ၂၄:၁၃-၁၆။ ယောဟန် ၂၁:၄။

ယေရှု​မှန်း မာရိ သိအောင် ဘယ်လို လုပ်ခဲ့သလဲ။ “မာရိ” လို့ တစ်ခွန်း​တည်း ခေါ်​လိုက်တယ်။ မာရိ နောက်ကို လှည့်ကြည့်​ပြီး သူ အကြိမ်ပေါင်း​များစွာ သုံးခဲ့​တဲ့ ဟီဘရူး​စကားလုံး​နဲ့ “ရဗ္ဗုနိ” လို့ အော်ခေါ်​လိုက်တယ်။ သူ ချစ်ခင်​ရတဲ့ သခင် ဖြစ်နေ​ပါလား။ မာရိ အတိုင်း​ထက်​အလွန် ဝမ်းသာ​သွားပြီး သခင် ထွက်သွား​မှာ စိုးလို့ တင်းတင်းကျပ်ကျပ် ဆွဲကိုင်​ထား​လိုက်တယ်။—ယောဟန် ၂၀:၁၆။

မာရိရဲ့ အတွေး​တွေကို ယေရှု သိတဲ့​အတွက် “ကျွန်တော့်ကို မဆွဲ​ထား​နဲ့” လို့ ပြော​လိုက်တယ်။ အဲဒီ​စကားတွေကို ယေရှု ပြုံး​ပြီး ကြင်ကြင်နာနာ ပြောတာကို မြင်ယောင်​ကြည့်နိုင်တယ်။ ဆုပ်ကိုင်​ထားတဲ့ မာရိရဲ့ လက်တွေ​ကို ဖြေရင်း “အဖ​ဘုရားဆီ ကျွန်တော် မသွား​သေး​ဘူး” လို့ မာရိ စိတ်ချ​အောင် ပြောတယ်။ ကောင်းကင်ကို သွားရမယ့်​အချိန် မကျ​သေး​ဘူး။ မြေကြီးပေါ်မှာ လုပ်စရာတွေ ရှိသေးတယ်။ အဲဒီ​အလုပ်မှာ မာရိ​ကို ကူညီပေး​စေချင်တယ်။ ယေရှု ပြောတာတွေကို မာရိ သေသေချာချာ နားထောင်​နေမှာ​ပဲ။ ယေရှု​က မာရိ​ကို “ညီအစ်ကို​တွေ​ဆီ သွားပြီး ‘ကျွန်တော့်​အဖ ဖြစ်တဲ့ ခင်ဗျားတို့ရဲ့ အဖ၊ ကျွန်တော့်​ဘုရားသခင် ဖြစ်တဲ့ ခင်ဗျားတို့ရဲ့ ဘုရားသခင်​ဆီ ကျွန်တော် သွား​ရတော့မယ်’ လို့ ပြောပေးပါ” ဆိုပြီး မှာတယ်။—ယောဟန် ၂၀:၁၇။

သခင်​ဆီကနေ မာရိ တာဝန်​ရ​လိုက်တာပဲ။ မာရိဟာ အသက်ပြန်ရှင်​လာတဲ့ ယေရှုကို မြင်တွေ့ခွင့် ရခဲ့တဲ့ ပထမဆုံး တပည့် ဖြစ်ပြီး အခုလည်း အဲဒီ​သတင်းကောင်း​အကြောင်း တခြား​သူတွေကို ပြောပြဖို့ တာဝန်​ပေးအပ်​ခံရတယ်။ တပည့်တွေကို ရှာပြီး ပြောပြဖို့ မာရိ ဘယ်လောက် စိတ်အား​တက်ကြွ​နေတယ်၊ ဘယ်လောက် ပျော်​နေတယ်​ဆိုတာ မြင်ယောင်​ကြည့်ပါ။ မာရိရဲ့ စိတ်ထဲမှာ​ရော တပည့်တွေရဲ့ စိတ်ထဲမှာ​ပါ တော်တော်​နဲ့ မေ့​မှာ မဟုတ်တဲ့ “သခင့်​ကို ကျွန်မ တွေ့​လိုက်တယ်” ဆိုတဲ့ စကားကို မာရိ အသက်​တောင် မရှူ​ဘဲ ပြော​နေတာကို မြင်ယောင်​ကြည့်ပါ။ စိတ်လှုပ်ရှား​နေတဲ့ မာရိက ယေရှု မှာ​သမျှကို တရစပ် ပြောပြ​ခဲ့တယ်။ (ယောဟန် ၂၀:၁၈) ယေရှုရဲ့ သင်္ချိုင်းဂူ​မှာ ဘာမှ မရှိတဲ့​အကြောင်း တခြား​အမျိုးသမီးတွေ​ဆီက တပည့်​တွေ ကြား​ပြီး​ထားပြီ။ မာရိ​ဆီကနေ နောက်ထပ်​သတင်း ကြားရ​ကြတယ်။—လုကာ ၂၄:၁-၃၊ ၁၀။

