ǀNamsa ǃgâsado:

Sadu tsîn ǂan, khamis ge Elobmîsa khoen xa ra ǃgû. ǂGuin ge ge ǂgomǂgomsa khoe-i ǂgui ǃgomsigu tsî ǁgâiǀāgu tsîna ge sida khami ūhâ ī na. ǁÎn ge sida “khami ī khoe ge i” tsâsiga ūhâna. (Jakobub 5:17) ǂGuin ge ǃgomsigu tsî ǂâiǂhansendi xa ge ǃnamiǂgāhe hâ i. Tsî ǂguin ge kaise ge tsûtsûhe hâ i ǀaokhoen tsî ǃoaba ǀhao-ūn gere ǃgâsan xa. Tsî ǀnîn ge ǁîn dīsādi ǀhapitsâsens xa ge ūhe hâ i.

Nē khoena Jehovaba ǁâba mā în ge? Tātsē. ǂGuin ge psalmdi xoa-aob khami gere ǀgore: “Tita ge kā hâ gū-i khami ge ǁhapu. Sa ǃgāba ôa re, sa mîmāde ta ǀuru tama xuige.” (Psalmdi 119:176) Sats tsîna ǁnāti ra tsâ?

Jehovab ge tātsēs tsîna ǁîb ǃharasa xu ra kā gū-e ǀuru tide. Nēs ǃoa-aib ge ǁîna ra ǁkhau oa—ǃnāsa ǁaebab ge ǃgâsan ǃnâ-ū ǁnāsa ra dī. ǂÂiro re, aiǁgause matib ge Jehovaba ǁîb ǃgāb Joba a hui ǀgausa ǂgui ǃgomgu ǃnâ ge hâ iba—nēs ge marisi ǃgomsib, ǁōb ǀgôan hoan dib, tsî ǁkhōǁkhōsa ǂurusib mâsigu tsîna ge ǃkhōǂgā hâ i. Jobi ge kaise tsûtsûsa mîdi tsîna ǂkhâǃnâ bi ǃgû ǀkhī hâ khoegu xa ge mîhe. Xaweb ge ǁîb ǁâba Jehovaba ge mā tama hâ i. (Job 1:22; 2:10) Jehovaba mati Joba ge hui îb ǁkhapa ǂaidi ai mâ?

ǀGui ǀgaub Jehovab ge Joba a huis ge Elihub ǃnâ-ū. Jobi ge ǁîb di ǃgomsiga gere ǃhoa ob ge ǃgaoǃgâxase ǃgâ tsî ge ǃeream, xawe matib ge ǃeream bi? ǁÎba Joba ǀau tamas ka io ǀhapitsâsens tsî taotaob ǃnâ-ūb nî hui? Elihuba Jobi xa gere ǀgapi ǃgôasen? Kaise ǁnāsa xu a ǃnūseb ge, Elob gagab xa ǁgarihe hâseb ge Elihuba ge mî: “Mû, tita ge a Elob di, sats ǁkhāts khami; tita on ge ǂgoaba xu ǂnubihe hâ.” Tsîb ge Joba ge hōhōǃnâ “mû, ti ǃhurib ge satsa ǃaoǃao tide, tsî ti ǃommi ge satsa ǃgomdā tide.” (Job 33:6, 7) Jobi ǃgomsigu tawa ǀaros xab ge Elihuba ǀnamxaǃnâ ǀapemādi tsî ǂkhâǃnâde Joba ge mā.

Toxoba ǂâis ǃnâ ūhâ re sige tsîn go nē ǂkhaniba ǁnā ǁkhā ǀgaub ai a aiǂhomisa. ǂGurose ge ge go ǃgâ, tsî ǂōrisase mâsiga go ôaǃnâ ǂgoms ǃnâ ge ǂkhabu khoen diga. (ǂKhoamîdi 18:13) Tsî ge ge xoade ǃoa ra ī, ǀgores ǀkha ge ra ôaǃnâse Jehovab ge mati ǁîb di ǃgāna ǃkharuge ǁae hui ǀgausa nēti ī ǃgomsin ǃnâ ge hâ ī na. ǀUnis ai ge ge ǁnā Xoadi ǃâga sida ǁaeb di ǃnaeǃkhaidi ǀkha ǀhaoǀhao hâ nē ǂkhanib ǃnâ. Kaise kai ǁkhoreb ǀkha ge ge ra ǁkhau du nē ǂkhaniba ôaǃnâsa. Toxoba ǂâis ǃnâ ūhâ re kaise ge ge a ǀnam du.

ǂGaeǂguira soros Jehovab di ǀHûǀguitimî-aon dis