1, 2. Tae-i dîna da nî dîsen tsî nēsa tae-i ǃaroma a ǂhâǂhâsa?

ELOBMÎSA du ra ôaǃnâ khami du ge ra mûǂan ǂgui khoen hîna Eloban ra ǀgoreǀî di ra mîn ge Elob ǃhui hâ xūna ra ǁkhāǁkhā tsî dī. (2 Korinteǁîn 6:17) ǁNā-amagab ge Jehovaba ge a mîmā î da ǂhumi eloǃoabade xu ǂoa, “Babilons kaisa.” (ǂHaiǂhais 18:2, 4) Tae-e du nî dī? Hoa da ge mîǁguiga nî dī tsî aitsama nî dîsen, ‘Eloba ǁîb ra ǂhâba ǀgaub ai ta ra ǀgoreǀî tamas ka io tita ra ǂhâba ǀgaub ai ta ra ǀgoreǀî bi?’

² ǀNai du ga ǂhumi eloǃoabasa xu ǂoa o, os ge ǁnāsa a ǃgâi. Xawe du ge ǀnîsi noxoba ǃgamse ǂhumi eloǃoabas di ǁnaetigu xa a ǃgâibahe. Hā re î da ǀnî ǁnaetiga ǃhoaǃgao tsî mû tae-i ǃaroma i a ǂhâǂhâsa ǃkhaisa ǁîna Jehovab ta mû khami mûsa.

3. (a) Tae-i ǃaroman ǀnî khoena a ǃgombahe ai-īsiga sîsenū ǀûsa ǁîn ǀgoreǀîs ǃnâ? (b) Elobmîsa tae-e ra mî ai-īsiga sîsenūsa Eloba ǀgoreǀîs ǃnâ?

³ ǀNî khoen ge ai-īsiga ǁîn omdi ǃnâ mâi tsî Eloba ǂgui kuriga ǁnāti ī ǀgaub ai gere ǀgoreǀî. ǁNās ga ra ama o, sadu xa, o du ge ǀnîsi nî ǃhaobahe tamas ka io ǃgâibahe tide Eloba ai-īsigu ose ǀgoreǀîsa. Xawe ǂâis ǃnâ ūhâ re Jehovab ge ra ǁkhāǁkhā da mati da ǁîba nî ǀgoreǀî ǀgausa. Tsî Elobmîs tsîn ge ǃgāsase ra mîba da Jehovab ǂgao tama hâsa î da ai-īsigu ǃnâ-ū ǁîba ǀgoreǀî.—Khomai re Eksodus 20:4, 5; Psalmdi 115:4-8; Jesajab 42:8; 1 Johaneb 5:21.

4. (a) Tae-i ǃaroma da ǁōǂoa ge kaiǁgûna ǀgoreǀî tide? (b) Tae-i ǃaromab ge Jehovaba Israelǁaesa mîbaba în tā ǁō hân ǀkha ǃhoa?

 ⁴ ǀNî khoen ge ǂgui ǁaeb tsî ǁîn ǀgaib tsîna ra sîsenū în ǁîn di ǁōǂoa ge kaiǁgûna ǂkhîǂkhî. ǁÎn ge nē ǁōǂoa ge kaiǁgûn tsîna ra ǀgoreǀî. Xawe ǁkhāǁkhāsen da ge go ǁō hân ge hui da ǁoa tamas kai io tsûtsû da ǁoa. ǁÎn ge ǀkhara ǃkhai-i tawa sī hâ tama hâ. Ama as ge ǁkhōǁkhōsa i ge a ǁîn ǀkha ǁgamsa, nē ǁō hâ ǀaokhoe-i di haisi-ams khami ra mûsen xū-i ge demonga xu a hā ǁkhā. ǁNā-amagab ge Jehovaba Israelǁaesa ge mîmā in tā ǁō hân ǀkha ǃhoa tamas ka io demongu ǀkha dī xū-e ūhâ.—Deuteronomium 18:10-12; 26ǁî tsî 31ǁî ǀArosa ǃgāsasiba mû re.

