1. Elobmîs ǃoa-ai, mâ ǀgam ǃnôa ǂgom ra hâ?

“ǂGÂ du re ǂō dao-ams ǃnâ,” tib ge Jesuba ra mî, “harab ge ǁnāb tsî ǂhawab ge daob, gāǁōsib ǃoa garuba, tsî ǂguin ge ǁîb ai ra ǃgûna xuige; tsî ǂōs ge dao-ams tsî ǀuib ge daob, ûib ǃoa gauba, tsî ǀoron ge ǁîba ra hōna.” (Mateub 7:13, 14) Elobmîs ǃoa-ais ge ǀgam ǃnâgu ǂgom ra ǀguira hâ, ǀgui ama ǂgoms, ǀgui ama tama ǂgoms, ǀgui ǂhanu-ai tsî ǀgui ǂhanu-ai tama ǂgoms, ǀguis ûib ǃoa ra īs tsî ǀguis dīkākās ǃoa ra īs.

2. Xoade mati ra ǁgau hoa ǂgomdi Eloba ǂkhîǂkhî tama ǃkhai-e?

² ǀNî khoen ge ra ǂâi hoa ǂgomdi Eloba ra ǂkhîǂkhî ti. Saora Elobmîs xoadi ge ra ǁgau nēs ama tama ǃkhai-e:

• “Tsî Israeli ôan ge ǃaruǃî ǀgui ǃKhub mûǁae a ǂkhawa na gere dī, tsîn ge gere ǃoaba Baalga tsî Astharote tsî Siriab di eloga tsî Sidons di eloga tsî Moab di eloga tsî Amoni ôan di eloga tsî Filisteǁîn tsîn di eloga. Tsîn ge ǃKhuba ǁnāxū tsî ǁîba ǃoaba tama ge i. Ob ge ǃKhub di ǁaiba ge ǂhuwi Israeli ǀî.” (ǂHanuǂhanu-Aogu 10:6, 7) ǁGôa-tsî-ǁgoa elogu tamas ka io ǀnîhâ eloga da ga ǀgoreǀî o ama Elob ǃgâ-ai, o da ge Jehovab ūǃoasa hō tite.

• “Nē ǁaes ge amǁgaugu ǀkha ra ǃgôa te [Elob], xawe ǂgaob ân ge tita xu ǃnū hâ. ǁAusen ra ǃgôate, ǁkhāǁkhāte ra ǁkhāǁkhā ǃâ, khoen xa ǂnûiǂgāhe hâ te.” (Markub 7:6, 7) Khoen hîna ra mîn Eloban ta ǃoaba ti tsî xawe ǁîn ǂâite ra ǁkhāǁkhān Elobmîsa xu ǁkhāǁkhā tama i tsî, ǁîn ǀgoreǀîs ge a ǁau. Elob xa ūǃoahe tama.

• “Elob ge a Gāgā, tsî ǁîba ra ǀgoreǀîn ge gāgāb tsî amab ǃnâ nî ǀgoreǀî bi.” (Johaneb 4:24) Sada ti ǀgoreǀîs ge nî ǀguiǃnâxa Elobmîs ǃnâ mâ amab ǀkha.

3. Mapa a ǀgui ǀgau ama ǂgomsats ama tama ǂgomsa xu a ǂanǂui ǁkhāba?

³ Mati da nî ǂan ǂgoms Eloba ra ǂkhîǂkhî tamas ka io ǂkhîǂkhî tama ǃkhai-e? Jesub ge ge mî: “ǁNās ǁkhās axase i ge ǃgâi hai-e ǃgâi ǂûna ra ǀkhī-ū, xawe ǁgao hâ hai-i ge ǁkhoa tama ǂûna ra ǀkhī-ū . . . ǁNā-amaga ǁîgu ǂûn tawa du nî mûǂan gu.” Nau mîdi ǃnâ, ǂgoms ga Eloba xu hâ o, os ge ǃgâi ǂûsa nî tani, xawe ǂgoms ga ǁGâuaba xu hâ o, os ge ǁgai ǂûna nî tani.—Mateub 7:15-20.

4. Mâ ǀgaugan Jehovab ǀgoreǀî-aona ūhâ?

⁴ Ama ǂgoms ge khoena ra ǀhaoǀhao ǀnama ūhâbagu tsî nau khoen tsîna ra ǀnama ǁgau na. Nēs ge Jehovab tsîn a ǀnami ti Elo ǃkhais ǃaroma. Jesub ge ge mî: “Nēs dawan ge hoana nî mûǂan ti ǁkhāǁkhāsabego a sa, ǀnamguba go ga sago ǃnâ ūhâ o.” ǂGomde mati nē ǁgui-aib ama ǀgoreǀîs ǃoa-aiba ra dī?—Johaneb 13:35; Lukab 10:27; 1 Johaneb 4:8.

