5 Tsî Jesub ge ǂnubis di khoena mû, ob ge ǃhomma ǃoa ge ǂoa tsî ge ǂnû, o î ge ǁîb ǁkhāǁkhāsabena ǁîba ǃoa ge hā. 2 Tsîb ge ge ǁkhāǁkhā nî tsoatsoa mî rase:

3 “ǀKhaehen ge hâ ǁnān hîna Eloban ǂhâhâsa a ǂana, ǀhommi di Gaosib a ǁîn di amaga.

4 “ǀKhaehen ge hâ ǁnān hîna ra ǃoana, ǁkhaeǂgaohen nî amaga.

5 “ǀKhaehen ge hâ ǃgamǃgamsenxa na ǃhūbaiban nî ǀhumi amaga.

6 “ǀKhaehen ge hâ ǁnān hîna ǂhanu xū-e dīs di turaba ūhana, Elob ǁîn di turaga nî ǀoaǀoa amaga.

7 “ǀKhaehen ge ǁnān hîna nauna ra ǀûbana, ǁîn nî ǀûbahe amaga.

8 “ǀKhaehen ge a ǁnān hîna ǃanu ǂgaoba ūhâna, Eloban nî mû amaga.

9 “ǀKhaehen ge hâ ǁnān hîna ǂkhîba ra kuruna, Elob ôan tin nî ǂgaihe amaga.

10 “ǀKhaehen ge hâ ǁnān hîna ǂhanu xū-en da dī amaga ra ǃgôaǃgonhena, Gaosib ǀhommi dib a ǁîn di amaga.

11 “ǀKhaehe du ge hâ khoen ga sado mîǁgaiǁgai, ǃgôaǃgon tsî ǂhumib ǀkha hoa ǁgai xūn xa sadu ǃoagu ǃhoa o, tida ǃaroma. 11 ǃGâiaǂgao re Elob kai mādawa-amsa nî mā du amaga. ǁNāti gu ge sadu aiǃâ ge hâ i kēbo-aogu tsîna gere ǃgôaǃgonhe.

13 “Sadu ge nē ǃhūbaib di ǂōdo, xawe ǂō-i ga ǁkhoaba ǂoaǃnâ, o mati i ǁkhawa nî ǁkhoaǁkhoa-e? ǁÎ-i ge ǁkhawa a sîsenūhe ǁoa, aoǂuihes tsî khoen xa dā-aihes ǀguisa i kom anu hâo.

14 “Nē ǃkhae ǃhūbaib ǃnâ du ge ǃnâ-i khami ī, ǃhommi ai ǂnôa ǃās ge a saûhe ǁoa. 15 Khoen ga ǃamamǀaesa ǃamam on kom ǃores ǃnaka mâi tamao, xawe ǃamǀaekandelari ai ra mâi tsî i ge oms ǃnâ hân hoana ǃnâba ra mā. 16 ǁNās khami sadu di ǃnâba khoen aiǃâ ǃnâ kai re în sadu ǃgâi sîsenga mû tsî sadu ǁûb ǀhommi ǃnâ hâba koa.

17 “Tā ǂâi re ǂhanub tamas ka io kēbo-aogu di mîde ta nî hîkākāse ta ge hā ti. ǁÎna ta nî hîkākāse ta ge hā tama xawe ǁîte ta nî dī ǀoaǀoase. 18 Amase ta ra mîba du, ǀhommi tsî ǃhūbaib tsîkha ge nî ǃgû-ī xawe mîs ǂhanub ǃnâ a xoasas hoas ge nî dīǀoaǀoahe. 19 Khoe-i nē mîmādi ǀgui i xa ǂkhari mîmāsa ga khôa-i tsî nauna ǁnāti dīs xa ga ǁkhāǁkhā-i ge Gaosib ǀhommi dib ǃnâ ūǃoahe tide. Xawe ǁnā-i hîna Elob ǂhanuba sao tsî nauna ǁnāsa ǁnâuǀnamsa ra ǁkhāǁkhā i ge Gaosib ǀhommi dib ǃnâ nî ūǃoahe. 20 Mîba du ta ra sadu ǂgoms ga Moseb ǂhanub di ǁkhāǁkhā-aogu tsî Farisegu dis xa ǃnāsa tama io, o du tātsē Gaosib ǀhommi dib ǃnâ ǂgâ tidesa. a

