Hagay 2:1-23
2 Tamin’ny andro fahiraika amby roapolon’ny volana fahafito,+ dia tonga tamin’i Hagay+ mpaminany ny tenin’i Jehovah, nanao hoe:
2 “Mba lazao amin’i Zerobabela+ zanak’i Sealtiela,+ governoran’i Joda,+ sy amin’i Josoa+ mpisoronabe zanak’i Jozadaka,+ ary amin’ny vahoaka sisa, hoe:
3 ‘Iza aminareo no nahita ity trano ity tamin’ny voninahiny taloha ka mbola velona eto ankehitriny?+ Ahoana no fahitanareo azy izao? Tsy toy ny tsinontsinona+ ve raha oharina amin’ilay taloha?’
4 “‘Koa mahereza, ry Zerobabela ô!’, hoy i Jehovah, ‘ary mahereza,+ ry Josoa mpisoronabe zanak’i Jozadaka!’
“‘Ary mahereza daholo ianareo mponin’ity tany ity’, hoy i Jehovah, ‘ka miasà.’+
“‘Fa momba anareo aho’,+ hoy i Jehovah Tompon’ny tafika.
5 ‘Tadidio ilay fifanekena nataoko taminareo fony ianareo nivoaka avy tany Ejipta,+ fony teo aminareo ny fanahiko.+ Ary aza matahotra.’”+
6 “Fa izao no nolazain’i Jehovah Tompon’ny tafika: ‘Mbola hohozongozoniko indray mandeha indray ny lanitra sy ny tany sy ny ranomasina ary ny tany maina,+ ary kely sisa+ dia hataoko izany.’
7 “‘Dia hohozongozoniko ny firenena rehetra, ka hiditra ato amin’ity trano ity ny zava-tsarobidin’ny firenena rehetra,+ ary hofenoiko voninahitra izy ity’,+ hoy i Jehovah Tompon’ny tafika.
8 “‘Fa ahy ny volafotsy ary ahy ny volamena’,+ hoy i Jehovah Tompon’ny tafika.
9 “‘Ho lehibe kokoa ny voninahitr’ity trano ity raha oharina amin’ilay taloha’,+ hoy i Jehovah Tompon’ny tafika.
“‘Ary eto amin’ity toerana ity no hanomezako fiadanana’,+ hoy i Jehovah Tompon’ny tafika.”
10 Tamin’ny andro fahefatra amby roapolon’ny volana fahasivy, tamin’ny taona faharoa nanjakan’i Dariosy, dia tonga tamin’i Hagay+ mpaminany ny tenin’i Jehovah, nanao hoe:
11 “Izao no nolazain’i Jehovah Tompon’ny tafika: ‘Mba anontanio amin’ny mpisorona izay lazain’ny lalàna+ momba izao:
12 “Raha misy olona mitondra hena masina ao anaty lambany, ka voakasiky ny lambany ny mofo, na ny zavatra nandrahoina na ny divay na ny menaka na ny karazan-tsakafo hafa, ho lasa masina+ ve izany?”’”
Dia hoy ny mpisorona: “Tsia!”
13 Ary hoy indray i Hagay: “Raha misy olona maloto satria nikasika faty,* nefa avy eo dia nikasika ny iray tamin’ireo zavatra ireo, tsy haloto ve ilay izy?”+
Dia hoy ny mpisorona: “Haloto izany.”
14 Ary hoy i Hagay: “Toy izany ity vahoaka ity, ary toy izany ity firenena ity eo anatrehako’,+ hoy i Jehovah, ‘ary toy izany izay rehetra ataony, sy izay atolony eo amin’ny alitara. Maloto izany.’+
15 “‘Koa manomboka anio, dia mba diniho+ ny zava-nitranga talohan’ny nametrahana vato natao fototry ny tempolin’i Jehovah.+
16 Tamin’izany fotoana izany mantsy dia nankeo amin’ny antontam-bary roapolon’ny famarana ny olona, kanjo folo monja no teo, ary nankeo amin’ny fanantazana mba hanovo divay indimampolon’ny famarana, kanjo roapolo no tao.+
17 Ary nataoko mainan’ny rivotra mahamay+ sy tratran’ny aretin-javamaniry+ sy havandra+ ny volinareo, dia izay rehetra nisasaran’ny tananareo.+ Tsy nisy nitady ahy anefa ianareo,+ na iray aza’, hoy i Jehovah.
18 “‘Koa manomboka anio fahefatra amby roapolon’ny volana fahasivy, eny, manomboka amin’ity andro ametrahana ny fototry ny tempolin’i Jehovah ity,+ dia mba diniho izao+:
19 Mbola misy voa ve ao an-davaka fitehirizam-bokatra?+ Ary mbola tsy mamoa ve ny voaloboka sy ny aviavy sy ny ampongabendanitra ary ny oliva? Manomboka anio, dia handrotsaka fitahiana aho.’”+
20 Dia tonga tamin’i Hagay+ fanindroany ny tenin’i Jehovah tamin’ny andro fahefatra amby roapolon’ny volana,+ nanao hoe:
21 “Lazao amin’i Zerobabela governoran’i Joda+ hoe: ‘Hohozongozoniko ny lanitra sy ny tany.+
22 Dia haongako tokoa ny seza fiandrianan’ireo fanjakana ary hofoanako ny herin’ny fanjakan’ireo firenena.+ Haongako ny kalesy sy ny mpitaingina azy, ary samy ho lavon-tsabatra na ny soavaly na ny olona,+ ka ny sabatry ny rahalahiny ihany no hamely azy.’”+
23 “‘Amin’izany andro izany’, hoy i Jehovah Tompon’ny tafika, ‘dia hampiasa anao aho, ry Zerobabela+ mpanompoko zanak’i Sealtiela’,+ hoy i Jehovah, ‘ka hataoko toy ny peratra fanombohan-kase+ ianao, fa ianao no nofidiko’,+ hoy i Jehovah Tompon’ny tafika.”+
Fanamarihana
^ Heb.: nefesh. Jereo F.F. 3A.
