Ohabolana 1:1-33
1 Ny ohabolan’i Solomona+ zanak’i Davida,+ mpanjakan’ny Israely.+
2 Nosoratana ireny mba hahalalana* ny atao hoe fahendrena+ sy anatra,Mba hahazoana ny dikan’ny tenin’ny hendry,
3 Mba hanekena anatra+ ka hahatonga ny olona ho lasa lalin-tsaina,Hanao ny marina,+ hahay hanapa-kevitra,*+ ary hanao ny rariny sy ny hitsiny.
4 Nosoratana koa ireny mba ho lasa malina+ ny olona mbola tsy dia nahita fiainana,*Ary hanam-pahalalana sy hahay hisaina tsara ny tanora.+
5 Mihaino ny hendry ka mitombo ny zavatra fantany.+Mahazo tari-dalana tsara* ny mahira-tsaina,+
6 Mba hahazoany ny dikan’ny ohabolana sy ny sarin-teny saro-pantarina,*Ary ny tenin’olon-kendry sy ny ankamantatra ataony.+
7 Ny fahatahorana* an’i Jehovah no fiandohan’ny fahalalana.+
Ny tsisy saina ihany no manao tsinontsinona ny fahendrena sy ny anatra.*+
8 Henoy, anaka, ny anatry ny rainao,+Ary aza lavina ny tenin’ny* reninao.+
9 Fehiloha tsara tarehy eo amin’ny lohanao izany,+Ary firavaka tena tsara eny amin’ny tendanao.+
10 Aza manaiky, anaka, raha misy mpanota mitady hitaona anao,+
11 Na raha miteny izy ireo hoe: “Andao hiaraka aminay.
Andao hiafina mba hamono olona.*
Hiafina isika dia hiandriandry olona tsy manan-tsiny, mba hamely azy tsy amin’antony.
12 Hitelina azy velona isika, hoatran’ny ataon’ny Fasana,*Dia hataontsika indray mitelina izy manontolo, sahala amin’ny olona latsaka any an-davaka.
13 Andao halaintsika daholo ny harenany sarobidy,Dia hofenointsika zavatra norobaina ny tranontsika.
14 Andao hiaraka* aminay,Dia hozaraintsika mitovy izay zavatra hangalarintsika.”*
15 Aza manaraka azy ireo, anaka.
Aza mandeha amin’ny lalany mihitsy.+
16 Fa mihazakazaka hanao ratsy ny tongony,Ary maika handatsa-dra+ izy.
17 Tena hiala maina izay mamelatra harato eo imason’ny vorona.
18 Izany no mahatonga azy ireo hiafina mba handatsa-dra.Miafina mba hanala ain’olona izy ireo.
19 Izany no fanaon’ny olona mitady tombony amin’ny tsy marina.Haningotra ny ain’izay mahazo azy izany.+
20 Miantsoantso eny an-dalana+ ny tena fahendrena,+
Ary manandratra ny feony eny amin’ny tany malalaky ny tanàna.+
21 Eny an-joron-dalana* be olona izy no miantsoantso.
Eo amin’ny vavahady fidirana mankao an-tanàna izy no miteny hoe:+
22 “Mandra-pahoviana ianareo tsy dia nahita fiainana* no mbola te hiadaladala?
Mandra-pahoviana ianareo mpaneso no mbola ho tia manesoeso?
Ary mandra-pahoviana ianareo tsisy saina no mbola hankahala fahalalana?+
23 Ekeo ny anatro,*+
Dia handatsahako ny fanahiko ianareo,Ary hampahafantariko anareo ny teniko.+
24 Efa niantsoantso mantsy aho, fa tsy nety mihitsy ianareo,Ary efa nanolotra ny tanako aho, fa tsy nisy niraharaha.+
25 Tsy nisy noraharahianareo ny torohevitro rehetra,Ary nolavinareo ny anatro.
26 Dia hihomehy koa aho rehefa mamely anareo ny loza,Ary haneso aho rehefa tonga izay tena atahoranareo,+
27 Rehefa avy hoatran’ny oram-baratra ny zavatra mampatahotra be anareo,Ary tonga tahaka ny tafio-drivotra ny loza hanjo anareo,Rehefa mianjady aminareo ny fahoriana sy ny zava-tsarotra.
28 Hiantso ahy foana izy ireo amin’izay, fa tsy hamaly aho,Ary hitady ahy mafy izy, fa tsy hahita ahy.+
29 Nankahala fahalalana mantsy izy,+Ary tsy nifidy ny hatahotra an’i Jehovah.+
30 Tsy nekeny ny torohevitro,Sady tsy nisy noraharahiany ny anatro.
31 Koa hizaka* ny vokatry ny nataony izy,+Ary hahita faisana noho ny teti-dratsiny.*
32 Fa ny ditran’izay mbola tsy dia nahita fiainana* no hahafaty azy,Ary ho ringana ny tsisy saina satria tsy mivaky loha.*
33 Izay mihaino ahy kosa hilamina,+Sady tsy mba hiady saina satria tsy matahotra loza.”+
Fanamarihana
^ Na: “hianarana.”
^ Na: “hanao izay mahitsy.”
^ Na: “mbola tanora fanahy.”
^ Na: “tari-dalana feno fahendrena.”
^ Na: “ny fanoharana.”
^ Na: “fanajana.”
^ Na: “fifehezana; famaizana.”
^ Na: “lalàn’ny.”
^ Abt: “handatsa-dra.”
^ Na: “hiara-manao antsapaka.”
^ Na: “Dia kitapo iray ihany no hiombonantsika.”
^ Abt: “Eny amin’ny lohan’ny lalana.”
^ Na: “ianareo tanora fanahy.”
^ Na: “Miverena rehefa mananatra aho.”
^ Abt: “hihinana.”
^ Abt: “Ary ho vokin’ny toroheviny.”
^ Na: “mbola tanora fanahy.”
^ Na: “satria afa-po amin’ny tenany.”