5. Tae-e a hui du ǁkhā î du ai-īsiga sîsenū ǀû Eloba ǀgoreǀîs ǃnâ tsî ǁōǂoa ge kaiǁgûna ǀgoreǀîs tsîna?

⁵ Tae-e a hui du ǁkhā î du tā ai-īsiga Eloba ǀgoreǀîs ǃnâ sîsenū tsî ǁōǂoa ge kaiǁgûna ǀgoreǀî ǀû? Elobmîsa khomai re tsî ǃamkuse ǂâiǃgâ re matib Jehovaba nē xūna ra mû ǀgausa. ǁÎb ge nē xūna “ǁgaiǁgaisa” tamas ka io ui-uixase ra mû. (Deuteronomium 27:15) Jehovab ǃoa tsēs hoasa ǀgore re îb hui du î du ǁîb mûǂuisa ūhâ tsî ǁîb ra ǂhâba ǀgaub ai ǀgoreǀî bi. (Jesajab 55:9) Sadu ge ǂgomǃgâsiba a ūhâ ǁkhā Jehovab nî hui du sa î du ǀgaiba ūhâ ǂhâ du hâba î du ama tama ǀgoreǀîs ǀgauba xu ǂgōsen.

6. Tae-i ǃaromas ge 25 Desemebersa ǁhûiheba Jesub ti ǃnaetsēs ase?

⁶ Kresmis ge kaise a ǂanǂansa sâtsēsa ǃhūbaib ǂhabase tsî ǃnāsa khoen ge ra ǂâi Jesub ge ǁnā tsēs ai a ǃnaehe ti. Xawe Kresmis ge ama tama ǀgoreǀîs ǀkha a ǃkhōǀhaosa. Encyclopedias ge ra ǁguiǃā Romeǁîn ge  sores ǃnaesa 25 Desember gere tsēdīsa. Kerkegu ǂgaeǂgui-aogu ge gere ǂhâba în ǂgui ǀūbena Xristeǁî kai, Jesub ge 25 Desember ǃnaehe tama i xawen ge ge mîǁgui în ǁnā ǁkhâb tsēs ai Jesub di ǃnaesa tsēdī. (Lukab 2:8-12) Jesub ti ǁkhāǁkhāsabegu ge Kresmisa ge tsēdī tama hâ i. ǀGui ǁnaeǁgaus ǂkhanis ge re ǁguiǃā 200 kurigu Jesub ǃnaes khaoǃgâ, “o i ge ǀgui khoe-i tsîna ge ǀū i tsî ǀoro khoen ge Jesub ge ǃnaehe ǁaeb xa ǁae tama ge hâ i.” (Sacred Origins of Profound Things) Kresmis ge kaidisidi kurigu Jesub ge ǀhomǃgapas khaoǃgâ ge dīhe tsoatsoa.

7. Tae-i ǃaroman ama Xristeǁîna Kresmisa tsēdī tama hâ?

⁷ ǂGui khoen ge Kresmis ǀūben ǀkha ge a tsoatsoasa a ǂan tsî ǁîn ǃhaoǃnābe xūn ǁâudīgu tsî ǀkhaexūna māgus tsîn hoana. Aiǁgause, Englandi tsî Amerikab ǃhūǃâgu ǃnâ i ge ge ǂkhāsa i Kresmis tsēdīsa ǀūben tsoatsoasa i ge ūhâ i amaga. Khoe-i hîna ǁnā tsēsa gere tsēdīn ge gere ǁkharahe. Xawen ge khoena ǁkhawa Kresmisa ge tsēdī tsoatsoa. Tae-i ǃaroman ama Xristeǁîna Kresmisa tsēdī tama hâ? Eloban ra ǂkhîǂkhî ǂgao amaga xūn hoan ǃnâ.

8, 9. Tae-i ǃaroman ge ǂgurokamǁaeb di Xristeǁîna ǃnaetsēde ge tsēdī tama hâ î?

