1. Elob di ǂâibasensa a tae khoen ǀkha?

ELOB ge buruxa ǂâibasensa ūhâ khoen ǃaroma. ǁÎb ge ǂguro aob tsî taras, Adammi tsî Evas tsîna ge kuru î ra îsa ǃhanab ǃnâ ǁan. ǁÎb ge ge ǂâibasen hâ i î ra ǀgôana hō, în hoaraga ǃhūbaiba paradais ǃnâ khoraǂui tsî ǀguruna kēǃgâ.—Genesis 1:28; 2:8, 9, 15; 6ǁî ǀArosa ǃgāsasiba mû re.

2. (a) Mati da a ǂan Elob nî ǁîb ǂâibasen hâna dīsa? (b) Elobmîsa tae-e ra mî ǀamose ûis xa?

² ǂÂi î du ra paradais ǃnâ da ǁkhawa nî hâ di? Jehovab ge ra mîba da: “Tita ge ǁîsa ge ǂnubi, tita ge ǁîsa ǁkhāti nîra dī.” (Jesajab 46:9-11; 55:11) Î, ǁîb ǂâibasen hâ-eb ge nî dī tsî xū-i ge ǁîba ǁkhae tide. Jehovab ge ra mî ǁîb ge ǃaromasa ūhâ ǃhūbaibab ge kurubasa. ǁÎb ge “ǁîba kuru tama, ǀkhaiǃnâseb nî hâga.” (Jesajab 45:18) ǁÎb ge ra ǂhâba în khoena hoaraga ǃhūbaib ai ǁan. Tae ǃnôa khoenab Eloba ra ǂhâba nēpa nî hâna tsî matikō ǁaeba? Elobmîs ge ra mî: “ǂHanu-ain ge ǃhūbaiba nîra ǀumi, tsî ǀamose ǁîb ai nîra ǁan.”—Psalmdi 37:29; ǂHaiǂhais 21:3, 4.

3. Khoen da ǀaesen tsî ra ǁō o tae-e du a dîsen ǁkhā?

³ Xawen ge nētsē khoena ǀaesen tsî ra ǁō. ǂGui ǃhūgu ǃnâ i ge khoena ǃkham tsî ra ǃgamgu. Amases ge nēsa Elob di ǂâibasen tama ge hâ i. Tae-e ge ī tsî tae-i ǃaroma? Elobmîs ǀguis ge nēsa a ǁguiǃā ǁkhā.

4, 5. (a) Ham-e Evas ǀkha ge ǃhoa ǀaob ǃnâ-ū Edenni ǃhanab ǃnâ? (b) Mati i ra hā o i ǂhauǃnâ khoe-e ra ǃnari-ao kai?

⁴ Elobmîs ge ra mîba da Elob khākhoeb “ǁgâuab tsî Satanni ti ra ǂgaiheb” xa. Satanni ge ǀaoba ge sîsenū îb Evas ǀkha ǃhoa Edenni ǃhanab ǃnâ. (ǂHaiǂhais 12:9; Genesis 3:1) ǁÎb ge ge dī i i mûsen ǀaob ta ǃhoa khami.—7ǁÎ ǀArosa ǃgāsasiba mû re.

⁵ Eloba, Satanni hîna ǁGâuab di ra ǂgaihebab ge kuru? Hî-î! ǀHomǃgāb hîna ge Elob ge ǃhūbaiba Adammi tsî Evas tsîna aiǂhomiba o, ǀhommi ǃnâ hâ îb ge ǀkharaǀkharasen tsî ge a ǁGâua kai. (Job 38:4, 7) Matis ge ǁnāsa ī ǁkhā i? Mati i ra hā o i ǂhauǃnâ khoe-e ra ǀkharaǀkharasen tsî ǃnari-ao kai? ǁÎ-i ge ǃnari-ao i ase ǃnaehe tama hâ. Xawe i ge ra tura tamas ka io ǁî-i di tama hâ xū-e ra ǂhâba. ǁÎ-i ga ǁnā xū-i xa ǂâiǀgara o, ob ge nē turaba ra ǀgai. ǁNāpaxūb ga ǃē-e hō o, ob ge ra ǃnari. Ob ge go ǃnari-ao kai.—Khomai re Jakobub 1:13-15; 8ǁî ǀArosa ǃgāsasiba mû re.

