ǂHANSENS ge mâ khoe-i hoa-e ra tsâǀkhā—Elob khoen tsîna. “Ti ǂâidi ge ti ǃnâ ǂguio,” dib ge psalms xoa-aoba ge xoa. (Psalmdi 94:19) Tsî Jesub tsîn ge ge mî ǀunis ǁaeb ain ge “ǂhansenaidi” ûib dide nî hâ, ǀō-aisase nî ǃgomǃgomba da ga î da tā Jehovaba ǃoaba ǁkhā. (Lukab 21:34) O sats? ǃKhōǃnamihets ta mariǁhōgu xa, omaris ǃgomsigu xa tamas ka io ǂurusib ǂhâgu xa? Jehovaba mati a huitsi ǁkhā nēsa sîsenǂams ǀkha?

Sada di ǂhansenaide da ge ǀguri a sîsenǂam ǁoa. “Sige ge hoan ǃnâ ra ǁgâiǀāhe,” dib ge apostel Pauluba ge a xoa. “Îganǀgē ge ra . . . . aoǁguihe ge ra.” ǁNās ǂamaib ge ge mî “xawe ge ge ǂkhabuǂâi tama hâ” “xawe ge ge huio tama hâ;” tsî “hîkākāhe tama hâ.” Tae-e ra huida î da tani ǁkhā? “ǃNāǂamsasib ǀgaib”—ǀgaib hîna sada di hoaǀgaixa Elob Jehovaba xu ra hāb ge ra hui da.—2 Korinteǁîn 4:7-9.

ǂÂi-oa re matits ge satsa nē ‘ǃnāǂamsasib ǀgaiba’ ǃkharuge ǁae ǃkhōǃoa ǀgauba. ǂÂihō îts ta ǁkhaeǂgao tsi gere ǃhoas ge mati sa ǃgôaǃgâba a ǃgamse tsâǀkhā ǀgausa Jehovab di ǂgomǂgomsa ǀnammi ǃnâ? Sa ǂgomsa Jehovab di mîmâidi ǃnâ ǀgai i ge, khoenats gere Paradais di ǃâubasens xa ǁkhāǁkhā o? Xristeǁî ǀhaode da ga hâǃnâ o tsî sada ǂgomsa ǀnî khoen ǀkha ǀgoragu o, o da ge ǀgaiba ra ǃkhōǃoa î da ûib di ǂhansenaide tani ǁkhā tsî da ge ǂkhîba ra hō î da Jehovaba ǃgâiaǂgaob ǀkha ǃoaba.

ǁNâuǃāxasets ge nî tsâ ǂgui ǃnôa ǀgaugu aits ta ǂgaehesa ǀgui ǁaeb ai. Aiǁgause, Jehovab ge ra ǂgan da î da Gaosiba ǂguro ôa tsî gagasi ǁaxasigu ǃnâ hâhâ. (Mateub 6:33; Lukab 13:24) Tae-i ǀgui i ga īs, mâǃoas kas, ǂkhabusa ǂurusib kas, tamas ka io omaris ǃgomsigu ga sorosise tsau kai tsi o? Tamas ka io sa sîsenni ga sa ǁaeb tsî ǀgaib tsîna ū o, hînats ga ǀhaohâb tawa sîsenū hâba? Nētikō ǂgui ǂgaoǀkhādets ge ūhâ—tsî ǂkhari ǁaeb tsî ǀgaib tsîna ūhâ ǁîna sîsenǂamsa—sats ge ǂkhabuǂâi ǁkhā. ǀNîsis tsînats ge ra ǂâi Jehovab ǃnāsase satsa xu ra ǃâubasen ti.

Jehovab ge a ǁnâuǃāxa. ǁÎb ge tātsēs tsîna ǁkhāts as ǂamai satsa xu ǃâubasen tide. Tsî ǁîb ge ra ǂanǃgâ ǁaeba i ra ūsa sorosise tsî kaise tsûtsûsa mâsiba xu ǂurusa.—Psalmdi 103:13, 14.

