1-2. (a) ǁGâuaba khoena mâ ǀgaub ǃnâ ge gaxaǃnâ? (b) Nē ǁkhāǁkhāǃâs ǃnâ da tae-e nî ǃhoaǃgao?

ǁGÂUAB hîna a “ǂhumib di ǁgûb” ge khoena ǁîn di tsoatsoasa xu ra gaxaǃnâ. (Jhn. 8:44) ǀNî ǂhumib ge ama tama ǁkhāǁkhādi hîna ǁōb tsî ǁōb khaoǃgâ hâ ûib tsîn xa hâde ǃkhōǂgā hâ. Nē ǁkhāǁkhādi ge nē ǁnaetigu tsî khoen ra ǂgom xūn ais tsîna a ǃgaoǃgaosa. Nēs xa ǃaroma-e hâsen ge ǂgui ǃgâsana ‘ǂgoms ǃgao ra ǃkham’ khoe-i ga ǁîn omaris ǃnâ ga ra ǁō o.​—Jud. 3.

² Nē mâsib ǃnâ da ga hōsen o, o da mati nî mâǀgai Elobmîs tae-e ǁōb xa ra mîsa da a ǂan amaga? (Efe. 6:11) Mati da nau ǃgâsa-i hîna ra mâǃoahe-e nî ǁkhaeǂgao tsî ǀgaiǀgai? Nē ǁkhāǁkhāǃâs ge nî ǃhoaǃgao Jehovab mati ra hui dasa. ǂGurose, hā re î da kō Elobmîs tae-e ǁōb xa ra mîsa.

3. Tae-e ǂguro ǂhumib xa ge ǃaromahe?

³ Elob ǂâibasen tamas ge în khoena ǁō. Xawe ǀamosib kōse ûis ǃgao ra ge Adammi tsî Evas tsîra supu mîmāsa nî ǁnâuǀnams ge ge i: “Xawe ǁnā hais ǃgâib tsî ǂkhabab tsîkha ǂans dis xats ge ǂû tide; ǁîs xats ga ǂû tsēs hoas aits nî ǁō xui-ao.” (Gen. 2:16, 17) Tsîb ge ǁGâuaba ǃgomsina ge ǃaroma. ǀAob ǃnâ-ūb ge ǁîba Evasa ǃoa ge mî: “Tātsē ro kom ǁō tideo.” ǁÎs ge nē ǂhumiba ge ǂgom tsî ge ǂû. Egab ge ǁîs aob tsîna ge ǂû. (Gen. 3:4, 6) Nēs ǃnâ-ūb ge ǁoreb tsî ǁōb tsîna ge tsoatsoa.​—Rom. 5:12.

4-5. ǁGâuaba mati ra aiǃgû khoena gaxaǃnâs ǀkha?

 ⁴ Adammi tsî Evas tsîn ge ge ǁō, Elob ge mîs ǁkhās khami. Xawe ǁGâuab ge ǁōb xa ge ǂhumi ǀû tama hâ i. Egab ge ǀnî hâ ǂhumin tsîna ge mî tsoatsoa. ǁNā ǂhumin di ǀgui i ge khoe-i soros ge ra ǁō xawe khoe-i ǃâ-i ge ǀnî hâba ǁkhawa ra ûi ǃkharu. Nē ǂâi ǀgaub ge ǂgui khoena ra gaxaǃnâ sida tsēdi ǃnâs tsîna.​—1Tim. 4:1.

⁵ ǂGui khoena tae-i ǃaroma ra gaxaǃnâ-e? ǁGâuab ǂhumib hîna ǁōb xa hâb ge sida ǁōb xa ra tsâ ǀgauba ra tsâǀkhā. ǀAmosib kōse da nî ûise da ge kuruhe amaga da ge ǁō ǂgao tama hâ. (Aoǁn. 3:11) ǁŌba da ge khākhoeb ase ra mû.​—1Kor. 15:26.

6-7. (a) ǁGâuaba ǁōb xa hâ amaba sâus ǃnâ ge dan? ǁGuiǃā re. (b) Elobmîs amaba mati ǁō hâ khoena ǃaosa xu ra ǁkhauba da?

