1. Ham-e a mîba da ǁkhā mâb a ǂhanu ǀgausa Jehova Eloba ǃoabas diba?

ǃNĀSA eloǃoabadi ge ra mî ǁîdi Elob xa hâ amaba ra ǁkhāǁkhā ti. Xawe ǁnās ge a ī ǁoa, eloǃoabadi ge ǃkharagagu xūna Elob xa ra ǁkhāǁkhā tsî mati da nî ǀgoreǀî bi ǀgaus xas tsîna. Mati da ǂhanu ǀgauba nî ǂanǂui Eloba ǃoabas diba? Jehova Elob ǀguib ge a mîba da ǁkhā mati da ǁîba nî ǃoaba ǀgausa.

2. Mati du ǂhanu ǀgauba a ǂanǂui ǁkhā Eloba ǃoabas diba?

² Elob ge Elobmîsa ge a mā da, î da ǁîsa xu ǁkhāǁkhāsen tsî ǂhanu ǀgauba ǂanǂui ǁîba ǃoabas diba. Elobmîsa ôaǃnâ re, ob ge Jehovaba nî hui du î du mîs di ǁkhāǁkhāsa xu ǀama, ǁîb ra ǃgamse tsâba du amaga.—Jesajab 48:17.

3. Eloba tae-e da nî dīsa ra ǂhâba?

³ ǀNî khoen ge ra mî Elob hoa eloǃoabade ra ūǃoa di xawe Jesub ge ǁnāsa ge ǁkhāǁkhā da tama hâ i. ǁÎb ge ge mî: “Mâ-i hoa-i tama-i: ǃKhūtse, ǃKhūtse ti ra mîǀî te-i ge gaosib ǀhommi dib ǃnâ ǂgâ tide, xawe ti Îb ǀhomigu ǃnâ hâb di ǂâisa ra dī-i ge nî ǂgâ.” ǂHâǂhâsa i ge a î da ǁkhāǁkhāsen tae-i a Elob di ǂâisa tsî ǁîsa dīsa. Nēs ge kaise a ǁkhōǁkhōsa Jesub ge Eloba ǁnâuǀnam tama khoena ǂkhabadī-aon ǀkha gere ǀgopeǀnō o, “ǂkhaba sîsenaodo” dib ge mî o.—Mateub 7:21-23.

4. Jesuba tae-e ge mî Elob di ǂâis xa?

⁴ Jesub ge ge ǃkhâikhom Elob di ǂâisa da ga ra dī ǂgao o, o da ge ǃgom ga nî hōǃâ. ǁÎb ge ge mî: “ǂGâ du  re ǂō dao-ams ǃnâ harab ge ǁāb, tsî ǂhapab ge daob, kāǁōsib ǃoa garuba, tsî ǂguin a ǁîb ai ra ǃgûna xuige. Tsî ǂōs ge dao-ams tsî ǀuib ge daob, ûib ǃoa gauba, tsî ǀoron ge ǁîba ra hōna.” (Mateub 7:13, 14) ǂŌ dao-ams tamas ka io ǂhanu ǃoaba ǀgaub Elob dis ge ǀamo ûib ǃoa ra ǁnaeǁgau. Hara daob tamas ka io ǂhanu tamase Eloba ǃoabas ge ǁōb ǃoa ra ǁnaeǁgau. Xawe Jehovab ge ǂhâba tama hâ khoe-i nî ǁō ǃkhaisa. ǁÎb ge mâ khoe-i hoa-e ǃēsa ra mā ǁîb xa ǁkhāǁkhāsens disa.—2 Petrub 3:9.

