Andriamanitra tia filaminana i Jehovah. (1 Korintianina 14:33) Tsy gaga àry isika raha voalamina tsara ny mpanompony. Ahoana no andaminana ny fiangonana kristianina? Inona no azontsika atao mba hilamina tsara foana izy io?

1. Iza no lohan’ny fiangonana?

‘I Kristy no lohan’ny fiangonana.’ (Efesianina 5:23) Avy any an-danitra izy no mitarika ny asan’ny vahoakan’i Jehovah maneran-tany. Nanendry anti-panahy matotra vitsivitsy i Jesosy mba ho “mpanompo mendri-pitokisana sy malina.” (Vakio ny Matio 24:45-47.) Antsoina koa hoe Filan-kevi-pitantanana io mpanompo io. Manome tari-dalana ho an’ny fiangonana maneran-tany ny Filan-kevi-pitantanana, hoatran’ny nataon’ny apostoly sy ny anti-panahy tao Jerosalema tamin’ny taonjato voalohany. (Asan’ny Apostoly 15:2) Tsy ireo lehilahy ireo anefa no mpitarika ny fandaminantsika. Mamaky ny Baiboly izy ireo mba hahitana hoe inona no tian’i Jehovah hataony. Manaraka ny tari-dalan’i Jesosy koa izy ireo.

2. Inona no andraikitry ny anti-panahy?

Lehilahy kristianina matotra ny anti-panahy. Mampianatra ny Soratra Masina izy ireo, ary manampy sy mampahery ny mpanompon’i Jehovah. Tsy mandray karama izy ireo rehefa manao an’izany andraikiny izany. Ataony “an-tsitrapo eo anatrehan’Andriamanitra” ilay izy, ary “tsy noho ny fitiavana tombony azo amin’ny tsy marina, fa noho ny fahazotoana.” (1 Petera 5:1, 2) Ireo lehilahy manampy ny anti-panahy indray antsoina hoe mpikarakara fiangonana. Mety hahafeno fepetra ho lasa anti-panahy koa izy ireo rehefa mandeha ny fotoana.

Tendren’ny Filan-kevi-pitantanana mba ho mpiandraikitra ny faritra ny anti-panahy sasany. Mitsidika fiangonana izy ireny mba hanome toromarika sy hampahery an’ireo rahalahy sy anabavy. Izy ireo koa no manendry rahalahy mba ho anti-panahy sy mpikarakara fiangonana. Jereny tsara anefa aloha raha mahafeno ny fepetra resahin’ny Baiboly ilay rahalahy.​—1 Timoty 3:1-10, 12; Titosy 1:5-9.

3. Inona no andraikitry ny Vavolombelona tsirairay?

Manana andraikitra “hidera ny anaran’i Jehovah” ny olona rehetra anisan’ny fiangonana. (Vakio ny Salamo 148:12, 13.) Izany no mahatonga azy ireo handray anjara amin’ny fivoriana sy hanao izay fara heriny mba hitoriana ny vaovao tsara.

ANDAO HOHALALININTSIKA

4. Mpitarika tsara fanahy i Jesosy

Mahafinaritra be ny zavatra asain’i Jesosy hataontsika. Vakio ny Matio 11:28-30, ary iaraho midinika ity fanontaniana ity:

• Inona no vokany rehefa manaiky an’i Jesosy ho mpitarika isika?

5. Manome modely ny anti-panahy

1. A. Miezaka mifandray tsara amin’Andriamanitra ny anti-panahy, ary manampy ny fianakaviany hanao an’izany koa

2. B. Mikarakara ny olona rehetra anisan’ny fiangonana ny anti-panahy

3. D. Mazoto mitory ny anti-panahy

4. E. Mampianatra ny anti-panahy. Mandray anjara amin’ny fanadiovana sy ny asa hafa koa izy

6. Afaka miara-miasa amin’ny anti-panahy isika

Miasa mafy foana ny anti-panahy eo anivon’ny fiangonana mba hanampiana ny hafa. Vakio ny 1 Tesalonianina 5:12, ary iaraho midinika ireto fanontaniana ireto:

• Ampirisihin’ny Baiboly hanao inona isika?

Manaja ny anti-panahy isika raha vonona hankatò sy manohana azy ireo. Vakio ny Hebreo 13:17, ary iaraho midinika ity fanontaniana ity:

• Nahoana ny Baiboly no milaza hoe tokony hankatò sy hanaiky an’ireo rahalahy manana andraikitra isika?

FAMINTINANA

I Jesosy no lohan’ny fiangonana ary manaiky ny fahefany ny anti-panahy. Faly isika miara-miasa amin’ny anti-panahy, satria tsara fanahy izy ireo sady modely ho antsika.

Famerenana

• Iza no lohan’ny fiangonana?

• Inona no ataon’ny anti-panahy mba hanampiana ny fiangonana?

• Inona no andraikitry ny mpanompon’i Jehovah tsirairay?