1. Efeseǁîn 6:10-13 ǃnâ i ra ǁguiǃāhe khamib Jehovaba mâ ǀnamǀnamsa ǀgaugu ǃnâ ǁîb khoexaǃnâsiba ra ǁgau da? ǁGuiǃā re.

ǀGUI ǀgaub hînab Jehovaba nēsa ǁîb khoena ra dības ge ǁîna huisa nē ǁgai ǂkhaba gagaga mâǃoas ǃnâ. Sada kai mâǃoa-aogu ge ǁGâuab tsî ǁîb demongu tsîna. Jehovab ge nē mâǃoa-aogu ǃoa-ai ra ǃkhâikhom da tsî ǁîga mâǃoas ǀkha ra hui da. (Khomai re Efeseǁîn 6:10-13.) Jehovab huiba ūǃoa tsî da ga ǁîb ai ǂgomaiǂnûi o, o da ge ǁGâuaba mâǃoas ǃnâ nî dan. Apostel Paulub ge ūhâ i ǂgomǃgâsiba da ge a ūhâ ǁkhā. ǁÎb ge ge xoa: “Elob ga sada ǀkha hâo, tari-e kha sada ǃoagu nî hâ?”​—Rom. 8:31.

2. Tae-e da nē ǁkhāǁkhāǃas ǃnâ nî ǃhoaǃgao?

² Xristeǁîn ase da ge sada ǁGâuab tsî ǁîb demongu ǀkha ǃgâiǃgâibasen-e ūhâ tama hâ. Sada ǁaeba da ge Jehovab tsî ǁîb xa ǁkhāǁkhāsens ai ra ǂnûi. (Psa. 25:5) Xawe da ge nî ǂan ǁGâuab mati ra sîsensa. Tae-i ǃaroma? Î da tā ǁîb xa ǂgaeǂhapu-e. (2Kor. 2:11) Nē ǁkhāǁkāǃâs ǃnâ da ge nî ǃhoaǃgao matib ǁGâuab tsî ǁîb demongu tsîna ra ǂgaeǂhapu da ǂgao ǀgausa. Tsî mati da ǁîga nî mâǃoa ǀgaus tsîna.

3-4. (a) ǃGaidība a tae? (b) ǃGaidīb ǃnâ ǂgomsa matikōse a kai?

³ ǂAm ǀgaub ǁGâuab tsî ǁîb demongu khoena ra ǂgaeǂhapub  ge ǃgaidīb ǃnâ-ū. ǁNān hîna ǃgaidība ra sîsen-ūn ge khoen ǃgōsase a ǀū xūna ǂan tsî a dī ǁkhā. Aiǁgause, ǀnîn ge hānîǁaeb xa a ǂan ǃgaidība sîsen-ūs ǃnâ-ū. ǀNîn ge ǁō hâ khoen ǀkhan ra ǃhoa khami ra ǁgausen. ǀNîn ge ǃgaidība sîsen-ū tsî khoena ra tsûtsû. *

⁴ ǃGaidīb ǃnâ ǂgomsa matikōse a kai? Ôaǃnâs hîna ge dī-es ge ra ǁgau nēs 18 ǃhūgu hîna Amerikab tsî Karibbeani ǃnâ hâgu ǃnâ ge hōǂui-e sa mâ ǃnonaǁî khoe-i hoa i ǃgaidīb tsî ǁō hân ǀkha ǃhoas ǃnâ ra ǂgomsa. Tsî ǀnî ôaǃnâs ge 18 Afrikab ǃhūgu ǃnâ ge dī-e. ǂAn da nîs ge hâ da a ǃkhai-i hoa i ǃnâ da ǃgaidīb ǃoa-ai nî ǃûisensa. ǁGâuab ‘ǃhūbaib hoaragaba ra ǂgaeǂhapu’ ǂgao amaga.​—J.ǂHa. 12:9.

