ကျမ်းစာထဲမှာ နှစ်သိမ့်စကားတွေ ပါတယ်။ (ရောမ ၁၅:၄) ခက်ခဲတဲ့ အခြေအနေ ကြုံရသူတွေ၊ စိတ်ဒုက္ခ ရောက်နေသူတွေကို နှစ်သိမ့်ပေးတဲ့ ကျမ်းချက်တချို့ကို သုံးသပ်ကြည့်ကြရအောင်။

ဒီဆောင်းပါးမှာ

•  ဒုက္ခရောက်ခြင်း

•  ချစ်ရသူ ဆုံးပါးသွားခြင်း

•  အပြစ်ကြီးတယ်လို့ ခံစားနေရခြင်း

•  ဝမ်းနည်းခြင်း

•  ဖျားနာခြင်း

•  စိုးရိမ်ပူပန်ခြင်း

•  စစ်ပွဲ

•  အနာဂတ်အတွက် စိုးရိမ်ခြင်း

 ဖိလိပ္ပိ ၄:၁၃။ “ကျွန်တော့်ကို အစွမ်းခွန်အား ပေးတဲ့ ဘုရားသခင်ကြောင့် အရာရာကို စွမ်းဆောင်နိုင်” တယ်။

 အဓိပ္ပာယ်။ ဘာပြဿနာကိုမဆို ရင်ဆိုင်ဖြေရှင်းနိုင်အောင် ဘုရားက အစွမ်းခွန်အား ပေးနိုင်တယ်။

 တမန်တော် ၂၄:၁၅။ “ရှင်ပြန်ထမြောက်လာမယ်။”

 အဓိပ္ပာယ်။ ကျွန်တော်တို့ ချစ်ရတဲ့ ကွယ်လွန်သူတွေကို ဘုရား အသက်ပြန်ရှင်စေနိုင်တယ်။

 ဆာလံ ၁၀၃:၁၂။ “နေထွက်ရာအရပ်နဲ့ နေဝင်ရာအရပ် အလှမ်းဝေးသလို အပြစ်တွေကို ငါတို့နဲ့ အလှမ်းဝေးစေတယ်။”

 အဓိပ္ပာယ်။ ဘုရား ခွင့်လွှတ်တဲ့အခါ ကျွန်တော်တို့ရဲ့ အပြစ်တွေကို အဝေးကြီးမှာ ထားပေးတယ်။ ကျွန်တော်တို့ကို ပြစ်တင်ဝေဖန်ဖို့၊ ဒဏ်ပေးဖို့ အဲဒီအပြစ်တွေကို ပြန်မဖော်ဘူး။

 ဆာလံ ၃၄:၁၈။ “ယေဟောဝါဟာ စိတ်ကြေကွဲနေသူတွေရဲ့ အနီးအပါးမှာ ရှိတယ်။ စိတ်ထောင်းကိုယ်ကြေ ဖြစ်နေသူတွေကို ကယ်တင်တယ်။”

 အဓိပ္ပာယ်။ ဝမ်းနည်းနေတဲ့အခါ ကူညီထောက်မမယ်လို့ ဘုရား ကတိပေးတယ်။ ခံနိုင်ရည် ရှိဖို့ ခွန်အားပေးနိုင်တယ်။

 ဟေရှာယ ၃၃:၂၄။ “ပြည်သူပြည်သားတွေက “နေမကောင်းဘူး” လို့ မညည်းရတော့ဘူး။”

 အဓိပ္ပာယ်။ လူတိုင်း ဒေါင်ဒေါင်မြည် ကျန်းမာနေမယ့်အချိန် ရှိမယ်လို့ ဘုရား ကတိပေးထားတယ်။

 ၁ ပေတရု ၅:၇။ “စိုးရိမ်ပူပန်စရာ ရှိသမျှကို ဘုရားသခင်ဆီ ပုံအပ်ထားလိုက်ပါ။ ဘုရားသခင်ဟာ ခင်ဗျားတို့ကို ဂရုစိုက်တဲ့အရှင် ဖြစ်လို့ပဲ။”

 အဓိပ္ပာယ်။ ကျွန်တော်တို့ ခံနေရတဲ့ဒုက္ခတွေကို သိတယ်၊ ဂရုစိုက်တယ်။ ပြဿနာအခက်အခဲတွေ ဆုတောင်းပြီး ဘုရားအပေါ် ပုံအပ်စေချင်တယ်။

 ဆာလံ ၃၇:၁၁၊ ၂၉။ “စိတ်နူးညံ့သူတွေကတော့ ကမ္ဘာမြေကို ပိုင်ဆိုင်ရလိမ့်မယ်။ များပြားလှတဲ့ ငြိမ်သက်ခြင်းကြောင့် ပျော်ရွှင်ကြည်နူးရလိမ့်မယ်။ . . . ဖြောင့်မတ်သူတွေဟာ ကမ္ဘာမြေကို ပိုင်ဆိုင်ပြီး ထာဝစဉ် နေထိုင်ရလိမ့်မယ်။”

 အဓိပ္ပာယ်။ လူကောင်းတွေ ငြိမ်းချမ်းသာယာတဲ့ ကမ္ဘာမြေကြီးပေါ်မှာ ထာဝစဉ် နေထိုင်ရလိမ့်မယ်။

 ဗျာဒိတ် ၂၁:၄။ “ဘုရားသခင်က သူတို့ရဲ့ မျက်ရည်ရှိသမျှကို သုတ်ပေးလိမ့်မယ်။ သေခြင်း ရှိတော့မှာ မဟုတ်ဘူး။ ငိုကြွေးမြည်တမ်းခြင်း၊ အော်ဟစ်ခြင်း၊ နာကျင်ခြင်းလည်း ရှိတော့မှာ မဟုတ်ဘူး။ အရင်က ဖြစ်ဖူးတာတွေ ကွယ်ပျောက်သွားပြီ။”

 အဓိပ္ပာယ်။ အခုမြင်နေရ၊ ကြုံတွေ့နေရတဲ့ မကောင်းတာအားလုံးကို ဘုရား ဖယ်ရှားပစ်မယ်လို့ ကတိပေးထားတယ်။