6. Matib ge ǀgui ǀhomǃgāba Elob di khākhoe kai?

⁶ Nēs ge ǁnā ǀhomǃgāb ǀkha ge ī. Jehovab ge Adammi tsî Eva hâra kuru toas khaoǃgâb ge ge mî, î ra ǀgôana hō tsî “ǃhūbaiba ǀoaǀoa.” (Genesis 1:27, 28) ǁNā ǀhomǃgāb ge ǀnîsi ge ǂâi, ‘khoen hoan kom ǁîba ǀgoreǀî ǁkhā o Jehovab ose!’ Nēs xab gere ǂâi ga ǂâi khamib ge ǁîb turaba ge ǀgai Jehovab ǀguib anu hâ-e hōsa. ǁNā ǀhomǃgāb ge gere ǂhâba în khoena ǁîba ǀgoreǀî. ǁÎb ge Evasa ǂhumiba tsî ge ǂgaeǂhapu. (Khomai re Genesis 3:1-5.) ǁNās ǀkhab ge ge ǀkharaǀkharasen tsî ge a Satan kai hîna a ǁGâuaba, Elob di khākhoeba.

7. (a) Tae-i ǃaroma ra ge Adammi tsî Eva hâra ǁō? (b) Tae-i ǃaroma da kaira tsî ra ǁō nētsē?

 ⁷ Adammi tsî Evas tsîn ge Satanni di ǂhumiba ge ǂgom tsî ra ge Eloba ge ǁnâuǀnamoǃnâ. (Genesis 2:17; 3:6) ǁÎra ge ǁnâuǀnamoǃnâ o, o ra ge ǁîra Jehovab ǃoa-ai ge ǁore tsî ra ge ǁnās ǀkha ge ǁō, Jehovab ge mî khami. (Genesis 3:17-19) Adammi tsî Evas ǀgôan ge ge ǁore-ao kai tsîn ge ǁîra khami ra ǁō. (Khomai re Romeǁîn 5:12.) Adammi tsî Evas ǀgôan tae-i ǃaroma a ǁore-aosa da ga ǁnâuǃā ǂgao o, o ǂâi re sao ra aiǁgaus xa. ǂÂi re pere-i ra amǃnâhe panni hîna abo hâb xa. ǁNā panni ǃnâ ra amhe peren hoan ge abo hâse nî ǂoaxa panni khami. Adammi ge Eloba ǁnâuǀnamoǃnâ o, ob ge Adamma ge ǁore-ao kai. Hoa da Adammi ǀgôa ǃkhais ǃaroma da ge hoa da “abo” hâ tsî ǁnā-amaga ra ǁore. Tsî hoa da a ǁore-ao amaga da ge kaira tsî ra ǁō.—Romeǁîn 3:23; 9ǁî ǀArosa ǃgāsasiba mû re.

8, 9. (a) Satanna tae-e Adammi tsî Evas tsîn nî ǂgomsa gere ǂhâba? (b) Tae-i ǃaromab ge Jehovaba mâǃoa-aona ǃkhais ai ǃgam tama hâ i?

⁸ Satanni ge mâǃoasa ge tsoatsoa Jehovab ǃoagu, Adammi tsî Evas tsînab ge Elob ǃoagu a ǁore kai amaga. ǁÎb ge gere ǂhâba Adammi tsî Evas tsîn nî ǂgomsa Jehovab a ǂhumi-ao tsî a ǁgai ǂgaeǂgui-aosa, ǃgâiba ǁîra xu gere ǃkhō-oaba. Satanni ge gere mî khoen Eloba ǂhâ tama hâsa, Adammi tsî Eva hâra aitsama a mîǁguibasen ǁkhāsa ǂhanu-i tsî tsū-i ǁaegu. Jehovaba tae-e ga dī hâ? ǁÎb ga mâǃoa-aona ga ǃgam hâ o, o i ge nē mâǃoasa ga ǀamǀam hâ. Xawe ǁnāsa ga ǁgau hâ Satanni a ǂhumi-aosa? Hî-î, ti ga ī tama hâ.

