Nosoratan’i Matio 28:1-20
28 Taorian’ny Sabata, tamin’ny andro voalohany amin’ny herinandro,* rehefa nihanazava ny andro, dia tonga hijery ny fasana i Maria Magdalena sy ilay Maria anankiray.+
2 Ary nisy horohoron-tany mafy, satria nisy anjelin’i Jehovah* nidina avy any an-danitra tonga nanakodia ny vato dia nipetraka teo ambonin’ilay izy.+
3 Nanjelanjelatra hoatran’ny tselatra ilay anjely, ary fotsy mangatsakatsaka ny akanjony.+
4 Natahotra azy ny mpiambina ka nangovitra be, sady tsy nahahetsika toy ny maty.
5 Ary hoy ilay anjely tamin’izy roa vavy: “Aza matahotra. Fantatro fa mitady an’i Jesosy, ilay novonoina teo amin’ny tsato-kazo, ianareo.+
6 Tsy ato izy fa efa natsangana, araka ny efa nolazainy.+ Avia, jereo ilay toerana nisy ny fatiny.
7 Mandehana haingana teneno ny mpianany hoe: ‘Efa natsangana tamin’ny maty izy. Hialoha anareo any Galilia+ izy, dia any no hahitanareo azy.’ Hiteny an’izany aminareo no nahatongavako eto.”+
8 Niala haingana teo am-pasana àry izy roa vavy, sady natahotra no faly be, ary nihazakazaka mba hilaza an’izany tamin’ny mpianatr’i Jesosy.+
9 Ary iny i Jesosy fa nifanena tamin’izy ireo sady niteny hoe: “Manahoana ianareo!” Dia nanatona izy ireo, ka nitazona azy tamin’ny tongony sady niankohoka teo anatrehany.
10 Hoy i Jesosy taminy: “Aza matahotra! Mandehana milaza amin’ny rahalahiko mba ho any Galilia, fa any no hahitany ahy.”
11 Tamin’izy ireo mbola teny an-dalana, dia nankany an-tanàna ny mpiambina sasany+ nilaza tamin’ny lehiben’ny mpisorona ny zava-nitranga rehetra.
12 Dia niara-nivory sy niara-nidinika ny lehiben’ny mpisorona sy ny anti-panahy, ary avy eo nomeny vola* be ireo miaramila ireo,
13 ka noteneniny hoe: “Lazao hoe: ‘Tonga tamin’ny alina ny mpianany nangalatra azy tamin’izahay mbola natory.’+
14 Ary raha tonga any am-poto-tsofin’ny governora izany, dia hohazavainay aminy ilay izy,* ka tsy misy tokony hatahoranareo.”
15 Noraisin’ny miaramila àry ireo vola* ireo, dia nanao araka izay nolazaina taminy izy ireo. Ary niely teo amin’ny Jiosy izany resaka izany hatramin’izao.
16 Ny mpianatra 11 lahy kosa nankany Galilia,+ dia nankeny amin’ilay tendrombohitra notenenin’i Jesosy hoe hihaonan’izy ireo.+
17 Dia niankohoka izy ireo rehefa nahita azy, fa ny sasany kosa nisalasala raha izy tokoa io.
18 Ary nanatona i Jesosy ka niteny taminy hoe: “Efa nomena ahy ny fahefana rehetra any an-danitra sy etỳ an-tany.+
19 Mandehana àry, ampianaro ny olona any amin’ny firenena rehetra mba ho lasa mpanara-dia ahy.+ Ataovy batisa+ amin’ny anaran’ny Ray sy amin’ny anaran’ny Zanaka ary amin’ny anaran’ny fanahy masina izy ireo,
20 sady ampianaro hankatò an’izay rehetra nandidiako anareo.+ Ary hiaraka aminareo foana aho isan’andro, mandra-pahatongan’ny faran’izao tontolo izao.”*+
