1. Tae-e du ǀnîsi nî dîsen nē ǂkhanisa du ga ǁkhāǁkhāsen toa o?

SADU ge Elobmîs amab xa go ǁkhāǁkhāsen nē ǂkhanisa xu, aiǁgause ǀamo ûib mîmâis, ǁō hân mâsib tsî khâis tsîn xa. (Aoǁnâ-aob 9:5; Lukab 23:43; Johaneb 5:28, 29; ǂHaiǂhais 21:3, 4) Sadu ge ǀnîsi Jehovab di ǀHûǀguitimî-aon ǀhaode ǀkhai ra hâǃnâ tsî du ge ra mû ǁîn da ama ǀgoreǀî ǀgauba ûiǂui ǃkhaisa. (Johaneb 13:35) Sadu ge Jehovab ǀkha ǀhōsasisa omkhâi hâ tsî du ge mîǁgui hâ ǁîba du ra ǃoaba ǂgaosa. Sadu ge ǀnîsi ra dîsen, ‘tae-e ta nēsi nî dī Eloba ta ga ǃoaba ǂgao o?’

2. Tae-i ǃaromab ge Etiopiaǁî khoeba gere ǁāǁnâhe ǂgao?

 ² Etiopiaǁîb hîna ge Jesub ǁaeb ǃnâ ûi hâ îb ge ǁkhā ǂâisa ge ūhâ i. Jesub ge khâisa māhes khaoǃgâb ge ǁîb ti ǁkhāǁkhāsabeb, Filipuba Etiopiaǁîba ge a aoǁnâba. Filipub ge nē khoeba ge a ǁgau Jesub a Mesia ǃkhaisa. Nē Etiopiaǁîb ge ge a tsâǀkhāhe ǁkhāǁkhāsen nî ge xūn xa tsî ǃhaese ge a mî: “Kō, nē i ge ǁgam-e hâ. Tare-e nî ǂhani te, ǁāǁnâkaisen ta nîsa?”—ǃNaeǃkhaidi 8:26-36.

3. (a) Tae-i mîmā-eb ge Jesuba ǁîb saosabena mā? (b) Khoe-e mati nî ǁāǁnâhe?

³ Elobmîs ge ǃgāsase ra mî Jehovaba du ga ra ǃoaba ǂgao o, o du ge nî ǁāǁnâ kaisen. Jesub ge ǁîb ti ǁkhāǁkhāsabena ge a mîba: “Hoa ǁaede ǁkhāǁkhāsabedī, î go ǁîna ǁāǁnâ.” (Mateub 28:19) Jesub tsîn ge aiǁgausa ge a ǁgau ǁāǁnâ kaisen nî ge o. ǁÎb ge ǁgammi ǃnâ hoase ge a ǂhomhe, ǁîb ge danas ai ǀgui ge ǀâǀâhe tama hâ i. (Mateub 3:16) Nētsēs tsîna i ga Xristeǁî-e ǁāǁnâ kaisen ǂgao o, o i ge hoase ǁgammi ǃnâ nî ǂhomhe.

4. Sadu ǁāǁnâsa khoena tae-e ra ǁgau?

⁴ ǁĀǁnâ kaisen du ga ra o, o du ge khoena ra ǁgau amabes ǃnâ du ra Elob ti ǀhōsa kai ǂgao tsî ǁîba ra ǃoaba ǂgaos tsîna. (Psalmdi 40:7, 8) Sadu ge ǀnîsi a dîsen ǁkhā, ‘tae-e ta nî dī î ta ǁāǁnâhe ǁkhā?’

5. (a) Tae-e du ǂgurose nî dī ǁāǁnâhe du nîs aiǃâ? (b) Tae-i ǃaroma di Xristeǁî ǀhaode a ǂhâǂhâsa?

⁵ ǁĀǁnâhe du nî aiǃâ du ge Jehovab tsî Jesub tsîkha nî ǂan. Sadu ge nēsa ǀnai go dī tsoatsoa Elobmîsa ôaǃnâs ǃnâ-ū. (Khomai re Johaneb 17:3.) Xawe ǁnās ge ǂâu tama. Elobmîs ge ra mî Jehovab “ǂâis di ǂans  ǀkha” ǀoaǀoahe re. (Koloseǁîn 1:9) Jehovab di ǀHûǀguitimî-aon ǀhaodi ge nî hui du î du ǀgaisa ǃgaeǁaesa Jehovab ǀkha ūhâ. ǁNās ge ǀgui ǂhâǂhâsa ǃaromasa ǀhaode da hoaǁae nî hâǃnâsa.—Hebreǁîn 10:24, 25.

