သန့်ရှင်းခြင်းဆိုတာ အညစ်အကြေး ကင်းစင်ခြင်း ဖြစ်တယ်။ “သန့်ရှင်းခြင်း” လို့ ပြန်ဆိုထားတဲ့ ဟီဘရူးစကားလုံးဟာ “သီးသန့်ဖြစ်ခြင်း” လို့အဓိပ္ပာယ်ရတဲ့ မူရင်းစကားလုံးကနေ လာတယ်။ ဒါကြောင့် သန့်ရှင်းတဲ့အရာဆိုတာ သန့်ရှင်းစင်ကြယ်ခြင်းကြောင့် သီးသန့်ဖယ်ထားရာ၊ အထွတ်အမြတ်ထားတဲ့အရာကို ဆိုလိုတယ်။

 ဘုရားသခင်ဟာ အမြင့်မြတ်ဆုံး အတိုင်းအတာနဲ့ သန့်ရှင်းတယ်။ “ယေဟောဝါလို သန့်ရှင်းမြင့်မြတ်တဲ့ဘုရား မရှိပါဘူး” လို့ ကျမ်းစာ ဆိုတယ်။ a (၁ ရှမွေလ ၂:၂) ဒါကြောင့် ဘုရားသခင်ဟာ သန့်ရှင်းတဲ့စံနှုန်းတွေကို ချမှတ်ထိုက်ပါတယ်။

 “သန့်ရှင်းခြင်း” ဆိုတဲ့ စကားလုံးဟာ ဘုရားသခင်နဲ့ တိုက်ရိုက်ဆက်စပ်နေတဲ့အရာ မှန်သမျှ၊ အထူးသဖြင့် ဝတ်ပြုရေးအတွက် သီးသန့်ထားတဲ့အရာတွေကို ဆိုလိုတယ်။ ဥပမာ၊ ကျမ်းစာမှာ ဒီလိုဆိုထားတယ်–

•   သန့်ရှင်းရာအရပ်များ၊ အထွတ်အမြတ်နေရာများ။ မီးလောင်နေတဲ့ ချုံပုတ်နား မောရှေ ချဉ်းကပ်သွားတဲ့အခါ ဘုရားသခင်က “မင်းရပ်နေတဲ့နေရာဟာ သန့်ရှင်းတဲ့မြေ ဖြစ်” တယ်လို့ မိန့်ဆိုခဲ့တယ်။—ထွက်မြောက်ရာ ၃:၂-၅။

•   မြင့်မြတ်တဲ့ပွဲများ၊ အခါကြီးရက်ကြီးများ။ ရှေးခေတ်အစ္စရေးတွေဟာ “မြင့်မြတ်တဲ့ စည်းဝေးပွဲတွေ” လို့ခေါ်တဲ့ ဘာသာရေးပွဲနေ့တွေမှာ ယေဟောဝါကို ဝတ်ပြုကိုးကွယ်ကြတယ်။—ဝတ်ပြုရာ ၂၃:၃၇။

•   သန့်ရှင်းတဲ့အသုံးအဆောင်များ။ ရှေးခေတ် ဂျေရုဆလင် ဗိမာန်တော်ပစ္စည်းတွေကို “သန့်ရှင်းတဲ့အသုံးအဆောင်များ” လို့ခေါ်ကြတယ်။ (၁ ဘုရင်များ ၈:၄) ဒီအသုံးအဆောင်တွေကို ကိုးကွယ်ကြမှာ မဟုတ်ပေမဲ့ တန်ဖိုးထား လေးစားကြတယ်။ b

 သန့်ရှင်းနိုင်ပါတယ်။ ဘုရားသခင်က “ငါဟာ သန့်ရှင်းတဲ့အတွက် မင်းတို့လည်း သန့်ရှင်းရမယ်” ဆိုပြီး ခရစ်ယာန်တွေကို မိန့်မှာထားတယ်။ (၁ ပေတရု ၁:၁၆) မစုံလင်သူ လူသားတွေအနေနဲ့ ဘုရားသခင်ရဲ့ သန့်ရှင်းခြင်းစံနှုန်းကို မပြည့်မီကြတာ မှန်ပါတယ်။ ဒါပေမဲ့ ဘုရားသခင့် ဖြောင့်မတ်တဲ့ပညတ်တွေကို နာခံသူ လူသားတွေကို “သန့်ရှင်းတဲ့၊ ဘုရားသခင် လက်ခံနိုင်တဲ့” သူတွေအဖြစ် ယူဆနိုင်ပါတယ်။ (ရောမ ၁၂:၁) အဲဒီလိုလူတွေဟာ အပြောရော အလုပ်ပါ သန့်ရှင်းဖို့ ကြိုးစားကြတယ်။ ဥပမာ၊ ‘လိင်အကျင့်ယိုယွင်းမှုကို ရှောင်ကြဉ်ပြီး သန့်ရှင်းနေကြပါ၊’ “ပြုမူကျင့်ကြံလေသမျှမှာ သန့်ရှင်းကြပါ” ဆိုတဲ့ ကျမ်းစာအကြံပြုချက်ကို လိုက်နာကြတယ်။—၁ သက်သာလောနိတ် ၄:၃။ ၁ ပေတရု ၁:၁၅။

 ဆုံးရှုံးနိုင်ပါတယ်။ ဘုရားသခင်ရဲ့ စာရိတ္တစံနှုန်းတွေ မလိုက်နာသူကို သန့်ရှင်းတဲ့သူလို့ ဘုရား မမြင်ပါဘူး။ ဥပမာ၊ “သန့်ရှင်းတဲ့ ညီအစ်ကိုတို့” ဆီ ရေးတဲ့ ဟီဘရူးကျမ်းမှာ “အသက်ရှင်တဲ့ ဘုရားသခင်ကို ကျောခိုင်းမယ်ဆိုရင် ယုံကြည်ခြင်းကင်းမဲ့ပြီး ဆိုးညစ်တဲ့စိတ်” ဖြစ်ပေါ်လာနိုင်တယ်လို့ သတိပေးထားတယ်။—ဟီဘရူး ၃:၁၊ ၁၂။

 ယူဆချက်အမှား။ အိမ်ထောင်မပြုဘဲနေခြင်းက ပိုသန့်ရှင်းစေနိုင်တယ်။

 အမှန်။ ခရစ်ယာန်တစ်ယောက် အိမ်ထောင်မပြုဘဲနေဖို့ ရွေးချယ်နိုင်ပါတယ်။ ဒါပေမဲ့ အိမ်ထောင်မပြုဘဲနေလိုက်လို့ ဘုရားသခင်ရှေ့ သန့်ရှင်းတဲ့အနေအထား ရောက်မသွားဘူး။ တစ်ကိုယ်ရေသမားတွေဟာ အာရုံမပျံ့လွင့်ဘဲ ဘုရားသခင်ကို ဝတ်ပြုနိုင်ကြတာ မှန်ပါတယ်။ (၁ ကောရိန္သု ၇:၃၂-၃၄) ဒါပေမဲ့ အိမ်ထောင်သည်တွေလည်း သန့်ရှင်းစင်ကြယ်နိုင်တယ်လို့ ကျမ်းစာ ဆိုတယ်။ ယေရှုရဲ့ တမန်တော်တွေထဲမှာ အိမ်ထောင်သည် ပေတရုလည်း ပါတယ်။—မဿဲ ၈:၁၄။ ၁ ကောရိန္သု ၉:၅။