Ezekiela 32:1-32
32 Dia niteny tamiko indray i Jehovah tamin’ny andro voalohan’ny volana faha-12, tamin’ny taona faha-12, hoe:
2 “Ry zanak’olona, manaova hira fisaonana an’i Farao mpanjakan’i Ejipta, ka lazao aminy hoe:‘Hoatran’ny liona tanora matanjaka ianao teo amin’ireo firenena,Nefa natao izay hampangina anao.
Hoatran’ny biby ngezabe any an-dranomasina+ ianao, ka nipelipelika nampitobaka rano teny amin’ny renirano.Dia nokobakobaninao tamin’ny tongotrao ny rano mba hiakaran’ny fotaka, ary nolotoinao ny renirano.’*
3 Izao no tenin’i Jehovah Tompo Fara Tampony:
‘Hatsipiko eo aminao ny haratoko, ka firenena be dia be mitambatra no hampiasaiko hanao an’izany.Dia hakarin’izy ireo amin’ilay haratoko ianao.
4 Hilaozako eny an-tanety ianao,Ary hatsipiko eny an-tsaha.
Hataoko mipetraka eny amboninao ny vorona rehetra eny amin’ny lanitra,Ka hataoko voky anao ny bibidia eran-tany.+
5 Hatsipiko eny an-tendrombohitra ny nofonao,Dia hofenoiko an’izay sisa tavela amin’ny fatinao ny lohasaha.+
6 Hataoko hotsaky ny ranao mifantsitsitra be ny tany, hatreny an-tendrombohitra,Dia ho feno ny ranao ny renirano.’*
7 ‘Rehefa tapitra ny ainao, dia hosaronako ny lanitra ary hataoko maizina ny kintana.
Hotakonako rahona ny masoandro,Ary tsy hanome hazavana ny volana.+
8 Hataoko maizina daholo ny zavatra manazava eny amin’ny lanitra, noho ny nataonao.Dia hosaronako haizina ny taninao, hoy i Jehovah Tompo Fara Tampony.
9 ‘Hataoko kivy ny fon’ny vahoaka maro,Rehefa alefako any amin’ny firenena hafa ny olona nataonao babo, dia any amin’ny tany mbola tsy fantatrao.+
10 Hataoko matahotra be ny firenena maro noho ny aminao,Ary hangovitra sy hihorohoro ny mpanjakany rehefa arangarangako eo alohany ny sabatro.
Hangovitra foana izy ireo, satria samy hatahotra ny ho faty,Amin’ny andro hianjeranao.’
11 Fa izao no tenin’i Jehovah Tompo Fara Tampony:
‘Hamely anao ny sabatry ny mpanjakan’i Babylona.+
12 Hataoko matin’ny sabatra ny vahoakanao, dia ny sabatry ny miaramila matanjaka.Firenena faran’izay tsy miantra olona no niavian’izy rehetra.+
Haetrin’izy ireo i Ejipta fa mirehareha, ary haripany daholo ny vahoakany.+
13 Haringako daholo ny biby fiompiny eny akaikin’ny rano be.+Dia tsy hisy hanakobakobana an’izany rano izany intsony, na tongotr’olombelona na kitron’ny biby fiompy.’+
14 ‘Amin’izany andro izany, dia havelako hitsika ny fotaka mba hadio ilay rano,Ka hataoko mikoriana hoatran’ny menaka ny reniranony’, hoy i Jehovah Tompo Fara Tampony.
15 ‘Rehefa ataoko ngazana i Ejipta ka tsy misy na inona na inona intsony,+Ary rehefa vonoiko daholo ny mponina rehetra ao,Dia tsy maintsy ho fantany fa izaho no Jehovah.+
16 Hira fisaonana izany, ka hohirain’ny olona amin’ny feo mitaraindraina.Hihira an’izany koa ny zanakavavin’ireo firenena.
Hihira an’izany izy ireo mba hisaonana an’i Ejipta sy ny vahoakany rehetra’, hoy i Jehovah Tompo Fara Tampony.”
17 Dia niteny tamiko indray i Jehovah tamin’ny andro faha-15 amin’ny volana, tamin’ny taona faha-12, hoe:
18 “Ry zanak’olona, mitomania an’ireo vahoakan’i Ejipta, ary ampidino any ambanin’ny tany miaraka amin’izay midina any anaty lavaka* izy sy ny zanakavavin’ireo firenena matanjaka.
19 “‘Angaha ianao tsara tarehy noho ny olon-kafa? Midìna dia mandehana mivalampatra miaraka amin’ny tsy mifora!’