⁹ Jehovab ge mâǃoa-aona ǃkhais ai ge ǃgam tama hâ i. ǁÎb ge khoesiba ge mā-am în aitsama ǂgaeǂguisen. Nēs ge nî ǃgāsa kai Satanni a ǂhumi-ao ǃkhaisa tsî  Jehovab ǀguib a ǂansa tae-i khoena a ǃgâibasa. Disiǀguiǀāǁî danaǃâs ǃnâ da ge nēs xa ǃnāsase nî ǁkhāǁkhāsen. Xawe tae-e du ra ǂâi Adammi tsî Eva hâra ge dī xū-i xa? ǁÎra ǂhanu i ra ge i Satanna ǂgomsa tsî Eloba ǁnâuǀnamoǃnâsa? Jehovab ge Adammi tsî Eva hâra xūn hoana ge mā ǁîra ge ūhâ îna. ǁÎb ge ǁîra dīǀoaǀoasa ûib, îsa  ǁan ǃkhaib tsî ǁkhoaxa sîsenni tsîna ge mā. Xawe Satanni ge tātsēs tsîna ǁîra ǃgâi xū-e ge mā tama hâ i. Sadu ga ǁnā ǃhanab ǃnâ hâhâ o, tae-e du ga dī hâ?

10. Tae ǂhâǂhâsa mîǁguiga da hoa da nî dī?

¹⁰ Nētsē da ge hoa da ǁkhā mîǁguiba nî dī sada ûib nē mîǁguiba xu ra hâ amaga. Jehovaba da ge sada di ǂGaeǂgui-aob ase a ǁhûi ǁkhā tsî da ge a hui ǁkhā ǁgausa Satanni a ǂhumi-aosa. Tamas ka io da ge Satanna sada di ǂgaeǂgui-aose a ǁhûi ǁkhā. (Psalmdi 73:28; khomai re ǂKhoamîdi 27:11.) Kaise ǀoro khoen ge Eloba ǃhūbaib ai ra ǁnâuǀnam. Elob ge ǃhūbaib di ǂgaeǂgui-ao tama hâ. Xawe Elo tamab ga io, ham-e?

11, 12. (a) Tae-e da ra ǁkhāǁkhāsen Satanni ge Jesuba gere mā ǂgao ǃhūbaib gaosib xa? (b) Mâ xoade ra ǁgau Satanni a nē ǃhūbaib di ǂgaeǂgui-aosa?

¹¹ Jesub ge ge ǂan i ham-i amabes ǃnâ ǃhūbaiba ra ǂgaeǂguisa. ǀGui ǁaxasib aib ge Satanna “hoa gaosigu ǃhūbaib diga ge ǁgau bi ǁîgu ǂkhaisib ǀkha.” Satanni ge Jesuba ge mîmâiba: “Nēn hoana ta nî mā tsi, ǁnāǁgoe tsîts ga tita ǀgoreǀîo.” (Mateub 4:8, 9; Lukab 4:5, 6) Dîsen re aitsama, ‘nē gaosigu ga Satanni ti tama hâ o, mati i iob Jesuba ǁîga ra mā ǂgao?’ Hî-î. Hoa gaosigu ge a Satanni ti.

¹² Sadu ge ǀnîsi a buru ǁkhā: ‘Mati i iob Satanna nē ǃhūbaib di ǂgaeǂgui-ao? Jehova tamaba ǀhommi tsî ǃhūbaib tsîkha ge kuruba, Hoaǀgaixa Eloba?’ (ǂHaiǂhais 4:11) Î, xaweb ge Jesuba ǃgāsase Satanni ǃoa ge mî ǁîb a “ǂamsab [“ǂgaeǂgui-ao,” NW] nē ǃhūbaib” diba. (Johaneb 12:31; 14:30; 16:11) Apostel Paulub ge Satanni hîna a ǁGâuaba ‘nē ǃhūbaib di elob’ di ge ǂgai. (2 Korinteǁîn 4:3, 4) Tsî apostel Johaneb ge ge xoa “ǃhūbaib  hoaragab ǂkhabab [“ǁGâuab,” NW] ǃnâ ǁgoesa.”—1 Johaneb 5:19.

13. Tae-i ǃaroma da ǀasa ǃhūbaiba ǂhâ hâ?

¹³ Nē ǃhūbaib ge ǁgaiǂoas ǀguisa ra dī. Toroga da ge ra mû, ǁgaoǁgaosib, gāxaǃnâsib tsî ǂkhabadīb ge hoaba sada ǂnamipe hâ. Khoen ge nē ǃgomsiga xu a ǃnora kaisen ǁoa, matikōsen ga ǃgarisase dītsâ xawe. Elob ge ǀgūǁae nē eloxoresa ǃhūbaiba nî dīkākā Armagedons torob ǀkha tsî ǂhanu-ai ǀasa ǃhūbaib ǀkha nî ǃkhōǃkhuni.—ǂHaiǂhais 16:14-16; 10ǁî ǀArosa ǃgāsasiba mû re.

