Januarib 2021 i ǃnâs ge ǂGaeǂguira sorosa. Elobmîs ǁkhāǁkhādi ǃaroma nî sîsenūhe ǂkhanisa ge ǂanǂan, ǀAmosib kōse ǃgâiaǂgao re di ǀon hâsa! a Nē ǂanǂansa sado mati ge tsâǀkhā? Mateub hîna Kanadab dib ge ra mî: “Kaise ta ge ge ǂkhî i, tsîb ge ti ǂkhîba gere ǀarosen. Nē ǂkhinis nî dīhe ǀgaub ge ǃhoadi tsî vidiogu ǃnâ gere ǁguiǃāhe khama. Tsî matis nî sîsenūhe ǀgaub gere ǁgauhe ǀgausa. ǃÂu ǁoa ta ge ge i, nē ǂkhinisa mû tsî sîsenūsa.”

 ǀAmosib kōse ǃgâiaǂgao re di ǀon hâ ǂkhinis ge ǀasa ǀgaub, Elobmîs ǁkhāǁkhādi ra dīhe ba ge mâi-aiǃâ. Xawe ǁnā ǃkharagagusib ǀguib ge hâ tama hâ. ǀAsa ǂkhinis tsî ǀnai ge hâ i ǂkhinidi ǁaegu. ǀAmosib kōse ǃgâiaǂgao re di ǀon hâ ǂkhinis ǁgâisasa du ga sîsenū. O du ge ǀnîsi ra hōǃâ ǀkharas asa. Tae-i ǃaromas a ǀkharasa ǂanǂûis ǃaroma. ǀKhī re î da kē, nē ǂkhinis ge mati a kuruhesa.

 ǁAu ǂkhinib. Tae-i ǃaromas ge nēsa ǂhâbasa i? ǀAmosib kōse ǃgâiaǂgao re di ǀon hâ ǂkhinis ge, 600 xa ǃnāsa îsa ai-īsiga ūhâ. Elobmîsa tae-e a ǁkhāǁkhāda ǁkhā di ǀon hâ ǂkhinis xa, 10 ǃnāde ǃnāsase. ǀAsa ǂkhinis ge ǃnāsase xoa-aihe tama ǃuri soaga ūhâ. Tamas ka io ai-īsi-e ūhâ tama ǂhawega. Nē ǀgam ǃaroma ra ge ǃgomsiba a mā ǁkhā. ǂKhinib ga ǁgā, o i ge nau ǀkhāb ai hâ xūna a mûsen ǁkhā. Nēti i mâsiba ǁkhaes ǃaromas ge ǃhūbaib ǂhawase ǁgâi sîsenne ra dī departements Wallkill, New York Amerikab ǃnâ hâsa. ǃKharagagu haga ǂkhiniga ge ǃâitsâ, hîna da ǁgâis ǃaroma ra sîsenū ga. Xoa ra komites ǂGaeǂguira soros dis ge mâ ǂkhinib hoaba ge ôaǃnâ. Tsî kaise ǁgā tama ǂkhiniba ge ǁhûi. Nē ǂkhinib ge 16 percenti xa ǃnāsase ǀgapise gere ǂgan, ǀnai da ra sîsenū ǂkhinigu xa. Xawe i ge ǀAmosib kōse ǃgâiaǂgao re di ǀon hâ ǂkhinisa xu. Elobmîsa ra ǁkhāǁkhāsen khoena ra hui, în ǂhanihe tamase ǂkhinib nau ǀkhābi hâ xūna khomai.

 ǂKhinis ǃkhûǀkhāb hîna ǀkharadi īb. ǀAsa ǂkhinis ǃkhûǀkhāb ge ǀkharadi ī, nau ǂkhinin sida dina xu. ǀKharadi ī ǃkhûǀkhāb tamas ka io ǁkhauba ra xū-eb ūhâ amaga. Hoa ǁae ra sîsenūhe mû ǃkharusen ra ǃkhûǀkhāba sîsenū tama i. Tsî i ge ǀasa ǂkhinis ǃaroma, ǂhanu xawe ǀorose ra ǂkhai ǃkhûǀkhāba ge sîsenūhe, î-i ai-īsina mâǂoa kai. Nē ǃkhûǀkhāb ge ǂkhinisa ra ǁkhauba. Tsî ra hui îs tā ǃkhaese ǀoro tamas ka io ǁgai. ǂHanu, xawe tikōse ǂkhai tama hâ ǃkhûǀkhāb ge. Koros xa ǃnāsa ǃnāde ǂkhaira ǃkhûǀkhāb xa ra ǂgan. ǁNā-amaga i ge ǀnî ǁnâub berode ǀhao. Tsî ǀorose ra ǂgan, ǂkhai tama ǃkhûǀkhāba ge ǁama.

 Tae-i ǃaroma i ge ǂgui mari-e ra ǂgan ǃkhûǀkhāba ǁhûihe? ǃHūbaib ǂhawase ra ǁgâihe ǃkhais tawa ra sîsen ǃgâsab ge nēti ra ǁguiǃā: “ǃÂubasen da ge ra îs nē ǂkhinisa ǃgâi ǀgaub ǃnâ sîsenūhe, khoe-i ga ǂgui ǃnāde sîsenūsi xawe.” Eduardob hîna ǁgâihe ra beros tawa, Brazili ǁnâub ai ra sîsenni ge ra mî: “Kaise da ge ǃgâise ra tsâ mûsa. Jehovab ǀapeǂhumis nē ǃamku ǃkhûǀkhāna ra sîsenūsa, îs ǂkhinisa îsa, gaxuse hâ ǁkhā. Tsî khoen xa ǃgâi ǀgaub ǃnâ sîsenūhe. Māsenxase ra māhe māden ǃgâise ra sîsenū hîna.”

