လောက ဘယ်တော့ အဆုံးတိုင်မလဲ ဆိုတာ သိဖို့ ကျမ်းစာမှာ “လောက” ဆိုတဲ့ စကားလုံး အသုံးပြုပုံကို နားလည်ဖို့ လိုတယ်။ ဂရိစကားလုံး ကော့စ်မော့စ် ကို “လောက” လို့ ပြန်ဆိုကြတယ်။ အများအားဖြင့် လူ့လောက၊ အထူးသဖြင့် ဘုရားအလိုတော်နဲ့ မညီတဲ့ လောကကို ရည်ညွှန်းတယ်။ (ယောဟန် ၁၅:​၁၈၊ ၁၉။ ၂ ပေတရု ၂:၅) တစ်ခါတလေ ကော့စ်မော့စ် က လူ့အဖွဲ့အစည်းကို ရည်ညွှန်းတယ်။​—၁ ကောရိန္သု ၇:၃၁။ ၁ ယောဟန် ၂:​၁၅၊ ၁၆။ a

“လောက အဆုံးတိုင်” တယ်ဆိုတာ ဘာလဲ

 “လောက အဆုံးတိုင်” ဆိုတဲ့ စကားစုကို ဘာသာပြန်ကျမ်းများစွာမှာ တွေ့ရပြီး “လောကစနစ်နိဂုံး၊” ဒါမှမဟုတ် “ကပ်ကမ္ဘာကုန်” လို့လည်း ပြန်ဆိုကြတယ်။ (မဿဲ ၂၄:​၃၊ ယုဒသန်ကျမ်း) ကမ္ဘာမြေ ဒါမှမဟုတ် လူသားအားလုံး ပျက်စီးသွားမှာကို မရည်ညွှန်းဘဲ လူ့အဖွဲ့အစည်း အဆုံးတိုင်သွားမှာကို ရည်ညွှန်းတယ်။​—၁ ယောဟန် ၂:၁၇။

 “လူယုတ်မာတွေ ပယ်ရှင်းခံရ” မယ်၊ လူကောင်းတွေ ကမ္ဘာမြေပေါ် ပျော်ရွှင်စွာ နေထိုင်သွားကြမယ်လို့ ကျမ်းစာ သွန်သင်တယ်။ (ဆာလံ ၃၇:​၉-၁၁) “ကြီးစွာသောဒုက္ခ” ရဲ့ အထွတ်အထိပ် အာမဂေဒုန်စစ်ပွဲမှာ လူဆိုးတွေ ဖျက်ဆီးခံရမယ်။​—မဿဲ ၂၄:​၂၁၊ ၂၂။ ဗျာဒိတ် ၁၆:​၁၄၊ ၁၆။

လောက ဘယ်တော့ အဆုံးတိုင်မလဲ

 “အဲဒီအချိန်ကို ဘယ်သူမှ မသိဘူး။ ကောင်းကင်တမန်တွေလည်း မသိဘူး။ သားဖြစ်သူ ကျွန်တော်လည်း မသိဘူး။ အဖဘုရားပဲ သိတယ်” လို့ ယေရှု ပြောခဲ့တယ်။ (မဿဲ ၂၄:​၃၆၊ ၄၂) ဒီလောက အဆုံးတိုင်မယ့်အချိန်ဟာ “မထင်မှတ်တဲ့အချိန်မှာ” ဖြစ်မယ်လို့လည်း ပြောခဲ့တယ်။​—မဿဲ ၂၄:၄၄။

 နေ့ရက်၊ အချိန်နာရီ အတိအကျကို မသိရပေမဲ့ လောက အဆုံးတိုင်တော့မှာကို သိစေတဲ့ စုပေါင်း “နိမိတ်” ကို ယေရှု ဖော်ပြခဲ့တယ်။ (မဿဲ ၂၄:​၃၊ ၇-၁၄) အဲဒီအချိန်ကို ကျမ်းစာမှာ “အဆုံးပိုင်းကာလ၊” “ကမ္ဘာကုန်ဆုံးချိန်၊” “နောက်ဆုံးကာလ” လို့ ဖော်ပြထားတယ်။​—ဒံယေလ ၁၂:​၄၊ ခေတ်သုံးမြန်မာ သမ္မာကျမ်း။ ၂ တိမောသေ ၃:​၁-၅။

လောက အဆုံးတိုင်သွားတဲ့အခါ ကျန်ရှိမယ့်အရာ ရှိပါသလား

 ရှိပါတယ်။ ကမ္ဘာမြေ ဆက်တည်ရှိနေမယ်။ “သူ့နေရာကနေ ဘယ်တော့မှ ရွှေ့လို့ရမှာ မဟုတ်ဘူး” လို့ ကျမ်းစာမှာ ဆိုထားတယ်။ (ဆာလံ ၁၀၄:၅) ကမ္ဘာပေါ်မှာ လူတွေနဲ့ ပြည့်နေမယ်။ “ဖြောင့်မတ်သူတွေဟာ ကမ္ဘာမြေကို ပိုင်ဆိုင်ပြီး ထာဝစဉ် နေထိုင်ရလိမ့်မယ်” လို့ ကျမ်းစာမှာ ကတိပြုထားတယ်။ (ဆာလံ ၃၇:၂၉) ဘုရားသခင့် မူလရည်ရွယ်ချက်အတိုင်း အောက်ပါအခြေအနေတွေ ဖြစ်လာမယ်–

•   ပရဒိသု။​—ဟေရှာယ ၃၅:၁။ လုကာ ၂၃:၄၃။

•   လုံခြုံမှုနဲ့ သာယာဝပြောမှု။​—မိက္ခာ ၄:၄။

•   လူတိုင်းအတွက် အဓိပ္ပာယ်ပြည့်ဝတဲ့၊ စိတ်ကျေနပ်စေတဲ့အလုပ်။​—ဟေရှာယ ၆၅:​၂၁-၂၃။

•   ဖျားနာမှု၊ အိုမင်းမှုတို့ ကင်းလွတ်ခြင်း။​—ယောဘ ၃၃:၂၅။ ဟေရှာယ ၃၃:၂၄။