5. Mati du Eloba ǂhanu ǀgaub ai ra ǃoaba khoena a ǂanǂui ǁkhā?

⁵ Jesub ge ge mî Eloba ǂhanu ǀgaub ai ra ǃoaba khoena da ge a ǂanǂui ǁkhā. Nēsa da ge ra dī ǁîn tae-e ra ǂgoms tsî dīs tsîna ôaǃnâs ǀkha. ǁÎb ge ge mî: ǁÎn “ǂûn ai du ge nî mûǂan gu.” ǁÎb ge ge ǀaro: Mâ ǃgâi hais hoas ge “ǃgâi ǂûna ra ūǀkhī.” (Mateub 7:16, 17) Nēs ge ǂâibasen tama hâ ǁnān Eloba ra ǃoaban dīǀoaǀoasa kurusa ūhâ ǃkhaisa. Xawe Elob ǀgoreǀî-aon ge hoaǁae ra dītsâ ǂhanu xūna dīsa. Nēsi da ge nî mû tae-i nî hui dasa î da ǂanǂui haman Eloba ǂhanu ǀgaub ai ra ǃoaba ǃkhaisa.

6, 7. Tae-i ǃaromas ama ǃoabasa Elobmîs ai a ǃgaoǃgaosa? Jesub di aiǁgausa tae-e ra ǁkhāǁkhā da?

⁶ ǃOabas Elobmîs ai a ǃgaoǃgaosas. Elobmîs ge ra mî: “Xoas hoas ge Elob xa ǃgomǂgāǃnâhe hâ, tsî a harebe ǁkhāǁkhās ǃoa, tsî ǂgōǀaus ǃoa, tsî ǀkharaǀkharas ǃoa, tsî ǂhanu-aisib ǃnâ kaikais ǃoa; Elob khoe-i nî dīǀoaǀoasaga, î-i mâ ǃgâi sîsenni hoab ǃoa ǁkhā.” (2 Timoteub 3:16, 17) Apostel Paulub ge Xristeǁîn ǃoa ge xoa: “Elob mîs di aoǁnâsa du ge sige xu ǃkhōǃoa ǃnubai du ge khoen di mîs ase ǃkhōǃoa si tama i  tsî (amases ī khami) Elob mîs ase ǃkhōǃoa si ǃkhaisa.” (1 Tesalonikaǁîn 2:13) ǁNā-amaga i ge ama ǃoaba ǀgauba Elobmîs ai ǀgui a ǃgaoǃgaosa. Khoen ǂâi ǀgaub, ǃhaoǃnābe xūn tamas ka io ǀnî hâ xūn ai ǃgaoǃgaosa tama hâ.

⁷ Jesub gere ǁkhāǁkhā xūn hoan ge Elobmîs ai ge ǃgaoǃgaosa i. (Khomai re Johaneb 17:17.) ǁÎb ge Xoade hoaǁae gere ǁguiǃā. (Mateub 4:4, 7, 10) Ama ǃoaba-aon Elob din ge Jesub di aiǁgausa ra sao tsî ǁkhāǁkhān ra xūn hoana Elobmîs ai ra ǃgaoǃgao.

8. Jesuba tae-e ge a ǁkhāǁkhā da Jehovaba ǀgoreǀîs xa?

⁸ Jehovab ǀguiba ǀgoreǀî re. Psalmdi 83:18 ge ra mî: “Sats ǀguits, ǀons âts a ǃKhūts [“Jehovats,” NW] ǀguits, Hoan xa ǀGapisa, ǃhūbaib hoaragab ai.” Jesub ge gere ǂhâba în khoena ǃamkuse ǂan ham-i a ama Elo ǃkhaisa tsî ǁîb ge khoena Elob ǀonsa gere ǁkhāǁkhā. (Khomai re Johaneb 17:6.) Jesub ge ge mî: “ǃKhūb [“Jehovab,” NW] sa Elob ǀguibats ge nî ǀgoreǀî tsî ǁîb ǀguiba ǃoaba.” (Mateub 4:10) ǁNās ǀkhan ge Elob ǃoaba-aona Jesub di aiǁgausa ra sao. ǁÎn ge Jehovab ǀguiba ra ǀgoreǀî, ǁîn ge ǁîb ǀonsa ra sîsenū tsî khoena Elob ǀons xa ra ǁkhāǁkhā tsî ǁîb ǂâis a taes tsîna ra mîba.

