Elob ge hoa ǃnôa khoena ra ǁkhauǂui ǀgores ǃnâ-ū ǁÎb ǃoa ǀgūsa. (Psalmti 65:3) ǁNāsa ī tsîb ge hoa ǀgorede ūǃoa tamas ka io ǁnâu-am tama hâ. Aiǁgause, aob hîna ǁîb tarasa ra ǁgâiǀab di ǀgores ge nî ǂhanihe. (1 Petrub 3:7) Israel ǁaes ge ǁgai xūna ǀûs ose gere dī o, ob ge Eloba ǁîn di ǀgorede ǁnâu-am tama ge hâ-i. ǃGāsa a ǃkhais ge ǀgores ge a aiǂhanu. Kai ǁore-ao i ga ǃhobasen o, ob ge Eloba ǁnāti i khoe-i di ǀgoresa a ǁnâu-am ǁkhā.​—Khomai re Jesajab 1:15; 55:7.

Vidioba kō re Eloba hoa ǀgorede ra ǃeream?

ǀGores ge sida ǃoabas di ǃâ, ǁnā-amaga da ge sida di Kuru-aob, Jehovab ǃoa ǀgui nî ǀgore. (Mateub 4:10; 6:9) ǀOasa kurusa da ūhâ tama hâ, amaga da ge Jesub ǀons ǃnâ-ū nî ǀgore ǁîb ge sida di ǁorena a ǁōba amaga. (Johaneb 14:6) Jehovab ge ǂgao tama hâ, i da tā mâ ǃnās hoasa ǀgui xūn ǀguina ǀgore tamas ka io xoamâihe hâ ǀgorede khomai ǁnâ. ǁÎb ge ra ǂhâba i da ǂgaob ǃgamsiba xu ǀgore.​—Khomai re Mateub 6:7; Filipeǁîn 4:6, 7.

Sida di Kuru-aob ge ǂgaob ǃnâ ra ǀgorehe ǀgoredi tsîna a ǁnâu ǁkhā. (1 Samueli 1:12, 13) ǁÎb ge ra ǁkhauǂui da i da mâǁaeb hoaba ǀgore, tsēs di tsoatsoas tsî ǀams ai, tsî ǂû da ga ra o, tsî ǃgomsin ǃnâ da ga hâ os tsîna.​—Khomai re Psalmti 55:23; Mateub 15:36.

Elob ǃoa ǀgūs ge supu tama hâ, khoen hîna Elob ǃnâ ǂgom tama hân ǁaegu da ra hâ amaga, tsîn ge ǁÎb di mîmâis  ǂkhîxa ǃhūbaib tisa ra ǃhō. (2 Timoteub 3:1, 4; 2 Petrub 3:3, 13) ǁNā-amaga da ge ǂkhâǃnâgusa ǂhâba hâ ǀgui ǂgoms tisa, ǂhâgu da ge hâ.​—Khomai re Hebreǁîn 10:24, 25.

Eloba ǀnam khoen ǀkha da ga ǀhōgu o, o da ge Elob ǃoa a ǀgū ǁkhā. Jehovab di ǀHûǀguitimî-aon di ǀhaodi tawa i ge ǃgâi ǃē-e hâ nau hâ khoen ǂgomsa xu hōdawa-amhe hōsa.​—Khomai re Romeǁîn 1:11, 12.

Jehovabats ge a ǀgū ǁkhā, ǁÎb xats ta ǁkhāǁkhāsen xūna ǂâiǃgâs ge nî huitsi, nē xūn ge ǁÎb Mîs ǃnâ ra hōhe. ǂÂi ǃgâ re ǁÎb di sîsengu xa, ǁÎb ǀapemās xa, tsî ǁÎb mîmâidi xas tsîna. ǀGores ǀkha hâ ǂâiǂâisens ge nî huida i da ǃgôaǃgâ sida di ǂgaogu ǃnâ Elob di ǀnami tsî gā-aisib tsîkha.​—Khoamai re Josuab 1:8; Psalmti 1:1-3.

Sats tsîn ge Eloba a ǀgū ǁkhā ǂgomǃgâbits ga o, tsî ǂgomsa ǁÎb ǃnâ nî ūhâ. Xawe ǂgoms ge ûitsama xū-i hîna ǂûhe ǂhâba hâ-i khami i. ǁAeba xu ǁaeb ǀkhats ge sa ǂgomsa nî kēǃgâ, sa ǂgomsa ôaǃnâs ǃnâ-ū.​—Khomai re Mateub 4:4; Hebreǁîn 11:1, 6.

Jehovab ge ǁnān hîna ǁîba a ǀnam na ra tsâba. ǁÎb ge nî sâu nî tsū xūn hîna ǁîn ǂgomsa ra khôa ǂgaona xu tsî ǁîn di ǃâubasens ǀamo ûib tis tsîna. (Psalmti 91:1, 2, 7-10) ǁÎb ge ra ǃkhâikhom da ûiǀgaugu hîna sida di ǂurusib tsî ǂkhîb tsîkha a ǁgaiǁgai ǁkhāna xu. Jehovab ge ǃgâi ûiǀgauba ra ǁkhāǁkhā da.​—Khomai re Psalmti 73:27, 28; Jakobub 4:4, 8.