Mika 6:1-16
6 Mba henoy re izay lazain’i Jehovah e!+ Mitsangàna, ka ento eo amin’ny fitsarana ny adinao mba hatrehin’ny tendrombohitra. Ary aoka ho ren’ny havoana ny feonao.+
2 Koa henoy ny adin’i Jehovah, ry tendrombohitra, sy ianareo vatolampy mateza ary ianareo fototra iorenan’ny tany!+ Fa manana ady amin’ny olony i Jehovah, ary toriny ny Israely:+
3 “Fa inona no nataoko taminao, ry oloko?+ Ary inona no nataoko ka nandreraka anao?+ Lazao àry izay fahadisoako.+
4 Nitondra anao niakatra avy tany Ejipta aho,+ ary avy tao amin’ny trano fanandevozana no nanavotako anao.+ Ary naniraka an’i Mosesy sy Arona ary Miriama aho mba handeha teo alohanao.+
5 Mba tsarovy re,+ ry oloko, ny teti-dratsin’i Balaka mpanjakan’i Moaba e,+ sy ny teny navalin’i Balama zanak’i Beora azy.+ Hatrany Sitima+ no namonjeko anao ka hatrany Gilgala,+ mba ho fantatra ny zavatra ara-drariny nataon’i Jehovah.”+
6 Inona no hoentiko manatona+ an’i Jehovah, sy miankohoka eo anatrehan’Andriamanitra izay any amin’ny avo?+ Hitondra fanatitra dorana manontolo ve aho rehefa manatona azy?+ Sa hitondra zanak’omby vao herintaona?
7 Ho tian’i Jehovah ve ny ondrilahy an’arivony, na ny menaka be dia be toy ny renirano an’aliny?+ Ny zanako lahimatoa ve no homeko noho ny fikomiako, sa ny naloaky ny kiboko no homeko noho ny fahotako?+
8 Ry zanak’olombelona, efa nolazainy taminao izay tsara.+ Ary inona moa no takin’i Jehovah aminao, afa-tsy ny hanao ny rariny+ sy ny ho tia hatsaram-panahy+ ary ny hanetry tena+ rehefa miara-mandeha amin’Andriamanitrao?+
9 Tonga hatrany an-tanàna ny antson’i Jehovah,+ ka hatahotra ny anaranao ny olona manam-pahendrena.+ Henoy ny tsorakazo sy ilay nampihatra izany.+
10 Mbola misy ao an-tranon’ny ratsy fanahy ve ny faharatsiana notehirizina,+ sy ny efaha nohakelezina ka voaozona?
11 Madio ve aho raha manana mizana mandainga sy kitapo misy vatomizana mamitaka?+
12 Mahery setra be ny mpanankarenany, mandainga ny mponina ao aminy,+ ary feno fitaka ny lelan’izy ireo.+
13 “Dia hokapohiko ianao ka hataoko lasa marary,+ ary ho lasa tsisy mponina ao aminao noho ny fahotanao.+
14 Dia hihinana ianao nefa tsy ho voky, ary mbola ho noana ihany ianao.+ Hafindranao ny fanananao nefa tsy ho voatahirinao. Ary izay voatahirinao aza dia hatolotro ho an’ny sabatra.+
15 Hamafy ianao nefa tsy hijinja. Hanitsakitsaka oliva ianao nefa tsy hihosotra menaka, ary hanao divay mamy nefa tsy hisotro divay.+
16 Mitandrina ny lalàn’i Omry+ sy izay rehetra nataon’ny taranak’i Ahaba+ ianareo, sady manaraka ny toroheviny.+ Koa hataoko higagan’ny olona ianareo. Ary hataoko izay hahatonga ny olona hisioka haneso ny mponina ao.+ Ary hozakainareo ny latsa ataon’ny olona.”+