⁸ ǀNî hâ ǂanǂansa ǁâudīb ǂgui khoen ra tsēdīb ge ǁîn ǃnaetsēsa. Xristeǁîna ǃnaetsēde nî ǁâudī? ǃNaetsēdi ǁâudīb Elobmîs ǃnâ xoamâisa ra ge khoen hîna ge Jehovaba ǀgoreǀî tama hâ în dina. (Genesis 40:20; Markub 6:21) ǃNaetsēde tsēdīs ǃnâ-ū gu ge ama tama eloga ǃgôasiba gere māhe. ǁNā-amagan ge ǂgurokamǁaeb  Xristeǁîna “ǃnaetsēdi ǁâudība ǀūben ǁnaetigu ase gere mû.”—The World Book Encyclopedia.

⁹ ǀOrokamǁaeb Romeǁîn tsî Grikeǁîn tsîn ge gere ǂgom gaga i mâ khoe-i hoa-i hîna ra ǃnaehe i tawa ra hâsa tsî ǁnā gagas ge nē khoe-e ǁî-i di ûib ǃnâ ra kēǃgâ. “Nē gagab ge ǃgaidīb ǃgaeǀhaosa ge ūhâ i,elo-i ǁnā khoe-i gere ǃnae tsēs ai ge ǁî-i tsîna a ǃnae i ǀkha,” dis ge ǂkhanis The Lore of Birthdays di ǀon hâsa ra ǁguiǃā.

10. Tae-i ǃaroman Xristeǁîna ǃnaetsēde tsēdī tama hâ?

¹⁰ ǂÂi i du ra Jehovab ǁâudīgu hîna ǂhumi eloǃoabadi ǀkha ǃkhōǀhaosa di ǃnâ ǃgâiǃgâibasensa ūhâsa? (Jesajab 65:11, 12) Tātsēs tsîna. ǁNā-amaga da ge ǃnaetsēde tsēdī tama hâ tamas ka io mâiǂuistsēdi hîna ǂhumi eloǃoabadi ǀkha a ǃkhōǀhaosa ǁâudī tama.

11. Tae-i ǃaroman ǀnî khoena ra tsēdī? Tae-e sadu nî kaise ǂhâǂhâsaba?

¹¹ ǀNî khoen ge a ǂan Kresmis ǀūben tsoatsoasa ūhâsa tsî ǀnî sâtsēdi tsîna, xawen ge noxoba ǁîde ra ǁâudī. ǁÎn ge re tsâ sâtsēdi ǁaegu a ǃgâisa ǁîn ǀaokhoena sarisa. Sadu tsîna di ra tsâ? Tsū tama i ge hâ sadu ǀaokhoena sarisa. Jehovab ge omaris di ǂnûiǂgā-aoba tsî ǁîb ge ra ǂhâba in omaris ǁanina ǃgâi ǃgaeǁaena ūhâ. (Efeseǁîn 3:14, 15) Xawe Jehovab ǀkha ǃgâi ǃgaeǁaesa omkhâis ge a ǂhabasa, sada di ǀaokhoena ǂkhîǂkhî ǂgaos ǂamai ǂhumi eloǃobadi ai a ǃgaoǃgao sâtsēde tsēdīs xa. ǁNā-amagab ge apostel Pauluba ge mî: “Î du ǃâitsâ, mâ xū-i a ǃKhūba ǃgâibas.”—Efeseǁîn 5:10.

12. Tae-e a ǃaroma ǁkhā îb Jehovaba tā sâtsēde ūǃoa?

¹² ǂGui khoen ge ra tsâ sâtsēdi di tsoatsoas amabes  ǃnâ ǂhâǂhâsa tama hâsa xawe Jehovab ge di tsâ tama hâ. ǁÎb ge sâtsēdi hîna ǂhumi eloǃoabade xu ra hāgu ǃnâ ǃgâiǃgâibasen-e ūhâ tama hâ. Aiǁgause, Egypteǁîn ge ǂgui ǁâudīga ge ūhâ i ǁîn ǂhumi elogu ǃaroma. Israelǁaes ge Egypteǃhūba xu a ǃnoraǃnorahe o, on ge ǁîna ǀūben ǁâudīga ‘ǃKhūb [“Jehovab,” NW] di kaitsēs’ di ge ǂgai. Xawe Jehovab ge ǁîna ge a ǁkhara ǁnā ǃkhais ǃaroma. (Eksodus 32:2-10) Kēbo-aob Jesajab ge mî khamai “Tā du ǀurixa xū-e tsâǀkhā.”—Khomai re Jesajab 52:11.

