ကျမ်းစာပါ အမျိုးသမီးတွေဆီက ဘာသင်ယူနိုင်သလဲ

ဖွင့်ပါ

ကျမ်းစာအဖြေ

ကျမ်းစာမှာ ဖော်ပြထားတဲ့ အမျိုးသမီးတွေဆီကနေ အဖိုးတန် သင်ခန်းစာတွေ သင်ယူနိုင်ပါတယ်။ (ရောမ ၁၅:၄။ ၂ တိမောသေ ၃:၁၆၊ ၁၇) ကျမ်းစာပါ အမျိုးသမီးတချို့အကြောင်း ဒီဆောင်းပါးမှာ အကျဉ်းချုပ် ဖော်ပြလိုက်ပါတယ်။ အများစုက အတုယူစရာ စံနမူနာရှင်တွေ ဖြစ်ကြတယ်။ တချို့ကတော့ သတိပေး စံနမူနာတွေ ဖြစ်ကြတယ်။—၁ ကောရိန္သု ၁၀:၁၁။ ဟီဘရူး ၆:၁၂။

အဘိဂဲလ

အဘိဂဲလက ဘယ်သူလဲ။ အဘိဂဲလဟာ နာဗလဇနီးပါ။ နာဗလဟာ ချမ်းသာကြွယ်ဝပေမဲ့ စရိုက်ကြမ်းတယ်။ အဘိဂဲလကတော့ ချင့်ချိန်တတ်တယ်၊ နှိမ့်ချတယ်။ ချောမောလှပသလို ယေဟောဝါဘုရား နှစ်သက်တဲ့ အရည်အသွေးကောင်းတွေ ရှိတယ်။—၁ ရှမွေလ ၂၅:၃။

အဘိဂဲလ ဘာလုပ်ခဲ့သလဲ။ အဖြစ်ဆိုး မကြုံရအောင် ဉာဏ်ပညာ၊ ပိုင်းခြားဉာဏ်နဲ့ လုပ်ဆောင်ခဲ့တယ်။ အစ္စရေးမင်းလောင်း ဒါဝိဒ် ဝရမ်းပြေးဘဝနဲ့ ပုန်းခိုနေတဲ့ နေရာအနီးမှာ အဘိဂဲလနဲ့ နာဗလတို့ နေထိုင်ကြတယ်။ ဒါဝိဒ်နဲ့ အပေါင်းပါတွေ ပုန်းအောင်းနေတုန်း နာဗလရဲ့ သိုးအုပ်တွေကို ဓားပြရန်ကနေ ကာကွယ်ပေးခဲ့ကြတယ်။ ဒါဝိဒ်က မိမိလူတွေကို နာဗလဆီ စေလွှတ်ပြီး ရိက္ခာ တောင်းဆိုတဲ့အခါမှာတော့ နာဗလက ရင့်ရင့်သီးသီး ပြောဆိုပြီး ငြင်းလိုက်တယ်။ ဒါဝိဒ် ဒေါသ အကြီးအကျယ် ထွက်သွားတယ်။ ဒါနဲ့ ဒါဝိဒ်နဲ့ အပေါင်းပါတွေဟာ နာဗလနဲ့တကွ အိမ်သားအားလုံးကို သတ်ဖို့ ထွက်လာတယ်။—၁ ရှမွေလ ၂၅:၁၀-၁၂၊ ၂၂။

ခင်ပွန်းရဲ့ လုပ်ရပ်ကို အဘိဂဲလ ကြားတဲ့အခါ လုပ်စရာရှိတာကို ချက်ချင်း လုပ်ဆောင်တော့တယ်။ ဒါဝိဒ်နဲ့ အပေါင်းပါတွေအတွက် စားစရာတွေ ပြင်ဆင်ပြီး အစေခံတွေနဲ့ ပို့လိုက်တယ်။ ကိုယ်တိုင် ဒါဝိဒ်ကို တောင်းပန်ဖို့ လိုက်သွားတယ်။ (၁ ရှမွေလ ၂၅:၁၄-၁၉၊ ၂၄-၃၁) အဘိဂဲလရဲ့ လက်ဆောင်၊ နှိမ့်ချမှု၊ ပညာရှိ အကြံပေးချက်ကို ဒါဝိဒ် တွေ့မြင်ကြားသိလိုက်ရတယ်။ ဒါကြောင့် လူမသတ်မိအောင် အဘိဂဲလကို ဘုရားသခင် သုံးပြီး တားနေတာလို့ ဒါဝိဒ် အသိအမှတ်ပြုခဲ့တယ်။ (၁ ရှမွေလ ၂၅:၃၂၊ ၃၃) မကြာခင် နာဗလ သေဆုံးသွားတယ်။ အဘိဂဲလဟာ ဒါဝိဒ်ဇနီး ဖြစ်လာတယ်။—၁ ရှမွေလ ၂၅:၃၇-၄၁။

အဘိဂဲလဆီကနေ ဘာသင်ယူနိုင်သလဲ။ အဘိဂဲလဟာ ချောမောလှပပြီး ချမ်းသာကြွယ်ဝပေမဲ့ ဘဝင်မမြင့်ခဲ့ဘူး။ သင့်မြတ်ဖို့ ကိုယ့်အမှား မဟုတ်ပေမဲ့ တလိုတလား တောင်းပန်ခဲ့တယ်။ တင်းမာနေတဲ့ အခြေအနေကို လိမ္မာပါးနပ်စွာ၊ သတ္တိရှိရှိ၊ ဉာဏ်ပညာရှိရှိ အေးအေးဆေးဆေး ဖြေရှင်းခဲ့တယ်။

▸ အဘိဂဲလအကြောင်း ထပ်လေ့လာချင်ရင် “ဉာဏ်အမြော်အမြင်ရှိရှိ သူပြုမူခဲ့” ဆောင်းပါးကို ကြည့်ပါ။

ဒေဗောရ

ဒေဗောရက ဘယ်သူလဲ။ အစ္စရေးတွေရဲ့ ဘုရား ယေဟောဝါရဲ့ ပရောဖက်မတစ်ဦး ဖြစ်တယ်။ ဘုရားအလိုတော်ကို အစ္စရေးတွေဆီ ပြောပြရတဲ့ တာဝန် ရထားတယ်။ အစ္စရေးတွေရဲ့ ပြဿနာတွေကို ဖြေရှင်းပေးဖို့လည်း သူ့ကို ဘုရား အသုံးပြုတယ်။—တရားသူကြီး ၄:၄၊ ၅။

ဒေဗောရ ဘာလုပ်ခဲ့သလဲ။ ပရောဖက်မ ဒေဗောရဟာ ဘုရားရဲ့ လူတွေကို သတ္တိရှိရှိ ထောက်မကူညီပေးခဲ့တယ်။ ဘုရားရဲ့ ညွှန်ကြားချက်အရ အစ္စရေးစစ်တပ်ကို ဗာရက် ဦးဆောင်ပြီး ဖိနှိပ်သူ ခါနန်လူတွေကို တိုက်ဖို့ ဒေဗောရ ဆင့်ဆိုတယ်။ (တရားသူကြီး ၄:၆၊ ၇) ဒေဗောရပါ လိုက်ခဲ့ဖို့ ဗာရက် ခေါ်တဲ့အခါ မကြောက်မရွံ့ တလိုတလား လက်ခံခဲ့တယ်။—တရားသူကြီး ၄:၈၊ ၉။

အစ္စရေးတွေကို ဘုရား အပြတ်အသတ် အောင်ပွဲခံစေပြီးနောက် ဒေဗောရက ဖြစ်ရပ်ကို သီချင်းစပ်ပြီး ဗာရက်နဲ့အတူ သီဆိုခဲ့တယ်။ သီချင်းထဲမှာ ခါနန်လူတွေ စစ်ရှုံးအောင် ကူညီပေးသူ ရဲစွမ်းသတ္တိရှိတဲ့ အမျိုးသမီး ယေလအကြောင်းလည်း ပါတယ်။—တရားသူကြီး အခန်းကြီး ၅။

ဒေဗောရဆီကနေ ဘာသင်ယူနိုင်သလဲ။ ဒေဗောရဟာ ကိုယ်ကျိုးစွန့်တတ်တယ်၊ ရဲစွမ်းသတ္တိရှိတယ်။ ဘုရားရှေ့မှာ မှန်ရာကို လုပ်ဖို့ တခြားသူတွေကို အားပေးတယ်။ မှန်ရာလုပ်သူတွေကိုလည်း သဘောထားကြီးစွာ ဂုဏ်တင်ခဲ့တယ်။

▸ ဒေဗောရအကြောင်း ထပ်လေ့လာချင်ရင် “အစ္စရေးလူမျိုးရဲ့ မိခင်သဖွယ် ငါဖြစ်လာ” ဆောင်းပါးကို ကြည့်ပါ။