5. Jehovaba mati ǃgaidīb xa ra tsâ?

⁵ Jehovab ge ‘amab di Eloba.’ (Psa. 31:5) ǁÎba mati ǃgaidīb xa ra tsâ? ǁÎb ge nēsa ǃhui hâ. Jehovab ge Israelǁaesa ge mîba: “Sa tawab ge hōhe tide ǁîb ôab kas, ǁîb ôas kas hoasa ǀaesa ra ǃgûǃganu kaib, ǃgai-aob, aimûǀgarusa ra sîsenūb, tsēde ra ūǂuibasenni tsî ani-ās ai ra ǃgaoǃgâb kas tsî ǃgai-aob kas, tsî nūba-aob, nūbasa ra sîsenūb kas, ǃgai-aob, aimûǀgaru ra gaga-e ra dîb kas, ǁgâuaǁāǁāǁkhāsabeb kas, ǁō hâna ra dîb kas hoasa. Nē xūna ga dī-i hoa-i ge ǃKhūba ǁgaiǁgaisase ība xui-ao.” (Deu. 18:10-12) Xristeǁîn ge nē ǂhanugu hînab ge Jehovaba Israelǁaesa a māgu ǃnāga hâ tama hâ. Xawe da ge a ǂan ǁîb tsâsigu dawa tama hâsa.​—Mal. 3:6.

6. (a) ǁGâuaba mati ǃgaidība ra sîsen-ū khoena tsûtsûs ǃaroma? (b) ǁŌ hân mâsib xa hâ amaba a tae Aoǁnâ-aob 9:5 ǃoagu?

⁶ Jehovab ge ǃgaidīb ǃoa-ai ra ǃkhâikhom da ǁGâuab nēsa khoena tsûtsûs ǃaroma ra sîsen-ū xui-ao. ǁGâuab ge ǃgaidība ǂhumiba aiǃgû kais ǃaroma ra sîsen-ū, ǁō hân ǀnî hâba ra ûi di hâ ǂhumib tsîna ǃkhōǂgā hâse. (Khomai re Aoǁnâ-aob 9:5.) ǁGâuab ge ǃgaidīb tsîna ra sîsen-ū khoena ǃaob ǀkha ǃkhōs tsî Jehovaba xu ū-oa nîs ǃaroma. ǁÎb di ǂâibasens ge în khoen hîna ǃgaidīb ǃnâ ǂgom tsî nēsa ra sîsen-ūna tā Jehovab ǃnâ ǂgom.

7. Jehovaba mati ra hui da?

⁷ ǀNai da go ǃhoaǃgao khamib ge Jehovaba ra hui da i da tā ǁGâuab tsî ǁîb demongu xa ǂgaeǂhapu-e. Kō re taen noxoba nî hui dasa ǁGâuab tsî ǁîb demonga ǃkham ǃoas ǃnâ.

8. (a) Mâ ǀgaub ǃnâ da ǂkhaba gagaga xu a ǂgōsen ǁkhā? (b) Psalmdi 146:4 sa mati ǁGâuab di ǂhumib ǁōb xa hâba ra ǂhaiǂhai?

⁸ Elobmîsa khomai tsî ǂâiǃgâ re. Nēb ge ǀgaub hîna da ǂkhaba gagagu ra aiǃgû kai ǂhumiba xu nî ǂgōsena. Elobmîs ge ǀā gôab hîna ǁGâuab ǂhumiba ra ǀam kaib ase ī. (Efe. 6:17) Aiǁgause, Elobmîs ge ǂhumib hîna ǁō hân ge ûitsaman ǀkha ra ǃhoa di  hâba ra ǂhaiǂhai. (Khomai re Psalmdi 146:4.) Tsî ra mîba da Jehovab ǀguib hānîǁaeb xa a ǂansa. (Jes. 45:21; 46:10) Elobmîsa da ga hoaǁae khomai tsî ǂâiǃgâ o, o da ge nî aiǂhomisa i nē ǂkhaba gagagu ǂhumiba ǃhui tsî ǁîga xu ǂgōsensa.