⁶ ǁGâuab ra dītsâ xawe i ge ǁōb xa hâ amaba sâusa tama hâ. ǂGui khoen ge nēsi a ǂan Elobmîs tae-e ra ǁkhāǁkhāsa ǁō hâ khoen mâsib xa tsî ǁîn ǃâubasens xas tsîna. (Aoǁn. 9:5, 10; ǃNǃkh. 24:15) Nē amab ge ra ǁkhaeǂgao da tsî ra hui da i da tā ǃao tsî ǂâiǂhansen tae-i ǁō da ga o ra īsa. Aiǁgause, ǁō hâ khoena da ge ǃao tama hâ tsî ǁîn ǀkha i ǁgai xū-e nî īs tsîna. ǂAn da ge a ǁîn ûisa tama hâsa tsî khoe-e tsūdī tidesa. ǁŌb ge ǃgamse ǁoms ǀkha a ǀgui. (Jhn. 11:11-14) Tsî da ge a ǂan ǁō hâ khoen ǁaeba ǀū ǃkhaisa. ǁNās ǀkha i ge khoen hîna khâisa nî hōna ǃgû ī ge ǁaeba ǀgui tsēs ase nî mû.

⁷ ǁŌb mâsib xa hâ amab ge kaise supu tsî ǁnâuǃāxa. Nēs ge ǁGâuab di ǂhumiba xu ra ǀkhara. Khoen ǀguina i ge nē ǂhumiba gaxaǃnâ tama hâ xawe sida Kuru-aob tsîna ra ǃkhāǃkhā. ǁGâuab ge ǃaroma ǃgomsina ǁnâuǃās ǃgao da ge sao ra dîde nî ǃhoaǃgao: ǁGâuab ǂhumiba Jehovaba mati ra ǃkhāǃkhā? Nēsa mati khoena ra ǂgom kai Xristub xoremarib ǃnâ ǂgoms ǂhâbasa tama hâ di? Nēsa mati khoen di tsûaǂgaob tsî ǃgomsigu ai ra ǀaro?

8. Jeremiab 19:5 tawa i ra ǁgau-e khamib ǁGâuab ǂhumib hîna ǁōb xa hâba mati Jehovaba ra ǃkhāǃkhā?

⁸ ǁGâuab ǂhumib hîna ǁōb xa hâb ge Jehovaba ra ǃkhāǃkhā. Nē ǂhumib ge  ama tama ǁkhāǁkhās hîna khoen ge ǀaeb ǀkha ra ǁkharahe di hâs tsîna ǃkhōǂgā hâ. Nē ǁkhāǁkhās ge Eloba ra ǃkhāǃkhā. Mâ ǀgaub ǃnâ? Nē ǁkhāǁkhādi ge khoena ra ǂgom kai ǀnammi Elob ge nē ǁgai ǀgauba ūhâ di. (1Jhn. 4:8) Nēsa mati ra tsâ kai da? Xawe ǂhâǂhâsase nēsa Jehovaba mati ra tsâ kai? ǁÎb ge ǁgai xūn hoana ǃhui hâ.​—Khomai re Jeremiab 19:5.

9. ǁGâuab ǂhumiba mati Xristub xoremarib ǁguibasa ra tsâǀkhā hîna Johaneb 3:16; 15:13 tawa ra ǁguiǃāhesa?

⁹ ǁGâuab ǂhumib hîna ǁōb xa hâb ge khoena Xristub xoremarib ǃnâ ǂgom kai tama hâ. (Mat. 20:28) ǀNî hâ ǂhumib ǁGâuab dib ge khoen ge ǁōb khaoǃgâ ǁkhawa ra ûiǃkharu di hâ. ǁNās ga ama hâ o, on ge hoa khoena ǀamose ga ûi hâ. Tsîb ge Xristuba xoremarib ase ga ǁō tama hâ, sida ǀamo ûiba hōs ǃgao. ǂÂis ǃnâ ūhâ re Xristub ǁguibas ge ǁîb di ǀnamma ra ǁgau da. (Khomai re Johaneb 3:16; 15:13.) Jehovab tsî Jesub tsîn mati ra tsâs xa ǂâi re nē ǁkhāǁkhādi hîna nē ǀkhaeba ǀō-aisa kai tama hâ di xa.

10. ǁGâuab ǂhumib hîna ǁōb xa hâba mati ǃoab tsî ǃgomsin tsîna ra ǃaroma?