ဒေလိလ

ဒေလိလက ဘယ်သူလဲ။ အစ္စရေး တရားသူကြီး ရှံဆုန်ရဲ့ ချစ်သူ ဖြစ်တယ်။—တရားသူကြီး ၁၆:၄၊ ၅။

ဒေလိလ ဘာလုပ်ခဲ့သလဲ။ ဖိလိတိတွေလက်ကနေ အစ္စရေးတွေကို ကယ်တင်ဖို့ ရှံဆုန်ကို ဘုရား အသုံးပြုနေတယ်။ ရှံဆုန်ကို သစ္စာဖောက်ဖို့ ဖိလိတိမင်းတွေဆီက ငွေကို ဒေလိလ လက်ခံခဲ့တယ်။ ရှံဆုန်ရဲ့ ခွန်အားကြီးမှုကြောင့် ဖိလိတိတွေ မထိန်းချုပ်နိုင်ကြဘူး။ (တရားသူကြီး ၁၃:၅) ဒါကြောင့် ဒေလိလကို အကူအညီ တောင်းကြတယ်။

ရှံဆုန် ခွန်အားကြီးရတဲ့ အကြောင်းရင်းကို သိအောင် လုပ်ပေးဖို့ ဖိလိတိတွေက ဒေလိလကို ငွေပေးကြတယ်။ ငွေကို ဒေလိလ လက်ခံလိုက်တယ်။ အကြိမ်ကြိမ် ကြိုးစားပြီးနောက် ရှံဆုန်ရဲ့ လျှို့ဝှက်ချက်ကို ဒေလိလ သိသွားတယ်။ (တရားသူကြီး ၁၆:၁၅-၁၇) လျှို့ဝှက်ချက် ပြောပြလိုက်တဲ့အတွက် ဖိလိတိတွေက ရှံဆုန်ကို ဖမ်းဆီးထောင်ချလိုက်ကြတယ်။—တရားသူကြီး ၁၆:၁၈-၂၁။

ဒေလိလဆီကနေ ဘာသင်ယူနိုင်သလဲ။ ဒေလိလက သတိပေး စံနမူနာ ဖြစ်တယ်။ တစ်ကိုယ်ကောင်းဆန်ပြီး ငွေမက်တဲ့အတွက် ယေဟောဝါဘုရားရဲ့ ကျေးကျွန်တစ်ယောက်ကို လှည့်စားပြီး သစ္စာဖောက်ခဲ့တယ်။

ဧသတာ

ဧသတာက ဘယ်သူလဲ။ ပါးရှားဘုရင် အာရွှေရုရဲ့ မိဖုရား ဂျူးအမျိုးသမီး ဖြစ်တယ်။

ဧသတာ ဘာလုပ်ခဲ့သလဲ။ မိဖုရား ဧသတာက မိမိဩဇာအာဏာကို သုံးပြီး မိမိလူမျိုး မျိုးဖြုတ်သတ်ဖြတ်ခံရမယ့် အခြေအနေကို တားဆီးခဲ့တယ်။ ပါးရှား အင်ပါယာမှာ ရှိတဲ့ ဂျူးအားလုံးကို သတ်မှတ်ထားတဲ့ နေ့မှာ သုတ်သင်ပယ်ရှင်းဖို့ အရာရှိတစ်ယောက်က အမိန့်ထုတ်ပြန်လိုက်ကြောင်း ဧသတာ သိလိုက်ရတယ်။ ဒီဆိုးရွားတဲ့ အမှုကို ကြံစည်သူဟာ ဝန်ကြီးချုပ် ဟာမန် ဖြစ်နေတယ်။ (ဧသတာ ၃:၁၃-၁၅။ ၄:၁၊ ၅) အသက်အန္တရာယ် ရှိပေမဲ့ အဲဒီအကြံအစည်ကို ဝမ်းကွဲအစ်ကို မော်ဒကဲရဲ့ အကူအညီနဲ့ ဘုရင်အာရွှေရု သိအောင် ဧသတာ ပြောပြခဲ့တယ်။ (ဧသတာ ၄:၁၀-၁၆။ ၇:၁-၁၀) အဲဒီနောက် အာရွှေရုက ဂျူးတွေ ကိုယ့်အသက်အတွက် ခုခံကာကွယ်ခွင့် အမိန့် ထုတ်ပြန်ဖို့ ဧသတာနဲ့ မော်ဒကဲကို ခွင့်ပြုလိုက်တယ်။ ဂျူးတွေဟာ ရန်သူတွေကို အနိုင်ယူနိုင်ခဲ့ကြတယ်။—ဧသတာ ၈:၅-၁၁။ ၉:၁၆၊ ၁၇။

ဧသတာဆီကနေ ဘာသင်ယူနိုင်သလဲ။ မိဖုရား ဧသတာဟာ ရဲစွမ်းသတ္တိ၊ နှိမ့်ချမှု၊ ကျိုးနွံမှု စံနမူနာကို ထူးထူးခြားခြား တင်ပြခဲ့တယ်။ (ဆာလံ ၃၁:၂၄။ ဖိလိပ္ပိ ၂:၃) ဧသတာဟာ ချောမောလှပပြီး အခွင့်အာဏာ ရှိပေမဲ့ အကြံပေးချက်ကို လက်ခံပြီး အကူအညီ ရှာယူခဲ့တယ်။ ခင်ပွန်းနဲ့ ပြောဆိုတဲ့အခါမှာလည်း လိမ္မာပါးနပ်မှု၊ ရိုသေလေးစားမှု ရှိတယ်။ ရဲရင့်တယ်။ ဂျူးတွေ အသက်အန္တရာယ် ကြုံနေရချိန်မှာ မိမိဟာ ဂျူးတစ်ယောက် ဖြစ်ကြောင်း သတ္တိရှိရှိ ထုတ်ပြောခဲ့တယ်။

▸ ဧသတာအကြောင်း ထပ်လေ့လာချင်ရင် “ဘုရားသခင့် လူမျိုးဘက် သူရပ်တည်ခဲ့၊” “ကိုယ်ကျိုးမငဲ့ဘဲ ပညာရှိရှိ၊ သတ္တိရှိရှိ သူလုပ်ဆောင်ခဲ့” ဆောင်းပါးတွေကို ဖတ်ပါ။

ဧဝ

ဧဝက ဘယ်သူလဲ။ ကျမ်းစာမှာ ဖော်ပြတဲ့ ပထမဦးဆုံး အမျိုးသမီး ဖြစ်တယ်။

ဧဝ ဘာလုပ်ခဲ့သလဲ။ ဘုရားရဲ့ ရှင်းလင်းတဲ့ ပညတ်ကို ဧဝ မနာခံခဲ့ဘူး။ ခင်ပွန်းအာဒံလိုပဲ ဧဝလည်း လွတ်လပ်စွာ ရွေးချယ်ပိုင်ခွင့် ရှိတဲ့ ပြည့်ဝစုံလင်သူ၊ မေတ္တာ၊ ဉာဏ်ပညာစတဲ့ ဘုရားနှစ်သက်တဲ့ အရည်အသွေးတွေကို မွေးမြူနိုင်တဲ့သူအဖြစ် ဖန်ဆင်းခံခဲ့ရတယ်။ (ကမ္ဘာဦး ၁:၂၇) အပင်တစ်ပင်ရဲ့ အသီးကို စားရင် သေမယ်လို့ အာဒံကို ဘုရား မိန့်မှာထားမှန်း ဧဝ သိတယ်။ ဒါပေမဲ့ သေမှာ မဟုတ်ဘူးလို့ ယုံကြည်အောင် လှည့်စားခံလိုက်ရတယ်။ ဘုရားစကား နားမထောင်ရင် ပိုကောင်းတဲ့ အသက်တာ ပိုင်ဆိုင်မယ်လို့ ဧဝ ယုံကြည်သွားတယ်။ အသီးကို ခူးစားပြီး မိမိခင်ပွန်းလည်း စားဖို့ သွေးဆောင်ခဲ့တယ်။—ကမ္ဘာဦး ၃:၁-၆။ ၁ တိမောသေ ၂:၁၄။

ဧဝဆီကနေ ဘာသင်ယူနိုင်သလဲ။ မှားယွင်းတဲ့ ဆန္ဒတွေကို မပြတ် တွေးတောနေခြင်းဟာ အန္တရာယ်ရှိကြောင်း ဧဝက သတိပေး စံနမူနာပါပဲ။ ဘုရားရဲ့ ရှင်းလင်းတဲ့ ပညတ်ကို ဆန့်ကျင်ပြီး ကိုယ်မပိုင်ဆိုင်တဲ့အရာကို လိုချင်တဲ့စိတ် ကြီးထွားလာခွင့် ပြုခဲ့တယ်။—ကမ္ဘာဦး ၃:၆။ ၁ ယောဟန် ၂:၁၆။

ဟန္န

ဟန္နက ဘယ်သူလဲ။ ဧလကာနရဲ့ ဇနီး၊ ရှေးအစ္စရေးပြည်က ထင်ရှားတဲ့ ပရောဖက် ရှမွေလရဲ့ မိခင် ဖြစ်တယ်။—၁ ရှမွေလ ၁:၁၊ ၂၊ ၄-၇။