5. Matis ǀgui encyclopedia ǂkhanisa Afrikab ǃgā ǁamaxūs xa ge mî?

⁵ ǂÂi re Afrikab di ǃgā ǁamaxūs xa. The New Encyclopædia Britannica di ǀon hâ ǂkhanis ge ra mî: “ǁAubexa 18 miliun Afrikab di khoen ge ǃgāse Sahara ǀkharib ǃnâ tamas ka io Indiab hurib ǂnamipe hâ ǃhūgu ǃnâ gere ǁamaxū-e 605ǁî kuriba xu 1905ǁî kurib kose. ǀGamǁî ǃâb 1500ǁî kurigu ǃnâ gu ge Euroba-ǁîga Afrikab di huriǂoas ǃnâ khoena ǁamas tsî ǁamaxūs ǃnâ ge ǂharugu tsoatsoa tsî 1867ǁî kurib ǃnân ge ǁaubexa 7 miliuns tsî 10 miliun ǁaegu hâ Afrikab di khoena ǃgān ase ǀasa ǃhūga ǃoa ge sîǂuihe.”

6. Mati ti ge ǂgomde gere ǁhao ǃgā ǁamaxūs ǃnâ?

 ⁶ ǂGomde mâǀkhāb ai ge mâ ī, nē ǀgaruǀgarub ge Afrikab ǃnâ aogu, taradi tsî ǀgôan tsîna gere ǀgora o, ǁîn omdi tsî ǀaokhoena xu, khedegu ǃnâ ǂgāhe tsîn ge goman khami ge re daohe tsî ǁamaxūhe tsî gere ǁamahe o? Bethwell Ogotib ge Daily Nation of Nairobi, Keniab !nâ ge xoa: “Xristeǁîn tsî Islami ǂgoms tsîn ge Elosi ǁkhāǁkhāsa ra sao tsî khoesib di ǀguiǃnâxasib ǃnâ ra ǂgom, xawe nē ǀgam ǂgom ra ge ge ǃnae kai ǃgāsisa mā-amsa ǀhûhâgu ǃnâ tsî ǃhaoǃnâbe ǃkharagusib tsîna. . . . ǂAnǃgâ da ge nî ǀhaosa ǀhawisan Moslemǁîn tsî Xristeǁîn ǁaegu hâsa, Huriǂoas tsî aiǂoas di ǁaegub kose, ǃgâi tama ǀgaub ain ge Afrikab khoena ge re sîsenūhe ǂgui kuriga ǂâi-e ǁoa ǃgomgan ge gere tsâ.”

7. Mâ ǃâ-e gu ge ǂgomdi ti ǂgaeǂgui-aoga torogu ǃnâ ūhâ ī?

⁷ Ama tama ǂgoms ge ǀnî hâ ǀgaub ai ǁîs di ǁgai ǂû tanisa ra ǁgau. Aiǁgause, Elobmîs ta mî: “Sa ǀgūkhoebats ge nî ǀnam” hînas ge ǂgomdi ǂgaeǂgui-aoga ǃhūbaib ǂhawase toroga ǀaexase gere ǂkhâǃnâ.—Mateub 22:39.

8. (a) Mati gu ge ǂgomdi di ǂgaeǂgui–aoga Afrikab ǃnâ ge hâ-i torogu ǃnâ ǃgams ǀkha gere hui? (b) Matib ge ǀgui ǁkhāǁkhā-aoba ǂgomdi di ǂgaeǂgui–aogu xa Nigeriab ǃnâ ge hâ-i ǃhaoǃnâbe torob xa mî?

⁸ Kaise ǃgâise ǂansa ǃkhais ge 1994ǁî kurib ai di ge nondi tsî ǁkhāǁkhā-aogu tsîna khoen ǃgams ǃnâ gere ǁhao Rwandab ǃnâ. ǂGomdi ge kai ǃâ-e gere ǀhuru Afrikab di torogu ǃnâ. Aiǁgause Nixeriab ǃnâ ge hâ ī ǀaoxa ǃhaoǃnābe torob ǃnâ di ge ǂgomde hoa ǀkha hâde khoena gere ǃkham kai. ǁNā torob gere ī hînab ge ǀgui kerkeb ǁkhāǁkhā-aoba ge mî kerkeb di ǂgaeǂgui-aogu ge “ǀgui  ǀkhāb ai Elob xa gu mā-e hâ sîsena ge mâi.” ǁÎb ge ge mî: “Sige hîna Elob di sîsen-aoge ge go ǁGâuab di sîsen-ao kai.”

9. Elobmîsa mati ǁGâuab ti sîsen-aogu xa ra mî?

⁹ Elobmîs tsîn ge nēsa ra ǃkhō-am: “ǁGâuab ǂûb gom ǃnâb di ǀhomǃgāse ra hîsen o. O i gom kai xu tama e o, ǁîb ǃgāgu on ga ǂhanu-aisib di ǃgāse hîsen o.” (2 Korinteǁîn 11:14, 15) ǂGui eloxoresa khoegu ǃgâi khoese ra ǁgausen, khamib ge ǁGâuaba khoena ra ǂgaeǂhabu ǁîb di sîsen-aogu ǀkha ǂhanu-aise ra mûsen xawe ǁîgu sîsengu ge a ǂkhawa tsî ǁîgu ǂûs ge a ǁgai.