21 “Sadu ge ǀoro ǁaeb kaikhoen ge mîbahesa ge ǁnâu: ‘ǃGamts ge tide tsî ǃgam ka-i hoa-i ge ǁnâuǃgâ ǃkhaib tawa nî sī-uhe i-ī ǀgoraǃgâhe.’ 22 Xawe da ra mîba du khoe i hîna ǁî-i ǃgâsa-i ǃoagu ǁaixa hâse ra hâ ǀgara i ge ǀgoraǃgâhes ǃaroma ǁnâuǃgâǃkhaiba ǃoa nî ǂgaihe tsî mâ-i hoa-i ǃgâsa-i ǃoa ‘Gâre xūtse’ ti  gam î-i, ge dīkākāhes ǃoagu nî ǀgoraǃgâhe. b

23 “Sa māsats ga altars ǃoa sī-ū tsîts ga ǁnāpa a ǂâihō, sa ǃgâsa-i sats ǀkha ǁaixa hâsa, 24 o sa māsa altars aiǃâ ǁnāxū tsî ǂgurose sa ǃgâsa i ǀkha ǂkhîba sī kuru, î oahā tsî sa māsa hā ǁguiba re.

25 “Khoe-i ga ǁnâuǃgâkhaiba ǃoa ī-u tsi, o ǁî-i ǀkhats garuhâ hîna ǃkhaese ǂkhîba kuru i-ī tā ǀgoraǃgâ-aoba māǁnâ tsi, îb tā ǀgoraǃgâ-aoba ǁnâuǃgâǃkhaib ǃûi-aoba māǁnâ tsî, îts tā ǃkhō-oms ǃnâ aoǂgāhe. 26 Amase ta ra mîba tsi ǁnāpa xuts ge tātsē ǂoa tide hoaraga marisats matare tamas kōse.

27 “ǁNâu du ge ge mîhe i ge o ‘ǃGamebats ge khôa tide.’ 28 Xawe ta tita ra mîba du, mâ khoeb hoab ga tarekhoesa ǃgâi tama turab ǀkha kō, ob ge ǀnâi ǁîb ǂgaob ǃnâ ǁîs ǀkha go ǀai. c 29 Sa mûs ga ǁoreb ǃoa ǂgaeǂhaputsi o, xoroǂuisi ī āxusi. ǃGâi i ge a sa soros di unîǁae-e ǂoaǃnâsa, sa hoaraga soros nî dīkākāhes xa. d 30 Sa ǃommi ga ǁoreb ǃoa ǂgaeǂhapu tsio, ǁhāǁnâbi î aoxū bi. ǃGâi i ge a sa uniǁaende ǂoaǃnâsa, sa hoaraga soros nî Ge·henʹnas ǃnâ dīkakahes xa. e

31 “Mîhe i ge ge: ‘Mâ aob, ǁîb tarasa ra ǀgoraxūb ge ǁîsa ǀgoras ǂkhanisa nî mā. 32 Xawe ta ge ra mîba du, aob ge tā ǁîb tarasa nî ǀgoraxū ǀai tamas ga īo. f ǁÎsab ga ǀgoraxū o, ob ge ra ǃaroma is ǁîsa ǃgammekhôa. Tsî ǀgoraxū-e hâ tarasa ra ǃgammeb hoab ge ra ǃgammekhôa.

33 “Sadu ge ǀoro ǁaeb kaikhoen ge mîbahesa ge ǁnâu: ‘Tāts ge xū-e mîmâi tsî dī tama nî ī.’ Jehovabats mîmâiba hâ xūn hoanats ge nî dī.” 34 Xawe ta ra mîba du: Hoaragase du nū tidesa, ǀhommi tawas gas, ǀhommi ǃnâb Eloba ǁîb trons ai ǂnôa xui-ao. 35 Tā ǃhūbaib ais tsîna nū, Elob di ǂaiǃnaose i ī amaga. Tā Jerusalems ais tsîna nū, Jerusalems a kai Gao-aob di amaga. 36 Tā sa ûib ais tsîna nū re, ǀgui ǀû-i tsînats a ǃuriǃuri tamas ka io ǂnūǂnū ǁoa xuige. 37 Xū-e dīsa du ga mîmâi o, dī re tsî du ga xū-e dī tide ti mî, o tā dī re. ǂÂibasen tama du hâ xū-e du ga mî, o du ge ǁGâuaba ra ǁgae.