ဟန္န ဘာလုပ်ခဲ့သလဲ။ ဟန္နမှာ သားသမီး မရှိချိန်တုန်းက ဘုရား ပေးတဲ့ နှစ်သိမ့်မှုကို မျှော်ကိုးခဲ့တယ်။ ဟန္နရဲ့ ခင်ပွန်းမှာ ဇနီးနှစ်ယောက် ရှိတယ်။ ပြိုင်ဘက်ဇနီး ပေနိန္နမှာ သားသမီးတွေ ရှိတယ်။ ဟန္နကျတော့ အိမ်ထောင်သက် အတော်ကြာတာတောင် သားသမီး မရဘူး။ ပေနိန္နက ဟန္နကို မခံချိမခံသာ ဖြစ်အောင် ကဲ့ရဲ့ပြောဆိုတယ်။ ဟန္နကတော့ ဘုရားဆီ နှစ်သိမ့်မှု တောင်းခံခဲ့တယ်။ သားတစ်ယောက် ပေးမယ်ဆိုရင် အစ္စရေးတွေ ဝတ်ပြုကိုးကွယ်တဲ့နေရာ၊ ဝတ်ပြုရာတဲတော်မှာ ဘုရားအမှုတော် ဆောင်ဖို့ ပေးအပ်ပါ့မယ်ဆိုပြီး ဟန္န သစ္စာကတိပြုခဲ့တယ်။—၁ ရှမွေလ ၁:၁၁။

ဟန္နရဲ့ ဆုတောင်းချက်ကို ဘုရား ဖြေကြားပေးတဲ့အတွက် ရှမွေလ မွေးလာတယ်။ ဟန္နဟာ ကတိအတိုင်း ရှမွေလ ကလေးအရွယ်မှာပဲ တဲတော်မှာ အမှုဆောင်ဖို့ ပေးအပ်ခဲ့တယ်။ (၁ ရှမွေလ ၁:၂၇၊ ၂၈) နှစ်တိုင်း ရှမွေလအတွက် လက်ပြတ်ဝတ်ရုံ ချုပ်ပြီး ယူလာပေးတယ်။ နောက်ပိုင်း ဟန္နကို ဘုရား ကောင်းချီးပေးတဲ့အတွက် သားသုံးယောက်၊ သမီးနှစ်ယောက်၊ စုစုပေါင်း ငါးယောက် ရလာတယ်။—၁ ရှမွေလ ၂:၁၈-၂၁။

ဟန္နဆီကနေ ဘာသင်ယူနိုင်သလဲ။ ဟန္နဟာ လှိုက်လှိုက်လှဲလှဲ ဆုတောင်းတဲ့အတွက် စမ်းသပ်မှုတွေကို ခံရပ်နိုင်ခဲ့တယ်။ ရှမွေလ ပထမစောင် ၂:၁-၁၀ မှာ ပါတဲ့ ဟန္နရဲ့ ကျေးဇူးတင်ချီးမွမ်းတဲ့ ဆုတောင်းချက်မှာ ဘုရားကို အလွန်ယုံကြည်ကြောင်း တွေ့ရတယ်။

▸ ဟန္နအကြောင်း ထပ်လေ့လာချင်ရင် “ဘုရားသခင်ဆီ သူရင်ဖွင့်ဆုတောင်းခဲ့” ဆောင်းပါးကို ကြည့်ပါ။
▸ ရှေးအချိန်က မယားအများယူတဲ့ ဓလေ့ကို ဘုရား ခွင့်ပြုရတဲ့ အကြောင်းရင်းနဲ့ပတ်သက်ပြီး “ဘုရားသခင်သည် မယားအများယူခြင်း ဓလေ့ကို နှစ်သက်သလော” ဆောင်းပါးကို ကြည့်ပါ။

ယေလ

ယေလက ဘယ်သူလဲ။ အစ္စရေးလူမျိုး မဟုတ်သူ ဟေဗာရဲ့ ဇနီး ဖြစ်တယ်။ ယေလဟာ ဘုရားလူမျိုးကို သတ္တိရှိရှိ ထောက်မခဲ့တယ်။

ယေလ ဘာလုပ်ခဲ့သလဲ။ ယေလရဲ့ တဲကို ရောက်လာတဲ့ ခါနန် ဗိုလ်ချုပ် သိသရကို ရဲရဲရင့်ရင့် ရင်ဆိုင်ခဲ့တယ်။ အစ္စရေးတွေနဲ့ စစ်တိုက်တော့ သိသရ စစ်ရှုံးပြီး ပုန်းခိုမယ့်နေရာကို ရှာနေတယ်။ ယေလက သိသရကို ထွက်ကြိုပြီး တဲထဲမှာ ပုန်းခိုအနားယူစေတယ်။ သိသရ အိပ်ပျော်သွားတဲ့အခါ ယေလက သတ်လိုက်တယ်။—တရားသူကြီး ၄:၁၇-၂၁။

ယေလရဲ့ လုပ်ရပ်က ဒေဗောရရဲ့ ကြိုဟောချက်ကို ပြည့်စုံစေခဲ့တယ်– “ယေဟောဝါဘုရားက သိသရကို အမျိုးသမီးတစ်ယောက်လက်ထဲ အပ်လိမ့်မယ်။” (တရားသူကြီး ၄:၉) ယေလရဲ့ လုပ်ရပ်ကြောင့် “အမျိုးသမီးတွေထဲမှာ အချီးမွမ်းထိုက်ဆုံးပဲ” လို့ ချီးကျူးခံရတယ်။—တရားသူကြီး ၅:၂၄။

ယေလဆီကနေ ဘာသင်ယူနိုင်သလဲ။ ယေလဟာ အစပြုလုပ်ဆောင်တတ်တယ်။ သတ္တိရှိတယ်။ ကြိုဟောချက်တွေကို ဘုရားသခင် ပြည့်စုံစေနိုင်တယ်ဆိုတာ ယေလရဲ့ အဖြစ်က ဖော်ပြတယ်။

ယေဇဗေလ

ယေဇဗေလက ဘယ်သူလဲ။ အစ္စရေးဘုရင် အာဟပ်ရဲ့ မိဖုရား ဖြစ်တယ်။ ယေဇဗေလဟာ အစ္စရေးလူမျိုး မဟုတ်ဘူး။ ယေဟောဝါဘုရားကိုလည်း မကိုးကွယ်ဘူး။ ခါနန်ဘုရား ဗာလကို ကိုးကွယ်တယ်။

ယေဇဗေလ ဘာလုပ်ခဲ့သလဲ။ မိဖုရား ယေဇဗေလဟာ ကြိုးကိုင်ချယ်လှယ်ချင်တယ်။ ရက်စက်တယ်။ ကြမ်းတမ်းရမ်းကားတယ်။ ဗာလဝတ်ပြုရေးအပြင် အဲဒီဝတ်ပြုရေးနဲ့ ဆက်နွှယ်တဲ့ လိင်အကျင့်ယိုယွင်းမှုကို အားပေးအားမြှောက်ပြုတယ်။ တစ်ချိန်တည်းမှာ စစ်မှန်တဲ့ဘုရား ယေဟောဝါရဲ့ ဝတ်ပြုရေးကို ဖယ်ရှားဖို့ ကြိုးစားခဲ့တယ်။—၁ ဘုရင်များ ၁၈:၄၊ ၁၃။ ၁၉:၁-၃။

ယေဇဗေလဟာ မိမိအတ္တဆန္ဒတွေ ဖြည့်ဆည်းဖို့ လိမ်လည်တတ်တဲ့အပြင် လူသတ်ဖို့လည်း ဝန်မလေးဘူး။ (၁ ဘုရင်များ ၂၁:၈-၁၆) ဘုရား ကြိုဟောတဲ့အတိုင်း ယေဇဗေလဟာ အသေဆိုးနဲ့ သေရပြီး သင်္ဂြိုဟ်ခွင့် မရခဲ့ဘူး။—၁ ဘုရင်များ ၂၁:၂၃။ ၂ ဘုရင်များ ၉:၁၀၊ ၃၂-၃၇။

ယေဇဗေလဆီကနေ ဘာသင်ယူနိုင်သလဲ။ ယေဇဗေလက သတိပေး စံနမူနာ ဖြစ်တယ်။ ကိုယ်ကျင့်တရား ယိုယွင်းပြီး ကောက်ကျစ်စဉ်းလဲတဲ့အတွက် အရှက်မဲ့တဲ့၊ အကျင့်ပျက်တဲ့၊ ထင်ရာစိုင်းတတ်တဲ့ အမျိုးသမီးတွေကို ယေဇဗေလလို့ ခေါ်လေ့ရှိကြတယ်။

