Nomery 5:1-31
5 Hoy koa i Jehovah tamin’i Mosesy:
2 “Omeo baiko ny Israelita hoe avoahy eny ivelan’ny toby daholo izay olona boka,+ na misy tsiranoka mivoaka amin’ny taovam-pananahany,+ na maloto satria nikasika faty.+
3 Avoahy izy ireny, na lahy na vavy. Avoahy eny ivelan’ny toby ireny mba tsy handotoany+ ny toby, satria mipetraka eo amin’ny vahoaka ao amin’ny toby aho.”+
4 Dia nataon’ny Israelita izany, ka navoakany teny ivelan’ny toby ireny. Araka ny didy nomen’i Jehovah an’i Mosesy no nataon’izy ireo.
5 Hoy ihany i Jehovah tamin’i Mosesy:
6 “Teneno ny Israelita hoe: ‘Raha misy lehilahy na vehivavy manota, na inona na inona fahotany, ary mivadika amin’i Jehovah izy, dia ho meloka.+
7 Tsy maintsy miaiky+ ny fahotany izy,* ary hanome onitra ka honerany manontolo izay nalainy tamin’ilay olona nanaovany fahadisoana, sady mbola hampiany ampahadiminy.+ Dia homeny an’ilay olona izany.
8 Raha tsy manana havana akaiky handray an’ilay onitra anefa ilay olona nanaovany fahadisoana, dia homena an’i Jehovah izany, ka ho lasan’ny mpisorona, afa-tsy ilay ondrilahy hatao fandrakofam-pahotana. Io mantsy no handrakofan’ilay mpisorona ny fahotan’ilay meloka.+
9 “‘Ho an’ny mpisorona+ daholo izay fanomezana masina+ entin’ny Israelita any aminy.
10 Ho azy* foana ny zava-masina atolotry ny olona tsirairay. Izay omen’ny tsirairay ho an’ny mpisorona, dia ho lasan’ilay mpisorona.’”
11 Hoy koa i Jehovah tamin’i Mosesy:
12 “Teneno ny Israelita hoe: ‘Raha misy vehivavy manambady nefa manota ka mivadika amin’ny vadiny,
13 ary misy lehilahy hafa manao firaisana aminy,+ nefa tsy fantatr’ilay vadiny izany sady tsy misy mahafantatra mihitsy, izany hoe mandoto ny tenany ilay vehivavy, nefa tsy misy vavolombelona miampanga azy ary tsy tratra izy, dia izao no tokony hatao:
14 Raha lasa saro-piaro ilay lehilahy vadiny ka ahiahiny hoe nivadika taminy ilay vehivavy, ary efa nandoto ny tenany tokoa, na raha lasa saro-piaro ilay lehilahy ka ahiahiny hoe nivadika taminy ilay vehivavy, nefa tsy nandoto ny tenany akory,
15 dia hoentin’ilay lehilahy any amin’ny mpisorona ilay vehivavy, ary hoentiny miaraka aminy koa ny fanatitra aterin’ilay vehivavy, izany hoe lafarinina ampahafolon’ny efaha* vita amin’ny vary orza. Tsy horarahany menaka eo ambonin’ilay izy sady tsy hasiany ditin-kazo manitra, satria fanatitra varimbazaha atolotra noho ny fahasarotam-piaro izany, dia fanatitra ahafantarana raha nisy fahadisoana tokoa na tsia.
16 “‘Dia hasain’ny mpisorona manatona ilay vehivavy, ka hasainy mijoro eo anatrehan’i Jehovah.+
17 Haka rano madio amin’ny zinga tanimanga ilay mpisorona, ary haka vovoka eo amin’ny tany misy an’ilay tranolay masina, dia hataony ao anatin’ilay rano ilay izy.