အမျိုးသားတွေ ဘယ်လို တုံ့ပြန်​ကြသလဲ။ အစပိုင်းမှာတော့ လက်မခံကြဘူး။ “အမျိုးသမီးတွေရဲ့ စကားက ယုတ္တိ​မရှိ​ပုံ​ပေါက်​နေ​တော့ သူတို့ မယုံကြဘူး” လို့ ဖတ်​ရတယ်။ (လုကာ ၂၄:၁၁) စိတ်ရင်း​ကောင်းတဲ့ အဲဒီ​အမျိုးသားတွေဟာ အမျိုးသမီးတွေကို ယုံကြည်လို့ မရဘူးလို့ သွန်သင်တဲ့ အသိုင်းအဝိုင်းမှာ ကြီးပြင်း​လာကြတာ။ ရဗ္ဗိ​ထုံးတမ်း​စဉ်လာ​အရ အမျိုးသမီးတွေဟာ တရားရုံးမှာ သက်သေ​ထွက်ဆို​ခွင့် မရကြဘူး။ တမန်တော်တွေဟာ သိထားတဲ့ အမှန်တရား​ထက် ယဉ်ကျေးမှု​ရဲ့ ဩဇာ​လွှမ်းမိုးမှုကို ခံ​နေကြ​ရတယ်။ ဒါပေမဲ့ ယေရှုနဲ့ အဖ​ယေဟောဝါမှာ အဲဒီလို ခွဲခြားမှု​မျိုး မရှိဘူး။ သစ္စာ​ရှိတဲ့ အမျိုးသမီးကို ဒီ​ထူးမြတ်​တဲ့ အခွင့်အရေး ပေးခဲ့တယ်။

အမျိုးသားတွေရဲ့ တုံ့ပြန်ပုံ​ကြောင့် မာရိ စိတ်မဆိုး​ခဲ့​ဘူး။ သခင် သူ့ကို ယုံကြည်​စိတ်ချတယ် ဆိုတာနဲ့​တင် လုံလောက်​ပြီ။ ယေရှုရဲ့ နောက်လိုက်​အားလုံးဟာ သတင်း ကြေညာ​ဖို့ တာဝန် ရထား​ကြပါတယ်။ ကျမ်းစာမှာ အဲဒီ​သတင်းကို “ဘုရားသခင့် နိုင်ငံတော် သတင်းကောင်း” လို့ ခေါ်တယ်။ (လုကာ ၈:၁) သူတို့ ပြောတာကို လူတိုင်း ယုံကြည်​မယ်၊ တန်ဖိုးထား​မယ်​လို့ ယေရှု ကတိ​မပေးခဲ့​ဘူး။ (ယောဟန် ၁၅:၂၀၊ ၂၁) ဒါကြောင့် ခရစ်ယာန်တွေဟာ မာဂဒလမာရိ​ကို သတိရ​တာ ကောင်းပါတယ်။ သူ ပြောတာကို ကိုယ့်ရဲ့ ညီအစ်ကိုချင်း​တွေ ချက်ချင်း မယုံကြည်ကြပေမဲ့ ယေရှု အသက်ပြန်ရှင်​ပြီဆို​တဲ့ သတင်းကောင်းကို ဝမ်းသာ​အားရ ပြောခဲ့တယ်။

နောက်ပိုင်းမှာ ယေရှုဟာ တမန်တော်တွေ၊ မိမိရဲ့ နောက်လိုက်​တွေ ရှေ့မှာ ပို​ပိုပြီး ကိုယ်ထင်ပြ​ခဲ့တယ်။ တစ်ကြိမ်​မှာ​ဆိုရင် တပည့် ၅၀၀ ရှေ့ ကိုယ်ထင်ပြ​ခဲ့တယ်။ (၁ ကောရိန္သု ၁၅:၃-၈) အဲဒီ​အကြောင်း​တွေ မာရိ မြင်ရ၊ ကြားရတဲ့​အခါမှာ ယုံကြည်ခြင်း ခိုင်ခံ့​သည်ထက် ခိုင်ခံ့​လာ​မှာ သေချာတယ်။ ယေရှုရဲ့ နောက်လိုက်​တွေ​ပေါ် သန့်ရှင်းသော စွမ်းအားတော် သွန်းလောင်းခဲ့​တဲ့ ပင်တေကုတ္တေ​ပွဲနေ့​တုန်း​က ဂျေရုဆလင်​မြို့မှာ စုရုံး​ရောက်ရှိ​နေတဲ့ အမျိုးသမီးတွေ​ထဲ မာဂဒလမာရိ​လည်း ရှိနေ​နိုင်တယ်။—တမန်တော် ၁:၁၄၊ ၁၅။ ၂:၁-၄။

ဘယ်လိုပဲ ဖြစ်ပါစေ၊ မာဂဒလမာရိ​ဟာ သေတဲ့အထိ သစ္စာ​ရှိခဲ့တယ် ဆိုတဲ့​အချက်ကို ယုံကြည်​စိတ်ချ​နိုင်ပါတယ်။ ကျွန်တော်တို့ တစ်ယောက်ချင်း​စီ​လည်း အဲဒီလို စိတ်ပိုင်းဖြတ်​ထားချင်​ကြပါတယ်။ ကျွန်တော်တို့​အတွက် ယေရှု လုပ်ပေးခဲ့​သမျှကို ကျေးဇူးတင်​လေးမြတ်​ကြောင်း ပြမယ်၊ ဘုရား အကူအညီကို ယုံကြည်​စိတ်ချ​ပြီး တခြား​သူတွေကို နှိမ့်ချစွာ ကူညီ​ပေးမယ်​ဆိုရင် မာဂဒလမာရိ​ရဲ့ ယုံကြည်ခြင်းကို အတုယူ​ရာ ရောက်​ပါလိမ့်မယ်။