လေအာ

လေအာက ဘယ်သူလဲ။ ရှေးခေတ် ယာကုပ်ရဲ့ ပထမဇနီး ဖြစ်တယ်။ ညီမဖြစ်သူ ရာခေလက ယာကုပ်ရဲ့ ဒုတိယဇနီး ဖြစ်တယ်။—ကမ္ဘာဦး ၂၉:၂၀-၂၉။

လေအာ ဘာလုပ်ခဲ့သလဲ။ လေအာက ယာကုပ်အတွက် သားခြောက်ယောက် မွေးပေးခဲ့တယ်။ (ရုသ ၄:၁၁) ယာကုပ်က လေအာကို မဟုတ်ဘဲ ရာခေလကို လက်ထပ်ဖို့ ရည်ရွယ်ခဲ့တာ။ ဒါပေမဲ့ သူတို့ရဲ့ ဖခင် လာဗန်က ရာခေလအစား လေအာကို ပေးစားခဲ့တယ်။ လှည့်စားခံရပြီး လေအာကို လက်ထပ်လိုက်ရမှန်း ယာကုပ် သိသွားတဲ့အခါ လာဗန်နဲ့ ထိပ်တိုက်ရင်ဆိုင်တော့တယ်။ လာဗန်က သမီးကြီးကို မပေးစားခင် သမီးငယ်ကို ပေးစားရိုး ထုံးစံ မရှိဘူးလို့ နားချခဲ့ရတယ်။ တစ်ပတ်ကြာပြီးနောက် ရာခေလကို ယာကုပ် လက်ထပ်ခဲ့တယ်။—ကမ္ဘာဦး ၂၉:၂၆-၂၈။

ယာကုပ်က လေအာထက် ရာခေလကို ပိုချစ်တယ်။ (ကမ္ဘာဦး ၂၉:၃၀) ဒါနဲ့ လေအာဟာ ယာကုပ်ရဲ့ မေတ္တာ ရဖို့ ညီမကို မနာလိုဖြစ်ခဲ့တယ်။ လေအာရဲ့ ခံစားချက်ကို ဘုရား သတိပြုမိတဲ့အတွက် လေအာကို သားခြောက်ယောက်၊ သမီးတစ်ယောက်၊ စုစုပေါင်း သားသမီးခုနစ်ယောက် ကောင်းချီးပေးခဲ့တယ်။—ကမ္ဘာဦး ၂၉:၃၁။

လေအာဆီကနေ ဘာသင်ယူနိုင်သလဲ။ လေအာက ဘုရားသခင်ကို ဆုတောင်းပြီး အားကိုးခဲ့တယ်။ စိတ်ဆင်းရဲစရာ မိသားစု အခြေအနေကြောင့် ဘုရားရဲ့ ထောက်မမှုကို မမြင်ဘဲ မနေခဲ့ဘူး။ (ကမ္ဘာဦး ၂၉:၃၂-၃၅။ ၃၀:၂၀) အချိန်ကာလတစ်ခုအထိ ဘုရား ခွင့်ပြုခဲ့တဲ့ မယားအများယူခြင်းရဲ့ လက်တွေ့ဘဝကို လေအာရဲ့ အဖြစ်ကနေ တွေ့နိုင်ပါတယ်။ အိမ်ထောင်ရေးနဲ့ပတ်သက်ပြီး ဘုရားရဲ့ စံနှုန်းကတော့ တစ်လင်တစ်မယားစနစ်ပါပဲ။—မဿဲ ၁၉:၄-၆။

▸ လေအာအကြောင်း ထပ်လေ့လာချင်ရင် “‘ဣသရေလအမျိုးကို တည်ထောင်သော’ စိတ်သောကရောက်ခဲ့သည့် ညီအစ်မများ” ဆောင်းပါးကို ကြည့်ပါ။
▸ မယားအများယူတဲ့ဓလေ့ကို ဘုရား ခွင့်ပြုရတဲ့ အကြောင်းရင်းနဲ့ပတ်သက်ပြီး “ဘုရားသခင်သည် မယားအများယူခြင်းဓလေ့ကို နှစ်သက်သလော” ဆောင်းပါးကို ကြည့်ပါ။

မာသ

မာသက ဘယ်သူလဲ။ လာဇရုနဲ့ မာရိရဲ့ အစ်မ ဖြစ်တယ်။ ဂျေရုဆလင်မြို့နားက ဗေသနိရွာမှာ မောင်နှမသုံးယောက် နေထိုင်ကြတယ်။

မာသ ဘာလုပ်ခဲ့သလဲ။ မာသဟာ ယေရှုရဲ့ ရင်းနှီးတဲ့ မိတ်ဆွေပါ။ ယေရှုက “မာသ၊ မာရိနဲ့ လာဇရုတို့ကို ချစ်ခင်” တယ်။ (ယောဟန် ၁၁:၅) မာသဟာ ဧည့်ဝတ်ကျေပွန်တယ်။ တစ်ခါက ယေရှု လာလည်ပတ်ချိန်မှာ မာသက ဧည့်ဝတ်ပြုဖို့ အလုပ်များနေပေမဲ့ မာရိကတော့ ယေရှုစကားကို ထိုင်နားထောင်နေတယ်။ မာရိ ဝိုင်းကူ မလုပ်တဲ့အတွက် ယေရှုကို မာသ တိုင်ပြောခဲ့တယ်။ မာသကို ယေရှု ကြင်နာစွာ တည့်မတ်ပေးခဲ့တယ်။—လုကာ ၁၀:၃၈-၄၂။

လာဇရု ဖျားနာနေတဲ့အခါ မာသနဲ့ မာရိက ယေရှု ကျန်းမာစေနိုင်တယ်ဆိုတာ ယုံကြည်ပြီး ယေရှုကို အကြောင်းကြားလိုက်တယ်။ (ယောဟန် ၁၁:၃၊ ၂၁) ဒါပေမဲ့ လာဇရု သေဆုံးသွားတယ်။ ယေရှုကို ပြောတဲ့ စကားတွေအရ မာသဟာ ရှင်ပြန်ထမြောက်ခြင်း ကျမ်းစာကတိကို ယုံကြည်ကြောင်း၊ မောင်ဖြစ်သူကို ယေရှု အသက်ပြန်ရှင်စေနိုင်တယ်ဆိုတာ ယုံကြည်ကြောင်း တွေ့ရတယ်။—ယောဟန် ၁၁:၂၀-၂၇။

မာသဆီကနေ ဘာသင်ယူနိုင်သလဲ။ မာသဟာ အထူး ဧည့်ဝတ်ကျေပွန်သူ ဖြစ်တယ်။ ဆုံးမမှုကို တလိုတလား လက်ခံခဲ့တယ်။ သူ့ရဲ့ ခံစားချက်၊ ယုံကြည်ချက်တွေကို ပွင့်ပွင့်လင်းလင်း ဖော်ပြတတ်တယ်။

▸ မာသအကြောင်း ထပ်လေ့လာချင်ရင် “ကျွန်မ ယုံပါတယ်” ဆောင်းပါးကို ကြည့်ပါ။

မာရိ (ယေရှုမိခင်)

မာရိက ဘယ်သူလဲ။ ဂျူးအမျိုးသမီးငယ် ဖြစ်တယ်။ ဘုရားသားတော်ကို အံ့ဖွယ်နည်းနဲ့ ကိုယ်ဝန်ဆောင်ပြီး ယေရှု မွေးဖွားချိန်အထိ အပျိုစင်တစ်ဦး ဖြစ်ခဲ့တယ်။

မာရိ ဘာလုပ်ခဲ့သလဲ။ ဘုရားအလိုတော်ကို မာရိ နှိမ့်ချစွာ လုပ်ဆောင်ခဲ့တယ်။ ကြာရှည်စွာ စောင့်မျှော်ခဲ့ကြတဲ့ မေရှိယကို ကိုယ်ဝန်ဆောင်ကာ မွေးဖွားရမယ်လို့ ကောင်းကင်တမန် ပြောတဲ့အချိန်မှာ မာရိဟာ ယောသပ်နဲ့ စေ့စပ်ထားတယ်။ (လုကာ ၁:၂၆-၃၃) ဒါပေမဲ့ တာဝန်ကို တလိုတလား လက်ခံခဲ့တယ်။ ယေရှုကို မွေးဖွားပြီးနောက်ပိုင်း မာရိနဲ့ ယောသပ်မှာ သားလေးယောက်၊ သမီး အနည်းဆုံး နှစ်ယောက် ရှိလာတယ်။ ဒါကြောင့် မာရိဟာ အပျိုစင်ဘဝနဲ့ ဆက်နေသွားတာ မဟုတ်ဘူး။ (မဿဲ ၁၃:၅၅၊ ၅၆) အထူးအခွင့်အရေး ရရှိခဲ့ပေမဲ့ ယေရှု အမှုဆောင်ချိန်အတွင်းမှာရော အစောပိုင်း ခရစ်ယာန်အသင်းသား ဖြစ်ချိန်မှာပါ အထူးတလည် ဂုဏ်တင်ချီးမွမ်းခံရဖို့ တစ်ခါမှ မကြိုးစားခဲ့ဘူး။

