Isaia 10:1-34
10 Lozan’izay mamoaka fitsipika mampidi-doza,+ sy izay tsy mitsahatra manoratra didy mampahory,
2 mba hisakanana ny mahantra tsy ho eo amin’ny fitsarana, sy mba tsy hanomezana rariny an’ireo ory eo amin’ny vahoakako,+ sy mba hakana ny mpitondratena ho babo, ary mba handrobana ny kamboty ray!+
3 Koa ahoana no hataonareo rehefa tonga ny andro hifantohana aminareo,+ sy rehefa tonga ny fandravana avy any lavitra?+ Any amin’iza ianareo no handositra hitady fanampiana,+ ary havelanareo aiza ny voninahitrareo?+
4 Tsy maintsy hihohoka ao ambanin’ireo voafonja ianareo, sady ho lavo ao ambanin’ireo voavono.+ Noho izany faharatsiana rehetra izany, dia tsy mitony mihitsy ny fahatezerany, fa mbola maninjitra ny tanany ihany Izy.+
5 “Jereo ny Asyrianina+ izay tsorakazon’ny fahatezerako!+ Ary ny tehina eny an-tanany no hoentiko hanamelohana.
6 Hirahiko hamely firenena mpivadi-pinoana+ izy, ary hodidiako hamely an’ilay vahoaka iharan’ny fahatezerako,+ mba hamaboany zavatra maro sy handrobany zavatra be dia be, ary hanosihoseny azy toy ny fanosihosy fotaka eny an-dalambe.+
7 Na tsy toy izany aza izy dia ho voatosika hanao izany ihany, ary na tsy toy izany aza ny fony dia hanao tetika ihany izy, satria efa ao am-pony ny handringana+ sy ny handripaka firenena maro.+
8 Hilaza mantsy izy hoe: ‘Tsy mpanjaka koa angaha ireo andrianako?+
9 Tsy tahaka an’i Karkemisy+ ihany ve i Kalno?+ Tsy tahaka an’i Arpada+ ihany ve i Hamata?+ Ary tsy tahaka an’i Damaskosy+ ihany ve i Samaria?+
10 Azon’ny tanako ireo fanjakan’ny andriamanitra tsy misy dikany, izay nanana sary sokitra maro kokoa noho ireo any Jerosalema sy Samaria.+
11 Koa tsy toy ny nataoko tamin’i Samaria sy ny andriamaniny tsy misy dikany+ ihany ve no hataoko koa amin’i Jerosalema sy ny sampiny?’+
12 “Rehefa vitan’i Jehovah daholo ny asany eo amin’ny Tendrombohitra Ziona sy any Jerosalema, dia hataoko ampamoaka ny mpanjakan’i Asyria, noho izy manivaiva sy miandranandrana manambony tena.+
13 Fa hoy izy: ‘Amin’ny herin-tsandriko sy ny fahendreko no hanaovako zavatra,+ satria manam-pahalalana aho. Ary hanafoana ny sisin-tanin’ireo firenena aho,+ sady handroba ny zavatra nangoniny,+ ka handavo ny mponina toy ny ataon’ny lehilahy mahery.+
14 Toy ny fakàna tranom-borona no hakako+ ny haren’ireo+ firenena, ary toy ny fanangon’ny olona ny atody tavela ao no hanangonako ny tany manontolo. Dia tsy hisy ho afaka hikopak’elatra na hanoka-bava na hikiakiaka.’”
15 Ny famaky ve dia hanandra-tena ho ambony noho izay mikapa aminy? Ny tsofa ve dia hihevi-tena ho ambony noho izay manatsofa aminy? Ny tehina indray ve no hanakipilipily an’ilay manainga azy? Sa ny tsorakazo no hanainga an’izay mitazona azy?+
16 Koa handefa aretina mankahia any amin’ireo Asyrianina matavy i Jehovah+ Tompon’ny tafika, ilay tena Tompo. Ary hisy zavatra hirehitra toy ny firehitry ny afo eo ambanin’ny voninahitr’i Asyria.+
17 Ho lasa afo+ ilay Fahazavan’ny+ Israely, ary ho lelafo+ Ilay Masiny. Hirehitra midedadeda izy io, ka holevoniny ao anatin’ny iray andro ny ahidratsy sy ny tsilon’i+ Asyria.