¹⁰ ǁGâuab ǂhumib ge ǃoab tsî ǃgomsin tsîna ra ǃaroma. ǁGûn hîna ǁîn ǀgôan ǁōb xa ra ǃoan ge ra mîbahe ǁîn ǀgôa-i ge Elob xa go ūhe, î-i ǀhommi ǃnâ sī ǀhomǃgā kai. Nē ǂhumiba ǁîn ǃoaba ra ūbē tamas ka io ra ǀaro? ǂHumi ǁkhāǁkhās hîna ǀamo ǀaeb xa hâs ge ǁkharahesa ǃoa ra ǁnaeǁgau, nēs ge khoen hîna kerkeb ǁkhāǁkhāde ūǃoa tama hân hîna ǀamose nî ǁkharahena ǃkhōǂgā hâ. ǀNî Spanish ǂkhanis ǃoagu î ge khoen hîna ge Katolik kerkheb ǂgomsa ūhâ tama hâ în di ǀgoraǃgâ-aoga khoen hîna ge kerkeb ǂgom ǀgauba ūǃoa tama hâ îna ǀaeb ǀkha gere ǁkhara, în ǁōn nîs aiǃâ ǃhōbasen tsî tā ǀamo ǀaeb ǀkha ǁkharahe. ǂGui ǃhūgu ǃnâ i ge khoena ǁîn ǀaokhoen hîna ge ǁōna ra ǃoaba, ǁîna ǃgôasiba ra mā tsî ǁîna xu ǀkhaeba ra hō. ǀNîn ge ǁō hâ khoena ra ǂkhîǂkhî ǂgao în ǁîn xa tā ǁkharahe. Xawe ǁGâuab ǂhumib ge ama ǁkhaeǂgaosa mā da tama hâ. Nēs ge tsûaǂgaob tsî ǃaob tsîn ǀguina ra ǃaroma.

11. Sida ǀaokhoena mati nî ǁgari da î da Elobmîs ǃoagu hâ xūna dī?

¹¹ Elob tsî ǁîb mîs tsîna da ūba hâ ǀnammi ge nî ǀgaiǀgai da î da Jehovaba ǁnâuǀnam, sida ǀaokhoen ga ǁgari da o, î da Elobmîs ai ǃgaoǃgaosa tama hâ ǁkhāǁkhādi hîna ǁōb xa hâdi ǃnâ ǁhao. ǁÎn ge ra mî sida ge ǁō go khoe-e ǀnam tama hâ tamas ka io ǃgôasiba ūhâba tama hâ. Tamas ka ion ge ra mî ǁō go khoe-i ge sida nî tsūdī di. Mati da Elobmîs amaba nî ǁkhauba? ǂÂi re mati du Elobmîs ǁgaraga nî sîsen-ūsa.

12. Mâ ǁnaetigu hîna ǁōb xa hâga Elobmîs ai ǃgaoǃgaosa tama hâ?

¹² A da mîǁgui re Elobmîs ai ǃgaoǃgaosa tama ǁnaetigu tsî dīxūn tsîna xu ‘ǃgûǂoasa.’ (2Kor. 6:17) Karibbean ǃhūb ǃnân ge khoena ra ǂgom khoe-i ga ǁō o, o i ge ǁî-e ra ‘ǀnōre’ kai tsî ǁî-e ra ǃkhāǃkhā khoena ra tsūdī. Nē ‘ǀnōre’ î ge khoen ǁaegu ‘ǃgomsina a ǃaroma ǁkhā’ dib ge ǀnî xoa-aoba ge mî. Afrikab ǃhūgu ǃnâ i ge khoena spilsa ra ǃgū-ai ǁō go khoe-i oms ǃnâ tsî ai-īsiga mirgu ǃoa ra dawa.  Tae-i ǃaroma? ǀNîn ge ra mî ǁō hâ khoen ge tā nî mûsen di. Jehovab ǃoaba-aon ase da ge ama tama xūna ǂgom tama tsî ǁGâuab ǂhumiba ra aiǃgû kai dīxūn ǃnâ ǃâ tama hâ.​—1Kor. 10:21, 22.

13. ǀNî ǁnaetigu xa du ga ǃnāsase ǂan tama ga ra io, o du tae-e nî dī Jakobub 1:5 ǃoagu?

¹³ ǀNî ǁnaetigu xa du ga ǃnāsase ǂan tama ga ra io, o du ge Jehovaba ǀgores ǃnâ nî ǂgan îb gā-aisiba mā du. (Khomai re Jakobub 1:5.) Tsî sida ǂkhanin ǃnâs tsîna khomais ǃnâ-ū. ǂHâbasa î ga o, o ǀhaohâb ǃûi-aogu ǀkhas tsîna ǃhoa re. ǁÎgu ge tae-e da nî dīsa mîba da tide xawe Elobmîs tsoatsoade nî mîba da, nēba a xoasa di khami. Nēna da ra dī khami da ge ‘ǀgoraǃās’ di ǀgauba nî hō tsî nēs ge nî hui da î da “mâ-i a ǃgâi tsî mâ-i a tsūsa ǀgoraǃā ǁkhā.”​—Heb. 5:14.