မာရိဆီကနေ ဘာသင်ယူနိုင်သလဲ။ မာရိဟာ ကြီးလေးတဲ့ တာဝန်ကို တလိုတလား လက်ခံတဲ့ သစ္စာရှိ အမျိုးသမီးပါ။ ကျမ်းစာကို ကောင်းကောင်း သိထားတယ်။ လုကာ ၁:၄၆-၅၅ မှာ ပါတဲ့ စကားကို မာရိ ပြောချိန်မှာ ကျမ်းချက် ၂၀ ခန့်ကို ကိုးကားခဲ့တယ်။

▸ မာရိအကြောင်း ထပ်လေ့လာချင်ရင် “မာရိ၏ ပုံသက်သေက ကျွန်ုပ်တို့ကို သင်ပေးနိုင်သည့်အရာ” ဆောင်းပါးကို ကြည့်ပါ။

မာရိ (မာသညီမ၊ လာဇရုအစ်မ)

မာရိက ဘယ်သူလဲ။ မောင် လာဇရု၊ အစ်မ မာသနဲ့ မာရိတို့ဟာ ယေရှုရဲ့ ရင်းနှီးတဲ့ မိတ်ဆွေတွေပါ။

မာရိ ဘာလုပ်ခဲ့သလဲ။ ယေရှုကို ဘုရားသားတော်အဖြစ် တန်ဖိုးထားကြောင်း မာရိ အကြိမ်ကြိမ် ဖော်ပြခဲ့တယ်။ မောင် လာဇရု မသေဆုံးအောင် ယေရှု လုပ်ပေးနိုင်တာကို ယုံကြည်ကြောင်း ဖော်ပြတယ်။ လာဇရုကို ယေရှု ရှင်ပြန်ထမြောက်ပေးချိန်မှာလည်း မာရိ ရှိနေခဲ့တယ်။ မာရိဟာ အိမ်အလုပ်တွေ ဝိုင်းကူမလုပ်ဘဲ ယေရှုစကားကို နားထောင်တဲ့အတွက် အစ်မ မာသရဲ့ ပြစ်တင်မှုကို ခံခဲ့ရတယ်။ ဒါပေမဲ့ ဘုရားနဲ့ပတ်သက်တဲ့ အမှန်တရားကို ပိုတန်ဖိုးထားတဲ့အတွက် မာရိကို ယေရှု ချီးမွမ်းခဲ့တယ်။—လုကာ ၁၀:၃၈-၄၂။

တစ်ခါက မာရိဟာ ယေရှုရဲ့ ခေါင်းနဲ့ ခြေကို “တန်ဖိုးကြီး ဆီမွှေး” လောင်းခြင်းအားဖြင့် အလွန်ရက်ရောကြောင်း ပြခဲ့တယ်။ (မဿဲ ၂၆:၆၊ ၇) တခြားသူတွေက မာရိကို ဖြုန်းတီးတယ်လို့ အပြစ်တင်ကြတယ်။ ဒါပေမဲ့ ယေရှုက ဘုရားနိုင်ငံတော် “သတင်းကောင်း ဟောလေရာ မြေတစ်ပြင်လုံးမှာ ဒီအမျိုးသမီးကို အမှတ်ရတဲ့အနေနဲ့ သူလုပ်ခဲ့တာတွေကို ပြောကြလိမ့်မယ်” လို့ပြောပြီး မာရိကို ကာကွယ်ခဲ့တယ်။—မဿဲ ၂၄:၁၄။ ၂၆:၈-၁၃။

မာရိဆီကနေ ဘာသင်ယူနိုင်သလဲ။ မာရိဟာ ခိုင်ခံ့တဲ့ ယုံကြည်ခြင်း ရှိအောင် မွေးမြူခဲ့တယ်။ သာမန်ကိစ္စတွေထက် ဘုရားဝတ်ပြုရေးကို ဦးစားထားတယ်။ အတော်အတန် ငွေကုန်ကြေးကျ ရှိပေမဲ့ နှိမ့်ချစွာ ယေရှုကို ဂုဏ်တင်ခဲ့တယ်။

မာဂဒလ မာရိ

မာဂဒလ မာရိက ဘယ်သူလဲ။ ယေရှုရဲ့ သစ္စာရှိ နောက်လိုက် ဖြစ်တယ်။

မာဂဒလ မာရိ ဘာလုပ်ခဲ့သလဲ။ ယေရှုနဲ့ တပည့်တွေ ခရီးလှည့်လည်ချိန်မှာ လိုက်ပါကူညီပေးတဲ့ အမျိုးသမီးတွေထဲမှာ မာဂဒလ မာရိလည်း ပါတယ်။ သူ့ရဲ့ ကိုယ်ပိုင် ပစ္စည်းဥစ္စာတွေကို ရက်ရောစွာ အသုံးပြုပြီး အလုပ်အကျွေးပြုခဲ့တယ်။ (လုကာ ၈:၁-၃) ယေရှုရဲ့ အမှုဆောင်လုပ်ငန်း နိဂုံးပိုင်းမှာရော ယေရှု အသတ်ခံရချိန်မှာပါ မာဂဒလ မာရိ ရှိနေခဲ့တယ်။ အသက်ပြန်ရှင်လာတဲ့ ယေရှုကို အရင်ဆုံး မြင်တွေ့ခွင့်ရသူတွေထဲမှာလည်း ပါတယ်။—ယောဟန် ၂၀:၁၁-၁၈။

မာဂဒလ မာရိဆီကနေ ဘာသင်ယူနိုင်သလဲ။ မာဂဒလ မာရိဟာ ယေရှုရဲ့ အမှုဆောင်လုပ်ငန်းကို ရက်ရောစွာ ထောက်မပေးခဲ့တဲ့ သစ္စာရှိ နောက်လိုက် ဖြစ်တယ်။

မိရိအံ

မိရိအံက ဘယ်သူလဲ။ မောရှေနဲ့ အာရုန်တို့ရဲ့ အစ်မ ဖြစ်တယ်။ ကျမ်းစာမှာ ပရောဖက်မလို့ အခေါ်ခံရသူ ပထမဆုံး အမျိုးသမီး ဖြစ်တယ်။

မိရိအံ ဘာလုပ်ခဲ့သလဲ။ ပရောဖက်မ တစ်ယောက်အနေနဲ့ ဘုရားသခင့် သတင်းစကားတွေကို ပြောပြရတယ်။ အစ္စရေးလူမျိုးအလယ်မှာ ထင်ပေါ်တဲ့ အနေအထား ရရှိထားတယ်။ ပင်လယ်နီမှာ အီဂျစ်စစ်တပ်ကို ဘုရား ဖျက်ဆီးပြီးနောက် အောင်ပွဲခံသီချင်း သီဆိုတဲ့ အမျိုးသားတွေနဲ့အတူ မိရိအံပါ သီဆိုခဲ့တယ်။—ထွက်မြောက်ရာ ၁၅:၁၊ ၂၀၊ ၂၁။

နောက်ပိုင်းမှာ မိရိအံနဲ့ အာရုန်က မောရှေကို ပြစ်တင်ဝေဖန်လာကြတယ်။ မာနနဲ့ မနာလိုမှုကြောင့် ဖြစ်တယ်။ ဘုရားသခင် “နားထောင်နေ” ပြီး မိရိအံနဲ့ အာရုန်ကို ပြင်းပြင်းထန်ထန် ဆုံးမခဲ့တယ်။ (တောလည်ရာ ၁၂:၁-၉) ပြစ်တင်ဝေဖန်မှုကို အစပြုသူ ဖြစ်ပုံရတဲ့ မိရိအံကို အနာကြီးရောဂါနဲ့ ဘုရား ဒဏ်ခတ်လိုက်တယ်။ မောရှေ ကြားဝင် တောင်းပန်ပေးလို့ မိရိအံကို ဘုရား ရောဂါပျောက်စေခဲ့တယ်။ စခန်းအပြင်မှာ ခုနစ်ရက်လုံး သီးသန့်နေရပြီးနောက်မှ အစ္စရေးစခန်းထဲ ပြန်ဝင်ခွင့် ရခဲ့တယ်။—တောလည်ရာ ၁၂:၁၀-၁၅။

မိရိအံဟာ ပဲ့ပြင်ပေးမှုကို နာခံကြောင်း ကျမ်းစာက ဖော်ပြတယ်။ ရာစုနှစ်တွေကြာပြီးနောက် ဘုရားသခင်က “မောရှေ၊ အာရုန်၊ မိရိအံကို မင်းတို့ရှေ့ကနေ စေလွှတ်ခဲ့တယ်” လို့ အစ္စရေးတွေကို ပြန်သတိပေးချိန်မှာ မိရိအံရဲ့ အထူးအခွင့်အရေးကို ဖော်ပြခဲ့တယ်။—မိက္ခာ ၆:၄။