6. Matikō xūna du nî ǂan ǁāǁnâhe du nîs aiǃâ?

⁶ Mâ hâ ǃkhais ge Jehovab ge sado xu ǃâubasen tama hâ î du hoa xūn Elobmîs ǃnâ hâna ǂan ǁāǁnâhe du nîs aiǃâ. ǁÎb ge Etiopiaǁî khoeb nî hoa xūna ǂansa ge ǃâubasen tama hâ i ǁāǁnâheb nîs aiǃâ. (ǃNaeǃkhaidi 8:30, 31) Elob xa da ge ǀamosib kōse nî ǁkhāǁkhāsen. (Aoǁnâ-aob 3:11) Xawe ǁāǁnâhe du nîs aiǃâ du ge Elobmîs ǃgaoǃgaob ǁkhāǁkhāde nî ūǃoa.—Hebreǁîn 5:12.

7. Matis ge sadu Elobmîs ôaǃnâsa hui du?

⁷ Elobmîs ge ra mî: “ǂGoms ose Eloba ǃgâiǃgâibas ge a ī ǁoa.” (Hebreǁîn 11:6) ǂGomsa du ge ǂhâ hâ ǁāǁnâhe du nîs aiǃâ. Elobmîs ge ra mîba da ǀnî khoen Korinte ǃās din ge Jesub di saosaben da ǁkhāǁkhā xūna a ǁnâu o, on ge ge “ǂgom tsî ge ǁāǁnâkaisen.” (ǃNaeǃkhaidi 18:8) ǁNās ǁkhās khamis ge sadu Elobmîs ôaǃnâsa go hui du, î du Elob di mîmâidi ǃnâ ǂgom tsî Jesub ti ǁguibas sadab ge ǁoreb tsî ǁōba xu xores dib ǃnâs tsîna.—Josuab 23:14; ǃNaeǃkhaidi 4:12; 2 Timoteub 3:16, 17.

8. Tae-e nî ǂkhâǃnâ du î du khoena ǁkhāǁkhāsen du ra xūna mîba?

⁸ Elobmîsa sadu ǃnāsase ra ǁkhāǁkhāsen khami du ge nî mû Elobmîs mati sadu ûib ǃnâ ra hui du ǀgausa tsî sadu ǂgoms tsîn ge nî ǀgai. Sadu tsîn ge khoena nî mîba ǂgao xūn hîna du ra ǁkhāǁkhāsen ân xa.  (Jeremiab 20:9; 2 Korinteǁîn 4:13) Xawe ham-e du nî mîba?

9, 10. (a) Ham ân ǀkha du a ǀgoragu ǁkhā ǁkhāǁkhāsen du ra xūna? (b) Tae-e du nî dī ǀhaohâb ǀkha du ga ǀguiba aoǁnâ sîsenni ǃnâ sîsen ǂgao o?

⁹ Sadu ge ǀnîsi sadu ǀaokhoen, ǀhōsan, ǀgūkhoen tamas ka io sîsenǁae-aona a mîba ǁkhā ǁkhāǁkāsen du ra xūn xa. ǁNās ge a ǃgâi xawe hoaǁae ǃgâi tsî ǀnamxaǃnâ ǀgaub ai ǁnāsa dī re. ǁAeb ǀkha du ge aoǁnâ sîsenni ǃnâ nî ǁhao ǂgao ǀhaohâb ǀkha. ǁKhoaǂgaose du ga ra tsâo, o du ge sado ra Elobmîsa ǁkhāǁkhā khoe-i ǀkha nî ǃhoa tsî ǁî-e nî mîba aoǁnâ sîsenni ǃnâ du ra ǁhao ǂgao ǃkhaisa. ǁNā khoe-i ga ra ǂâio, sadu a ǂhanu ǃkhaisa tsî du Elobmîs ǃoa-ai ra ûisa, o i ge sadu tsî ǁî-i tsîna ǀgam ǀhaohâb ǃûi-aoga sī nî mû.