9, 10. Mati da ǀnamma ra ǁgaugu?

⁹ Ama ǀnamma khoena ūba hâ. Jesub ge ǁîb di ǁkhāǁkhāsabega ge ǁkhāǁkhā î gu ǀnamgu. (Khomai re Johaneb 13:35.) Xū-i ge hâ tama hâ mapa xu da ra hās, sada di ǃhaoǃnābe khaoǃhūs tamas ka io ǃkhū da kas tsî ǀgâsa da kas hoasa. Sida ra tsâba gu ǀnammi ge ra ǀguiǃnâxa kai da khoeǃgâgun khami. (Koloseǁîn 3:14) ǁNā-amaga da ge torodī tsî khoena sī ǃgam tide. Elobmîs ge ra mî: “Nēs ǃnân ge Elob ôan tsî ǁgâuab ôan tsîna  a ǂhaisa. ǂHanu-aisiba dī tama-i hoa-i ge Eloba xu hâ tama-e, tsî ǁî-i di ǃgâsaba ǀnam tama-i tsîn.” Elobmîs ge ra ǀaro: “Kainni khami tama, ǂkhababa xu ge hâ ib, tsî ǃgâsab âba ge ǂnauǃanni” ose.—1 Johaneb 3:10-12; 4:20, 21.

¹⁰ Sida ǁaeb, ǀgaib tsî ū da hâ xūn tsîna da ge ra sîsenū î da huigu tsî ǂkhâǃnâgu. (Hebreǁîn 10:24, 25) Sida ge ra “hoana ǃgâidība.”—Galateǁîn 6:10.

11. Tae-i ǃaroma da Jesuba Elob ǃoa garu daob ase ra ūǃoa?

¹¹ Jesuba da ge nî ǁnâuǀnam ǁîb a dao amaga Elob ǃoa. Elobmîs ge ra mî: “ǀNî-i ǃnâs oresa hâ tama hâ, tsî i ǁkhati ǀnî ǀon-e ǀhommi ǃnaga khoena māhe tama hâ, ǁî-i ǃnâ da nî orehe-e.” (ǃNaeǃkhaidi 4:12) Nē ǂkhanis di 5ǁî danaǃâs ǃnâ da ge go ǁkhāǁkhāsen Jehovab ge Jesuba sî ǃkhaisa îb ǁîb ûiba xoremarib ase mā ǁnâuǀnamxa khoen ǃaroma. (Mateub 20:28) Tsî Jehovab ge Jesuba Gao-aob ase ge ǁgaumâi îb ǃhūbaib ǂama ǂgaeǂgui. ǁNā-amagas ge Elobmîsa ra mîba da, î da Jesuba ǁnâuǀnam ǀamosib kōse da ga ra ûi ǂgao o.—Khomai re Johaneb 3:36.

12. Tae-i ǃaroma da ǂgīǂgōsi xūn ǃnâ ǁhao tama hâ?

¹² ǂGīǂgōsi xūn ǃnâ ǁhao tama is. Jesub ge ǂgīǂgōsi xūn ǃnâ ge ǁhao tama hâ i. ǁNâuǃgâheb gere o, ob ge Jesuba Romeǁî ǂgaeǂgui-aob Pilatuba ge mîba: “Ti gaosib ge nē ǃhūbaiba xu hâ tama hâ.” (Khomai re Johaneb 18:36.) Jesub khami da ge a ǂgomǂgomsa ǁkhā Elob di ǀhomsi Gaosib ǃoa-ai, nēs ǃaroma da ge mapa ǀgui da ga hâ xawe ǂgīǂgōsi xūn ǃnâ ǁani tama hâ. Elobmîs ge ra mîba da î da ǁnâuǀnam tsî “ǃnaga hâba ǂamkhoegu” ǀgaiba re, ǁnāgu ge khoesi ǂhanuga. (Romeǁîn 13:1) ǃHūb ǁan ǃnâ da hâb di ǂhanuga  da ge ra ǁnâuǀnam. Xawe khoesi ǂhanugu ga Elob di ǂhanuga mâǃoa o, o da ge apostelga ra sao mî ge ga: “Anu i kom a o, Elob nî khoen ǃgâ-ai ǁnâuǀnamhe ǃkhaisao.”—ǃNaeǃkhaidi 5:29; Markub 12:17.