14. Ham-eb ge Eloba Gao-aose ǁhûi ǁîb di ǀhomsi Gaosib ǃaroma? Elobmîsa tae-e ge kēbo Jesub xa?

¹⁴ Jehovab ge Jesub Xristuba Gao-aose ge ǁhûi ǁîb di ǀhomsi ǂhanub tamas ka io Gaosib diba. ǀOadisidi kurigu ǃkharu hâses ge Elobmîsa ge kēbo Jesub nî “ǂKhîb Gao-aob” ase ǂgaeǂguisa tsî ǁîb ǂhanub ge tātsēs tsîna ǀam-e ūhâ tide. (Jesajab 9:5, 6) Jesub ge ǁîb di saosabena ge ǁkhāǁkhā în ǁîb ǂhanuba ǀgoreba mîb ge o: “Sa gaosiba ab hā re. Sa ǂâisa as ī, ǀhommi ǃnâs ra īs ǁkhās khami ǁnāti ǃhūbaib on ai.” (Mateub 6:10) ǁKhaisaǁî danaǃâs ǃnâ da ge nî ǁkhāǁkhāsen matib Elob Gaosiba ǃhūbaib di ǂhanuga nî ǃkhōǃkhuni ǀgausa. (Khomai re Danieli 2:44.) ǁNāpaxūb ge Elob Gaosiba ǃhūbaiba îsa paradais ǃnâ nî ǀkharaǀkhara.—11ǁÎ ǀArosa ǃgāsasiba mû re.

15. “ǀAsa ǃhūbaiba” a tae?

¹⁵ Elobmîs ge ra mîmâi: “ǀAsa ǀhommi tsî ǀasa ǃhūbaib tsîkha, ǂhanu-aisib ǁanǃnâ hâkha ra ǃâubasen.” (2 Petrub 3:13; Jesajab 65:17) ǀNî ǁaegu ais ga Elobmîsa “ǃhūbaib” xa ǃhoa o, os ge khoen hîna ǃhūbaib ai hân xa ra ǃhoa. (Genesis 11:1) ǂHanu-ai “ǀasa ǃhūbaib” ge  hoa khoen hîna Eloba ra ǁnâuǀnam ân ǃoa ra ǁnaeǁgau tsî ǁîb xa ra ǀkhaehe.

16. Tae-i buruxa ǀkhaebab Eloba ǁnān hîna ǁîb di ǀasa ǃhūbaib ai nî hâna nî mā tsî tae-e da nî dī ǁnā ǀkhaeba da ga hō ǂgao o?

¹⁶ Jesub ge ge mîmâi ǁnān hîna Elob di ǀasa ǃhūbaib ǃnâ nî hân ge “ǀamo ûiba” nî māhe. (Markub 10:30) Tae-e da nî dī î da nē ǀkhaeba ǃkhōǃoa? Toxoba khomai re Johaneb 3:16 tsî 17:3 tsîna i ǃereamsa hō. Hā re î da kē Elobmîs tae-e ra mîsa ûib Paradais ǃhūbaib ai nî ī ǀgaus xa.

17, 18. Mati da a ǂan ǂkhîb nî ǃhūbaib ǂhabase hâsa tsî da ǃnorasase nî tsâ ǃkhaisa?

¹⁷ Eloxoresasib, torob, tsūdīb tsî ǂkhabadīb tsîn ge hâ tide. ǁNāpa i ge ǀgui eloxoresa khoe-e hâ tide. (Psalmdi 37:10, 11) Elob ge “toroga ra ǀû” kai “ǃhūbaib di ǀams kōse.” (Psalmdi 46:9; Jesajab 2:4) ǃHūbaib ge Eloba a ǀnam tsî ǁîba ra ǁnâuǀnam khoen xas tsîna nî ǀoahe. ǂKhîb ge nî hâ ǀamosib kōse.—Psalmdi 72:7.