ǂÂi re, aiǁgause Jehovab gere mati kēbo-aob Eliaba ǂhansenba ǀgauba. Eliab ge ǂkhabuǂâi tsî ǃaob xa ǃgarob ǃoa a ǃkhoe o, Jehovaba nē kēbo-aoba ǃkhoebēb ge o, ǁgau-oa îb ge tsî mîba îb ge Eliaba îb ǁîb di kēbo sîsenni ǃoa oa? Hî-î. Jehovab ge ǀgam ǃnāra ǀhomǃgā-e ge sî Eliaba ge ǃamku ǀgaub ai ǂkhaiǂkhaiba tsî ǂû-e māba îb ǂû. Hakadisi tsēdi khaoǃgâb ge Eliaba noxoba ǂhansen tsî  gere ǃao. Jehovaba noxoba tae-e ge dī hui bisa? ǂGuroseb ge Jehovaba ge ǁgau, ǁîbab nî ǁkhaubasa. ǀGamǁîseb ge Jehovaba Eliaba ge a ǁkhaeǂgao “ǀō-i ǂause” ra ǃhoa dommi ǀkha. ǀAms aib ge Jehovaba ge ǂhaiǂhai ǀoadisidi ǃnâ hâ khoegu ǂgomǂgomsase Eloba ra ǃoaba ǃkaisa. ǀGūǁaeb ge Eliaba ǁkhapa ôasase kēbo sîsenna gere dī. (1 Gao-aogu 19:1-19) Tae-ets nēba xu a ǀama ǁkhā? Eliab ge ǂhansenaidi xa ǃkhōǃnamihe hâ i o, ob ge Jehovaba ǁîba ge ǃnūǃnâxaba i tsî ǀkhomxaǂgao ǀgaub ai ǁîba gere sîsenū. Jehovab ge ǀkharaǀkharasen tama hâ. ǁÎb ge sada noxoba ra tsâba, ǁkhā ǀgaub ai ǀgui.

ǂÂits ga ra o Jehovaba xū-e māsa, ots ge ǁnâuǃāxa ǀgaub ai nî ǁnāsa dī. Tā nētsēts a dī ǁkhā-e, ǀnaits gere dīn ǀkha ǀgopeǀnō re. Hā re î da nēti ǂkhō: ǃKhoe-ao-i hîna ǂgui kurigu tsî ǁkhâgu tsîna ǃâisen tama i ge ǃkhoe tsoatsoas ǀguisa dī tide. Xaweb ge nî tsoatsoa ǂkhari mîǁguiga dīsa, îb aibe ǀgai tsî ǁkhapa ǃkhoe tsoatsoa. Xristeǁî da tsîn ge ǃkhoe-aon khami ī. ǁÎn ge ǃgāsa mîǁguib ǀkha ra ǃâisen ǂâis ǃnân ūhâba. (1 Korinteǁîn 9:24-27) Tae-i ǃaromats sī ǃnâ ǁkhāts a gagasi mîǁguiba dībasen tama hâ nēsi? Aiǁgause, mîǁguits ga o, ǀhaodets nî hâǃnâsa. O Jehovaba ǂgan re îb huitsi, îts ǁnā mîǁguiba sī ǃnâ. Gagasisets ga ǀgai o “Tsâtsâ, î mû ǃKhūb [Jehovab NW] a ǃgâi ǃkhaisa.” (Psalmdi 34:8) ǂÂis ǃnâ ūhâ re xū-i hoa-ets ga dī o, Jehovaba sa ǀnamma ǁgausa—matikōse i ga ǂkharirose mûsen xawe—ǁîb tawa i ge a ǃgomǀgausa.—Lukab 21:1-4.

Jehovaba mati Junesa ge hui îs oaǀkhī ǁîb ǃoa? ǁÎs ge ra mîba da: “Tita ge Jehovab ǃoa gere ǀgore, îb hui te. Ti ǀui ǀgôas ge ge mîba te kai ǀhao-i xa ǃās ǃnâ. Mîǁgui ta ge ge î ta ǀgui tsēs nē kai ǀhaos disa hâǃnâ. Taekō buruxa tsâsiba ge ī ǁkhapa Jehovab di khoen ǀkha oaǀkhīsa! ǁNā kai ǀhaos ge ge ǂkhâǃnâ i, tita ge ǃâu hâ isa. Nēsi ta ge Jehovaba ǃgâiaǂgaob ǀkha ǁkhapa ra ǃoaba. Ûib ge nēsi ǃnāsa ǂâibasensa ūhâba te hâ. ǁNās ǃgâ-ai ta ge a ǂan ǀguriǀgurisen ǁoa ta asa xawe ta ge ǃgâsan di huiba nî ūǃoabasen. Kaise ta ge ra aio noxobab ge ǁaeba hâ isa î ta oaǀkhī.”