Joela 3:1-21
3 “Fa amin’izany andro sy fotoana izany,+ rehefa hampodiko avy any amin’ny fahababoana ny mponin’i Joda sy Jerosalema,+
2 dia hangoniko koa ny firenena rehetra+ ka hampidiniko ho eo amin’ny lemaka ivan’i Josafata.+ Ary eo no hitsarako azy ireo noho ny amin’ny Israely oloko sy lovako,+ izay naparitak’izy ireo tany amin’ireo firenena. Nozarazarainy koa ny taniko.+
3 Ary nataony antsapaka ny oloko.+ Ny zazalahy nataony takalon’ny mpivaro-tena,+ ary ny zazavavy namidiny hahazoana divay hosotroina.
4 “Misy zavatra iombonanareo amiko angaha moa, ry Tyro sy Sidona+ ary ianareo rehetra faritr’i Filistia?+ Izao ve no mba valisoa omenareo ahy? Koa raha izao no ataonareo amiko, dia hatsingeriko haingana dia haingana ho eo an-dohanareo izany.+
5 Nalainareo ny volafotsiko sy ny volamenako,+ ary nentinareo tao amin’ny tempolinareo ny zava-tsarobidiko,+
6 ary ny taranak’i Joda sy Jerosalema dia namidinareo+ tamin’ny zanaky ny Grika,+ mba handefasana azy lavitra ny faritaniny.+
7 Koa hanentana azy ireo aho mba hialany any amin’ny toerana nivarotanareo azy.+ Ary hatsingeriko ho eo an-dohanareo ny nataonareo.+
8 Ary hamidiko eo an-tanan’ny taranak’i Joda ny zanakalahinareo sy ny zanakavavinareo,+ ka hamidiny amin’ireo lehilahy any Sheba,+ dia amin’ny firenena lavitra.+ Fa i Jehovah no efa niteny.
9 “Ambarao any amin’ireo firenena+ izao: ‘Miomàna hiady!* Entano ny lehilahy mahery!+ Aoka izy ireo hanatona! Aoka hiakatra ny lehilahy mpiady rehetra!+
10 Tefeo ho sabatra ny angadinombinareo, ary ho lefona ny antsy fandrantsanam-boalobokareo.+ Ary aoka ny kely hery hilaza hoe: “Lehilahy mahery aho.”+
11 Tongava hifanampy, ry firenena rehetra manodidina,+ ka mivoria.’”+
Ampidino ho eo amin’izany toerana izany ireo maherinao, Jehovah ô!+
12 “Aoka hoentanina ireo firenena ka hankeo amin’ny lemaka ivan’i Josafata,+ fa eo no hipetrahako hitsara ny firenena rehetra manodidina.+
13 “Arosoy ny antsy fijinjana,+ fa masaka ny vokatra.+ Avia, midìna fa feno be ny lavaka famiazam-boaloboka,+ ary tondraka ny ao anatin’ny fanantazana ka mihoatra. Fa nanjary nitombo be ny faharatsian’ireo firenena.+
14 Vahoaka be, vahoaka be no eo amin’ny lemaka ivan’ny didim-pitsarana,+ fa akaiky ny andron’i Jehovah eo amin’ny lemaka ivan’ny didim-pitsarana.+
15 Ho lasa maizina ny masoandro sy ny volana, ary tsy hamirapiratra intsony ny kintana.+
16 Hierona avy ao Ziona i Jehovah, ary hanandratra ny feony avy ao Jerosalema izy.+ Hihovotrovotra ny lanitra sy ny tany.+ I Jehovah anefa no ho fialofan’ny olony+ sy ho fiarovana mafy ho an’ny zanak’Israely.+
17 Dia ho fantatrareo fa izaho no Jehovah Andriamanitrareo+ izay mitoetra ao Ziona, tendrombohitro masina.+ Ary ho toerana masina i Jerosalema,+ ka tsy hisy vahiny hamakivaky intsony eo.+
18 “Amin’izany andro izany, dia hisy divay mamy hitete eny an-tendrombohitra,+ sy ronono hikoriana eny amin’ny havoana, ary rano hikoriana eny amin’ny renirano rehetra any Joda. Dia hisy loharano hifantsitsitra avy ao an-tranon’i Jehovah.+ Ary izy io hanondraka ny lohasaha falehan-driakan’ny Hazo Akasia.+
19 Ary hanjary ho lao i Ejipta,+ ary ho tany efitra lao i Edoma,+ noho ny herisetra nataon’izy ireo tamin’ny taranak’i Joda, dia ny nandatsahany ran’olona tsy manan-tsiny, tany Joda.+
20 Fa i Joda kosa honenana mandritra ny fotoana tsy voafetra,+ ary i Jerosalema, hatramin’ny taranaka fara mandimby.+
21 Koa hoheveriko ho tsy manan-tsiny ny ran’izy ireo, na dia tsy noheveriko ho toy izany aza taloha.+ Ary hitoetra ao Ziona i Jehovah.”+
Fanamarihana
^ A.b.t.: “Manamasìna ady.”