¹⁸ Jehovab khoen ge ǃnorasase nî tsâ. Elobmîs di ǁaegu ais ge Israelǁaesa Eloba gere ǁnâuǀnam o, ob ge ǁîna gere sâu tsî ǁkhauba. (Levitikus 25:18, 19) Paradais ǃnâs tsîna da ge xū-i tamas ka io khoe-e ǃao tide. Hoaǁae da ge ǃnorasase nî tsâ!—Khomai re Jesajab 32:18; Mixab 4:4.

19. Tae-i ǃaroma da a mî ǁkhā ǂgui ǂûn nî Elob di ǀasa ǃhūbaib ǃnâ hâsa?

¹⁹ ǂGui ǂûn ge nî hâ. “Tsî i ge ǃhūb ǃnâ ǃnāǂamsi-e nîra hâ, ǃhorob di-e, ǃhomgu di ǀamdi ai.” (Psalmdi 72:16) Jehovab “sida di Eloba ab ǀkhae da,” tsî “ǃhūb ge ǂûn âba ra ūǀkhī.”—Psalmdi 67:6.

20. Mati da a ǂan ǃhūbaib nî paradais ǃnâ ǀkharaǀkharahesa?

²⁰ Hoaraga ǃhūbaib ge paradais ǃnâ nî ǀkharaǀkharahe. Khoen ge îsa omdi tsî ǃhanaga nî ūhâ. (Khomai re Jesajab 65:21-24; ǂHaiǂhais 11:18.) Hoaraga ǃhūbaib  ge Edenni di ǃhanab ge îsa ī khami nî mûsen. Jehovab ge hoaǁae da ǂhâ hâ xūna nî mā da. Elobmîs ge ǁîb xa ra mî: “Sats ge ǃommi âtsa ra khowa, tsî ûitsaman hoana ra ǁâǁâ, sa ǃgâiǃgâibasensa ǃoa.”—Psalmdi 145:16.

21. Mati da a ǂan khoen tsî ǀgurun ǁaegub ǂkhîba nî hâsa?

²¹ ǂKhîb ge nî hâ khoen tsî ǀgurun tsîn ǁaegu. ǀGurun ge khoena tsûtsû tide. ǂKhari ǀgôaron ge ǃnorasase nî tsâ, nētsē a ǁkhōǁkhōsa ǀgurun ǂnamipe.—Khomai re Jesajab 11:6-9; 65:25.

22. Jesuba tae-e ǀaesen hâna nî dība?

²² Khoe-i ge ǀaesen tide. Jesub ge ǃhūbaib ai hâ io, ob ge ǂgui khoena ge gere ǂuruǂuru. (Mateub 9:35; Markub 1:40-42; Johaneb 5:5-9) Xawe Elob Gaosib di Gao-aoseb ge Jesuba hoa khoena nî ǂuruǂuru. ǀGui khoe-i tsîn ge mî tide: “Tita ge ǀaesen hâ.”—Jesajab 33:24; 35:5, 6.

23. Eloba tae-e ǁō hâna nî dība?

²³ ǁŌ hân ge ǁkhawa nî ûi. Elob ge ra mîmâi miliundi ǁō hâ khoenab nî khâisa māsa tsî în ǁîna ǀamosib kōse nî ûisa. “ǁŌ hâna xu khâi-i nîra hâ ti, ǂhanu-ain tsî ǂhanuoǃnân tsîn di-e.”—Khomai re Johaneb 5:28, 29; ǃNaeǃkhaidi 24:15.

24. Mati du ra tsâ Paradais ǃhūbaib ai hâs xa?

²⁴ Hoa da ge mîǁguiga ūhâ. ǁHûi ǁkhā da ge a Jehovab xa ǁkhāǁkhāsensa tsî ǁîba ǀgoreǀîsa tamas ka io da ge ǂgao da ra khami a dī ǁkhā. Jehovaba ǀgoreǀîsa da ga ǁhûi o, o da ge ǁkhoaxase hānîǁaeb ǃnâ nî hâ. ǀGui khoeb ge Jesuba ǂgan o îb ǁîb xa ǂâi ǁîb ǁōb khaoǃgâ, ob ge Jesuba ge mîmâiba bi: “Tita” ǀkhats ge “paradais ǃnâ nîra hâ.” (Lukab 23:43) Hā re î da ǃnāsase Jesub xa ǁkhāǁkhāsen tsî matib nî Elob di buruxa mîmâide ama kai ǀgaus tsîn xa.