ǀNamsa ǃgâsado:

Elob tsî khoena da a ǀnam amaga da ge ra ǂkhâǃnâhe îda “ǃgûǂoa, tsî hoa ǁaede ǁkhāǁkhāsabedī . . . tsî ǁîna ǁāǁnâ.” (Mat. 28:19, 20; Mrk. 12:28-31) Nēti ī ǀnamma da ga ūhâ o khoen ǃoagu, o da ge ǁnān hîna “ǀamo ûib ǃaroma ǂgamaisana” a hui ǁkhā.—ǃNǃkh. 13:48.

ǃKharuge ǁaeb ǃnâ da ge taena da khoena nî mîbasa gere ǃkhō-mâi tsî ǂkhanîn ǀguina ǁîna gere mā. Xawe nēsi da ge ǁgamǀhaode da ra ūhâ ǀgauba ra ǀāǀā ǂgao. Khoena da ge ǀnamma ra ǁgau ǂgao ǁîn ǃgâiǃgâibasensa ūǃnâ hâ xūn xa ǃhoas ǃnâ-ū. ǁNās ge ra ǂâibasen dawa da ge nî tsî da ge ǃgaoǃgâxase nî ǂâiǃgâ, mâ khoe-i hoa i tae-i ǃnâ ǃgâiǃgâibasensa ūhâsa. Nē ǂkhanîsa mati a hui da ǁkhā, î da ǁnāsa dī?

Nē ǂkhanîs ge 12 ǁkhāǁkhāǃâde ūhâ, ǂhâ da hâ ǀgauga ra ǁgauga î da khoena ǀnamma ǁgau tsî ǁkhāǁkhāsabedī. Mâ ǁkhāǁkhāǃâs hoas ge Elobmîs ǃnaeǃkhaidi ai ǃgaoǃgaosa, Jesub tamas ka io ǃkharuge ǁaeb Xristeǁîn ge ǁgau ǀgaub xa, aoǁna sîsennî ǃnâ. Mî da nî xun ǀguina da ge ǂâiho ǂgao tama hâ xawe da ge ǀgauna ra ôa îda khoena ǀnamma ǁgau. Hoa ǀgaugu ge ǂhâǂhâsa aoǁnâ sîsenni ǃnâ. Xawe da ge ǃgaoǃgâxase ǀnî ǀgaugu ai nî kō. ǃGōsase ǁnā ǀgaugu ǁgamǀhaosa tsoatsoas ǃaroma da ǂhâhâ ga. Tsî ǁkhawa sari di tsî Elobmîs ǁkhāǁkhādi tsîna da ga dī o.

Mâ ǁkhāǁkhāǃâs hoasa du ra ǂâiǃgâ khami, ǂai re mati du nē ǀgauba a ǁgau ǁkhāsa. Khoe-i ǀkha du ga ǃhoa o sadu ra hâ ǀhûhâsib ǃnâ, dītsâ re îdu Jehovab tsî khoen tsîna du ūba hâ ǀnamma ǀgaiǀgai. ǁNā ǀnammi ge nî hui du, îdu mîmâis ǁkhāǁkhāsabedīs diba sīǃnâ.

Kaise ge ge ra ǃgôaǃgâ aiǂhanub, sadu ǀkha ǀguiba sîsens diba. (Sef. 3:9) Ab Jehovaba ǀkhae du, aiǃgû tsî du khoena ǀnam tsîra ǁkhāǁkhāsabedī hîna.