38 “ǁNâu du ge ge mîhe i ge o: ‘Khoe-i ga nau khoe-i di mûsa tsûtsû, o i ge ǁî-i di mûs tsîna nî tsûtsû-e. Tsî i ga khoe-e nau khoe-i ǁgûba khôa, o i ge ǁî-i ǁgûb tsîna nî khôa-e.’ 39 Xawe ta ge ra mîba du: Tā ǂkhabaxa khoe-e ǃkham ǃoa re. Khoe-i ga amǀkhāb xōs ai ǁaputsi, o naus tsîna mā re. 40 Tsî khoe-i ga ǂhanub ǃoa ī-ū du o, sadu saraba nî ūse o sadu anaǂgāsaraba mā re. 41 ǃEreamsa ūhâ khoe-i ga ǂgaoǀkhā du xū-e dīsa, o ǁî-î ra ǂhâba-i xa ǃnāsase dī re. 42 Khoe-i ga xū-e ǂgan du, o mā re. Khoe-i ga sado xu xū-e ǀhupi, o tā ǂkhā re.

 43 “ǁNâu du ge ge mîhe i ge o: ‘Sa ǀgūkhoebats ge nî ǀnam tsîts ge tsûtsû tsi ǂgaora khoeba nî ǃhui’ ti. 44 Xawe ta ge ra mîba du: Sado ra tsûtsûǂgao khoena du ge nî ǀnam tsî du ge ǁgaise ra hâ-ū du na nî ǀgoreba. 45 Nēna du ga dī, o du ge nî ǁgau sadu Îb ǀhommi ǃnâ hâba du ra ǁgaesa. ǁĪb soresab ge ǁgai tsî ǃgâi khoen ai ra ǁhai kai tsîb ge ǀanuba ǁgai xūna ra dīn tsî ǃgâi xūna ra dīn ai ǀguitikōse ra ǀapi kai. 46 Sats a ǀnam khoen ǀguinats ga ǀnam, ots tae-i ǃaroma nî madawa-amheba? ǁGui-aimariǃkhōǃoa-aogu tsîn ge ǁnāti ra dī. 47 Tsîts ga sa ǃgâsan ǀguina tawede, ots tae-i ǃgâi xū-e ra dī? Nau ǃhaon khoen tsîna ǁkhā xū-e dī tama? 48 Sadu ǀhommsi ǁGûb ǀoasa ǀnamma ra ǁgau khami, du ge sadu tsîna ǀoasa ǀnamma nî ǁgau.

6 “ǂAnbasen re, î du tā ǃgâi xūna naun khoen xa du nî mûhe ga ǀgui dī. ǁNāti du ga dī o du ge sadu ǀhomsi ǁGûb xa mādawa-amhe tide. 2 ǃGâi xūna du ga dī, o tā hoa khoena ǂanǂan re, g trompet-e ra ǃnâi khoe-i khami. ǁNā-i ge ǀgam aixa khoen ta dī xū-e, ǁîn di ǃoaba ǃkhaigu ǃnâ tsî ǃgangu ǃnâ. Khoen xan nî koa-e amagan ge nēsa ra dī. ǁÎn ge ǃgôasiba ǀnai madawa-ams ase hō hâ. 3 Xawe du ga nau khoena ǃgâi dī o, tā nau khoena mîba dī du ge xūn xa. 4 Dī du ra ǃgâi xūna du ge ǂganǃgâsib ǃnâ nî dī, ob ge sadu Îb hoa xūna ra mûba nî mādawa-am du.

5 “Tsî ǀgore du ka, o tā ǀgamaixa khoen khami tanisen, ǀgoregu ga o gu ge hoa khoen xa gu ni mûhe ǃkhain tawa ra mâ. Amase ta ra mîba du, ǁîn ge nē ǃgôasib ǀguiba nî mādawa-amhe. 6 Xawe ǀgorets ka, o sa kamers ǃnâ ǀguri ǂgâ, î dao-amsa ǂganam tsî sa Îba ǃoa ǀgore. Khoe-i xab ge a mûhe ǁoa xaweb ge ǁîba hoa xūna ra mû tsîb ge ǁîba nî mādawa-am tsi. 7 ǀGorets ka o, tā ǁkhā xūna mî ga mîre, ǁnā î ge Eloban nî ǃoaba ǀgauban a ǀū khoen ra dī xū-e. ǁÎn ge ra ǂâi Elob xan nî ǃgâ-e ti, gaixusen ra ǀgore amaga. 8 Tā ǁîn khami ī. Sadu Îb ge a ǂgan tae-e du ǂhâ hâsa ǂgan du nîs aiǃâ.