18 Ary hasain’ny mpisorona mijoro eo anatrehan’i Jehovah ilay vehivavy, ka hovahany ny volony. Dia hataony eo am-pelatanan’ilay vehivavy ny fanatitra varimbazaha mampahatsiahy an’ilay fahadisoana, dia ilay fanatitra atolotra noho ny fahasarotam-piaro.+ Ary ho eny an-tanan’ny mpisorona kosa ny rano mangidy mitondra ozona.+
19 “‘Dia hasain’ilay mpisorona mianiana ilay vehivavy, sady hoteneniny hoe: “Raha tsy nisy lehilahy nanao firaisana taminao, amin’izao ianao mbola eo ambany fahefan’ny vadinao izao,+ ary tsy hoe nanota ianao ka nandoto ny tenanao, dia enga anie tsy hampaninona anao ity rano mangidy mitondra ozona ity!
20 Fa raha nanota ianao ka nandoto tena nefa mbola eo ambany fahefan’ny vadinao, ary efa nanao firaisana tamin’ny lehilahy hafa+ ankoatra ny vadinao...”
21 Dia hasain’ny mpisorona mianiana sy miozona* ilay vehivavy, sady hotenenin’ilay mpisorona hoe: “Enga anie ny anaranao ka hataon’i Jehovah fampiasan’ny firenenao rehefa manozona na mianiana, ary enga anie hataon’i Jehovah tsy miteraka ianao,* dia hataony mibontsina ny kibonao!
22 Hiditra ao amin’ny tsinainao ity rano mitondra ozona ity, ka hampibontsina ny kibonao dia tsy ho afaka hiteraka ianao.”* Dia tokony hiteny ilay vehivavy hoe: “Amena! Amena!”*
23 “‘Dia hosoratan’ny mpisorona ao anaty boky ireo ozona ireo ka hofafany ao anatin’ilay rano mangidy.
24 Avy eo dia hampisotroiny an’ilay vehivavy ilay rano mangidy mitondra ozona, dia hiditra ao anatiny ka hijalijaly izy.
25 Ary halain’ny mpisorona eny an-tanan’ilay vehivavy ilay fanatitra varimbazaha atolotra noho ny fahasarotam-piaro,+ ka hahetsiketsiny eo anatrehan’i Jehovah, dia hoentiny eo akaikin’ny alitara.
26 Haka eran’ny tanan’ila amin’ilay fanatitra varimbazaha ny mpisorona mba hatao santionany amin’ilay fanatitra. Ary hodorany eo ambony alitara+ ilay izy mba hidona-tsetroka. Dia hampisotroiny an’ilay vehivavy ilay rano.
27 Rehefa ampisotroiny an’ilay vehivavy ilay rano, ary raha nandoto ny tenany izy ka nivadika tamin’ny vadiny, dia hiditra ao anatiny ilay rano mitondra ozona, ka hijalijaly izy. Dia hibontsina ny kibony ka tsy ho afaka hiteraka izy,* ary ny anarany no hampiasain’ny fireneny rehefa manozona.
28 Raha tsy nandoto ny tenany anefa ilay vehivavy fa madio, dia tsy hiharan’izany sazy izany izy. Dia ho afaka hiteraka izy ka hanan-janaka.
29 “‘Izany no lalàna momba ny fahasarotam-piaro,+ rehefa misy vehivavy manota ka mandoto ny tenany nefa mbola eo ambany fahefan’ny vadiny,
30 na koa rehefa misy lehilahy lasa saro-piaro, ka miahiahy hoe nivadika taminy ny vadiny. Tokony hasainy mijoro eo anatrehan’i Jehovah ilay vehivavy, ka hampiharin’ny mpisorona aminy izany lalàna rehetra izany.
31 Tsy hanan-tsiny ilay lehilahy, fa ny vadiny kosa hizaka ny vokatry ny ratsy nataony.’”
Fanamarihana
^ Abt: “izy ireo.”
^ Mety hoe ho an’ny mpisorona.
^ Izany hoe manaiky fa hisy loza hanjo azy raha tsy marina ny teniny.
^ Abt: “havelan’i Jehovah hikainkona ny fenao.” Ilazana ny taovam-pananahana ny hoe fe eto.
^ Abt: “dia hikainkona ny fenao.” Ilazana ny taovam-pananahana ny hoe fe eto.
^ Na: “Ho tanteraka anie izany! Ho tanteraka anie izany!”
^ Abt: “ka hikainkona ny feny.” Ilazana ny taovam-pananahana ny hoe fe eto.
