Genesisy 49:1-33
49 Avy eo dia nantsoin’i Jakoba ireo zanany lahy, ka hoy izy: “Avia daholo ianareo mba hilazako izay hitranga aminareo any am-parany.
2 Avia ka mihainoa, ry zanak’i Jakoba, mihainoa an’i Israely rainareo:+
3 “Robena! Ianao no lahimatoako+ sy tanjako, ary ianao no voalohan-terako.+ Lehibe kokoa ny voninahitrao sy ny herinao.
4 Tsy voafehy toy ny rano vaky anefa ny filanao. Koa tsy ho ambony noho ny rahalahinao ianao,+ satria efa niakaranao ny fandrianan’ny rainao,+ ka nolotoinao ny farafarako.+ Dia niakarany tokoa lahy ny farafarako!
5 “Mpirahalahy i Simeona sy Levy.+ Ary fitaovana entiny mihetraketraka ny sabatra famonoany.+
6 Koa enga anie aho tsy hiditra ho isan’ny namany,+ na ho tafaray amin’ny fiangonany!+ Fa tamin’ny fahatezerany no namonoany olona,+ ary hasomparana fotsiny no nanapahany ny hoza-tongotry ny omby.
7 Ho voaozona anie ny fahatezeran’izy ireo+ satria lozabe,+ ary ny fisafoahany satria masiaka!+ Hozarazaraiko eny amin’ny tanin’i Jakoba sy haparitako any amin’ny Israely izy ireo.+
8 “Ary ianao, ry Joda,+ hoderain’ny rahalahinao ianao.+ Ny tananao ho eo amin’ny hatoky ny fahavalonao.+ Ary hiankohoka eo anatrehanao ny zanaky ny rainao.+
9 Zana-diona ianao, ry Joda.+ Hihinana remby ianao, anaka, dia hitsangana. Niondrika izy, nitsotsotra toy ny liona izy. Toy ny liona izy, ka iza no ho sahy hanaitra azy?+
10 Ny tehim-panjakana tsy hiala amin’i Joda,+ ary ny tehim-pahefana tsy hiala eo anelanelan’ny tongony, mandra-pahatongan’i Silo.+ Ary hankatò an’i Silo ireo firenena.+
11 Hamatotra ny ampondrany amin’ny foto-boaloboka izy ary ny zanaky ny ampondravaviny amin’ny foto-boaloboka karazany tsara. Hanasa ny fitafiany amin’ny divay izy ary ny akanjony amin’ny ram-boaloboka.+
12 Mena dia mena ny masony vokatry ny divay, ary fotsy ny nifiny vokatry ny ronono.
13 “Honina amoron-tsiraka i Zebolona,+ ka ho eo amin’ny morona fiantsonan’ny sambo.+ Ary ho tandrifin’i Sidona ny sisin-taniny farany lavitra.+
14 “Isakara+ dia ampondra mafy taolana, izay matory eo ambany lasely, eo anelanelan’ny kitapon-dasely roa.
15 Ho hitany fa tsara ny toerana onenany sady mahafinaritra ilay tany. Ary hanaiky hitondra entana eo an-tsorony izy ka hampanaovina asa an-terivozona.
16 “Hitsara ny fireneny i Dana, izay anisan’ny fokon’ny Israely.+
17 Ho bibilava eo amoron-dalana i Dana, eny, ho bibilava misy tandroka eo an-tsisin-dalana, izay manaikitra ny hato-tongotry ny soavaly, hany ka mianjera ny mpitaingina azy.+
18 Hiandry ny famonjena avy aminao aho, Jehovah ô!+
19 “Hisy mpandroba hanafika an’i Gada, nefa izy hanafika ny vodilaharan’ireny.+
20 “Avy amin’i Asera no hiavian’ny sakafo tena tsara,+ ary hanome ny sakafo matsiron’ny mpanjaka izy.+
21 “Serfa manifinify i Naftaly.+ Manao teny kanto izy.+
22 “Sampan’ny hazo mamoa+ i Josefa, eny, sampan’ny hazo mamoa eo anilan’ny loharano,+ ary mihoatra any ivelan’ny manda ny rantsany.+
23 Fa tsy nitsahatra nampahory sy nitifitra azy ny mpandefa zana-tsipìka, ary nitana lolompo taminy.+
24 Efa nihenjana tsara anefa ny tsipìkany,+ ary natanjaka ny tanany sady mailaka.+ Ny tanan’Ilay Maherin’i Jakoba+ no nanome an’ilay Mpiandry sady Vato Fehizoron’i Israely.+
25 Avy amin’ilay Andriamanitry ny rainao+ izy, ary miaraka amin’ilay Mahery Indrindra.+ Hanampy anao Andriamanitra+ ka hanome anao ny fitahian’ny lanitra ambony+ sy ny fitahian’ny rano lalina any ambany+ ary hanome anao taranaka be dia be.*+
26 Ny tsodranon-drainao dia ho tsara lavitra noho ireo zava-tsoa avy amin’ny tendrombohitra maharitra mandrakizay,+ sy noho ny hakanton’ny havoana maharitra hatramin’ny fotoana tsy voafetra.+ Ho eo an-dohan’i Josefa foana izany, eny, ho eo an-tampon-dohan’ilay nosinganina tamin’ny rahalahiny.+
27 “Hamiravira foana toy ny amboadia i Benjamina.+ Hihinana ny rembiny izy amin’ny maraina, ary hizara izay nobaboiny izy amin’ny hariva.”+
28 Avy amin’izy rehetra ireo ny foko roa ambin’ny folon’ny Israely, ary izany no nolazain-drainy tamin’izy ireo rehefa nitso-drano azy izy. Samy notsofiny rano araka ny tsodrano tokony ho azy avy izy ireo.+
29 Ary namela hafatra tamin’izy ireo izy hoe: “Tsy ho ela dia hangonina any amin’ny razako+ aho. Aleveno miaraka amin’ny razako aho, ao amin’ilay lava-bato eo amin’ny sahan’i Efrona Hetita,+
30 dia ilay lava-bato eo amin’ilay saha ao Makpela izay tandrifin’i Mamre any Kanana. Io ilay saha novidin’i Abrahama tamin’i Efrona Hetita ho toeram-pandevenana.+
31 Tao no nandevenana an’i Abrahama sy Saraha vadiny.+ Tao koa no nandevenana an’i Isaka sy Rebeka vadiny,+ ary tao no nandevenako an’i Lea.
32 Avy tamin’ny taranak’i Heta ilay saha novidina sy ilay lava-bato eo aminy.”+
33 Rehefa avy namela hafatra tamin’ny zanany lahy i Jakoba, dia navonkiny teo am-pandriana ny tongony, ka niala aina izy ary nangonina any amin’ny razany.+
Fanamarihana
^ A.b.t.: “fitahian’ny nono sy ny kibo.”
