Jeremia 33:1-26
33 Tamin’i Jeremia mbola nogadraina tao amin’ny Tokotanin’ny Mpiambina,+ dia niteny taminy fanindroany i Jehovah hoe:
2 “Izao no lazain’i Jehovah, ilay Mpanao ny tany, dia i Jehovah ilay namolavola azy io sy nanao azy ho mafy orina; Jehovah no anarany:
3 ‘Antsoy aho dia hamaly anao. Vonona aho hilaza aminao zavatra lehibe sy tsy takatry ny saina, izay mbola tsy fantatrao.’”+
4 “Fa izao no lazain’i Jehovah Andriamanitry ny Israely momba an’ireo trano ato amin’ity tanàna ity sy ireo tranon’ny mpanjakan’ny Joda, izay noravana mba hiatrehana an’ireo fahavalo nanorina dongon-tany hanaovana fahirano sady nampiasa sabatra,+
5 sy momba an’ireo tonga hiady amin’ny Kaldeanina ka mameno an’ireo toerana ireo amin’ny fatin’ireo olona novonoiko tao anatin’ny hatezerako sy ny fahavinirako, dia ireo nanao ratsy ka nahatonga ahy hanafina ny tarehiko tsy hijery an’ity tanàna ity:
6 ‘Hataoko matanjaka sy salama indray izy.+ Hanasitrana azy ireo aho, ary homeko fiadanam-be izy ireo sady haharihariko aminy ny fahamarinana.+
7 Hampodiko ny Joda sy Israely nentina babo.+ Ary hampahery azy ireo toy ny nataoko tamin’ny voalohany aho.+
8 Hodioviko izy ireo mba ho afaka amin’ny heloka rehetra vitany tamin’izy ireo nanota tamiko.+ Havelako daholo ny helony tamin’izy ireo nanota tamiko sy nandika ny lalàko.+
9 Hahafaly ahy ny anaran’ity tanàna ity, ary hahazo dera sy voninahitra eo anatrehan’ny firenena rehetra eny ambonin’ny tany aho noho ny aminy. Handre ny soa rehetra hataoko amin’ny vahoakako+ mantsy izy ireny. Ary hihorohoro sy hangovitra+ izy ireny noho ny soa rehetra hataoko amin’ilay tanàna sy ny fiadanam-be homeko azy.’”+
10 “Izao no lazain’i Jehovah: ‘Eto amin’ity toerana lazainareo hoe ngazana tsy misy olona na biby fiompy ity, izany hoe ao amin’ireo tanànan’i Joda sy ny lalan’i Jerosalema izay tsy misy olona na mponina na biby fiompy, dia mbola handrenesana
11 feon’olona mifaly sy miravoravo,+ feona mpampakatra sy ampakarina, ary feon’ireo olona milaza hoe: “Misaora an’i Jehovah Tompon’ny tafika fa tsara+ i Jehovah. Be fitiavana izy sady tsy mivadika mandrakizay!”’+
“‘Hitondra fanatitra fisaorana ao an-tranon’i Jehovah+ izy ireo, satria hampodiko izay mponin’ity tany ity lasa babo ka ho lasa toy ny taloha izy ireo’, hoy i Jehovah.”
12 “Izao no lazain’i Jehovah Tompon’ny tafika: ‘Mbola hisy kijana hahafahan’ny mpiandry ondry hampiala sasatra ny andian’ondriny,+ eto amin’ity toerana ngazana tsy misy olona na biby fiompy ity, sy ao amin’ny tanànany rehetra.’
13 “‘Mbola hisy andian’ondry handalo eo ambany tanan’ny mpanisa azy ao amin’ireo tanàna eny amin’ny faritra be tendrombohitra, ao amin’ireo tanàna eny amin’ny faritra iva, ao amin’ireo tanàna any atsimo, ao amin’ny tanin’i Benjamina, ao amin’ny faritra manodidina an’i Jerosalema,+ ary ao amin’ireo tanànan’i Joda’,+ hoy i Jehovah.”
14 “‘Henoy izao!’, hoy i Jehovah. ‘Ho avy ny andro hanatanterahako ny zava-tsoa nampanantenaiko momba ny taranak’Israely sy ny taranak’i Joda.+
15 Hampipoitra tsimoka*+ marina ho an’i Davida aho, amin’izany andro sy fotoana izany. Ary hanao ny rariny sy ny hitsiny eo amin’ilay tany izy.+
16 Hovonjena+ ny Joda amin’izany andro izany ary hilamina+ i Jerosalema, ka izao no hiantsoana azy: I Jehovah no Fahamarinantsika.’”+
17 “Fa izao no lazain’i Jehovah: ‘Hisy lehilahy avy amin’ny taranak’i Davida foana hipetraka eo amin’ny seza fiandrianan’ny taranak’Israely.+
18 Hisy lehilahy avy amin’ny Levita mpisorona foana koa hitsangana eo anatrehako, mba hanolotra fanatitra dorana manontolo sy handoro fanatitra varimbazaha ary hanao sorona.’”
19 Niteny tamin’i Jeremia indray i Jehovah hoe:
20 “Izao no lazain’i Jehovah: ‘Raha vitanareo ny manafoana ny fifanekena nataoko momba ny andro sy ny fifanekena nataoko momba ny alina, mba hisakanana ny andro sy ny alina tsy ho tonga amin’ny fotoana tokony hahatongavany,+
21 dia amin’izay ihany vao ho azo foanana ny fifanekena nataoko tamin’i Davida mpanompoko,+ ka tsy hanana zanakalahy ho mpanjaka hipetraka eo amin’ny seza fiandrianany+ izy. Amin’izay ihany koa vao ho azo foanana ny fifanekena nataoko tamin’ny Levita mpisorona mpanompoko.+
22 Hataoko maro be ny taranak’i Davida mpanompoko sy ny Levita manompo ahy, ka ho be dia be hoatran’ny zavatra eny amin’ny lanitra* izay tsy voaisa, sy hoatran’ny fasika any an-dranomasina izay tsy voafatra.’”
23 Niteny tamin’i Jeremia indray i Jehovah hoe:
24 “Tsy efa henonao ve fa niteny ity vahoaka ity hoe: ‘Hialan’i Jehovah ireo fianakaviana roa nofidiny’? Tsy hajain’izy ireo ny vahoakako, ary tsy heverin’izy ireo ho firenena intsony.
25 “Izao no lazain’i Jehovah: ‘Tsy hanova ny fifanekena nataoko momba ny andro sy ny alina aho,+ ary tsy hanova ny lalàna* mifehy ny lanitra sy ny tany.+ Dia hoatr’izany koa
26 fa tsy hanary ny taranak’i Jakoba sy Davida mpanompoko mihitsy aho. Koa hifidy olona avy amin’ny taranany foana aho, mba ho mpanjaka eo amin’ny taranak’i Abrahama sy Isaka ary Jakoba. Hangoniko mantsy izay taranany lasa babo+ ka hiantrako.’”+
