1. Tae-e nî hā ‘Elob ǃoa da ga ǀgū o’?

JEHOVAB ge ǁnān hîna ǁîba ra ǃoabana a ǀnam. Sats ga Jehovaba ǀgoreǀî o, ob ge nî ǀkhae tsi nēsi tsî hānîǁaeb ǃnâs tsîna. Elobmîs ge ra mî: “Eloba ǀgū, ob ge sado nî ǀgū.”—Jakobub 4:8.

2. Mati da Elob ǃoa ǀgū ǁkhā, tsî matis nēsa sida ǀgorede nî tsâǀkhā?

² Elob ǃoa da ga ǀgū ǂgao-o, o da ge ǁÎb mîsa nî ǁkhāǁkhāsen tsî nîra ûiǂui. ǁÎb ǂâis ǃoagu da ga ǀgore o, ob ge Jehovaba ǃgâ tsî nî ǃereamdi. Xristeǁî aposteli Johaneb ge ge xoa: “Tsî nēb ge ǁkhoaǂgaosib, ǁÎb [Elob] ǃoa da ūhâba: xū-e da ga ǁÎb di ǂâis ǃoa ǂgan o, ob ge ra ǁnâu-am da. Tsî ǂgan da ga ra i hoa-i ǃnâb ta ǁnâu-am da ǃkhai-e da ga ǂan o, o da ge a ǂan, ǁÎb dawa da ge ǂgan ǂgande da ra hōsa.”—1 Johaneb 5:14, 15.

3-7. Mati da Elosi gā-aisiba a hōǁkhā, tsî mati-i a huida ǁkhā?

³ ǃAruǀî, Elob ǀkhats ta ǀgū khamib ge ǁÎba gā-aisiba nî mātsi, îts tsēs hoas xūn sa ûib ǃnâ hân ǂama sîsenū. Elobmîs ge ra mî “Tsî ǀgui-i âdo ga gā-aisiba tôasi o, a i Elob dawa ǂganbasen.”—Jakobub 1:5.

⁴ Matib Elosi gā-aisiba a hui tsi ǁkhā? ǀGui-i ǃaroma, ǁî-i ge hui tsi ǁkhā îts ǂan xūn hîna Jehovaba ǃgâiba tama na. ǁKhāǁkhāsen ǁkhāts ge a tae-i ǃaroman nē xūna a tsū sa tsî matits ǁîna dīsa xu ǁkhaesen ǁkhāsa. Nē ǂans ge nî hui tsi ǂgui ǃgomsina xu ǁkhaetsi sa hoaǃnâ-aixasen khoena ūhâ na. Aiǁgause, Eloba ǁnâuǀnams ge nî huida ǀapehe tama ǀgôa hōs, ǁgoe-ūgus ǃnâ-ū ra hōhe ǁōn tsî ǂkhî-oǃnâ khôa hâ ǃgamegu tsîna xu.

⁵ Tae-i tsînab Elob māhâ gā-aisiba satsa a dība ǁkhā? Nē gā-aisib ge satsa ǁkhāsiba a mā ǁkhā ǃgâi hōdawa-amsa sa ûiba xu hōsa. Nēs ge nî hui tsi ǁkhā gā-ai ǀgaub ai ǀapeǁguisa, sa mariǁhoga ǃgâise sîsenū sa. Sats ge nî ǁkhā ǂûǂûsa ǂâibasensa ūhâ ǁkhorega ǃoa ǁgū sa, hâhânî hōǂuiba ūhâ te, tsî hui tama na xu ǂgōsa.

⁶ Elosi gā-aisib ge nî hui tsi ǃgaeǁaresa nau khoen ǀkha ūhâ sa. Sats ge ǂkhîxaǃnâ omaris ûiba ūhâ ǁkhā. Sats ge omǁkhā hâhânî, ama khoeǀhōgu sisa nau khoen ǀkha, tsîts ge ǃgôasiba a hōǁkhā ǁnān Eloba ǃoaba tama hâna xus tsîna.

⁷ ǃAruǀî, satsa Elosi gā-aisiba ūhâs ge nî ǃgâiǃgâi sa mûǂuisa ûib ai. ǁÎn ge nî huida ûib di ǃgomsin, augu tsî khôaǁnâde xu. Tsîts ge ǃgâi ǀnōsa mûǂuisa ǀgauba nî ūhâ ûib ai hānîǁaeb ǃnâ. ǃGâi mûǂuiba ūhâs ge sa ûib ǃnâ ǃgâi hōdawasa nî ūhâ ǂâiǀgaub tsî sorosi ǂurusib ǃoa-ai.—ǂKhoa-mîdi 14:30; Jesajab 48:17.

8. Elobats ga ǃoaba o, tae-ets ǃao tite?

⁸ Ama Elobats ga ǃoaba o, ots ge ǃnorasasiba nî hō ǃaosa xu ǁnān hîna ǁÎba ǃoaba tama hân ūhâba. ǁŌhân uî-ose ǀhowas ǃnâ hâsa da a ǂan amaga da ge ǁōhâna ǃao tama hâ. Elob mîmâis khâis tis ǃnâts ǂgomǃgâsa ūhâ amagats ge ǁōsa ǃao tama hâ. Tsî ǂants a Elob hoaǀgaiba ūhâsa, amagats ge ǃgaib tsî xomahesa ǃao tite.—Johaneb 8:32.

9-11. Hamna Paradais ǃnâ nî hâ, tsî hamna hâ tite?

