Eksodosy 15:1-27
15 Tamin’izay, dia nanao izao hira izao ho an’i Jehovah i Mosesy sy ny zanak’Israely:+
“Hihira ho an’i Jehovah aho, fa nisandratra avo dia avo izy.+Natsipiny tao an-dranomasina ny soavaly mbamin’ny mpitaingina azy.+
2 I Jah* no tanjako sy heriko,+ satria izy no mpamonjy ahy.+Izy no Andriamanitro, ka hidera azy aho.+ Andriamanitry ny razako izy,+ ka hasandratro avo dia avo.+
3 I Jehovah dia mpiady mahery.+ Jehovah no anarany.+
4 Natsipiny tao an-dranomasina ny kalesin’i Farao sy ny tafiny,+Ary nilentika tao amin’ny Ranomasina Mena ny kalazalahy tamin’ny miaramila mpiadiny.+
5 Nandifotra azy ireo ny rano manonja.+ Nilentika tao amin’ny lalina tahaka ny vato izy ireo.+
6 Mahery dia mahery ny tananao ankavanana, Jehovah ô!+Afaka manorotoro fahavalo ny tananao ankavanana, Jehovah ô!+
7 Ary noho ny haben’ny fahambonianao, dia afaka mandavo an’izay mitsangana hanohitra anao ianao.+Avoakanao ny fahatezeranao mirehitra ka mandevona an’ireny toy ny fandevona vodivary.+
8 Fofonain’ny vavoronao+ no nampivangongo ny rano.Dia tsy nihetsika ny rano, ka tonga toy ny tohodrano lehibe.Nivaingana teo afovoan’ny ranomasina ny rano manonja.
9 Niteny ny fahavalo hoe: ‘Hanenjika aho!+ Hahatratra aho!+Hizara babo aho+ ka tsy hijanona raha tsy afa-po!Hanatsoaka ny sabatro aho! Horoahin’ny tanako ireny!’+
10 Ny fofonainao no nitsofanao+ ny ranomasina ka nanafotra azy ireo izany.+Nilentika toy ny firaka nalatsaka tao amin’ny rano be izy ireo.+
11 Iza amin’ireo andriamanitra no tahaka anao, Jehovah ô?+Iza no tahaka anao izay fara tampony amin’ny fahamasinana,+Eny, Ilay tokony hatahorana+ ka hanaovana hira fiderana,+ eny, Ilay manao zava-mahagaga maro?+
12 Naninjitra ny tananao ankavanana ianao,+ ka natelin’ny tany izy ireo.+
13 Tamin-katsaram-panahy no nitondranao ny vahoaka navotanao.+Ary amin’ny herinao no hitarihanao azy ho any amin’ny fonenanao masina.+
14 Handre izany ireo firenena+ ka hitebiteby.+Hanaintaina toy ny vehivavy mihetsi-jaza+ ny mponin’i Filistia.
15 Amin’izay fotoana izay, dia tena hivarahontsana ny lehibem-pokon’i Edoma.Ary ho tora-kovitra ny mpitondra jadon’i Moaba.+Ho kivy tokoa ny mponina rehetra any Kanana.+
16 Hatahotra sy hihorohoro izy ireo.+Tsy hihetsika toy ny vato izy ireo, noho ny herin’ny sandrinao,Mandra-pandalon’ny olonao+ Jehovah ô,Eny, mandra-pandalon’ny+ vahoaka noforoninao.+
17 Hitondra azy ireo ianao ka hampitoetra* azy eo amin’ny tendrombohitra lovanao,+Izay fonenana efa nomaninao honenanao,+ Jehovah ô,Eny, toerana masina+ naorin’ny tananao, Jehovah ô!
18 Hanjaka i Jehovah mandritra ny fotoana tsy voafetra, eny, mandrakizay.+
19 Rehefa niditra tao an-dranomasina ny soavalin’i Farao+ sy ny kalesin’adiny ary ny mpitaingin-tsoavaliny,+Dia naverin’i Jehovah ny rano mba hanafotra azy ireo.+Ny zanak’Israely kosa nandia tany maina teo afovoan’ny ranomasina.”+
20 Ary naka ampongatapaka+ i Miriama mpaminanivavy, anabavin’i Arona.+ Nivoaka nanaraka azy koa ny vehivavy rehetra, nitondra ampongatapaka sady nandihy.+
21 Ary namaly ny hiran’ireo lehilahy i Miriama, ka nanao hoe:+
“Mihirà ho an’i Jehovah,+ fa nisandratra avo dia avo izy.+Natsipiny tao an-dranomasina ny soavaly mbamin’ny mpitaingina azy.”+
22 Taorian’izay, dia nasain’i Mosesy niala teo amin’ny Ranomasina Mena ny Israely ka nivoaka nankany an-tany efitr’i Sora.+ Ary nandeha telo andro tany an-tany efitra izy ireo, kanefa tsy nahita rano.+
23 Tonga tany Mara+ izy ireo tamin’ny farany, nefa tsy afaka nisotro ny rano tao satria nangidy ny rano. Koa nataon’i Mosesy hoe Mara+ ny anaran’ilay toerana.
24 Dia nanomboka nimenomenona tamin’i Mosesy ny vahoaka,+ ka nanao hoe: “Inona no hosotroinay?”
25 Ary nitaraina mafy tamin’i Jehovah i Mosesy.+ Koa nisy hazo naniry natoron’i Jehovah azy. Dia natsipin’i Mosesy tao anaty rano ilay izy ka nanjary mamy ny rano.+
Teo Izy no nametraka fitsipika sy lalàna ho azy ireo, ary teo koa Izy no nizaha toetra azy ireo.+
26 Ary hoy koa Izy: “Raha mihaino tsara ny feon’i Jehovah Andriamanitrareo ianareo, ary manao izay mahitsy eo imasony ka tena mihaino ny didiny sy mitandrina ny fitsipiny rehetra,+ dia tsy hisy halefako aminareo ny aretina nalefako tamin’ny Ejipsianina,+ fa izaho no Jehovah izay manasitrana anareo.”+
27 Taorian’izay, dia tonga tany Elima izy ireo. Nisy loharano roa ambin’ny folo sy hazo palmie fitopolo tany,+ ka nitoby teo amoron-drano izy ireo.
