Zakaria 14:1-21
14 “Ho avy ny andro, dia ny andron’i Jehovah, ka amin’izay no hozarazaraina eo imasonao ny fanananao nalaina ho babo.*
2 Hangoniko hiady amin’i Jerosalema ny firenena rehetra. Dia ho babo ilay tanàna, horobaina ny trano, ary hovetavetaina ny vehivavy. Hatao sesitany ny antsasaky ny mponina ao, fa ny olona sisa kosa havela ao ihany.
3 “Hivoaka hiady amin’ireo firenena ireo i Jehovah,+ hoatran’ny tamin’izy niady tamin’ny fahavalony.+
4 Amin’izany andro izany, dia hijoro eo amin’ny Tendrombohitra Oliva,+ izay eo atsinanana tandrifin’i Jerosalema, ny tongony. Dia hizara roa, hatrany atsinanana* ka hatrany andrefana* ny Tendrombohitra Oliva, ka ny antsasany hifindra hianavaratra, ary ny antsasany hianatsimo. Dia hisy lohasaha tena lehibe eo anelanelany.
5 Handositra ho any amin’ilay lohasaha eo anelanelan’ireo tendrombohitro ianareo, satria hitatra hatrany amin’ny lalana mankany Azela ilay lohasaha. Handositra ianareo, hoatran’ny nandosiranareo tamin’ilay horohoron-tany tamin’ny andron’i Ozia mpanjakan’ny Joda.+ Dia ho avy i Jehovah Andriamanitro, ary hanaraka azy koa ny anjely masina rehetra.+
6 “Tsy hisy hazavana mamirapiratra+ amin’izany andro izany, ary hivaingana* ny zava-drehetra.
7 Ho lasa andro manokana io andro io, ka ho fantatra hoe andron’i Jehovah.+ Sady tsy ho andro izy io no tsy ho alina, fa mbola hazava ihany na amin’ny takariva aza.
8 Ary hisy rano velona+ hikoriana avy ao Jerosalema,+ amin’izany andro izany. Hivarina any amin’ny ranomasina atsinanana*+ ny antsasany, ary ho any amin’ny ranomasina andrefana*+ ny antsasany. Dia ho toy izany rehefa fahavaratra sy ririnina.
9 Ary ho Mpanjakan’ny tany manontolo i Jehovah.+ Ho iray ihany i Jehovah+ ary ho iray ihany ny anarany,+ amin’izany andro izany.
10 “Lasa hitovy amin’i Araba+ ilay tany manontolo, manomboka any Geba+ ka hatrany Rimona+ any atsimon’i Jerosalema. Hisondrotra i Jerosalema ka hisy mponina eo amin’ilay misy azy,+ manomboka any amin’ny Vavahadin’i Benjamina+ ka hatrany amin’ny Vavahady Voalohany sy hatrany amin’ny Vavahady An-jorony, ary manomboka eo amin’ny Tilikambon’i Hananela+ ka hatrany amin’ny famiazam-boaloboky* ny mpanjaka.
11 Hisy mponina ao Jerosalema, ary tsy ho voaheloka haringana intsony izy.+ Dia hiadana sy hilamina ny mponina ao.+
12 “Ary izao no loza hamelezan’i Jehovah ny olona rehetra miady amin’i Jerosalema:+ Mbola eny am-pitsanganana eny izy dia ho lo ny nofony. Ho lo ao anaty taolamasony ny masony, ary ho lo ao am-bavany ny lelany.
13 “Hataon’i Jehovah misahotaka izy rehetra amin’izany andro izany, ka samy hitazona ny tanan’ny namany avy ary samy hifamely.+
14 Hiady any Jerosalema koa ny Joda. Hangonina ny harenan’ny firenena rehetra manodidina, dia volamena sy volafotsy ary akanjo be dia be.+
15 “Ho tratran’ny loza hoatr’izany koa ny soavaly, ny ramole, ny rameva, ny ampondra, ary ny biby fiompy rehetra ao amin’ireo toby ireo.
16 “Ny sisa tavela amin’ny firenena rehetra izay tonga hiady amin’i Jerosalema, dia hiakatra isan-taona any Jerosalema.+ Hiakatra any izy ireo mba hiankohoka eo anatrehan’ny* Mpanjaka, dia i Jehovah Tompon’ny tafika,+ ary mba hankalaza ny Fetin’ny Trano Rantsankazo.*+
17 Raha misy olona any amin’ireo firenena ambonin’ny tany anefa tsy miakatra any Jerosalema mba hiankohoka eo anatrehan’ilay Mpanjaka, izany hoe i Jehovah Tompon’ny tafika, dia tsy hisy orana hirotsaka any aminy.+
18 Raha tsy miakatra any koa ny Ejipsianina, dia tsy hisy orana hirotsaka any aminy. Hamely azy kosa ny loza alefan’i Jehovah amin’ireo firenena tsy miakatra hankalaza ny Fetin’ny Trano Rantsankazo.
19 Izany no ho sazin’i Ejipta sy ireo firenena rehetra tsy miakatra hankalaza ny Fetin’ny Trano Rantsankazo.
20 “Amin’izany andro izany, dia izao no hosoratana eo amin’ny lakolosy kelin’ny soavaly: ‘An’i Jehovah ny fahamasinana!’+ Ary ho masina hoatran’ireo vilia baolina+ eo anoloan’ny alitara ny vilany*+ ao an-tranon’i Jehovah.
21 Ho masina ny vilany* rehetra any Jerosalema sy Joda sady ho lasa fananan’i Jehovah Tompon’ny tafika. Ary hiditra izay rehetra manao sorona ka hahandro hena amin’ireny. Amin’izany andro izany, dia tsy hisy Kananita* intsony ao an-tranon’i Jehovah Tompon’ny tafika.”+
Fanamarihana
^ Izany hoe nalaina ho babo tao amin’ilay tanàna resahin’ny and. 2.
^ Na: “hatrany amin’ny fiposahan’ny masoandro.”
^ Abt: “hatrany amin’ny ranomasina.”
^ Na: “tsy hihetsika”, hoatran’ny rehefa tratran’ny hatsiaka.
^ Izany hoe ny Ranomasina Mediterane.
^ Izany hoe ny Ranomasina Maty.
^ Na: “fanantazana ranom-boaloboky.”
^ Na: “Fialokalofana Tsy Maharitra.”
^ Na: “hanompo ny.”
^ Na: “vilanibe.”
^ Na: “vilanibe.”
^ Na mety hoe “mpivaro-mandeha.”