⁹ Elob ǃoats ga ǀgū o, ots ge hānîǁaeba ǃao tite. Mû da go khamis, ge Elobmîsa ǂgui ǃgomsin nētsē da ǃhūbaib ai ra mûna ge aimûǀgaru. Jehovab ge ra mîba da nē xūn ǁaerob tis ǀguisa ī ǃkhaisa; Elob Gaosib ge ǀāǁae nē ǃhūbaiba paradais ǃnâ nî ǀkharaǀkhara.—Lukab 21:10, 11, 31; 23:43.

¹⁰ ǁNān hîna Jehovab ǃoa ra ǀgū tsî ǁÎba ra ǃoaban ǀguin ge Paradais ǃnâ nî ûi. Elobmîs ge ra mî: “Ganubē ǂkhariose ǁnām, ob ge eloxoresaba nî ǀkhai; Tsîts ge ǁîb di hâ ǃkhaisa nî ǃgaoǃgâ, xaweb ge ǁnapa hâ tite. Xawe tsamtsi ǂâixan ge ǃhūbaiba nîra ǀomi, tsî kai ǂkhîb ǃnâ nîra ǃgâiǃgâisen.”—Psalmti 37:10, 11.

¹¹ ǁÎn hîna ǃgari danase Elob tsî ǁÎb ǂhanu-ai ǂhanuba ǁnâuǀnam ǂgao taman ge ǁîn ûiba nî ǂoaǃnâ ǀamosib kose. (2 Tesalonikaǁîn 1:8, 9) ǁÎn ge ǁkhapa hâ tite. ǁÎn ge ǁGâuab tsî ǁîb ǁgâuagu ǀkha ǀamo ǁōba nî hō. (ǂHaiǂhais 20:10, 14) Xawe ǁnān hîna Jehovab xa ra ǁkhāǁkhāsen ân ge kai ǂkhîb ǃnâ nîra ǃgâiǃgâisen Paradais ǃhūbaib ai.

12. Elobmîsa hānîǁaeb xa tae-e ra mî?

¹² Jehovab ge ǃgâi xūna ūhâ ǁnān hîna ǁÎba a ǀnam ân ǃaroma! Kēs ǀguisa dī re ǁÎb mîs mati ûib xa Paradais ǃhūbaib ai ra mîsa:

• ǂÂusa ǂû-i ge nî hâ ǂûs ǃaroma: “Tsî i ge ǃhūb ǃnâ ǃnāǂamsi-e nîra hâ ǃhōrob di e ǂû-e ǃhomgu di ǀam di ai.”—Psalmti 72:16.

• ǃGâi omdi: “Tsîn ge omga nîra ǂnuwibasen tsî ǁîga nîra ǁanǃnâ.”—Jesajab 65:21.

• ǂKhîxa sîseni: “Tsî ti ǃkhōǂuisaben ge sîseni ǁîn ti ǃomgu diba nîra sîsenū toa. ǁÎn ge ǁause sîsen tite.”—Jesajab 65:22, 23.

• ǀAe-i xare-i hâ tite: “Oi ge ǁansabe-i xare-e: ‘Tita ge ǀaesen hâ, timî tite.’”—Jesajab 33:24.

• ǃHora-i xare-i hâ tite: “ǁNā ǃnūb-ai di ge ǂgīhân di mûte nî khowahe, tsî ǂgaeti ǂganaǂgae hân diti ge nîra ǁkhowa-amhe. ǁNā ǃnūb-aib ge ǃhoraba ǁkhamab khami nî ra ūri tsî nams ǃgomeb tis ge nîra dâ.”—Jesajab 35:5, 6.

• Tsû-i, ǃoa-i, tsî ǁō-i ǃaruǀî hâ tite: “Ob ge Eloba mûdi âna xu ǁgamron hoana nî ǀombē; Ob ge ǁōba !aru|î hâ tide, tsî !oa-i xare-i tsî !au-i tsî ǀhuwuǀhuwusen i xare-i !aruǀî hâ tide; ǂguron go !gôa i xui-ao.”—ǂHaiǂhais 21:4.

• Toro-i xare-i hâ tite: “Toroga ra ǀû kaib ǃhūbaib di ǀams kose, khasa ra khôa ǂkhub tsî gôaba ra ǂnoaǃāb, gunite ǀaes ǀkha ra khauǂkhuba.”—Psalmti 46:10.

• ǀAmo ûib: “ǂHanu-ain ge ǃhūbaiba nîra ǀomi, tsî ǀamose ǁîb ai nîra ǁan.”—Psalmti 37:29.

13. Ham-i ǀgui-e nē ǃhūbaiba paradais ǃnâ nî ǀkharaǀkhara, tsî mati i io?

¹³ Khoen ge nē xūna dīǁkhā tite, xawe Jehovab ge ǀgaiba ūhâ ǁÎb ta mî dib nî ti xū-i hoa-e dīsa. Xū-i xare-i ge ǁÎba ǁkhae tite ǁÎb ta dī ǂgao xū-e dīsa. Elobmîs ge ra mî “Xū-i xare-i khom Elob tawa īǁoasase i tama o.”—Lukab 1:37.

14. Matits ǀamo ûiba ǃoa garu daob ai ǃgû ǁkhā?

¹⁴ ǀHûǀguitimi-aon ǃnâ-ūb ge Jehovaba khoena mâ ǃkhai-i hoa-i ai ǃēsa ra mā in “ǂō dao-ams ǃnâ” ǂgâ tsî ǃgû ǀamo ûib ǃoa garu daob ai. Sats tsîn ge a ǁnā khoen ti ǀgui kai ǁkhā hîna nē ǁkhauǂuisa ūǃoa hân di tsa. Satsa ǁnān di ǀgui kai re ama ǂgoms ǀgaub ai ǃoaba tsî ǀamo ǀkhaeba Jehovaba xu nî hō tsa!—Mateub 7:13, 14.