18 Hofoanany tanteraka ny voninahitry ny alan’i Asyria sy ny saham-boankazony,+ ka hitsonika toy ny olona marary.+
19 Hazo vitsy kely sisa no ho tavela any an’alany, ka na ankizilahikely aza dia hahasoratra ny isany.+
20 Amin’izany andro izany, dia tsy hiantehitra intsony amin’ilay namely azy+ ny sisa tavela amin’i Israely,+ sy ny sisa miangana amin’ny taranak’i Jakoba. Fa i Jehovah Ilay Masin’ny Israely+ kosa no tena hianteheran’izy ireo.+
21 Hisy sisa tavela hiverina amin’ilay Andriamanitra Mahery, dia ireo sisa amin’i Jakoba.+
22 Fa na maro toy ny fasika any an-dranomasina aza ny olonao,+ ry Israely, dia ny sisa amin’izy ireo ihany no hiverina.+ Ho avy toy ny safodrano ny fandripahana+ efa voatendry, ary ho ara-drariny+ izany,
23 satria hahatonga fandripahana+ sy hampihatra didim-pitsarana hentitra eo amin’ilay tany manontolo i Jehovah Tompon’ny tafika,+ ilay Tompo Fara Tampony.
24 Koa izao no nolazain’i Jehovah Tompon’ny tafika, ilay Tompo Fara Tampony:+ “Ry oloko mitoetra any Ziona!+ Aza matahotra noho ny amin’ny Asyrianina izay namely anareo tamin’ny tsorakazo,+ sady nanainga ny tehiny hamelezana anareo toy ny nataon’i Ejipta.+
25 Fa tsy ho ela dia ho tanteraka ny fanamelohana,+ ary hihatra amin’izy ireo ny fahatezerako ka handany azy.+
26 Ary i Jehovah Tompon’ny tafika dia hanambana azy amin’ny karavasy,+ toy ny tamin’ny fotoana naharesy ny Midianina, teo akaikin’ny harambaton’i Oreba.+ Ho eo ambony ranomasina ny tehiny,+ ary hingainy toy ny nataony tamin’i Ejipta izany.+
27 “Amin’izany andro izany, dia hiala tsy ho eo an-tsorokao ny entana nampitondrain’i Asyria,+ ary hiala tsy ho eo am-bozonao ny ziogany+ ka ho tapatapaka,+ noho ny fisian’ny menaka.”
28 Tonga tao Aiata+ i Asyria, ary nandalo an’i Migrona. Dia napetrany tao Mikmasy+ ny fitaovany.
29 Ary nandeha teo amin’ny toerana fiampitana izy, ka natory tao Geba.+ Mihorohoro i Rama,+ ary mandositra i Gibean’i+ Saoly.
30 Miantsoantsoa, ry zanakavavin’i Galima!+ Mihainoa, ry Laisy! Miantsoantsoa ianao, ry Anatota,+ izay ampahorina!
31 Mandositra i Madmena, ary mitady fialofana ny mponin’i Gebima.
32 Hijanona ao Noba+ i Asyria raha mbola antoandro ny andro. Hambanany amin’ny tanany ny tendrombohitr’i Ziona zanakavavy, dia ilay havoanan’i Jerosalema.+
33 I Jehovah Tompon’ny tafika, ilay tena Tompo, dia hanapaka an’ireo sampana ka hampidaraboka azy mafy.+ Hokapaina ireo hazo avo, ary hietry ny olona ambony.+
34 Nokapainy tamin’ny fitaovana vy ny kirihitrala, ary hisy mahery handavo an’i Libanona.+