9. Mâ ǃgaidīb ǁnaetiga xu da ra ǂgōsen ǂgao?

⁹ ǃGaib ǀkha ǃgaeǀhaosa ūhâ xūn hoana xu ǂgōsen re. Ama Xristeǁîn ase da ge ǃgaib ǀkha dī xū-e ūhâ ǂgao tama hâ. Aiǁgause, da ge hānîǁaeb xa ra aimûǀgaru khoena sari tamas ka io ǁō hân ǀkha ǃhoa ǂgao tama hâ. ǃKharu go ǁkhāǁkhāǃâs ǃnâ i goro mî-e khami da ge ǁkhōdi ǁnaetigu hîna ǁō hâ khoen ûitsama di ra mîga xu ra ǂgōsen. Tsî da ge ǃgaidība sîsen-ū ǂgao tama hâ hānîǁaeb xa ǂanǂuis ǃaroma. (Jes. 8:19) Nē ǁnaetigu a tsūsa da ge a ǂan tsîgu ǁGâuab tsî ǁîb demongu ǀkha nî ǃgaeǀhao da ǃkhaisa.

10-11. (a) ǂGuro ǁaeb khoena tae-e ge dī amaban ge ǁkhāǁkhāsen o? (b) 1 Korinteǁîn 10:21 ǃoagu da tae-i ǃaroma ǂguro ǁaeb Xristeǁîn aiǁgausa nî ǁgae tsî nēsa da mati a dī ǁkhā?

¹⁰ ǃGaib ǀkha ǃgaeǀhaosa ūhâ xūn hoana āxū re. Efesus ǃnâ gere hâ khoen ge ǃgaidīb ǀkha gere sîsen. Xawen ge amaba a ǁkhāǁkhāsen o, on ge nē xūna ge ǀû. “Tsî ǁkhāti ǂguin, ǃgaidīga gere dīn ge ǂkhanide ūhā, tsî ǁîde ǂhaisase ge khauǃkhū.” (ǃNǃkh. 19:19) Nē khoen ge ǃgarise ge dītsâ nē ǂkhaba gagaga xu ǂgōsensa. ǁÎn ǂkhanin hîna ge ǃgaidīb xa hâ in ge ǂgui mari-e gere ǂgan. Xawen ge nē ǂkhanina khoena mā tamas ka io ǁamaxū tama i tsî ge hîkākā. ǁÎn ge Jehovaba ǂkhîǂkhîs xa gere ǂâi, nē ǂkhanin ge matikō mari-e gere ǂgans xas ose.

¹¹ Mati da ǁnā ǂguro ǁaeb Xristeǁîn  aiǁgausa a ǁgae ǁkhā? ǃGaib ǀkha dī xū-e ūhâ xūn hoana da ga āxū o, o i ge nî ǃgâi. Nēs ge ǁgā-e ra xūn, ana-e ra xūn tamas ka io khoen ǂkhaba gagaga xu ǁkhaubasens ǃaroma ra ūhâ xūn tsîna ǃkhōǂgā hâ.​—Khomai re 1 Korinteǁîn 10:21.

12. Mâ dîde da nî dîsen sâǁaeb ǃnâ da ra dī xūn ǃaroma?

¹² Sâǁaeb ǃnâ du ra dī xūna ǃgâise ôaǃnâ re. Dîsen re: Internets ai ta ǂkhanin hîna ǃgaib xa hâna ra khomai? Tsî musik i hîna ta ra ǃgâ i, muvin hîna ta ra kōn tsî gaim an hîna ta ra ǀhurun tsîna ta ǃgâise ra ôaǃnâ? Tita ra dī xūn hoana ǃgaidība ǃkhōǂgā hâ? Zombin tsî ǁōba xū ra khâi khoen xa hâ muvin tsîna ta ra kō? ǃGaidība ǃgâi xū-i ase ra mûsen kai muvin tsîna ta ra kō? Xawe hoa muvin ge ǃgaidīb xa hâ tama hâ. Xawe da ga kō da nî xūna ǁhûi o, o da ge Jehovaba nî ǂkhîoǃnâ kai xūna xu ǃnūse ra hâ ǂgao. Hoa xūna da ge ra dī ǂgao ‘ǃanu ǃgâiǂâisa ūhâs’ ǃaroma.​—ǃNǃkh. 24:16. *