13. Tae-e da ra aoǁnâ Elob Gaosib xa?

¹³ Elob Gaosib ge hoara hâ ǃereamsa ǃhūbaib ǃgomsiga nî ǀam kaiba. Jesub ge ge mî “ǃgâiǂhôas gaosib dis” ge ǃhūbaib ǂhabase nî aoǁnâhe. (Khomai re Mateub 24:14.) Khoesi ǂhanu-i ge Elob Gaosib nî khoena dība-e dī ǁkhā tide. (Psalmdi 146:3) Jesub ge ge ǁkhāǁkhā da, î da Elob Gaosiba ǀgoreba: “Sa gaosiba ab hā re, sa ǂâisa as ī, ǀhommi ǃnâs ta īs ǁkhās khami ǁnāti ǃhūbaib on ai.” (Mateub 6:10) Elobmîs ge ge kēbo Elob Gaosib hoa khoesi ǂhanuga nî dīkākāsa “xawe ǁîb ge ǀamosib hoab kōse nîra hâhâ.”—Danieli 2:44.

14. Hamna Eloba ǂhanu ǀgaub ai ra ǀgoreǀî?

¹⁴ Nē ǃâroga ôaǃnâs khaoǃgâ, dîsen re: ‘Hamna ǁîn ǁkhāǁkhāsa Elobmîs ai ra ǃgaoǃgao? Hamna khoena Elob ǀons xa ra mîba? Hamna ama ǀnamma ra ǁgaugu tsî ra ǂgom Elob ge Jesuba sî ǃkhaisa îb sada ore hā? Hamna ǂgīǂgōsi xūn ǃnâ ǁhao tama hâ? Hamna ra aoǁnâ Elob Gaosib ǀguib khoen ǃgomsiga nî ǀam kai ǃkhaisa?’ Jehovab di ǀHûǀguitimî-aon ǀguin ge ǁnāsa ra dī.—Jesajab 43:10-12.

15. Tae-e da nî dī îb Eloba sada di ǀgoreǀîsa ūǃoa?

¹⁵ ǂAu tama i ge hâ Elob ǃnâ ǀgui ǂgomsa. Demongu tsîn ge Elob ǃnâ ra ǂgom xawe gu ge ǁîba ǁnâuǀnam tama. (Jakobub 2:19) ǂGao da ga ra o, îb Eloba sada di ǀgoreǀîsa ūǃoa, o da ge ǁîb ǃnâ ǂgoms ǀguisa dī ǂgao tama hâ xawe ǁîb ta mîn tsîna nî dī.

16. Tae-i ǃaroma da ǂhumi eloǃoabade nî ǃharaxū?

 ¹⁶ Elob nî sada ǀgoreǀîsa ūǃoasa da ga ra ǂhâba o, o da ge ǂhumi eloǃoabade nî ǃharaxū. Kēbo-aob Jesajab ge ge mî: “ǁNā-amaga ǁîna xu ǃgûǂoa, î du khaisen.” (Jesajab 52:11; 2 Korinteǁîn 6:17) ǁNā-amaga da ge ǂhumi eloǃoabadi ǀkha dīxū-e ūhâ ǂgao tama hâ.

17, 18. “Babilons kais” sa a tae tsî tae-i ǃaroma i a ǁgariǁgarisa ǁîsa xu ǂoasa?