9 “Nē ǀgaub ǃnâ du ge nî ǀgore:

“‘Sida Îtse ǀhommi ǃnâ hâtse, ǀgore da ge ra în khoena sa ǀonsa ǃgôasiba ūhâba. h 10 ǀGore da ge ra, ab sa Gaosiba hā re. Sa ǂâisa as ī re ǀhommi ǃnâs ra ī ǁkhās khami, ǁnāti ǃhūbaib ais tsîna. i 11 Toxoba nētsēs pere-e māda re; 12 tsî ǀûba da re ǁkhā ǀgaub sida ra tsū dīna da ra ǀûbas ǁkhās khami. 13 Tsî toxoba hui da re, ǃâitsâhe da ga o j xawe ǁGâuaba xu ǁkhauba da re.’

14 “Sado ra tsūdī khoena du ga ǀûba, ob ge sadu ǀhommsi ǁGûb tsîna nî ǀûba du. 15 Xawe du ga khoena ǀûba tama io tsūdīn ka, ob ge sadu Îb tsîna ǀûba du tide tsūdī du ga o.

16 “ǂÛtamase hâsa du ga ǁhûi, o tā ǃoa hâ ais ǀkha hâ re, în khoena mû ǂû tama du hâsa ǀgamaixa khoen khami. k ǃOa hân aidi ǀkhan ge ra mâ mâ în nau khoena ǂan ǂû tamase hâsan ǁhûi hâsa. Amase ta ra mîba du, ǁnā mādawa-ams ǀguisan ge nî hō. 17 Tsî ǂû tama īsats ga ǁhûi, o oli-e sa danas ai ǂkhau tsî sa aisa ǁā re. 18 ǁNāti du ga dī on ge khoena nî ǀū ǂûtamase du hâsa. Sadu ǀhomsi ǁGûb ǀguib ge nî ǂan tae-e du ra dīsa, Ob ge sa ǀhommsi ǁGûb hoa xūna ra mûba nî madawa-amsti.

19 “Tā ǃgarise sîsen î du ǃhūbaib ai  marisi xūn tamas ka io ǃkhūsisa ǀhaoǀhaobasen, xoxoron tsî rusib tsîn ge ǁnā xūna ūbe ǁkhā. Tsî ǃnari-aon ge khôaǂgâ tsî a ǃnarini ǁkhā. 20 ǃGarise sîsen tsî xūna dī Elob ǀhommi ǃnâ hâb ra ǃgôaǃgâna. Xoxoron tsî rusib tsîn ge a dīkākā nî ǁoa. Tsî ǃnari-aon tsîn ge khôaǂgâ tsî ǃnari nî ǁkhā tide. 21 Sats ra ǀgapiǃgôa xū-i hoa xats hoaǁae nî ǂâi amaga.

22 “Sa mûn ge sa sorosa ǃnâb ase ība. Sa mûs ga ǃgāsase mû os ge soros hoaragasa ǃnâba nî ūhâ. 23 Xawes ga sa mûsa surixa l, os ge sa soros hoaragasa nî ǃkhae. Kaise i ge nî ǁgai sa soros ǃnâ hâ ǃnâb ga ra ǃkhae o.

24 “Khoe-i xare i ge ǀgam ǀhonkhoega a sîsenba ǁoa, ǁîb ga ǀguiba ǀnam, ob ge nauba nî ǃhui tamas ka iob ga ǀguib ǃoagu ǂgomǂgomsa ob ge nauba ǃgôasiba ūhâba tide. Elob tsî ǃkhūsis tsînats ge a ǃoaba ǁoa.

