Nomery 21:1-35
21 Ary henon’ilay Kananita mpanjakan’i Arada+ nipetraka tany Negeba fa efa eny amin’ny lalana mankany Atarima ny Israely. Dia notafihiny izy ireo ka nentiny ho babo ny sasany.
2 Koa nivoady tamin’i Jehovah ny Israely hoe: “Raha ataonao resinay io firenena io, dia tsy maintsy horavanay ny tanànany.”
3 Nohenoin’i Jehovah àry ny Israely ka nataony resin’izy ireo ny Kananita. Dia naringan’izy ireo ny Kananita sy ny tanànany. Koa nataon’izy ireo hoe Horma*+ ny anaran’ilay toerana.
4 Niala teo amin’ny Tendrombohitra Hora+ izy ireo avy eo, ka nanohy ny diany nanaraka an’ilay lalana mankany amin’ny Ranomasina Mena mba tsy handalo eo amin’ny tanin’i Edoma.+ Dia nanomboka leo an’ilay dia ny vahoaka.
5 Ary nanome tsiny an’Andriamanitra sy Mosesy foana ny vahoaka+ hoe: “Fa maninona ianareo no nitondra anay niakatra avy tany Ejipta mba ho faty atỳ amin’ity tany efitra ity? Tsy misy sakafo atỳ na rano,+ sady efa maharikoriko anay* itony mofo tsisy ilana azy itony.”+
6 Dia nandefa bibilava misy poizina* teo amin’ny vahoaka i Jehovah. Nokaikerin’ireny ny Israelita, ka be dia be no maty.+
7 Nankany amin’i Mosesy àry ny vahoaka ka niteny hoe: “Efa nanota izahay, satria nanome tsiny anao sy Jehovah.+ Aleo re ianao mba mifona amin’i Jehovah ho anay e! Dia mba hesoriny any ireo bibilava ireo.” Ary nifona ho an’ny vahoaka i Mosesy.+
8 Dia hoy i Jehovah tamin’i Mosesy: “Manamboara sarivongana bibilava misy poizina,* dia ataovy eo amin’ny tsato-kazo ilay izy. Amin’izay rehefa misy voakaikitra dia hijery an’ilay bibilava izy ka tsy ho faty.”
9 Tonga dia nanamboatra bibilava varahina i Mosesy,+ dia nataony teo amin’ny tsato-kazo+ ilay izy. Koa isaky ny nisy olona voakaikitra ka nijery an’ilay bibilava varahina, dia tsy maty.+
10 Taorian’izay dia niainga ny Israelita ka nitoby tao Obota.+
11 Niala tao Obota indray izy ireo ka nitoby tao Ie-abarima,+ tany amin’ilay tany efitra tandrifin’i Moaba, any atsinanana.
12 Ary niala teo izy ireo ka nitoby teo akaikin’ny Lohasahan’i* Zareda.+
13 Dia niala teo indray izy ireo ka nitoby tao amin’ny faritr’i Arnona,+ izay tany an-tany efitra. Nanomboka teo amin’ny sisin-tanin’ny Amorita io tany efitra io. Fa i Arnona no sisin-tanin’i Moaba, teo anelanelan’i Moaba sy ny tanin’ny Amorita.
14 Izany no mahatonga an’ilay bokin’ny Adin’i Jehovah hiresaka momba an’i “Vaheba any Sofa, sy ny lohasahan’i* Arnona,
15 ary ilay fidinana ao amin’ny* lohasaha,* izany hoe ilay fidinana tonga hatrany amin’ilay tanàna kely atao hoe Ara, sady manakaiky ny sisin-tanin’i Moaba.”
16 Dia lasa nankany Bera izy ireo. Teo amin’io lavadrano io i Jehovah no niteny tamin’i Mosesy hoe: “Vorio ny vahoaka fa homeko rano.”
17 Dia nihira an’izao hira izao ny Israely tamin’izay fotoana izay:
“Hiboiboika anie ny ranonao, ry lavadrano! Valio* izy e!
18 Io ilay lavadrano nolavahan’ny andriana! Ny olona ambony tamin’ny vahoaka no nandavaka azy,Tamin’ny tehim-pahefana sy tamin’ny tehin-dry zareo ihany.”
Avy eo dia niala tany an-tany efitra izy ireo ka nankany Matana.
