Hoa da ge mari-e ǂhâ hâ sida di omaride ǂhâban hâ xūna mās ǃaroma. (ǂKhoamîdi 30:8) Hoa xūn ǂamaib ge “mariba sommi khama ī.” (Aoǁnâ-aob 7:12) Khoe-aoguse i ge a ǃgom mariǁhōgu xa ǃhoasa, xawe tān mariǁhōna sa ǃgameb ǃnâ ǃgomsiga ǃaroma. (Efeseǁîn 4:32) Khoe-aoguse ǂgomǃgâgu tsî ǃgarise ǀguiba sîsen re tsî mîǁgui mati ro mari-e nî sîsenū ǀgausa.

ELOBMÎS TA MÎS: “Tarib âdo, ǂgō-om-e ra ǂnuwi ǂgoaba kha aibe ǂnû, tsî ǁnās ǃoa ǂhâbab hâna ǃgôa tama hâ, iseb xare dītoab nîsa ǂâuba hâna ūhâsa?” (Lukab 14:28) Kaise i ge ǂhâǂhâsa ǀguiba ro nî ǀape ǀhaosa saro marina ro mati nî sîsenū ǀgausa. (Amob 3:3) Mîǁgui re tae-ets nî ǁamasa tsî matikō ets a sîsenū ǁkhās tsîna. (ǂKhoamîdi 31:16) Mari-ets ūhâs ge ǂâibasen tama hâ, mâ xū-i hoa-ets nî ǁama ǃkhaisa. Dītsâ re surudeba xu ǂgōsensa. Ūts hâ maris ǀguisa sîsenū re.—ǂKhoamîdi 21:5; 22:7.

SATS A DĪ ǁKHĀ I:

• ǁKhâb ǀunis ai i ga mari-e ǃau o, ǀguiba mîǁgui re tae-ets ǁnā maris ǀkha nî dī ǃkhai-e

• Sats ga mari ǀorosiba ūhâ o, ǀō-aisa ǀapena dī its sa māǂuisa tā sa hōǂgās xa kai. Aiǁgause, sats ge oms ai ǂû-e a aiǂhomibasen ǁkhā, ǀnai sâi toasa ǂû-e ǁamas xa

ELOBMÎS TA MÎS: “ǃKhūb ǀguib aiǃâ tama i, tsî khoen tsîn aiǃâ” ǂhauǃnâse tanisen re. (2 Korinteǁîn 8:21) Sats ǃgame hâ khoe-ets ge nî ǂhauǃnâ ū, matikō ets ta hōǂgās tsî matikō ets ta sîsenūs tsîna.

Sats ǃgame hâ khoe-e hoaǁae mîba re mîǁgui-ets nî ūs aiǃâ sa mariǁhōgu xa. (ǂKhoamîdi 13:10) Mariǁhōgu xa ǃhoas ge sa ǃgameba nî hui ǂkhîba ūhâ sa. Sa hōǂgāsa kēǃgâ tsî tā ǂâi ǁnā maris ǀguri a sa ti xawe omaris di mari-i a ǃkhaisa.—1 Timoteub 5:8.

SATS A DĪ ǁKHĀ I:

• ǁNâu gu re matikō mari-e i mâ khoe-i hoa-e a sîsenū ǁkhā sa mîba gu tama hâ se

• Tā ǃâu re mari ǃgomsib nî hās kōse ǁnās nî hās aiǃâ ǃhoa ūgu re