25 “ǁNā-amaga ta ra mîba du: Tā sadu ûib, tae-e du nî ǂûs tsî tae-e du nî ās xa ǂâiǂhansen. Tae-e du nî anas xas tsîna ǂâiǂhansen ǀû. Sadu ûib ge ǂû-i xa a ǂhâǂhâsa tsî sadu soros ge ana du ra saran xa ǂhâǂhâsa. 26 ǀHomanirona kō re, ǁîn ge ǂûna ǃhana, ǃgao tsî sâu tama hâ, xaweb ge sadu di ǀhomsi ǁGûba ra ǂûmâ ni. Sado nē ǀhomaniron xa ǃnāsase ǂhâǂhâsa tama hâ? 27 Ham-e ǁî-i ûib tawa ǀgui īra a ǀaro ǁkhā ǂâiǂhansen i ga ra o? 28 Tsî tae-i ǃaroma du saran xa ra ǂâiǂhansen? ǁKhāǁkhāsen re ǃgarob ǃnâ ra ǃī hairon tamas ka io blomrona xu. ǁÎn ge ǃgarise sîsen tamas ka io sarana ǂom tama. 29 Xawe ta ra mîba du Salomob tsîn ge ǁîb di ǂkhaisib hoab ǃnâ, nē blomron tamas ka io hairon di ǀgui-i xa ǃnāsase îxase ge anasen tama hâ i. 30 Nēb ge ǀgaub Elob ǃgarob ǃnâ ra ǃī blomna îxase ra kuru ǀgauba, ǀgui tsēs ǀguisa ǃī, saora tsēs ai ǂnâ tsî khoen xa ra ǂhubiǂuihena. ǁÎb ge sado ǃnāsa-e nî dība sadu ǂgoms ga ǂkhabusa xawe. 31 Tā ǂâiǂhansen ‘tare-e du nî ǂû tamas ka io ā tsî anasen ǃkhais xa.’ 32 Eloba a ǀū khoen ge nē xūn xa ra ǂâiǂhansen. Sadu ǀhomsi ǁGûb ge ǀnai a ǂan nē xūn hoana du ǂhâhâsa.

33 “ǂGurose Elob Gaosiba ôa tsî ǁîba ǁnâuǀnam, ob ge Eloba ǂhâ du hâ xūn haona nî mādu. 34 Tā saora tsēs xa ǂâiǂhânsen, saora tsēs ge ǀasa ǂâiǂhansende nî ūhâ. Ma tsēs hoas ǁîs di ǂhânsende ǂâu hâse ūhâ xui-ao.

7 “Tā ǀgoraǃgâ its tā ǀgoraǃgâhe; 2 ǀGoraǃgâts ra khamits ge nî ǀgoraǃgâhe. Tsîts ge khoenats ra hâ-ū khami nî hâ-ūhe. 3 Tare-i ǃaromats sa ǃgâb mûs ǃnâ ǁgoe ǀgâroba ra mûǃā, xawets ge sa mûs ǃnâ hâ kai ǃnaoba mûǃā tama hâ? 4 Tamas ka io, matits sa ǃgâsaba ra mîba: ‘Mā-am te î ta ǀgâba sa mûsa xu ūǂui,’ kai ǃnaob sa mûs ǃnâ hâ hîna? 5 ǀGamaixatse, aibe sa mûs ǃnâ hâ ǃnaoba ūǂui o ǀguits ge ǃgāsase nî mû sa ǃgâb mûs ǃnâ ǁgoe ǀgâroba.

6 “Tā Elob ǃanu xūna ari-i khami ra tanisen-e khoe-e mā, tsî tā sadu ǃanu xūna varkena mā. ǁNāti du ga dī on ge ǁîna nē xūna ǃhūb ǃnâ dāǂgā tsî nî ǁnāǂam du.

7 “Aiǃgû tsî Elob ai ǂhâ du hâ xūna ǂgan re ob ge ǁîba nî mā du. Aiǃgû tsî ǂganbi re, ob ge ǁîba dao-amsa nî ǁkhowa-amba du. 8 ǂGan ra i hoa-i ge nî hō, ôa ra i hoa-i ge nî hō, tsî ǃgubu-am ra i hoa-i ge dao-amde nî ǁkhowa-ambahe. 9 Amase sadu ǀgôab ga ǂû-e ǂgan, o du ge ǀui-e mābi tide. 10 Tamas ka iob ga ǂûb nîse ǁau-e ǂgan, o du ge tātsē ǀao-e mābi tide. 11 O sadu ǀoasa kurusa ūhâ tama du ga  ǂan o, mati du sadu ǀgôana ǃgâi māde nî māsa, mâtikōseb ǁnās ǃgâ-ai sadu ǀhomsi ǁGûba ǂganbi rana ǃgâiba nî mā.