¹⁰ Tae-e nî ī ǁnā ǂnûs tawa? ǀHaohâb ǃûi-aogu ge sadu ǀkha nî ǃhoa î gu kē ǁnâuǃā tsî du hoaǃnâ-aixa Elobmîs ǁkhāǁkhādi ǃnâ ra ǂgomsa. Tsî Elobmîsa du ra ǁnâuǀnamsa sadu ûib ǃnâ tsēs hoasa tsî amabes ǃnâ du ra Jehovab di ǀHûǀguitimî-aon di ǀgui kai ǂgaosa. ǂÂis ǃnâ ūhâ re ǀhaohâb ǃûi-aogu ge ǀhaohâb ǁanin hoana ra kēǃgâ, sadu tsîna ǃkhōǂgā hâse, tā toxoba ǁîga ǃao re. (ǃNaeǃkhaidi 20:28; 1 Petrub 5:2, 3) ǁNā ǂnûs khaoǃgâgu ge ǀhaohâb ǃûi-aoga nî ǂanǂan du aoǁnâ sîsenni ǃnâ du a ǁhao ǁkhā ǃkhaisa tsî ǀhaohâb ǀkha ǀguiba sîsensa.

11. Tae-i ǃaroma i a ǂhâǂhâsa ǀkharaǀkharana sadu ûib ǃnâ dīsa ǀhaohâb ǀkha du nî aoǁnâ tsoatsoas aiǃâ?

¹¹ ǀHaohâb ǃûi-aogu ge a mîǃāba du ǁkhā î du ǀkharaǀkharana sadu ûib ǃnâ dī aoǁnâ sîsenni ǃnâ du nî ǁhaos aiǃâ. Tae-i ǃaroma i a ǂhâǂhâsa ǁnā ǀkharaǀkharana  sadu ûib ǃnâ dīsa? Elob xa da ga khoena mîba o, o da ge Jehova Eloba ra ǂnûǁkhaeba ǁnā-amaga da ge ǁîba ǃgôasiba ra mā ǀgaub ai nî ûi.—1 Korinteǁîn 6:9, 10; Galateǁîn 5:19-21.

12. Tae-i ǃaroman hoa khoena nî ǃhobasen?

¹² ǁĀǁnâhe du nîs aiǃâ i ge ǀnî hâ xū-e hâ dī du nî-e. Apostel Petrub ge ge mî: “ǃHausen ǁnâi î du ǃhobasen, sadu ǁoren nî ǀarihese.” (ǃNaeǃkhaidi 3:19) ǃHobasensa tae-e ra ǂâibasen? ǁNās ge ra ǂâibasen dī du gere tsū xūn xa du ǁgaise ra tsâsa. Aiǁgause, ǀnîsi du ǁgauoǃnâ ǁgoe-ūgub ǀgauba gere sao amaga du ge ǃhobasensa ǂhâ hâ. Tsî ǁkhā du ân hoana du ge ra dītsâ ǂhanuse ûisa xawe i ge noxoba ǂhâbasa î du ǃhobasen, hoa da ra ǁore xui-ao, ǁnā-amaga da ge Elob di ǀûbasa ǂhâ hâ.—Romeǁîn 3:23; 5:1.

13. ‘ǃHausensa’ tae-e ra ǂâibasen?

¹³ ǂÂu i hâ tsūse ǀgui tsâsa, dī du ge ǁgai xūn xa? Hî-î. Petrub ge ge mî “ǃhausen” [tamas ka io ūdawasen] da nîsa. ǁNās ge ra ǂâibasen hoaraga tsū ǀgauga ǁnâxū tsî ǃgâina dīsa. Hā re î da nēti ǂkhō, mûnanai re ǂguro ǃnās ase du ǃkhai-i ǃoa ra ǃnari ǃkhaisa. ǁAerob khaoǃgâ du ge ra ǂanǂui ǂhanu daob ai du hâ tama hâsa. Tae-e du nî dī? Îganǀgē tamase du ge nî ǂauǂau, dawasen tsî ǂhanu daoba nî ū. ǁNās ǁkhās khamis ge sadu Elobmîs ôaǃnâsa a hui du ǁkhā î du ǂanǂui ǁnaetin tamas ka io xūn sadu ûib ǃnâ ǀkharaǀkharahesa ǂhâ hâna. Māsenxase “ǃhausen” re, ǁnās ge ra ǂâibasen ǂhâbasa ǀkharaǀkharana dī re—î du ǂhanuse dī tsoatsoa.

14. Mati du aitsama ra māǁnâsen Jehova Elob ai?

¹⁴ ǀNî hâ ǂhâǂhâsa xū-i dī du nî i ǁāǁnâhe du nîs aiǃâs ge aitsama Jehovab ai māǁnâsensa. Aitsama du ga ra māǁnâsen o Jehovab ai, o du ge ǀgores ǃnâ ra mîmâi ǁîb ǀguiba du nî ǀgoreǀî ǃkhaisa tsî ǁîb ǂâisa dīsa sadu ûib ǃnâ ǂgurose ra mâisa.—Deuteronomium 6:15.

