4ǁÎ ǃÂB
ǀHapitsâsens—“ǃAnuǃanu te re ti ǁoreba xu”
“Ti ǀasa sîsenni ge sida di omaris ûiba kaise ge a ǃgâi kai, xawe ta ge tita hoa ǃnôa ǃgâi tama hâ ǁaxasigu ǃnâ ge a ǁhao tsoatsoa. Tita ge mâiǂuis tsēde ge tsēdī tsoatsoa, ǂgīǂgōsi ǁaxasigu ǃnâ gere ǁhao tsî ge kerke ǃgû tsoatsoa. Tita ge 40 kurigu ǀgaiba gagasise ge ǃkhai-i Jehovab di ǀHûǀguitimî-aon di ǀguise. ǂGui ǁaeb ge ǃkharu khami ta ge ge tsâ Jehovab xa ta ǀûbahe tidesa. Tita ge ge tsâ aitsamas tsîna ta a ǀûbasen ǁoa ǃkhaisa. ǁNās ǂamai ta ge amaba ge ǂan i, tsū xūna ta nî dīs aiǃâ.”—Martas.
ǀHAPITSÂSENS ge dīkākā tsi ǁkhā ǃgommi khami ī. “Ti ǀhapidi ge ti danasa ra īǂam,” dib ge Gao-aob Daviba ge a xoa. “ǁÎdi di ǃgommi xa ta ge go dāhe.” (Psalmdi 38:4) ǀNî Xristeǁîn ge ǃnāǂamsase hâ tsûaǂgaob xa ǃkhōǃnamihe hâ, tsî ǂgomǁapo hâ Jehovab ǁîna ǀûba tide ǃkhaisa. (2 Korinteǁîn 2:7) ǁNā ǀamǂoasa ǂhanu-e? ǁKhōǁkhōsa ǁorebats ga dī o, o i ra ǂâibasen Jehovab tātsēs tsîna ǀûba tsi tide ǃkhaisa? Hî-i, ti tamas ge!
“Î da ǁnâi ǂhanuse dī-ūgu”
Jehovab ge ǃhausen hâ ǁore-aona ǁnāxūǃgâ tama hâ. Ama as ge ǁîb ge ǁîna ra hui! Kā hâ ǀgôab di ǂkhōs ǃnâb ge Jesuba, Jehovaba ǀnamxaǃnâ ǁgûb ǀkha ra ǀgopeǀnō ǀgôab hîna ge ǁîb di omarisa ǁnāxū tsî ǁgauoǃnâ ûiba sao tsî gere ûiba. ǁAeb ǀkhab ge ǀgôaba ge mîǁgui îb oaǀkhī omsa ǃoa. “Tsî goroseb ǃnūse hâ, hîab ge ǁgûb âba mû bi, tsî ge ǀkhom bi; ob ge ǃkhoesī tsî ǁnam tsî ge ǁoa bi.” (Lukab 15:11-20) ǁKhorebasents ta Jehovab ǃoa ǀgūsa xawets ge ǀnîsi ra tsâ ǁîba xuts: “ǃnūse hâ” ti? ǁNā ǁgûb Jesub di ǂkhōs ǃnâ hâb khamib ge Jehovaba a ǀkhomxaǃnâ sats ǃaroma. ǁÎb ge ra tura satsa ǁkhoreǁhare oasa.
Xawets ga satsa ǂgom o sa ǁoren kaise a ǁkhōǁkhōsa tamas ka io kaise a ǂgui ǃkhaisa Jehovab xan ǀûbahe ǁoase? Toxoba ǂâi re Jehovab di ǁkhauǂuis Jesajab 1:18 ǃnâ: “‘Hā, î da ǁnâi ǂhanuse dī-ūgu, tib ra ǃKhūba [Jehovaba NW] mî: Sadu di ǁoren ga skarlakǃkhaib khami ǀapa xawen ge tsamaros khami nîra ǃuri.’” Î, ǁoren hîna ra hâhâ nî khami mûsen an skarlakǃkhaib khamin ǃuri sarab ain ge Jehovab di ǀûbas ǃgâ-ai hâ tama.
Jehovab ge ǂgao tama hâ îts ǃgomma tsâ sa ǀhapitsâsens ǃaroma. Matits Eloba xu ra hā ǀûbasa a hōǃâ ǁkhā tsî ǃanu ǃgâi ǂâis tsîna? ǂÂi re ǀgam xūn Gao-aob Davib ge dīn xa. ǂGuroseb ge ge mî: “Tita ge: ǃKhūb [Jehovab NW] ai ta ti ǃûǂamde nî ǁguiǁnā.” (Psalmdi 32:5) ǂÂis ǃnâ ūhâ re Jehovab ge ǀnai ǁkhau tsi hâ îts ǁîba ǀgores ǃnâ-ū ǀgū tsî îts ‘ǁnâi ǂhanu’ ǂhanu ǁîb ǀkha sa ǁhōga. Ūǃoa re ǁnā ǁkhauǂuisa. ǁGuiǁnā re sa ǁorena Jehovab ǃoa tsî sa tsâsiga ǁîb ǀkha ǀgoragu re. Khoeseb ge Daviba ǂgomǁapo hâse ge ǀgore: “ǃAnuǃanu te re ti ǁoreba xu. . . . Khôaǂkhūsa tsî ǃgamǃgamsensa ǂgaobats ge sats Elotsa ǃharaxū tide.”—Psalmdi 51:2, 17.