14. Mâ ǀgaub ǃnâ da nau khoena ǃnôa kai tide?

¹⁴ ‘Tsî dī du kan hoan, ǁîna Elob di ǃgôasib ǃoa dī re. Tā khoena ǃnôase ība re.’ (1Kor. 10:31, 32) Nē ǁnaetigu ǃnâ da nî ǁhaosa da ra mîǁgui hîna da ge nî ǂâi sida mîǁguib mati nau khoen ǃgâiǂâisa nî tsâǀkhāsa, nēs ge ǃgōsase nau Xristeǁîna ǃkhōǂgā hâ. Nau ǃgâsana da ge ǃnôa kai ǂgao tama hâ. (Mrk. 9:42) Tsî da ge ǀHûǀguitimî-ao tama hâ khoen tsîna tsūdī ǂgao tama hâ. ǀNammi ge nî ǁgari da î da ǁîn ǀkha ǃgôasib ǃnâ ǃhoa, nēs Jehovaba ǂkhaisiba ra mā amaga. Khoen ǀkha da ge tā nî ǂnoagu tsî ǁîn ǂgomsa tā nî ǀgoraǃgâ. ǂÂis ǃnâ ūhâ re ǀnammi ge ǀgaiba ūhâ. ǀNamma da ga ǃgôasib ǃnâ ga ra ǁgau o, o da ge mâǃoa da ra khoen ǂgaogu tsîna a tsautsau ǁkhā.

15-16. (a) Tae-i ǃaroma i a ǂhâǂhâsa sadu ǂgoms xa khoena mîbasa? Aiǁgau-e mā re. (b) Paulub mîdi hîna Romeǁîn 1:16 ǃnâ a xoasade mati sida ǃoa ra ǁnaeǁgau?

¹⁵ Sadu ǀhûhâsib ǃnâ hâ khoena mîba re Jehovab di ǀHûǀguitimî-aon ǀgui du a ǃkhaisa. (Jes. 43:10) Sadu ǀaokhoe-i ga ǁō o, o i ge ǃgom tide sadu ǂâi ǀgauba nau ǀaokhoena mîbasa ǁîn ǀnai sadu ǂgoms xa a ǂan amaga. Franciscob hîna Mozambiki ǃnâ ra hâb ge ge xoa: “Tita tsî ti taras tsîn ge amaba a ǁkhāǁkhāsen o, om ge sim omaris khoena ge mîba  ǁkhawam ge ǁō hâ khoena ǃoaba tide. Sim mîǁguib ge ge ǃâitsâhe Carolinas ǃgâs ge ǁō o. ǁNā khoen ǁnaetigu ǃoagu i ge ǁō hâ khoe-i ǀkhāsa ǁāhesa ǂhâbasa. Tsî i ge ǁō hâ khoe-i ǀaokhoe-e ǃnona tsēde ǁnā khoe-i goro ǁāhe ǃkhais tawa nî ǁgoe. Nē ǁnaetib ge ǁō hâ khoena ǃgôasiba ra ǁgau. Carolinas omaris ge ge ǂhâba hâ i, is ǁîsa ǁîs ǃgâs goro ǁāhe ǃkhais tawa sī ǁgoe.”

¹⁶ Franciscob tsî ǁîb taras tsîna tae-e ge dī? Franciscob ge ra ǁguiǃā: “Jehovabam a ǀnam amagam ge nē ǁnaetib ǃnâ ǁhaosa xu ge ǂgōsen. Carolinas omaris khoen ge kaise ge ǁaixa. ǁÎn ge ge mî sim ge ǁō hâ khoena ǃgôasiba ǁgau tama hâ tsîn ge ǁîna sima ǁkhawa sari tide. ǁÎnam ge ǀnai sim ǂgoms xa mîba hâ i amagam ge ǁkhawa nēs xa ǁîn ǀkha ge ǃhoa tama hâ i ǁaixan hâ hîna. ǀNî ǀaokhoen ge gere ǁkhauba mi tsî gere mî ǀnaim ge sim ǂâi ǀgauba ge ǁguiǃā di. ǁAeb ǀkhan ge Carolinas ǀaokhoena ge ǁaixa tama hâ i tsî da ge ǂkhîba ge kuru. ǀNîn ge sim omsa ǃoas tsîna hā tsî Elobmîs ai ǃgaoǃgaosa ǂkhanina gere ǂgan.” Tā da ge nî tao Elobmîs amab ǁōb xa hâba da ra ǁkhauba hîna.​—Khomai re Romeǁîn 1:16.

