Zakaria 4:1-14
4 Niverina ilay anjely niresaka tamiko, dia namoha ahy, hoatran’ny mamoha olona matory.
2 Dia hoy izy tamiko: “Inona no hitanao?”
Ary hoy aho: “Fitoeran-jiro no hitako. Volamena izy manontolo,+ ary misy vilia baolina iray eo an-tampony. Misy jiro fito eo amboniny.+ Fito ny isany. Misy fantsona fito eo amin’ireo jiro, izay eo an-tampon’ilay fitoeran-jiro.
3 Ary misy oliva roa maniry eo akaikiny,+ ka ny iray eo ankavanan’ilay vilia baolina, ary ny iray eo ankaviany.”
4 Dia hoy aho tamin’ilay anjely niresaka tamiko: “Inona ny dikan’ireo, tompoko?”
5 Ary hoy ilay anjely niresaka tamiko: “Tsy fantatrao ve ny dikan’ireo?”
Dia hoy aho: “Tsy fantatro, tompoko.”
6 Ary hoy izy tamiko: “Izao no tenin’i Jehovah amin’i Zerobabela: ‘“Tsy amin’ny alalan’ny tafika, na ny hery,+ fa amin’ny alalan’ny fanahiko”,+ hoy i Jehovah Tompon’ny tafika.
7 Iza moa ianao, ry tendrombohitra lehibe? Ho lasa tany lemaka*+ ianao eo anatrehan’i Zerobabela.+ Ary hitondra an’ilay vato hapetraka eny an-tampon’ny tempoly izy, rehefa miantsoantso iny ny olona hoe: “Tsara be izy izany! Tsara be mihitsy!”’”
8 Niteny tamiko indray i Jehovah hoe:
9 “Ny tanan’i Zerobabela no nametraka ny fototr’ity trano ity,+ ary ny tanany koa no hamita an’ity trano ity.”+ Dia ho fantatrareo fa i Jehovah Tompon’ny tafika no naniraka ahy ho atỳ aminareo.
10 “Fa iza no manao tsinontsinona ny andron’ny zavatra tsotsotra tany am-boalohany?*+ Ho faly ny olona hahita ny pilao* eny an-tanan’i Zerobabela. Mason’i Jehovah ireo fito ireo, ary mijery eny rehetra eny manerana ny tany ireo.”+
11 Dia hoy aho taminy: “Inona ny dikan’ireo hazo oliva roa eo ankavanan’ilay fitoeran-jiro sy eo ankaviany?”+
12 Nanontaniako fanindroany izy hoe: “Inona ny dikan’ireo rantsany* amin’ny hazo oliva roa ireo, izay mamoaka ranon-javatra mivolombolamena avy eo amin’ny fantsona volamena roa?”
13 Ary hoy izy tamiko: “Tsy fantatrao ve ny dikan’ireo?”
Dia hoy aho: “Tsy fantatro, tompoko.”
14 Ary hoy izy: “Ireo dia voahosotra roa izay mijoro eo anilan’ilay Tompon’ny tany manontolo.”+