13. Tae ǃnôa dîna du a ūhâ ǁkhā sâtsēde du ga tsēdī ǀû o?

¹³ Sadu ga ra mîǁgui o, sâtsēde tsēdīsa ǀûsa, o du ge ǀnîsi ǂgui dîna nî ūhâ. Aiǁgause: Tae-e danî dī ti sîsenǁae-aon ga dî te o, tae-i ǃaroma du ǁîn ǀkha Kresmisa tsēdī tama hâsa? Tae-e ta nî dī khoe-i ga ra Kresmis ǀkhaexūna mā te o? Tae-e ta nî dī ǃgame ta hâ khoe-i ga ra ǂgaoǀkhā o, î ta sâtsēde tsēdī? Mati ta ti ǀgôana a hui ǁkhā în tā tsūse tsâ sâtsēdi tsî ǃnaetsēdi tsînan ga ǁâudī tama io?

14, 15. Tae-e du nî dī khoe-i ga ǃgâiǃgâxa sâǁaeba ǁkhoreba du o, tamas ka io ǀkhaexū-e mā duǂgao o?

¹⁴ ǂHâǂhâsa i ge a sada ǁnâuǃāba sîsenūsa, î da ǂan tae-e da nî mâ mâsib hoab ǃnâ mîsa. Aiǁgause, khoen ga ǃgâiǃgâxa sâǁaeba ǁkhoreba duo, o i ge ǂhâbasa tama hâ ǁîna ǃharaxūsa. Sadu ge ǀguiǃgubuse “gangans” ti a mî ǁkhā. Xawe ǀni mâsigu ǃnâ i ga ra khoe-e ǃnāsase ǂan ǂgao o, o du ge ǁî-e mîǃāba ǁkhā tae-i ǃaroma du sâtsēsa tsēdī tama hâsa. Xawe hoaǁae khoexaǃnâ, ǃgâi ǀgaub ai tsî ǃgôasib ǀkha ǁnāsa dī re. Elobmîs ge ra mî: “As mîs âdo mâ ǁaeb hoab ai ǀnamǀnamsase ī,  ǂō-i ǀkha tsoro-aihe hâse, ǂan du nîga, mati du nî mâ-i hoa-e ǃereamsa.” (Koloseǁîn 4:6) ǀNîsi du ge a mîǃā ǁkhā ǃgâiǃgâibasensa du ūhâsa nau khoen ǀkha hâǁaesa tsî ǀkhaexūna mās tsîn ǃnâ xawe du ge ge ǁhûibasen ǁnāsa du sâǁaeb ai dī tidesa.

¹⁵ Tae-e du nî dī khoe-i ga ǀkhaexū-e mā du o? Elobmîs ge ǁgaraga mā tama hâ xawes ge ra mî î da ǃgâi ǂâisa ūhâ. (1 Timoteub 1:18, 19) ǀNîsi i ge khoe-i hîna ǀkhaexū-e ra mā du-e a ǀū, sadu sâtsēsa tsēsdī tama hâsa. Tamas ka io ǁî-i ge a mî ǁkhā, “ǂan da ge a sâtsēsa du tsēdī tama hâsa xawe ta ge noxoba nē ǀkhaexūna ra mā du ǂgao.” Mâ ga hâ mâsib hoab ǃnâts ge satsa nî mîǁgui ǁnā ǀkhaexūna ūǃoasa tamas ka io ū du tidesa. Xawe mâ mîǁguib hoab gas ǃnâ ǂâis ǃnâ ūhâ re ǃgâi ǂâisa ūhâsa. Xū-e da ge dī ǂgao tama hâ sada Jehovab ǀkha ūhâ ǃgaeǁaesa nî ǁgaiǁgai-e.

