Juli ǁkhâb 2022ǁî kurib dib ǃnâ i ge noxoba hōǃâhe tsâ tama ǀgama, ǃhūbaib ǂhawase ge ǃnurihe:

•    “ǀGamǁî ǃnâsa nē ǁkhâb ǃnâ i ge Chinab di ǂhanuba khoena ge mîba, 70 ǃādi ǃnâ i kaise nî ǀgamsasa.”—Julib 25, 2022, CNN Wire Service.

•    “Europi ǃnâ i kaise a ǀgamsa amagan ge haina ǂgui ǃhūgu ǃnâ ra ǂhubi.”—Julib 17, 2022, The Guardian ǂhôan ǂkhinib.

•    “Sontaxtsēs ai di ge ǂgui ǃāde Amerikab ǃnâ noxoba hōǃâhe tsâ tama ǀgama gere hōǃâ. Soreb ǁaeb di ǀgami ge oostes hurib ami, suides tsî westes ǁaegub ǃnâ kaise ǀgaisa i amaga.”—Julib 24, 2022, The New York Times ǂhôan ǂkhinib.

 Nēn hoana tae-e ra ǂâibasen? ǃHūbaib ai da ega ûi hō tide? Elobmîsa tae-e ra mî?

 Îo. ǀGaisa ǀgami ge ra ǃgûǀhao sida ǁaeb ǃnâ nî ī dis ge Elobmîsa a mî xūn ǀkha. Aiǁgause Jesub ge ge kēbo “buruburuxa tsî ǃhuriǃhurisa” xūna da nî mûsa. (Lukab 21:11) ǃHūbaib ǂhawase i ra ǀgam amagan ge ǂgui khoena ra ǂâi, khoen ra dī xūn nî ǃaromasa î da tā ǃhūbaib ai ûi ǁkhā.

 Hî-i. Elob ge ǃhūbaiba ge kuru în khoena ǁnapa ǀamose ǁan. (Psalmdi 115:16; Aoǁnâ-aob 1:4) ǁÎb ge mā-am tide în khoena ǃhūbaiba hîkākā. Xaweb ge mîmâib ge khama ‘ǁnān hîa ǃhūbaiba ra hîkākāna nî hîkākā.’—ǂHaiǂhais 11:18.

 Kō re ǀgam kēbo ra hîna ra ǁgau ra tae-i tsînab Eloba hānîǁaeb xa mîmâi hâsa:

•    “ǃGaroǃhūb tsî ǂnâsa ǃhūb ge nî dâ, ǀgopaǃhūb ge ǃgâiaǂgao tsî nî ǁhare, lelib khami.” (Jesajab 35:1) Elob ge mā-am tide îb horaga ǃhūbaiba ǀgopa i hîna a ûi ǃnâhe ǁoa i khami ī. Xaweb ge ǃhūbaib ai dīkākāhe hâ ǃâga nî ǃgâiǃgâi.

•    ‘Sats ge ǃhūba kōǃgâ tsî ǃnāǂamsase ra ǃkhū kai.’ (Psalmdi 65:9) Elob di ǀkhaeb ǀkhab ge ǃhūbaiba nî paradais kai.

 ǃHūbaib ǂoab tsî ǀnanub mâsib Elobmîs kēbode ra dīǀoaǀoa ǀgausa du ga ǂan ǂgao o “Climate Change and Our Future—What the Bible Says” di hâ khomaiǃâsa khomai re.

 Elobmîs mîmâis ǃhūbaib nî dī-unuhe ǀgaus xa hâs xa du ga ǃnāsase ǂan ǂgao o, “Who Will Save the Earth?” di hâ khomaiǃâsa khomai re.