13. Taena xu da ra ǂgōsen ǂgao?

¹³ ǂKhaba gagagu xa hâ ǂhôana ǃhoasa xu ǂgōsen re. Nēs ǃnâ-ū da ge Jesub aiǁgausa nî ǁgae. (1Pet. 2:21) ǃHūbaiba ǃoab nî hās aiǃâb ge Jesuba ǀhommi ǃnâ ge hâ i tsî ǁGâuab tsî ǁîb demongu xa a ǂan. Xaweb ge nē ǂkhaba gagagu xa ge ǃhoa tama hâ i. Jesub ge Jehovab xa gere aoǁnâ ǂgao ǁGâuab xas ose. Tsî da ge Jesub aiǁgausa ra sao ǂgao tsî  demongu ra dī xūn xa ǃhoa ǂgao tama hâ. Tsî da ge sida mîdi ǃnâ ra ǁgau ǂgao ‘sida ǂgaogu ǃgâi mî-e ra ūǀkhīsa.’​—Psa. 45:1.

14-15. (a) Tae-i ǃaroma da ǂkhaba gagaga ǃao tide? (b) Mâ ǁgauǁgaude da ūhâ Jehovab ǁîb khoena ra ǁkhaubasa?

¹⁴ Tā ǂkhaba gagaga ǃaoba omkhâiba re. Nē ǁgai ǃhūbaib ǃnân ge tsū xūna sada ǀkha a īǁkhā. Tsūkeǃgâb, ǀaeb tsî ǁōb tsîn ge a hāǂam da ǁkhā. Xawe da ge tā hoaǁae ǂkhaba gagaga nî ǂgā-am. Elobmîs ge ra ǁguiǃā “ǁaeb tsî hâsib tsîkha ī khami ra hōhe” di. (Aoǁn. 9:11) Jehovab ge ge ǁgau ǁîb demongu xa a ǀgaisasa. Aiǁgause, Jehovab ge ǁGâuaba ge mā-am tama hâ i îb Joba ǃgam. (Job. 2:6) Moseb ǁaeb ǃnâb ge Jehovaba ǁîb di ǀgaiba ǃgaidība gere sîsen-ū aogu ǃoa-ai ge ǁgau. (Eks. 8:18; 9:11) Jehovab xa ǂkhâǃnâ-e hâseb ge Jesuba ǁGâuab tsî ǁîb demongu xab a ǀgaisa ǃkhaisa ge ǁgau ǁîgab ge ǀhomma xu ǃhūbaib ǃoa a aoǁnâ o. Tsî gu ge ǀgūǁae nî hîkākā-e tsî khoena ǃaruǀî tsûba ǃaromaba tide.​—J.ǂHa. 12:9; 20:2, 3

¹⁵ Jehovab ǁîb khoena ra ǁkhauba ǃkhaisa da ge ra mû. ǂÂi re: Sada ge hoaraga ǃhūbaib ǃnâ amaba aoǁnâ tsî ra ǁkhāǁkhā. (Mat. 28:19, 20) Tsî da ge nēs ǀkha ǁGâuab ǂhumiba ra ǂhaiǂhai. Tsî ǁGâuab ge sada sîsenab ga ǀam kai ǂgao hâ o, o ǀnai ga dī hâ xawe ǁnā ǀgaiba ūhâ tama hâ. ǂAn da ge a “ǁÎb di mûra ge ǃhūbaib hoaba ra ǃganu, ǀgaisaseb nî ǁgausenga, ǁnān ǂgaob ân ǀoasase ǁîb tawa ǂae hâna.” (2Kro. 16:9) Jehovab ǃoa-ai da ga ǂgomǂgomsase hâ o, o gu ge demonga hâhâ ra tsûba ǃaromaba da tide.