20 “‘Ho faty miaraka amin’ny olona novonoina tamin’ny sabatra+ izy ireo. Navela ho fatin’ny sabatra i Ejipta. Taritarito izy sy ny vahoakany rehetra.
21 “‘Avy any amin’ny Fasana* ireo miaramila matanjaka indrindra no hiresaka aminy* sy amin’izay manampy azy. Ho fatin’ny sabatra izy ireo, dia hidina any tokoa, ary hivalampatra any, hoatran’ny tsy mifora.
22 Any no misy an’i Asyria sy ny vahoakany rehetra. Manodidina azy ny fasan’ny Asyrianina, fa matin’ny sabatra izy rehetra.+
23 Any anaty lavaka* lalina be ireny fasany ireny. Manodidina an’ireny fasany ireny ny vahoakany. Matin’ny sabatra daholo izy rehetra, satria nampihorohoro tao amin’ny tanin’ny velona.
24 “‘Manodidina ny fasany i Elama+ sy ny vahoakany rehetra, ary matin’ny sabatra daholo. Nidina tsy mifora any ambanin’ny tany izy ireo, satria nampihorohoro tao amin’ny tanin’ny velona. Ho afa-baraka miaraka amin’izay midina any anaty lavaka* izy ireo izao.
25 Nanamboatra fandriana ho an’i Elama teo amin’izay novonoina izy ireo, izany hoe teo amin’ny vahoakany rehetra manodidina ny fasany. Tsy mifora daholo ireo, sady matin’ny sabatra, satria nampihorohoro tao amin’ny tanin’ny velona. Dia ho afa-baraka miaraka amin’izay midina any anaty lavaka* izy ireo. Nampiarahina tamin’ny olona novonoina i Elama.
26 “‘Any no misy an’i Meseka sy Tobala+ ary ny vahoakany rehetra. Manodidina azy ny fasan’izy ireo. Tsy mifora daholo ireo, sady voatrobaky ny sabatra, satria nampihorohoro tao amin’ny tanin’ny velona.
27 Ireo ve dia tsy hiara-mivalampatra amin’ny miaramila matanjaka sady tsy mifora? Maty izy ireny ka nidina tany amin’ny Fasana* niaraka tamin’ny fitaovam-piadiany. Hataon’izy ireo eo ambany lohany ny sabany,* fa ho eo ambony taolany kosa ny fahotany. Nampihorohoro tao amin’ny tanin’ny velona mantsy ireny miaramila matanjaka ireny.
28 Ianao* kosa ho torotoro miaraka amin’ny tsy mifora, ka hiara-mivalampatra amin’ireo novonoina tamin’ny sabatra.
29 “‘Any koa no misy an’i Edoma+ sy ny mpanjakany ary ny mpiadidiny rehetra. Nampiarahina tamin’ny olona matin’ny sabatra izy ireo, na dia matanjaka aza. Hiara-mivalampatra amin’ny tsy mifora+ sy amin’izay midina any anaty lavaka* koa izy ireo.
30 “‘Any no misy ny andriana* rehetra avy any avaratra, sy ny Sidonianina rehetra.+ Niara-nidina tamin’izay novonoina izy ireo sady afa-baraka, na dia nampihorohoro aza satria hoe matanjaka. Hiara-mivalampatra amin’izay novonoina tamin’ny sabatra ireny tsy mifora ireny, ary ho afa-baraka miaraka amin’izay midina any anaty lavaka.*
31 “‘Ho hitan’i Farao daholo izany, ka hionona izy rehefa mahita an’izay rehetra mitranga amin’ny vahoakany.+ Ho fatin’ny sabatra i Farao sy ny miaramilany rehetra’, hoy i Jehovah Tompo Fara Tampony.
32 “‘Nampihorohoro tao amin’ny tanin’ny velona i Farao, ka halevina miaraka amin’ireo tsy mifora matin’ny sabatra izy sy ny vahoakany rehetra’, hoy i Jehovah Tompo Fara Tampony.”
Fanamarihana
^ Abt: “ny reniranon’izy ireo.”
^ Abt: “ho feno anao ny fanambanin’ny renirano.”
^ Na: “any am-pasana.”
^ Mety ho i Farao.
^ Na: “fasana.”
^ Na: “any am-pasana.”
^ Na: “any am-pasana.”
^ Angamba miaramila nalevina niaraka tamin’ny sabany, ho fanomezam-boninahitra azy.
^ Angamba i Farao, na i Ejipta.
^ Na: “any am-pasana.”
^ Na: “mpitarika.”
^ Na: “any am-pasana.”