15, 16. Tae-e khoe-e ra ǂkhâǃnâ î-i aitsama māǁnâsen Jehova Elob ai?

¹⁵ Mîmâi du ga ra o Jehovab ǀguiba ǀgoreǀîsa, o i ge ǀnam du a khoe-i ǀkha ǁōb kōse hâs khami ī. ǂÂi re aorekhoeb tsî tarekhoes hîna ra mûgu ra xa. Nē khoeb ta nē tarekhoesa ǃgâise ǂan khamib ge ǁîsa ra ǀnam tsoatsoa tsî ǁîsa ra ǃgame ǂgao. Nē mîǁguib kaise a kai xaweb ge nē khoeba a māsenxa ǁnā ǃereamsa ūǃoasa khoesab a ǀnam amaga.

¹⁶ Jehovab xa du ra ǁkhāǁkhāsen khami du ge ǁîba nî ǀnam tsoatsoa, ǁnāpaxū du ge ǁkhā du ân hoana nî dītsâ ǁîba ǀgoreǀîsa. ǁNās ge nî ǂkhâǃnâ du î du ǀgores ǃnâ mîmâi ǁîb ǀguiba du ra ǀgoreǀî ǂgao ǃkhaisa. Elobmîs ge ra mî khoe-i ga Jesuba sao ǂgao o, o i ge nî “ǁî-aitsama ǀūxūsen.” (Markub 8:34) ǁNāsa tae-e ra ǂâibasen? ǁNās ge ra ǂâibasen ǁnâuǀnamxasib Jehovab ǃoa-ai du ūhâb sadu ûib ǃnâ ǂgurose nî mâ ǃkhaisa. Jehovab sadu xu ra ǂhâba i ge kaise a ǂhâǂhâsa sadu turagu tsî mîǁguigu xa.—Khomai re 1 Petrub 4:2.

17. Tae-i ǃaroman ǀnî khoena aitsama māǁnâsen ǂgao tama hâ Jehovab ai?

¹⁷ ǀNî khoen ge Jehovab ai aitsama māǁnâsensa  ǂgao tama hâ, ǁîn ge ra ǃao ǁîn māǁnâsens ain hâhâ tide ǃkhaisa ǁîba ǀgoreǀîs ǃnâ. ǁÎn ge Jehovaba tsūse tsâ kai ǂgao tama hâ. ǁÎn ge ra ǂâi māǁnâsen taman ka io, on Jehovab ǃoa-ai ǃeream-e tani tamasa dī ǂgaon da xūn hoan ai.

18. Tae-e nî hui du Jehovaba ǂkhîoǃnâ kaisa dan-e hōbasa?

¹⁸ Sadu ǀnammi Jehovaba du ūba hâb ge nî hui du î du ǁîba ǂkhîoǃnâ kaisa dan-e hōba. ǁÎba du a ǀnam ǃkhais ǃaroma du ge ǁkhā du ân hoana nî dītsâ sadu mîmâis ai hâhâsa. (Aoǁnâ-aob 5:4; Koloseǁîn 1:10) Sadu ge Jehovab di ǂâisa dīs a ǃgom ti ǂâi tide. Apostel Paulub ge ge a xoa: “Nēb ge ǀnammi Elob diba, ǁîb di mîmāde da ga ǃkhōǀgaipeo; tsî ǁîb di mîmādi ge ǃgom tama hâ.”—1 Johaneb 5:3.

19. Tae-i ǃaroma du ǃao tide aitsama Jehovab ai māǁnâsensa?

¹⁹ Sadu ge dīǀoaǀoasa kurusa ǂhâ tama hâ î du Jehovab ai aitsama māǁnâsen. ǁÎb ge tātsēs tsîna dī ǁoa da a-e ǃâubasen tama hâ sada xu. (Psalmdi 103:14) ǁÎb ge nî hui du î du ǂhanuse dī. (Jesajab 41:10) ǂGomaiǂnûi re Jehovab ai sadu ǂgaob hoab ǀkha, “ob ge ǁîba daogu âtsa nîra ǂhauǂhau.”—ǂKhoamîdi 3:5, 6.

20. Khoexaǃnâ māǁnâsensa du Jehova Elob ǃoa-ai dī hâs khaoǃgâ, tae-e du sao rase nî dī?

²⁰ ǂÂi î du ra aiǂhomisa du a ǃkhaisa sadu ûiba Jehovab ai māǁnâsa? Jehovab ai du māǁnâsen hâs khaoǃgâ, du ge sao ra xū-e nî dī. ǁĀǁnâ kaisen du ge nî.