ǀGamǁîseb ge Daviba Elob xa ǁgaumâisa kēbo-aob Natanna xu huiba ge a ǃkhōǃoa. (2 Samueli 12:13) Nētsēb ge Jehovaba ǀhaohâgu ǃnâ ǀHaohâb ǃûi-aoga ǁgaumâi hâ, ǃhausen hâ ǁore-aona gu nî huise în Jehovab ǀkha ǀhōsa kai ǁkhapa. ǀHaohâb ǃûi-aogu ǃoats ga ī o, o gu ge Xoade nî sîsenū tsî ǂgaob ǃgamsiba xu nî ǀgoreba tsi îb sa ǂgaoba ǃnōmsa, tsî ǀoroǀoro ǃgâi tama ǂâi ǀgauga tsî nî huitsi îts gagasise ǂuru.—Jakobub 5:14-16.
Jehovab ge ra ǂhâba îts ǃanu ǃgâi ǂâisa ūhâ
“ǃGâiǃō i ge hâ ǁnā-i, ǁî-i ǃûǂamsa ǀûbahe hâ-e”
ǂAnǃgâsasets ge ǀnîsi nî tsâ sa ǁorena Jehova Elob tawa sī ǁguiǁnās tsî ǀHaohâb ǃûi-aoga sī mûs ge kaise nî ǃgomba tsi. Davib ǂûb tsîn ge ǁkhā tsâsiba ge ūhâ i. ǁÎb ge ǁaerob ǀgaiba ge “ǃnō” ǁîb ǁoren xa. (Psalmdi 32:3) ǁNās khaoǃgâb ge ge ǀama tsî ǃgôaǃgâ ǁîb di ǁorenab ge ǁguiǁnā tsî ǁîb di daobab ge a ǂhanuǂhanu o.
Davib ge kaise ge a ǀama ǁîb di ǃgâiaǂgaobab ge a hō oa o. ǁÎb ge ge xoa: “ǃGâiǃō i ge hâ ǁnā-i, ǁî-i ǃûǂamsa ǀûbahe hâ-e.” (Psalmdi 32:1) ǁÎb tsîn ge ge ǀgore: “ǃKhūtse [Jehovatse NW], khowa re ti amǁgaukha, os ge ti amsa sa koasa nîra ǂhôa.” (Psalmdi 51:15) ǃNorab ge ge ǁîb di ǀhapitsâsensa xu, tsî Elob di ǀûbasa ge gangan, ǁnās ǀkhab ge Daviba ge a tsâǀkhāhe îb khoena Jehovab xa mîba.
Jehovab ge ra ǂhâba îts ǃanu ǃgâi ǂâisa ūhâ. Tsî ǁîb ge ra ǂhâba îts khoena ǁîb xa mîba tsî ǁîb ǂâibasendi xas tsîna, xawe ǀhapitsâsens ǀkhas ose, îts ǂhauǃnâsib tsî ǃgâiaǂgaob ǀkha ǁnāsa dī. (Psalmdi 65:1-4) ǂÂis ǃnâ ūhâ re ǁîb di ǁkhauǂuisa “Sadu ǁoren nî ǀarihese, î gu khoakhoahes di ǁaega hā ǃKhūb di aisa xu.”—ǃNaeǃkhaidi 3:19.
ǁNās ge Martas ǀkha ge a ī. ǁÎs ge ge mî: “Ti ǀgôab ge Watchtower tsî Awake! ǂkhanikha hoaǁae gere sîba te. ǂKharirose ta ge Jehovab ǀkha ǁkhapa ǂangusa ge dī. Kaise ge tita ǃgomba īs ge oakhī tsî dī ta ge ǁoren hoan ǃaroma ǀûbaba ǂgansa. Xawe ǀams ai, ta ge tita Eloba ǀgores ǃnâ-ū ge ǃhoa-ū tsî ge ǂgan bi îb ǀûba te. Kaise i ge a ǃgari ǂgomsa 40 kurigu go a ǃkharu ǃkhaisa Jehovab ǀkha ta go oaǀkhīs aiǃâ. Tita ge a ǁgauǁgau ǂgui kurigu khaoǃgâ i khoe-e ǀnî hâ ǃēsa a māhe ǁkhāsa Elob xa tsî a oaǀkhī ǁkhāsa ǁîb ǀnammi ǃnâ i nî hā hâhâse.”