16-17. Aiǁgau-e mā re ǁgau ra e mati da ǂkhaba gagaga a mâǃoa ǁkhā ǀgausa.

¹⁶ ǁKhoaǂgaosiba i ge ǂhâ hâ ǂkhaba gagaga mâǃoasa ǃgōsasen ga sada  ǀgūkhoena mâǃoa da o. Xaweb ge Jehovaba ǁnān hîna nē ǃnoa ǁkhoaǂgaosiba ra ǁgauna ra ǀkhae. Erica di ǀon hâ ǃgâsas hîna Ghanab ǃnâ ra hâs aiǁgausa ǃoa kō re. Ericas ge ge 21 kurixa i Elobmîs ǁkhāǁkhāsas ge ūǃoa o. ǃGai-aob ǀgôas ge i xui-aos ge nē ǁnaetiga nî sao ge is ge. Nēs ge ǁîs ǁgûb gere ǃoaba elogu gere ǁguibahe ǁgan-e ǂûs tsîna ge ǃkhōǂgā hâ i. Ericas ge ǂkhā o, on ge ǁîs omaris khoena nēsa ǁîn eloga mîǁgaiǁgais ase gere mû. Tsîn ge omaris khoena gere ǂgom nē elogu ǁîna nî tsûtsûsa.

¹⁷ Ericas omaris khoen ge gere dītsâ ǁîsa ǁgarisa nē ǁnaetiga saos ǃnâ. Xawes ge ǁîsa nēs ǃnâ ge mâǁnâsen tama hâ i omsa xus nî ǂoas ge i xawe. ǀNî ǃgâsan ge ǁîsa ǁîn oms ǃnâ ge ūǂgā. Nē ǀgaub ǃnâb ge Jehovaba Ericasa ǀasa omaris ǁanin ǀkha ge ǀkhae, nēn ge ge ǁîs ǃgâsa kai. (Mrk. 10:29, 30) ǁÎs omaris khoen ge āxūsi tsî ǁîs xūna ǂhupiǂui xawes ge Ericasa ǂgomǂgomsase Jehovab ǃoa-ai ge hâ tsî ge ǁāǁnâhe tsî nēsi a aimâba-ao. ǁÎs ge nē ǂkhaba gagagu di ǃaoba ūhâ tama hâ. ǁÎs omaris khoen xas ge Ericasa ra mî, “tsēs hoasa ta ge ti omaris khoena ra ǀgoreba în tita ra hōǃâ ǀkhaegu tsî ǃnōrasasib tsîna hōǃâ Jehovaba ǂans ǃnâ-ū.”

18. Jehovab ǃnâ ǂgomsa tae ǃnoa ǀkhaega ra hauba da?

¹⁸ Hoada ge nē ǃnoa ǃgomsiga ǃkharu ǃnâ tide. Xawe da ge hoada ǂkhaba gagaga mâǃoa tsî Jehovab ǃnâ nî ǂgom. Nēsa da ga dī o, o da ge ǂgui ǀkhaega ǃkhōǃoa tsî ǁGâuab ǂhumiba xu nî ǁkhaubahe. Tsî da ge demongu tsîna ǃaos gagaba omkhâi tide. Xawe hoan ǂam-ai da ge sada ǀhōsagusisa Jehovab ǀkha nî ǀgaiǀgai. “Elob ǃnaga māsen” dib ge Jakobuba ge xoa. “ǁGâuaba mâǃoa, ob ge nî ǁhâxū du; Eloba ǀgū, ob ge sado nî ǀgū.”​—Jak. 4:7, 8.