16. Tae-e du nî dī sadu omaris ǁanin ga ra ǂhâba o, î du sâtsēde tsēdī?

¹⁶ Tae-e du nî dī sadu omaris ga sâtsēde tsēdī ǂgao o? ǂHâbasa tama i ge a hâ ǁîn ǀkha ǂnoagusa. ǂÂis ǃnâ ūhâ re ǁîn ge aitsama a mîǁguibasen ǁkhā tae-en ra dī ǂgaosa. Khoexaǃnâ tsî ǃgôasiba ǁîn mîǁguiga ūhâba re, sadu nî sîsenūhe ǂgao khami ǁîna sîsenū re ǃgôasib ǀkha. (Khomai re Mateub 7:12.) Xawe sadu omaris ǁanin ga ra ǂhâba o, î du sâtsēdi ǁaeb ai ǁîn ǀkha hâ, tae-e du nî dī? Xū-e dunî dīs aiǃâ ǀgore re Jehovab ǃoa îb hui du î du ǃgâi mîǁguiba dī. Hoaraga mâsib xa ǂâi re tsî ôaǃnâ sîsenna dī re ǁî-i xa. ǂÂis ǃnâ ūhâ re hoaǁae Jehovaba ǂkhîǂkhî ǂgaosa.

17. Mati du sadu ǀgôana a hui ǁkhā nau khoen ga sâtsēde tsēdī o în tā ǀguri tsâsen?

 ¹⁷ Tae-e du a dī ǁkhā sadu ǀgôana huisa mûn ga ra o, naun sâtsēde ra tsēsdīsa o? ǁAeba xu ǁaeb ǀkha ǀō-aisa xūrona sadu ǀgôana dīb re. ǁÎna du ge ǂgom taman hâ hîna ǀkhaexūna a mā ǁkhā. Tsî sado ǀgôana du a mā ǁkhā ǂoaǂamsa ǀkhaeb ge sadu ǁaeb tsî ǀnammi tsîkha.

18. Tae-i ǃaroma da Xristeǁî ǀhaode nî hâǃnâ?

¹⁸ Jehovaba ǂkhîǂkhî ǂgaos ǃaroma da ge ǂhumi eloǃoabadi ǁnaetigu tsî ǁîn ǀkha ǃkhōǀhaosa ūhâ sâtsēde xu nî ǂgōsen. Xawe da ge ama ǀgoreǀîs ǀgauba nî sîsenǂui. Mati? ǀGui ǀgaub ge hoaǁae Xristeǁîn ǀhaode hâǃnâsa. (Khomai re Hebreǁîn 10:24, 25.) ǀHaodi ge kaise a ǂhâǂhâsa ǃâga ama ǀgoreǀîs diga. (Psalmdi 22:22; 122:1) ǂKhâǃnâgu da ge ra ǀhaodi tawa.—Romeǁîn 1:12.

19. Tae-i ǃaroma i a ǂhâǂhâsa khoena Elobmîs amaba mîbasa?

¹⁹ ǀNî hâ ǀgaub ama ǀgoreǀîs dib ge Elobmîsa xu da ra ǁkhāǁkhāsen xūna khoena mîbasa. ǂGui khoen ge ǃhūbaib ai ra ī ǁgai xūn xa ra tsûaǂgao kaihe. ǀNîsi du ge khoe-e a ǂan di ra tsâ-e. ǁGamba nî re sadu buruxa ǃâubasens hānîǁaeb dis xa. Xristeǁî ǀhaode du ga ra hâǃnâ tsî khoena Elobmîs amaba mîba khami du ge nî hōǃâ turaba du ūhâ tama hâsa ǂhumi eloǃoabadi tsî ǁîs ǁnaetigu tsîn ǃnâ. Mâ hâ ǃkhais ge sadu ge nî ǂkhîba ūhâ tsî Jehovab ge kaise nî ǀkhae du sadu ǁguiǂgāsens ǃaroma ǁîba du ra ǂhanu ǀgaub ai ǀgoreǀî ǃkhais ǃaroma.—Maleaxib 3:10.