 ǀAmosib kōse ǃgâiaǂgao re di ǀon hâ ǂkhinisa da ge, Maarti 2021 ge ǁgâi tsoatsoa. Nēs ge coronas ǁaeb ǃnâ gere ī tsî i ge ǂgui ǃgomsina gere ǃaroma. Betels di lockdowns xa ǃaromahe hâse di ge ǁgâi ra ǃkhaide, ǃgâsan huiba ge hō tama hâ i. Tsîn ge ǀasa ǃgâsan tsîna ge ǁkhau ǁoa i, Betels dawa hā sîsensa. ǁNās xa ǃaromahe hâse di ge ǁgâi ra ǃkhaide, ǂâusa ǃgâsana ge ūhâ tama hâ i. Tsî i ge ǀnî ǃkhaidi ǁgâi sîsenne ra dide ge ǂanamsa i, ǂhanub ǁgaragu ǃoagu.

 Nē ǃgomsina mati ge danhe? ǁGâihe ra ǃkhaidi ge sîsen tsoatsoa o i ge ǃgâsan. Hîna nau departemendi tawa hâna ǁaeroba ge ǁgaumâihe în ǁgâi sîsenni ǀkha hui. “ǁÎn di ǀgaub tsî māsenxa gagab, ǀasa xūna ǁkhāǁkhāsens dib ge ge īǁkhā kai î-i ǂhâǂhâsa sîsenga dīhe.” Tib ge Joeli hîna ǃhūbaib ǂhawase ra ǁgâihe ǂkhinin ǃkhais ai ra sîsena ra mî.

 Nē ǃgom mâsigu ge hâ i xawe da ge, ǀAmosib kōse ǃgâiaǂgao re di ǀon hâ ǂkhinisa. ǂGui gowagu ǃnâ ge ǁgâi ǁkhā i. Nē ǂkhinisa ǁgâis ǃaroma i ge ǂgui ǃkharagagu xūna a ǂhâbasa. Aiǁgause ǁgâi-aihe ra ǂkhinib, ǃgariǃgari-ūhe ra xūb, ǂkhinigu, ink-i tsî lem-i tsîna. ǂGuro goro ǁkhâgu hîna da ge ǁgâi gu ǃnâ da ge ǀnai. $2.3 Miliun (U.S.) dollan xa ǃnāsa marisa ge sîsenū materialan ai ǀgui. Mari-e saus ǃaroma da ge ǀhaohâgu ǂhâhâ ǂkhinidi ǀguide ge ǁgâi.

 Elobmîsa ra ǁkhāǁkhā ǃgâsan. Tsî Elobmîsa ra ǁkhāǁkhāhe khoen tsîna mati, nē ǀasa Elobmîs ǁkhāǁkhās xa ra tsâ? Paulub, Australiab ǃnâ ra hâ ǃgâsab ge sao rase ra mî: “ǀAmosib kōse ǃgâiaǂgao re di ǀon hâ ǂkhinis ge kaise a ǁkhoaxa. Tsî ta ge ra mûǂui Elobmîs ǁkhāǁkhāsa dīsa. Nē ǂkhinis dīhe hâ ǀgaub ge kaise îsa tsî ǃgâi ǁgamǀhaode ra hau. Nē ǂkhinis ge kaise ǃgāsase ǀhaobesa ǃgāsasiba ra mā. Dîdi hîna ǂgaoba ra tsâǀkhādi, vidiogu, ai-īsigu, map ti. Tsî Elobmîsa ra ǁkhāǁkhāsen khoe-i nî sīǃnâ xū-i. Kaises ge ǃgâi ǀgaub ǃnâ dīhe hâ. Tsî ra ǂkhâǃnâ te, î ta ti ǁkhāǁkhā ǀgauba ǃgâiǃgâi.”

 Elobmîsa ra ǁkhāǁkhāsen khoeb hîna, Amerikab ǃnâ hâb ge ra mî: “Kaise ta ge ǀasa ǂkhinis xa a ǃgâibahe. Ai-īsin hîna hân ge ra hui te mâǂoa ra ǂâide ǃgâise ǁnâuǃāsa. Vidiogu ge ti ǂgaoba ra tsâǀkhā tsî ra ǂkhâǃnâ te î ta xū-e dī.” Nē khoeb ge Elobmîsa ǀgamǃnâ ra wekheb ǃnâ ra ǁkhāǁkhāsen. Tsî ǀhaode ra hâǃnâ.

 ǀAmosib kōse ǃgâiaǂgao re di ǀôn hâ ǂkhinis ge noxoba, ǂgui gowagu ǃnâ nî ǁgûihe. ǂGaeǂguira soros ge ge mā-am î-i nē ǂkhinisa 710 gowaguǃnâ ǁgâihe. 340 xa ǃnāsase, Elobmîsa tae-e a ǁkhāǁkhāda ǁkhā di ǀon hâ ǂkhinis xa.

 Nē ǂkhinis di ǁgâi sîsen-e mati ge matarehe? ǃHūbaib ǂhawase ra māhe māsenxa mādi donate.pr418.coms ǃnâ-ū. Kaise da ge ra ǃgâoǃgâ sadu māsenxa gagab. Hîna ra huiba î-i Elobmîs ǁkhāǁkhās ra dī-ūhe ǂkhinisa ǁgâihe. Hîna ǂgui khoena a hui ǁkhāsa, în Jehovab xa ǁkhāǁkhāsen tsî “ǀamose ûi.”—Psalmdi 22:26.