မိရိအံဆီကနေ ဘာသင်ယူနိုင်သလဲ။ ဘုရားကို ဝတ်ပြုကိုးကွယ်သူတွေ တစ်ယောက်နဲ့ တစ်ယောက် ပြောဆိုတဲ့စကားကို ဘုရား အာရုံစိုက်ကြောင်း မိရိအံရဲ့ အဖြစ်က ဖော်ပြတယ်။ ဘုရား နှစ်သက်လက်ခံမှု ရဖို့ မာနကြီးမှု၊ မနာလိုမှုတို့ကို ရှောင်ရမယ်။ မဟုတ်ရင် တခြားသူရဲ့ နာမည်ကောင်းကို ပျက်အောင် လုပ်မိသွားနိုင်တယ်။

ရာခေလ

ရာခေလက ဘယ်သူလဲ။ လာဗန်ရဲ့ သမီး၊ ဘိုးဘေး ယာကုပ်ရဲ့ ချစ်ဇနီး ဖြစ်တယ်။

ရာခေလ ဘာလုပ်ခဲ့သလဲ။ ယာကုပ်နဲ့ လက်ထပ်ပြီး သားနှစ်ယောက် မွေးခဲ့တယ်။ ယာကုပ်က ရှေးအစ္စရေးလူမျိုး ၁၂ နွယ်ရဲ့ ဖခင် ဖြစ်လာတယ်။ ရာခေလ ဖခင်ရဲ့ သိုးတွေကို ထိန်းကျောင်းနေစဉ် ခင်ပွန်းလောင်းနဲ့ တွေ့ဆုံခဲ့တယ်။ (ကမ္ဘာဦး ၂၉:၉၊ ၁၀) အစ်မ လေအာနဲ့ ယှဉ်ရင် ရာခေလဟာ “ဆွဲဆောင်မှု ရှိ” တယ်။—ကမ္ဘာဦး ၂၉:၁၇။

ယာကုပ်က ရာခေလကို ချစ်မိသွားတဲ့အတွက် လက်ထပ်ခွင့် ရဖို့ ခုနစ်နှစ် အလုပ်လုပ်ပေးမယ်လို့ သဘောတူလိုက်တယ်။ (ကမ္ဘာဦး ၂၉:၁၈) ဒါပေမဲ့ လာဗန်က လှည့်စားပြီး လေအာနဲ့ အရင် ပေးစားလိုက်တယ်။ နောက်မှ ရာခေလနဲ့ လက်ထပ်ပေးတယ်။—ကမ္ဘာဦး ၂၉:၂၅-၂၇။

ယာကုပ်ဟာ လေအာ၊ လေအာနဲ့ ရတဲ့ သားသမီးတွေထက် ရာခေလ၊ ရာခေလနဲ့ ရတဲ့ သားနှစ်ယောက်ကို ပိုချစ်တယ်။ (ကမ္ဘာဦး ၃၇:၃။ ၄၄:၂၀၊ ၂၇-၂၉) ဒါကြောင့် အမျိုးသမီး နှစ်ယောက်ကြားမှာ ပြိုင်ဆိုင်မှုတွေ ဖြစ်လာတယ်။—ကမ္ဘာဦး ၂၉:၃၀။ ၃၀:၁၊ ၁၅။

ရာခေလဆီကနေ ဘာသင်ယူနိုင်သလဲ။ ရာခေလက မိမိရဲ့ ဆုတောင်းသံကို ဘုရားသခင် နားထောင်ပေးမယ်ဆိုတဲ့ မျှော်လင့်ချက်ကို မစွန့်ဘဲ ခက်ခဲတဲ့ မိသားစုဘဝမှာ ခံရပ်ခဲ့တယ်။ (ကမ္ဘာဦး ၃၀:၂၂-၂၄) မယားအများယူခြင်းရဲ့ အိမ်တွင်းရေး ပြဿနာတွေကို ရာခေလရဲ့ အဖြစ်ကနေ တွေ့ရတယ်။ ဘုရားသခင်ရဲ့ မူလအိမ်ထောင်ရေးစံနှုန်း၊ တစ်လင်တစ်မယားစနစ်ရဲ့ ကောင်းမွန်မှုကို ရာခေလရဲ့ အဖြစ်က ဖော်ပြတယ်။—မဿဲ ၁၉:၄-၆။

▸ ရာခေလအကြောင်း ထပ်လေ့လာချင်ရင် “‘ဣသရေလအမျိုးကို တည်ထောင်သော’ စိတ်သောကရောက်ခဲ့သည့် ညီအစ်မများ” ဆောင်းပါးကို ကြည့်ပါ။
▸ မယားအများယူတဲ့ ဓလေ့ကို ဘုရား ခွင့်ပြုရတဲ့ အကြောင်းရင်းနဲ့ပတ်သက်ပြီး “ဘုရားသခင်သည် မယားအများယူခြင်း ဓလေ့ကို နှစ်သက်သလော” ဆောင်းပါးကို ကြည့်ပါ။

ရာခပ်

ရာခပ်က ဘယ်သူလဲ။ ခါနန်လူမျိုးရဲ့ မြို့၊ ယေရိခေါမြို့က ပြည့်တန်ဆာ ဖြစ်တယ်။ နောက်ပိုင်းမှာ ယေဟောဝါဘုရားကို ဝတ်ပြုကိုးကွယ်လာတယ်။

ရာခပ် ဘာလုပ်ခဲ့သလဲ။ ပြည်ကို သူလျှိုလုပ်ဖို့ ရောက်လာတဲ့ အစ္စရေးနှစ်ယောက်ကို ရာခပ် ဝှက်ပေးခဲ့တယ်။ အစ္စရေးတွေရဲ့ ဘုရား ယေဟောဝါက မိမိလူမျိုးကို အီဂျစ်ပြည်က ကယ်တင်ခဲ့ပုံ၊ နောက်ပိုင်း အမ္မုန်လူမျိုးရဲ့ တိုက်ခိုက်မှုကနေ ကယ်နုတ်ခဲ့ပုံတွေကို ကြားသိထားတဲ့အတွက် အဲဒီလို လုပ်ခဲ့ခြင်း ဖြစ်တယ်။

သူလျှိုနှစ်ယောက်ကို ရာခပ် ကူညီပေးပြီးနောက် ယေရိခေါမြို့ကို ဖျက်ဆီးဖို့ အစ္စရေးတွေ လာတဲ့အခါ မိမိနဲ့ အိမ်သူအိမ်သားတွေကို အသက်ချမ်းသာပေးဖို့ အသနားခံခဲ့တယ်။ သဘောတူညီမှု ရပေမဲ့ ရာခပ်ဘက်က လုပ်စရာ ရှိပါတယ်– ဒီကိစ္စကို ရာခပ် လျှို့ဝှက်ထားရမယ်။ အစ္စရေးတွေ လာတိုက်တဲ့အခါ ရာခပ်နဲ့ မိသားစုက အိမ်ထဲမှာပဲ ပုန်းနေရမယ်။ ရာခပ်အိမ်မှန်း သိစေဖို့ ပြတင်းပေါက်မှာ ကြိုးနီကို ချထားရမယ်။ ညွှန်ကြားချက်အားလုံးကို ရာခပ် နာခံတဲ့အတွက် အစ္စရေးတွေ ယေရိခေါမြို့ကို သိမ်းပိုက်ချိန်မှာ ရာခပ်နဲ့ မိသားစု အသက်ရှင် လွတ်မြောက်ခဲ့ကြတယ်။

ရာခပ်ဟာ နောက်ပိုင်း အစ္စရေးတစ်ယောက်နဲ့ ထိမ်းမြားပြီး ဘုရင်ဒါဝိဒ်နဲ့ ယေရှုခရစ်ရဲ့ ဘေးမ ဖြစ်လာတယ်။—ယောရှု ၂:၁-၂၄။ ၆:၂၅။ မဿဲ ၁:၅၊ ၆၊ ၁၆။

ရာခပ်ဆီကနေ ဘာသင်ယူနိုင်သလဲ။ ရာခပ်ကို ထူးခြားတဲ့ ယုံကြည်ခြင်း စံနမူနာရှင်အဖြစ် ကျမ်းစာမှာ ဖော်ပြထားတယ်။ (ဟီဘရူး ၁၁:၃၀၊ ၃၁။ ယာကုပ် ၂:၂၅) ဘုရားသခင်ဟာ ခွင့်လွှတ်တတ်တဲ့ ဘုရား၊ မျက်နှာမလိုက်တဲ့ ဘုရား၊ ဘယ်ဘဝနောက်ခံပဲ ဖြစ်ပါစေ မိမိအပေါ် ယုံကြည်ကိုးစားသူတွေကို ကောင်းချီးပေးတဲ့ ဘုရား ဖြစ်ကြောင်း ရာခပ်အဖြစ်က ဖော်ပြတယ်။