12 “Hoaǁae khoena sadu ra hâ-ūhe ǂgao khami hâ-ū. Nēs ge Moseb ǂhanub tsî kēbo-aon di ǁkhāǁkhāsa.

13 “ǂGō dao-ams ǃnâ ǂgâ, ǂhabab ge daob kāǁōsib tamas ka io hîkākās ǃoa garuba. Tsî ǂguin ge ǁîb ai ra ǃgû ǂhawa i a amaga; tsî ǁîs dao-ams a hara amaga. 14 Xawe dao-ams ǀamo ûiba ǃoa garus ge a ǂō tsî a ǂkhariro tsî ǀoro khoen ǀguin ge nē ûiba ǃoa garu daoba ra hō.

15 “ǂAnbasen re ǂhumi ra khoega xu. ǁÎgu ge ra mî Eloba gu ra ǃoaba ti. Tsū xū-e gu dī tide khami gu ge ra tanisen, gū i khami. Xawe gu ge ǂganaga a ǁaixasa ǃâ ǂhira sado ra tsûtsû ǂgaoga. 16 ǁÎgu ǂûn ai du ge nî ǂan gu. Amase i kom ǁkhūhaisa xu draibena a ǃorahe ǁoao tsî ǀnomaǂûna ǁkhūxa haisa xu. 17 Mâ ǃgâi hai-i hoa-i ge ǃgâi ǂûna ra mā, xawe ǁgai hai-i hoa-i ge ǁgaora ǂûna ra mā. 18 ǃGâi hai-i ǁgaora ǂûna mā ǁoa khami i ge ǁgai hai-e ǃgâi ǂû-e mā ǁoa. 19 Mâ hai-i hoa-i ǃgâi ǂûna tani tama i ge ǁhāǂuihe tsî nî ǂhubiǂuihe. 20 ǁKhā ǀgaub ai i ge ama tama kēbo-aoga ǁîgu di ǂûtanib ai nî mûǃāhe.

21 “Mâ-i hoa-i tida ra ǃoaba ti ra mî-i ge ǀhomsi Gaosib ǃnâ ūǃoahe tide. ǁNān ti ǀhomsi ǁGûba ra ǁnâuǀnaman ǀguin ge nî ūǃoahe. 22 Tsēs ge nî hā ǂguin tita ǃoa nî mîsa: ‘Khutse, Khutse nau khoen ǀkha da ge sats xa gere ǃoa, sa ǀonsa da ge gere sîsenū tsî sa ǀgaib ǀkha da ge ǂkhawa gagana gere ǃhaebē. Buruxa dīna da ge sa ǀgaib ǃnâ gere dī. ǂÂihō tamats hâ?’ 23 O ta ge nî mîba nî: ‘Bē xu te, ǀū du ta a sa ǂkhawadī-aodo.’

24 “Mâ-i hoa-i ti mîde ǁnâu tsî ra ǁnâuǀnam i ge ǁnâuǃāxa aob khami i, ǁîb omsa ǀuib ai ge om a. 25 Tsî kai ǀgaisa ǀapib tsî ǁgamǃāgu ge ǁgôaxa tsî ǀgaisa ǁgaoǂoas ge nē ommi tsî ǂnamipe a ǃgom, xaweb ge ǂkhôahe tama ge i, ǀuib aib ge ǂnubihe hâ i amaga. 26 Xawe mâ-i hoa-i ti mîde ǁnâu tsî ǁnâuǀnam tama i ge ǃereamoǃnâ aob ǁîb oma ge ǃhu-i ai om i khami i. 27 ǀGaisa ǀnanub ga ǀapi tsî i ga dâu tsî ǀgaisa ǂoade ǃgom tsî ǁnā omsa hō, os ge ǁnā omsa nî ǁnā tsî hoase nî hîgāgāhe.”

28 Tsî Jesub ge nēna mî toa on ge khoena ǁîb di ǁkhāǁkhā ǀgaub xa kaise ge buru. 29 ǁÎb ge Eloba xu ra hā ǀgaib ǀkha ǁîna ǁkhāǁkhā amaga, Moseb ǂhanub di ǁkhāǁkhā-aogu khamis ose.