5ǁÎ ǃÂB
Oa hā re “sadu ǀomdi di ǃÛi-aob tsî Mûǂamaob ǃoa”
Sats tsîna nē ǂkhanib ǃnâ ra ǃhoaǃgaohe ǃgomsigu xa tsâǀkhāhe hâ? ǁNāti ī ga ī o, ots ge ǃgâi ǃomgu ǃnâ hâ. ǂGui ǂgomǂgomsa ǃoaba-aon Elob din tsîn—ge Elobmîs ǁaeb ai tsî sada tsēs ǃnâ—ǁkhā ǃgomsiga ra hōǃâ. ǁÎn gere huiba Jehovaba xu ǃkhōǃoa khamits ge sats tsîna huiba a hōǁkhā sa ǃgomsiga sîsenǂams ǃaroma.
Jehovab ge satsa nî hâba oaǀkhīts ga ra o ǁîb ǃoa
ǂGOMǃGÂSA ūhâ re Jehovab nî hâba tsisa ǁîb ǃoats ga ra oaǀkhī o. ǁÎb ge nî huitsi îts ǂhansenaide sîsenǂam, îts ǀhapitsâsensa ūbē, îts ǂkhîba hō tsî ǃanu ǃgâi ǂâisa ūhâ ǂgaoba ūhâ ǁkhā. ǁNās ge ǁkhoreba nî mā tsi îts Jehovaba ǁkhapa ǃoaba nau ǃoaba-aon ǀkha. Sa mâsib ge ǂgurokamǁaeb di Xristeǁîn ǀkha a ǀgui, apostel Paulub tsîn ge ǁîn xa ge xoa: “ǁHapuma ra gūse du ge ī, xawe du kom nēsi ǃhobasen hâo sadu ǀomdi di ǃÛi-aob tsî Mûǂamaob ǃoa.”—1 Petrub 2:25.
Jehovab ǃoats ga oaǀkhī ots ge kaise ǃgâi xū-e go dī. Mati i io? Sats ge ǃgâiaǂgaoba Jehovab ǂgaoba nî ǀkhī-ūba. (ǂKhoamîdi 27:11) ǂAnts a khamib ge Jehovaba tsâsiga ūhâ tsî sada di dīb ge ǁîba ra tsâǀkhā. Mâ hâ ǃkhais ge Jehovab ge sada ǁgari tama hâ î da ǁîba ǀnam tsî ǁîba ǃoaba. (Deuteronomium 30:19, 20) ǀGui Elobmîs di ǂansabeb ge nēti ge mî: “ǃKhō ǃkhai-i ge a ǀkhai khoesib di ǂgaob dao-ams ǃauga. ǁÎb ge ǂgânagaba xu nî ǁkhowa-amhe.” Jehovaba ǀnammi xa ǀoa hâ ǂgaob ǀkha ǃoabas ge nî huida ǁnā dao-amsa ǁkhowa-amsa. ǁNāsa da ga dī o, o da ge ǁîba ǃgomǀgausa ǀkhaeba ra mā—sada di ǂhauǃnâsiba—tsî da ge kai ǃgâiaǂgaoba ǁîba ra hauba. Amabes ǃnâ i ge xū-e a ǀkhai ǂkhîb hîna da ra hōǃâba ǀgopeǀnō ūsa Jehovaba da ǁîba anu hâ ǃoabasa mā ǃkhais ǃaroma.—ǃNaeǃkhaidi 20:35; ǂHaiǂhais 4:11.
ǁNās ǂamaits ga sa Xristeǁî ǃoabasa tsoatsoa o, ob ge sa gagasi ǂhâba nî ǀoaǀoahe. (Mateub 5:3) Mâ ǀgaub ai? ǃHūbaib ǂhabasen ge khoena ra ǂhâ, ‘Tae-i ǃaroma da nēpa hâba?’ ǁÎn ge ûib di ǂâibasens di dîdi ǃereamde ra ôa. Khoen ge ǁnā ǂhâba ūhâ, Jehovab ge ǁîna ǁîb ǀkha kuru amaga. Sada ge kai ǂkhîba a ūhâ ǁkhā ǂan da a amaga Jehovaba da ra ǀnamma xu ǃoaba ǃkhais ǃaroma.—Psalmdi 63:1-5.
Toxoba ǂan re Jehovab ge ra ǂhâba îts ǁîb ǃoa oaǀkhī. Matits nēsa a ǂan? ǂÂi re: ǃNāǂamsa ǀgores, ǀkhab ge nē ǂkhaniba ǃamkuse aiǂhomihe hâ. ǁÎb ge go hau-e îts ǃgaoǃgâ, ǀnîsi ǀHaohâb ǃûi-aob xa tamas ka io ǀnî hâ ǂgomsabe-i xa. ǁNāpaxūts ge go khomai bi tsî ǁîb haisi-ams xa go tsâǀkhāhe. Nēn hoan ge a ǁgauǁgau Jehovab ǀuru tsi tama hâsa. Nau ǀkhāb aib ge ǁîba ra ǂgae tsi ǁîb ǃoa oaǀkhīsa.—Johaneb 6:44.
Jehovab tātsēs tsîna kā hâ ǃoaba-ao-e ǀuru tides ge ra ǁkhaeǂgao da. ǁNāsas ge ǀgui ǃgâsas Donnas di ra ǂgaihesa ge a ǃgôaǃgâ. ǁÎs ge ge mî: “ǂAuse ta ge amaba xu ge bē, xawe ta ge hoaǁae Psalmdi 139:23, 24, xa gere ǂâiǂâisens mîra ra: ‘Ôaǃnâǃganu te re, Elotse, î ti ǂgaoba ǂan re: ǃÂitsâ te re, î ti ǂâide ǂan re. Î mû re, ise i tita tawa tsū dao-e hâsa, î ǂgaeǂgui te re ǀamo daob ai.’ Tita ge ge ǂan i ǃhūbaib di tama ta hâsa—Tita ge amabes ǃnâ ǁnāpa ǃamǁaesase ge tsâ tama hâ i. Tita ge ge ǂan i Jehovab di ǀapeǂhumis tawa ta nî hâsa. Tita ge ge mû Jehovab tātsēs tsîna ǁnāxū te tama hâsa; tita ge ǀgau i ǀgui-e gere ôa ǁîba ǃoa oa hāsa. Tsî nēsi ta ge kaise ra ǃgâiaǂgao ǁnāsa ta go dīhō ǃkhaisa!”
“Tita ge ge mû Jehovab tātsēs tsîna ǁnāxū te tama hâsa; tita ge ǀgau i ǀgui-e gere ôa ǁîba ǃoa oa hāsa”
Sige di ǂhauǃnâ ǀgores ge îts sats tsîna ǁkhapa “ǃGâiaǂgaob ǃKhūb [Jehovab NW]” diba hōǃâ. (Nehemiab 8:10) Sats ge tātsēs tsîna ǃhausen tide Jehovab ǃoa oa hāsa.