19 Avy tao Matana indray izy ireo dia nankany Nahaliela, ary avy tao Nahaliela dia nankany Bamota.+
20 Avy tao Bamota kosa izy ireo dia nankany amin’ilay lohasaha teo amin’ny faritr’i* Moaba,+ teo an-tampon’i Pisga,+ izay mahatazana an’i Jesimona.*+
21 Ary naniraka olona nankany amin’i Sihona mpanjakan’ny Amorita ny Israely, hiteny hoe:+
22 “Avelao izahay handalo ao amin’ny taninao. Tsy hivily ho eny amin’ny saha na tanimboaloboka izahay, sady tsy hisotro rano amin’izay lavadrano ao. Fa ny Lalan’ny Mpanjaka no handehananay, mandra-pahatafavoakanay ny taninao.”+
23 Tsy navelan’i Sihona handalo tao amin’ny taniny anefa ny Israely. Nangoniny daholo kosa ny vahoakany, dia nivoaka hiady tamin’ny Israely tany an-tany efitra izy. Ary tonga tao Jahaza izy ka niady tamin’ny Israely.+
24 Resin’ny Israely anefa izy ka novonoiny tamin’ny sabatra ny mponina tao.+ Dia nalain’ny Israely ny taniny,+ hatrany Arnona+ ka hatrany Jaboka,+ teo akaikin’ny Amonita. I Jazera+ mantsy no sisin-tanin’ny Amonita.+
25 Nalain’ny Israely daholo àry ireny tanàna ireny. Dia nipetrahan’izy ireo daholo ny tanànan’ny Amorita,+ izany hoe Hesbona sy ny tanàna rehetra niankina taminy.*
26 Fa i Hesbona no tanànan’i Sihona mpanjakan’ny Amorita. Efa niady tamin’ny mpanjakan’i Moaba izy taloha, ka nalainy daholo ny tanin’io mpanjaka io, hatrany Arnona.
27 Izany no nahatonga an’ilay tononkalo fanesoana hoe:
“Tongava any Hesbona.
Aleo hamboarina ny tanànan’i Sihona ka hatao mafy orina.
28 Fa nisy afo avy tao Hesbona, nisy lelafo avy tao an-tanànan’i Sihona,
Ka nandevona an’i Aran’i Moaba, dia ny tompon’ny toerana avo any Arnona.
29 Hahita loza ianao, ry Moaba! Ho ringana ianareo, ry vahoakan’i Kemosy!+
Tsy ho afa-manoatra izy mahita ny zanany lahy mandositra, sy mahita ny zanany vavy entin’i Sihona mpanjakan’ny Amorita ho babo.
30 Andao hotafihintsika ireo.Ho rava hatrany Dibona i Hesbona.+Andao hataontsika tsy misy mponina intsony io tanàna io, hatrany Nofa.Dia hisy afo hitatra hatrany Medeba.”+
31 Nipetraka tao amin’ny tanin’ny Amorita àry ny Israely.
32 Ary nandefa lehilahy hitsikilo tany Jazera i Mosesy.+ Dia azon’izy ireo ny tanàna niankina tamin’i* Jazera, ka noroahiny ny Amorita tao.
33 Nivily lalana izy ireo avy eo, ka niakatra nanaraka an’ilay Lalan’i Basana. Dia nivoaka hiady tamin’izy ireo tao Edrehy+ i Oga+ mpanjakan’i Basana sy ny tafiny manontolo.
34 Ary hoy i Jehovah tamin’i Mosesy: “Aza matahotra azy+ fa hataoko resinao izy sy ny tafiny manontolo ary homeko anao ny taniny.+ Hataonao hoatran’i Sihona izy, dia ilay mpanjakan’ny Amorita nipetraka tao Hesbona.”+
35 Dia nasian’izy ireo izy sy ny zanany lahy ary ny tafiny manontolo, ka nataony tsy nisy niangana na iray aza.+ Dia nalain’izy ireo ny taniny.+
Fanamarihana
^ Midika hoe “Natokana Haringana.”
^ Na: “efa halanay.”
^ Na: “poizina mampamaivay.”
^ Na: “poizina mampamaivay.”
^ Na: “Lalan-driakan’i.”
^ Na: “lalan-driakan’i.”
^ Abt: “ilay vavan’ny.”
^ Na: “lalan-driaka.”
^ Na: “Ataovy an-kira.”
^ Na mety hoe “an’ilay tany efitra.”
^ Abt: “sahan’i.”
^ Na: “nanodidina azy.”
^ Na: “nanodidina an’i.”