▸ ရာခပ်အကြောင်း ထပ်လေ့လာချင်ရင် “‘အကျင့်အားဖြင့် ဖြောင့်မတ်’ တဲ့သူ” ဆောင်းပါးကို ကြည့်ပါ။

ရေဗက္ကာ

ရေဗက္ကာက ဘယ်သူလဲ။ ရေဗက္ကာဟာ အိဇက်ရဲ့ ဇနီး၊ အမြွှာသားနှစ်ယောက် ယာကုပ်နဲ့ ဧသောတို့ရဲ့ မိခင် ဖြစ်တယ်။

ရေဗက္ကာ ဘာလုပ်ခဲ့သလဲ။ ရေဗက္ကာဟာ ခက်ခဲရင်တောင် ဘုရားအလိုတော် လုပ်ဆောင်ခဲ့တယ်။ ရေတွင်းကနေ ရေခပ်ပြီး တက်လာချိန်မှာ အမျိုးသားတစ်ယောက်က ရေတစ်ငုံလောက် တိုက်ဖို့ တောင်းတယ်။ ရေဗက္ကာက သူ့ကို ရေတိုက်ပြီး ကုအားအုတ်တွေကိုလည်း ရေတိုက်မယ်လို့ ပြောတယ်။ (ကမ္ဘာဦး ၂၄:၁၅-၂၀) အဲဒီအမျိုးသားက အာဗြဟံရဲ့ ကျွန်၊ အာဗြဟံရဲ့သား အိဇက်အတွက် မိန်းမရှာဖို့ ခရီးဝေးနှင်လာသူ ဖြစ်တယ်။ (ကမ္ဘာဦး ၂၄:၂-၄) သူဟာ ဘုရား ကောင်းချီးပေးဖို့လည်း ဆုတောင်းခဲ့တယ်။ ရေဗက္ကာရဲ့ လုံ့လဝီရိယ၊ ဧည့်ဝတ်ကျေပွန်မှုကို တွေ့တဲ့အခါ မိမိရဲ့ ဆုတောင်းချက်ကို ဘုရား အဖြေပေးမှန်း၊ ရေဗက္ကာကို အိဇက်အတွက် ဘုရား ရွေးချယ်ပေးမှန်း သိသွားတယ်။—ကမ္ဘာဦး ၂၄:၁၀-၁၄၊ ၂၁၊ ၂၇။

အာဗြဟံရဲ့ ကျွန် ဒီကို လာရတဲ့ အကြောင်းရင်းကို ရေဗက္ကာ သိသွားတဲ့အခါ အိဇက်ရဲ့ ဇနီးအဖြစ် လိုက်သွားဖို့ သဘောတူလိုက်တယ်။ (ကမ္ဘာဦး ၂၄:၅၇-၅၉) နောက်တော့ ရေဗက္ကာ သားအမြွှာ မွေးတယ်။ သားကြီး ဧသောဟာ သားငယ် ယာကုပ်ဆီမှာ ကျွန်ခံရမယ်လို့ ရေဗက္ကာကို ဘုရား အသိပေးတယ်။ (ကမ္ဘာဦး ၂၅:၂၃) အိဇက်က ဧသောကို သားဦးကောင်းချီး ပေးမယ့်အချိန် ရောက်လာတဲ့အခါ ဘုရားအလိုတော်ကို ရေဗက္ကာ သိထားတဲ့အတိုင်း ယာကုပ် ကောင်းချီး ရအောင် စီမံဆောင်ရွက်ပေးခဲ့တယ်။—ကမ္ဘာဦး ၂၇:၁-၁၇။

ရေဗက္ကာဆီကနေ ဘာသင်ယူနိုင်သလဲ။ ရေဗက္ကာဟာ ကျိုးနွံတယ်၊ လုံ့လဝီရိယရှိတယ်၊ ဧည့်ဝတ်ကျေပွန်တယ်။ ဒီအရည်အသွေးတွေကြောင့် ဇနီးကောင်း၊ မိခင်ကောင်း၊ စစ်မှန်တဲ့ ဘုရားကို ဝတ်ပြုသူ ဖြစ်ခဲ့တယ်။

▸ ရေဗက္ကာအကြောင်း ထပ်လေ့လာချင်ရင် “ကျွန်မ လိုက်ပါမည်” ဆောင်းပါးကို ကြည့်ပါ။

ရုသ

ရုသက ဘယ်သူလဲ။ အစ္စရေးပြည်မှာ ယေဟောဝါကို ဝတ်ပြုဖို့အတွက် ကိုယ့်နေရင်းပြည်နဲ့ ကိုယ့်ဘုရားတွေကို စွန့်ခဲ့သူ မောဘအမျိုးသမီး ဖြစ်တယ်။

ရုသ ဘာလုပ်ခဲ့သလဲ။ ရုသဟာ ယောက္ခမ နောမိအပေါ် အထူးမေတ္တာ ပြခဲ့တယ်။ အစ္စရေးပြည်မှာ အစာခေါင်းပါးတဲ့အတွက် နောမိဟာ ခင်ပွန်း၊ သားနှစ်ယောက်နဲ့အတူ မောဘပြည်ကို ထွက်သွားတယ်။ နောက်ပိုင်း သားနှစ်ယောက်က မောဘအမျိုးသမီး ရုသနဲ့ ဩရပကို လက်ထပ်ကြတယ်။ နောက်ဆုံး နောမိရဲ့ ခင်ပွန်းနဲ့ သားနှစ်ယောက် ဆုံးပါးသွားကြတဲ့အတွက် မုဆိုးမသုံးယောက် ကျန်ခဲ့တယ်။

အစာခေါင်းပါးမှု မရှိတော့တဲ့ အစ္စရေးပြည်ကို ပြန်ဖို့ နောမိ ဆုံးဖြတ်လိုက်တယ်။ ရုသနဲ့ ဩရပက နောမိနဲ့အတူ လိုက်ဖို့ ရွေးချယ်ကြတယ်။ ဒါပေမဲ့ နောမိက ဆွေမျိုးသားချင်းတွေဆီ ပြန်ဖို့ ဖျောင်းဖျတယ်။ ဩရပ ပြန်သွားတယ်။ (ရုသ ၁:၁-၆၊ ၁၅) ဒါပေမဲ့ ရုသက ယောက္ခမကို သစ္စာရှိရှိ တွယ်ကပ်နေခဲ့တယ်။ ရုသက နောမိကို ချစ်တယ်၊ နောမိရဲ့ ဘုရား ယေဟောဝါကို ဝတ်ပြုကိုးကွယ်ချင်တယ်။—ရုသ ၁:၁၆၊ ၁၇။ ၂:၁၁။

ယောက္ခမကို ရုသ ပြုစုစောင့်ရှောက်ကြောင်း၊ အလုပ်ကြိုးစားကြောင်း ဂုဏ်သတင်းဟာ မကြာခင်မှာပဲ နောမိရဲ့ နေရင်းမြို့၊ ဘက်သလီဟင်မှာ ပျံ့သွားတယ်။ ချမ်းသာတဲ့ မြေပိုင်ရှင် ဗောဇက ရုသကို အထင်ကြီးလေးစားတဲ့အတွက် ရုသနဲ့ နောမိအတွက် အစားအစာ ရက်ရက်ရောရော ပေးတယ်။ (ရုသ ၂:၅-၇၊ ၂၀) နောက်ပိုင်း ရုသဟာ ဗောဇနဲ့ ထိမ်းမြားပြီး နှစ်ယောက်စလုံး ဘုရင်ဒါဝိဒ်နဲ့ ယေရှုခရစ်တို့ရဲ့ ဘိုးဘေးတွေ ဖြစ်လာကြတယ်။—မဿဲ ၁:၅၊ ၆၊ ၁၆။

ရုသဆီကနေ ဘာသင်ယူနိုင်သလဲ။ နောမိနဲ့ ယေဟောဝါကို ရုသ ချစ်မြတ်နိုးတဲ့အတွက် ကိုယ့်နေရင်းပြည်နဲ့ မိသားစုကို တလိုတလား စွန့်ခဲ့တယ်။ ရုသဟာ အလုပ်ကြိုးစားတယ်။ အခက်အခဲတွေ ရင်ဆိုင်ရပေမဲ့ သစ္စာစောင့်သိတယ်။

▸ ရုသအကြောင်း ထပ်လေ့လာချင်ရင် “အမေ သွားတဲ့နေရာကို ကျွန်မ လိုက်မယ်၊” “မွန်မြတ်တဲ့ အမျိုးသမီး” ဆောင်းပါးတွေကို ကြည့်ပါ။