¹⁷ ǂHumi eloǃoabade a tae? Nēti ge ǂgomde Elobmîs ǃnâ hâ tama xūna ra ǁkhāǁkhāde. Elobmîs ge ǂhumi eloǃoabade “Babilons kais” di ra ǂgai. (ǂHaiǂhais 17:5) Tae-i ǃaroma? Kai ǁgammi dâus khaoǃgâ i ge ǂgui ǂhumi eloǃoabadi ǁkhāǁkhāde Babilons ǃās ǃnâ ge tsoatsoa. ǁNā ama tama ǁkhāǁkhān ge ǃhūbaib hoab ai ge a khoraǂui. Aiǁgause, khoen hîna Babilons ǃnâ ge ǁan hâ în ge ǃnona ǃkharagagu eloga gere ǃoaba. Nētsēs tsînan ge ǂgui eloǃoabade ra ǁkhāǁkhā Elob a ǃnona ǀguira Elosa xawe Elobmîs ge ǃgāsase ra ǁkhāǁkhā ǀgui ama Elob ǀguib hâsa, ǁîb ǀons ge a Jehova tsî ǁîb ǀgôab ge a Jesu. (Johaneb 17:3) Khoen Babilons ǃnâ ge ǁan hâ în tsîn ge gere ǂgom khoe-i ga ra ǁō o, o i ra ûiǃkharu ǃkhaisa tsî ǀnî ǃâ-i ǀamoǀaeb ǃnâ ǂhubi ǃkhaisa. ǁNās ge ama tama.—14ǁÎ, 17ǁî tsî 18ǁî ǀArosa ǃgāsasiba mû re.

¹⁸ Elob ge ge mîmâi hoa ǂhumi eloǃoabadeb nî dīkākā ǃkhaisa ǀgūǁae. (ǂHaiǂhais 18:8) ǁNâuǃā î du ra matikōse i a ǁgariǁgarisa ǃkhaisa ama tama eloǃoabade xu ǂoasa? Jehova Elob ge ra ǂhâba î du ǁnāsa dī ǃonkhao tama i hâ hîna.—ǂHaiǂhais 18:4.

19. Jehovaba ǃoabasa du ga ra mîǁgui o, matib ǁîba nî kēǃgâ du?

¹⁹ ǂHumi eloǃoabade xu du ga ra ǂoa o, tsî Jehovaba  ǃoaba o, on ge sadu di ǀhōsan tamas ka io ǀaokhoena sadu di mîǁguiba ǁnâuǃā tide tsî sadu di ûiba a ǁkhoao kai ǁkhā. Xawe Jehovab ge ǁnāxūǃnâ du tide. Sadu ge nî ǃâ kai ǃhūbaib ǂhabase hâ omaris miliundi khoen disa, amabes ǃnâ a ǀnamgu na tsî du ge ǃâubasensa nî ūhâ ǀamosib kōse Elob di ǀasa ǃhūbaib ǃnâ ǁansa. (Markub 10:28-30) Sadu ǀhōsan tsî ǀaokhoen hîna gere mâǃoa dun Jehovaba du ra ǃoaba ǃkhais ǃaroman ge ǀnîsi Elobmîsa nî ǁkhāǁkhāsen ǂgao.

20. Tae-i ǃaroma i a ǂhâǂhâsa Eloba ǂhanu ǀgaub ai ǃoabasa?

²⁰ ǀGūǁaeb ge Jehovaba eloxoresasiba nî dīkākā tsî ǁîb Gaosib ge ǃhūbaib ǂama nî ǂgaeǂgui. (2 Petrub 3:9, 13) ǁNāb ge nî ǂoaǂamsa ǁae i! ǀGui ǀgaub ǀguib ge nî hâ Eloba ǃoabas diba. Khoen hoan ge Jehovaba ǁîb ta ǂgao ǀgaub ai nî ǃoaba. ǁNā-amaga i ge a ǂhâǂhâsa î du nēsi xū-e dī tsî Eloba ǂhanu ǀgaub ai ǃoaba.