10. Mâ ǀgaub ai gu ge ǂgomdi ǂgaeǂgui-aoga Eloba ǀūxu?

¹⁰ Hoa ǃhūbaib ǃnâ, gu ge ǂgomdi ǂgaeǂgui-aoga ǀnamixa, ǂkhîb tsî ǃgâisib xa ra aoǁnâ, xawe gu ge ǃhuigub, torob tsî ǂhanu-oǃnâsib tsîna ra dī. Elobmîs ge ǃgâise ra mîǃgāǃgāgu. Mî ra se: “Eloba in a ǂan, tin da ǁkhoase mî, xawen ta dīgu ǀkha ǀūbi.”—Titub 1:16.

11. Matis Elobmîsa ama tama ǂgomsa ra mîǃgāǃgā?

¹¹ Mû ǁkhā da ge a Jehovab mati ama tama ǂgomdi xa ra ǂâi ǃkhaisa Elobmîs ǂkhanis ǂHaiǂhaisa da ga ra khomai o. ǁNapas ge ama tama ǂgomsa tare khoes ase ra ǂkhōhe, “Babilons Kais.” (ǂHaiǂhais 17:5) Kē re Elob mati ra mîǃgāǃgāsi ǀgausa:

• “Kai ǀai-aos . . . ǃhūbaib di gao-aogu ǁîs ǀkha ge ǀaigus.” (ǂHaiǂhais 17:1, 2) Elob ǃoas nî ǂgomǂgomsase hâ, hînas ge ama tama ǂgomsa ǂgīǂgōsi xūn ǃnâ mâ, ǃnāsa ǁaega ǂhanuga ra mîbase tae-e gu nî dī ǃkhaisa.

• “Tsî ǁîs ǃnâb ge ǀaob kēbō-aogu tsî ǃnanun tsîn diba ge hōhe, tsî ǃhūbaib ai ge ǂnau ǃanhen hoan diba.” (ǂHaiǂhais 18:24) Ama tama ǂgoms ge ǂgomǂgomsa ǃgān Elob di na saoǃgon tsî gere ǃgam tsîs ge a ǀhawixa miliundi ǃnâ hâ khoen ǁōgas ge torogu ǃnâ-ū ǃaroma o.

• “ǁÎ aitsamas ge ǂkhaiǂkhaisen tsî ǃgâiǃgâisen kose.” (ǂHaiǂhais 18:7) Ama tama ǂgoms ge kaise ǃkhū hâ tsî ǁîs ǂgaeǂgui-aogu ge ǀgawi tsî ǀâse ûi hâ.

• “Sa ǃgaidīsa xūn ge ǀūben hoana ǂgaeǂhabuhe xui-ao.” (ǂHaiǂhais 18:23) ǁÎs di ǂhomi ǁkhāǁkhāti ǀoms ǁō tamas, tsî ama tama ǂgoms ge ǂgui dao-amde ǁkhopa-am hâ ǃgaidīb. Tsî ǁōhâna ǃaos tsî ǁōǂoa ge kai ǁgûna ǀgoreǀîsa ra ǂkhâǃnâ.

12. Mâ ǃkhâikhomsas Elobmîsa ama tama ǂgomdi xa ra mâ?

¹² ǀGaisa domi ǀkhas ge Elobmîsa khoena ra ǃkhâikhom in ama tama ǂgomasa xu ǂoa. Elobmîs ge ra mî: “ǁÎsa xu ǂoa, di ǁaese, idu ǁîs di ǁoren ǃnâ tā amǃnâxa, ǁîs di tsûtsû aite xa du hōhe tite ga.”—ǂHaiǂhais 18:4, 5.

13. Tae-e nî ī ama tama ǂgoms tsî ǁîs ǃnâ hân ǀkhā?

¹³ ǀĀǁaes ge Babilons Kais, ǃhūbaib hoab di ama tama ǂgomdi di gaosa hoaragase nîra dīkākāhe. Elobmîs ge ra mî: “ǁNā-amgas ge ǁîs di tsûtsû aite ǀgui tsēs ai nîra hā, ǁōb tsî ǃaob tsî ǃâb tsîna, os ge ǀaes ǀkha nîra khauǂkhuhe, ǀgaixab a ǃKhub Eloba, ǁîsa nî ǀgoraǃgâba xui-ao.” (ǂHaiǂhais 18:8) ǁÎs di tsûtsû aiti xa ta ga hōhe ǂgao tama io, o da ge ǁîsa xu ǂoa tsî ǃnūse ama tama ǂgomsa xu nî hâ. ǁÎs di ǁnaetigu, ǁâudīgu, tsî ǂgomǀgaugu hîna Eloba ǂkhîǂkhî tama hâ ga xus tsîna. Nēs ge kaise a ǁgariǁgarisa. Sida ûiǃkharus nēsa xu hâ xui-ao!—2 Korinteǁîn 6:14-18.