စာရာ

စာရာက ဘယ်သူလဲ။ အာဗြဟံရဲ့ ဇနီး၊ အိဇက်ရဲ့ မိခင် ဖြစ်တယ်။

စာရာ ဘာလုပ်ခဲ့သလဲ။ ခင်ပွန်း အာဗြဟံကို ဘုရား ပေးခဲ့တဲ့ ကတိကို ယုံကြည်စိတ်ချတဲ့အတွက် ချမ်းသာကြွယ်ဝတဲ့ ဥရမြို့က သက်သောင့်သက်သာ ဘဝကို စွန့်ခဲ့တယ်။ အာဗြဟံကို ဥရမြို့က ထွက်ပြီး ခါနန်ပြည်ကို သွားဖို့ ဘုရားသခင် မိန့်ဆိုတယ်။ အာဗြဟံကို ကောင်းချီးပေးမယ်၊ လူမျိုးကြီး ဖြစ်စေမယ်လို့ ဘုရား ကတိပြုခဲ့တယ်။ (ကမ္ဘာဦး ၁၂:၁-၅) အဲဒီအချိန်မှာ စာရာက အသက် ခြောက်ဆယ် ကျော်နေပြီ။ စာရာတို့ ဇနီးမောင်နှံဟာ တစ်နေရာပြီး တစ်နေရာ ရွှေ့ပြောင်းပြီး တဲနဲ့ နေခဲ့ရတယ်။

လှည့်လည်ရွှေ့ပြောင်း နေထိုင်ရတဲ့ ဘဝဟာ အန္တရာယ် များပေမဲ့ ဘုရားပေး ညွှန်ကြားချက်ကို အာဗြဟံ လိုက်နာနိုင်အောင် စာရာ ထောက်မပေးတယ်။ (ကမ္ဘာဦး ၁၂:၁၀၊ ၁၅) နှစ်အတော်ကြာတဲ့အထိ စာရာမှာ ကလေး မရှိတဲ့အတွက် အတော် ဝမ်းနည်းခဲ့မှာပဲ။ ဒါပေမဲ့ ဘုရားသခင်က အာဗြဟံရဲ့ မျိုးနွယ်ကို ကောင်းချီးပေးမယ်လို့ ကတိပေးခဲ့တယ်။ (ကမ္ဘာဦး ၁၂:၇။ ၁၃:၁၅။ ၁၅:၁၈။ ၁၆:၁၊ ၂၊ ၁၅) နောက်ပိုင်း၊ အာဗြဟံအတွက် စာရာ ကလေး မွေးဖွားပေးမယ်လို့ ဘုရား အခိုင်အမာ ပြောခဲ့တယ်။ စာရာဟာ ကလေးမွေးဖွားနိုင်တဲ့ အရွယ် ကျော်လွန်နေပြီ ဖြစ်ပေမဲ့ ဘုရားကတိအတိုင်း ဖြစ်ခဲ့တယ်။ စာရာ အသက် ၉၀၊ အာဗြဟံ အသက် ၁၀၀ အရွယ်မှာ ကလေးရခဲ့တယ်။ (ကမ္ဘာဦး ၁၇:၁၇။ ၂၁:၂-၅) ကလေးကို အိဇက်လို့ နာမည်ပေးတယ်။

စာရာဆီကနေ ဘာသင်ယူနိုင်သလဲ။ ဘုရားရဲ့ ကတိတွေဟာ ပြည့်စုံနိုင်မယ့်ပုံ မပေါက်ရင်တောင် အမြဲ ယုံကြည်စိတ်ချနိုင်ကြောင်း စာရာရဲ့ အဖြစ်ကနေ သိရတယ်။ (ဟီဘရူး ၁၁:၁၁) အိမ်ထောင်မှာ ဇနီးတစ်ယောက်ရဲ့ လေးစားမှု အရေးကြီးပုံကို စာရာရဲ့ စံနမူနာက ဖော်ပြတယ်။—၁ ပေတရု ၃:၅၊ ၆။

▸ စာရာအကြောင်း ထပ်လေ့လာချင်ရင် “မင်းဟာ မိန်းမချောပဲ၊” “ဘုရားသခင်က ‘မင်းသမီး’ လို့ နာမည်ပေးခဲ့သူ” ဆောင်းပါးတွေကို ကြည့်ပါ။

ရှုလမိုက် မိန်းကလေး

ရှုလမိုက် မိန်းကလေးက ဘယ်သူလဲ။ ရှောလမုန်သီချင်းလို့ ခေါ်တဲ့ ကျမ်းစောင်ထဲက အဓိကဇာတ်ကောင်၊ ချောမောလှပတဲ့ ကျေးတောသူလေး ဖြစ်တယ်။ ကျမ်းစာမှာ သူ့နာမည်ကို မဖော်ပြထားဘူး။

ရှုလမိုက် မိန်းကလေး ဘာလုပ်ခဲ့သလဲ။ သူဟာ ချစ်သူ သိုးထိန်းလေးအပေါ် သစ္စာရှိတယ်။ (ရှောလမုန်သီချင်း ၂:၁၆) ထူးခြားတဲ့ သူ့အလှကြောင့် ချမ်းသာကြွယ်ဝတဲ့ ဘုရင်ရှောလမုန်က ချစ်မိသွားပြီး သူ့အချစ်ကို ရဖို့ ကြိုးစားခဲ့တယ်။ (ရှောလမုန်သီချင်း ၇:၆) တခြားသူတွေက ရှောလမုန်ကို ပြန်ချစ်ဖို့ တိုက်တွန်းကြပေမဲ့ ရှုလမိုက် မိန်းကလေး ငြင်းခဲ့တယ်။ ဆင်းရဲတဲ့ သိုးထိန်းလေးကိုပဲ ချစ်ပြီး သစ္စာရှိခဲ့တယ်။—ရှောလမုန်သီချင်း ၃:၅။ ၇:၁၀။ ၈:၆။

ရှုလမိုက် မိန်းကလေးဆီကနေ ဘာသင်ယူနိုင်သလဲ။ သူဟာ ချောမောလှပပြီး အများရဲ့ အာရုံစိုက်မှု ခံရပေမဲ့ နှိမ့်ချကျိုးနွံတယ်။ ရွယ်တူချင်းဖိအား၊ စည်းစိမ်ချမ်းသာ၊ ကျော်ကြားမှုတွေနဲ့ သွေးဆောင်ခံရတာတောင် သူ့မေတ္တာ မယိုင်လဲခဲ့ဘူး။ ခံစားချက်ကို ထိန်းချုပ်ခဲ့ပြီး ကိုယ်ကျင့်တရား စင်ကြယ်အောင် ထိန်းသိမ်းခဲ့တယ်။

လောတဇနီး

လောတဇနီးက ဘယ်သူလဲ။ သူ့နာမည်ကို ကျမ်းစာမှာ မဖော်ပြဘူး။ ဒါပေမဲ့ သမီးနှစ်ယောက် ရှိကြောင်း၊ မိသားစုက သောဒုံမြို့မှာ နေထိုင်ကြောင်းကိုတော့ ဖော်ပြထားတယ်။—ကမ္ဘာဦး ၁၉:၁၊ ၁၅။

လောတဇနီး ဘာလုပ်ခဲ့သလဲ။ ဘုရားမိန့်မှာချက်ကို နားမထောင်ခဲ့ဘူး။ သောဒုံမြို့နဲ့ အနီးဝန်းကျင်မြို့က လူတွေ အလွန်အမင်း လိင်အကျင့်ယိုယွင်းမှုကြောင့် ဖျက်ဆီးပစ်ဖို့ ဘုရား ဆုံးဖြတ်လိုက်တယ်။ ဖြောင့်မတ်တဲ့ လောတနဲ့ မိသားစုကို ချစ်တဲ့အတွက် သောဒုံမြို့ကနေ ဘေးလွတ်ရာ ထွက်သွားစေဖို့ ဘုရားသခင်က ကောင်းကင်တမန်နှစ်ပါး စေလွှတ်လိုက်တယ်။—ကမ္ဘာဦး ၁၈:၂၀။ ၁၉:၁၊ ၁၂၊ ၁၃။

ကောင်းကင်တမန်တွေက လောတမိသားစုကို ထွက်ပြေးဖို့၊ နောက်လှည့်ကြည့်ရင် သေမှာဖြစ်လို့ နောက်ပြန်လှည့်မကြည့်ဖို့ မှာလိုက်တယ်။ (ကမ္ဘာဦး ၁၉:၁၇) လောတဇနီးဟာ “နောက်လှည့်ကြည့်လို့ ဆားတိုင် ဖြစ်သွားတယ်။”—ကမ္ဘာဦး ၁၉:၂၆။

လောတဇနီးဆီကနေ ဘာသင်ယူနိုင်သလဲ။ ရုပ်ပစ္စည်း တပ်မက်ခြင်းက ဘုရားစကားကို မနာခံတဲ့အထိ ဖြစ်စေနိုင်ကြောင်း လောတဇနီးအဖြစ်က ဖော်ပြတယ်။ ယေရှုက လောတဇနီးကို သတိပေးနမူနာအဖြစ် ဖော်ပြခဲ့တယ်။ “လောတရဲ့ဇနီးကို သတိရကြပါ” လို့ ပြောခဲ့တယ်။—လုကာ ၁၇:၃၂။