17. Tae-e nî hui î da ama ǀhōsa kai ǃgâsa i hîna ǃoab ǃnâ hâ i ǃoa-ai?

¹⁷ ǃGâsa i ga ǀgūkhoe-e ǁōb ǃnâ ǂoaǃnâ o, o da ge nî ǁgūtsâ î da ‘mâ ǁaeb hoab ai ǀnam hâ tsî ǃgâsab hîna ǂōǂōsib ǃnâ ra ǃnaeb ase ī.’ (ǂKhm. 17:17) Mati da nî “ama ǀhōsa” kai ǃgâsan ǃoa-ai hîna ǃoab ǃnâ hâna tsî ǁgâiǀāba ra hōna Elobmîs ai ǃgoaǃgaosa tama xūna dīs ǃnâ? ǀGam Elobmîs tsoatsoara xa ǂâi re hîna a hui da ǁkhāra î da ǃoab ǃnâ hâ khoena ǁkhaeǂgao.

18. Jesuba tae-i ǃaroma ge ā tsî ǁîb aiǁgausa xu da tae-e ra ǁkhāǁkhāsen?

¹⁸ “Ā ran ǀkha ā re.” (Rom. 12:15) Kaise î ge a ǃgom ǃoab ǃnâ hâ khoe-e ǁkhaeǂgaos mîde mîbasa. ǀNî ǁaegu ai i ge  sida ǁgamrona ǂgui xūna a mî ǁkhā. Jesub ǀhōsab Lasarub ge ǁō o, o i ge Marias, Martas tsî ǀnî hân tsîna ǁîn ǃgâsab tsî ǀhōsab ǃgao gere ā. Haka tsēde ǃkharu hâseb ge Jesuba sīb ge o, o ǁîb tsîna “ge ā”. (Jhn. 11:17, 33-35) Jesub gere ā ǃkhais ge ge ǁgau Jehovab mati ǁōb xa ra tsâsa. Nēs ge ge ǁgau Jesub nē omarisa a ǀnam ǃkhaisa tsî nēs ge Marias tsî Martas tsîna ge ǁkhaeǂgao. Sida ǃgâsan ga sida a ǀnam nî ǃkhaisa mû o, on ge ǀguri tsâsen tama hâ xawe ǀhōsanan ūhâ khami ra tsâ.

19. ǃOab ǃnâ hâ ǃgâsa-e da ga ǁkhaeǂgao o, o da mati Aoǁnâ-aob 3:7 sa nî sîsen-ū?

¹⁹ “ǁAeb ǃnōsase hâs dib, tsî ǁaeb ǃhoas dib.” (Aoǁn. 3:7) ǀNî hâ ǀgaub ǃoab ǃnâ hâ Xristeǁî-e da a ǁkhaeǂgao ǁkhās ge ǃgâise ǃgâs ǃnâ-ū. ǃGâsa-e mā-am re î-i ǁî-i ra tsâ ǀgauba ǃhoaǂui tsî mîdi ga ‘ǂâiǃgâhe tama hâse’ ǃhoahe o, o tā ǁgaise tsâ re. (Job. 6:2, 3) ǁÎ-i ge ǀnîsi ra ǂâiǂhansen ǁî-i ǀaokhoen hîna ǀHûǀguitimî-ao tama hân xa i ra mâǃoa-e amaga. ǁNā-amaga ǁî-i ǀkha ǀgore re. ‘ǀGoredi ǁnâu-am-aoba’ ǀkhomma re îb ǀgaib tsî ǃgâi ǂâis tsîna mā du. (Psa. 65:2) Mâsib ga mā-am o, o Elobmîsa ǀguiba khomai re. Tamas ka io ǃâ-e Elobmîs ai ǃgaoǃgaosa ǂkhani-e xu khomai re hîna ǃgâsa-e nî ǂkhâǃnâ-e.

20. Tae-e da sao ra ǁkhāǁkhāǃâs ǃnâ nî ǃhoaǃgao?

²⁰ Kaise da ge ra ǂkhî ǁōb xa hâ amaba da a ǂansa tsî ǁō hân ūhâ ǃâubasens tsîna. (Jhn. 5:28, 29) ǁNās ǀkha da ge mîs tsî dīgu tsîn ǃnâ-ū Elobmîs tsoatsoade ra ǃkhōǀgara tsî nau khoen ǀkha hō da ra ǃēs hoas ai ra ǀgoragu. Sao ra ǁkhāǁkhāǃâs ge ǀnî hâ ǀgaub ǁGâuab mati khoena gagasise ǃkhaenab ǃnâ ra ūhâsa nî ǃhoaǃgao. Tsî da ge nî mû tae-i ǃaroma da nē ǁnaetigu ǀkha dīxū-e ūhâ xūna xu nî ǂgōsensa.