21, 22. Mati du “ǃgâiǃōsib” sadu ǂgoms diba a “ǁguiǁnâ” ǁkhā?

²¹ ǀHaohâb ǃûi-aogu mûǂam-aob sadu ǀhaohâb diba ǂanǂan re Jehovab ai du go māǁnâsen ǃkhaisa tsî du ra ǁāǁnâhe ǂgao ǃkhaisa. ǁÎb ge ǁnāpaxū ǀhaohâb  ǃûi-aoga nî mîba î gu sadu ǀkha hoaǃnâ-aixa Elobmîs ǁkhāǁkhāde ǃhoaǃgao. ǁÎgu ga mîǁgui o ǃgâi du a ǃkhaisa, o gu ge nî mîba du î du sao ra ǂharis kai ǀhaos tamas ka io ǀkharib kai ǀhaos tawa ǁāǁnâhe Jehovab di ǀHûǀguitimî-aon dis tawa. ǁNā ǂharis kai ǀhaos tawa i ge ǃhoasa nî hâ ǁāǁnâs ǂâibasensa ra ǁguiǃāsa. ǃHoa-aob ge ǁāǁnâhe nî khoe-e ǀgam supu dî ra nî dî. ǁNā dîde ǃereams ǃnâ-ū i ge ams ǀkha  “ǃgâiǃōsib ǃoa” ra “ǁguiǁnâ” ǁî-i di ǂgomsa.—Romeǁîn 10:10.

²² ǁNāpaxū du ge nî ǁāǁnâhe. Sadu ge hoase ǁgammi ǃnâ nî ǂhomhe. Sadu ǁāǁnâs ge hoa khoena nî ǁgau Jehovab ai du go māǁnâsen ǃkhaisa tsî du nēsi Jehovab di ǀHûǀguitimî-aon di ǀguisa.

23. Tae-e i ra ǂâibasen “ǁGûb, ǀGôab, tsî ǃAnu Gagab ǀons ǃnâ” ǁāǁnâhesa?

²³ Jesub ge ge mî ǁîb di ǁkhāǁkhāsabegu nî ǁāǁnâhesa “ǁGûb, ǀGôab, tsî ǃAnu Gagab ǀons ǃnâ.” (Khomai re Mateub 28:19.) ǁNāsa tae-e ra ǂâibasen? ǁNās ge ra ǂâibasen Jehovab ǂhanub tsî Jesub ta ǁîb ǂâibasens ǃnâ ǀhuru ǃâba du ra ǂanǃgâ ǃkhaisa. Tsî Elob ta mati ǁîb ǃanu gagaba sîsenū ǀgaub tsîna ǁîb ǂâisa dīǀoaǀoas ǃnâ-ū.—Psalmdi 83:18; Mateub 28:18; Galateǁîn 5:22, 23; 2 Petrub 1:21.

24, 25. (a) ǁĀǁnâsa tae-e ra ǂâibasen? (b) Tae-e da sao ra danaǃâs ǃnâ nî ǃhoaǃgao?

²⁴ ǁĀǁnâs ge kaise ǂhâǂhâsa xū-e ra ǂâibasen. ǁGammi ǃnâ du ga ra ǂhomhe o, o i ge ra ǂâibasen ǁō du gosa tamas ka io sadu ǀoro ûi ǀgauba du go ǁnāxūsa. ǁGam-e xu du ga ǂoaxa o, o du ge ǀasa ûiba ra tsoatsoa î du Elob ǂâisa dī. Nēs ge nî ǁgau Jehova Eloba du nî ǃoaba tsoatsoasa ǁnā ǁaeba xu. ǂÂis ǃnâ ūhâ re khoe-i, khoesi ǃnan-i tamas ka io sîsenni ai du ge māǁnâsen tama hâ. Sadu ûiba du ge Jehovab ai go māǁnâ.

²⁵ Sadu māǁnâsens ge nî hui du î du ǀgaisa ǀhōsasisa Elob ǀkha omkhâi. (Psalmdi 25:14) Nēs ge ǂâibasen tama hâ khoe-i go ǁāǁnâhe ǃkhais ǃaroma i nî ǃgâiǃō di. Apostel Paulub ge ge xoa: “ǃAob tsî ǀkhūb tsîkha ǀkha sadu ǃgâiǃōsiba sîsen re.” (Filipeǁîn 2:12) ǁĀǁnâs ge tsoatsoas ǀguisa. Xawe mati du Jehovab ǀgūse a hâ ǁkhā? ǀUniga danaǃâs nē ǂkhanis dis ge ǁnā dîsa nî ǃeream.