1-2. Jesuba tae-i ǃaroma ǃgomsina gere hōǃâ?

ǁÎB DI ǀuniga tsē khoeb ase ǃhūbaib aib ge Jesuba gere ǁgonǁgon ǂgao-e. ǀGūǁaeb ge kaise ǃgomǀgausa ǁōba ǁîb khākhoen ǃomgu ǁaegu nî ǁōse ge īs ge. Xawe ǁîb ǁōb ǀgui tama ge hâ îb ge ǁgonǁgon ǂgaobi gere-e. ǁÎb ge ǁîb ǁGûba kaise ge ǀnam i tsî gere ǂkhîǂkhîbi ǂgao. Jesub ge ge ǂan i nē ǃgomǀgausa ǁōbab ga ǃkharu ǃnâ ob Jehovab ǀonsa kaikais ǀkha nî huisa. Jesub ge khoen tsîna ge ǀnam i tsî ge ǂan i khoen di ǀamo ûib ǁîb di ǂgomǂgomsasiba xu nî hāsa.

² Kai ǁgonǁgon ǂgaosib ǃnâb ge hâ i xaweb ge Jesuba ǂkhîba ge ūhâ i. “ǂKhîba ta ra ǃgoroba go” dib ge ǁîb apostelga ge mîba. (Jhn. 14:27) ǁÎb ge ‘Elob di ǂkhîba’ ge ūhâ i sâsasiba ra māba ǃgâi ǀhōsagusisats ga Jehovab ǀkha ūhâ o. Nē ǂkhîb ge Jesub di ǂâis tsî ǂgaob tsîna sâsasiba ge mā.​—Fil. 4:6, 7.

3. Tae-e da nē ǁkhāǁkhāǃâs ǃnâ nî ǃhoaǃgao?

³ Khoe-i ge Jesub ge ǃkharu ǃnâ ǃgomsina ǃkharu ǃnâ tide xawen ge hoan hîna a Jesub di saosabena ǃgomsina nî hōǃâ. (Mat. 16:24, 25; Jhn. 15:20) Jesub khami da ge ǁaen ai ǃgomsina nî hōǃâ. Mati da ǃgomsin xa gaoǂam-es tsî sada ǂkhîba ǂoaǃnâs tsîna nî ǁkhae? Jesub ge ǁîb di ǀuniga tsēs ai a dī ǃnona xūna ǃoa hā re i da kō ǁîb ǃoabas ǃnâ ǃhūbaib ai tsî mati da nēs ǃnâ a ǁgaebi ǁkhā ǀgausa.

4. 1 Tesalonikaǁîn 5:17 sa ǂâis ǃnâ ūhâse da tae-i ǃaroma a mî ǁkhā Jesub ge mâ ǃnās hoasa ǁîb ǀuniga tsē ǃhūbaib ai gere ǀgoredi?

⁴ Khomai re 1 Tesalonikaǁîn 5:17. Jesub ge ǁîb di ǀuniga tsēdi hoade ge ǀgore ǃkharu. ǁÎb ǁōb di ǂâiǂâisensab ge ǂnuiǂgā o, ob ge Jesuba ǂauxûi-i tsî ǀkhuruǀkhuruhe tama hâ pere-i ai ge ǀgore. (1Kor. 11:23-25) Pasxab ǀkha gu ge toa o, ob ge ǁîb di ǁkhāǁkhāsabegu ǀkha ge ǀgore ǀhao. (Jhn. 17:1-26) ǀKheraǃhommi tawa gu ge ǁîb tsî ǁîb ǁkhāǁkhāsabegu tsîna sī o, ob ge Jesuba ǀûs ose ge ǀgore. (Mat. 26:36-39, 42, 44) Jesub di ǀuniga mîdi ǁōb nîs aiǃâb ge mîdi ge ǀgores ǃnâ ge sîsen-ūhe. (Luk. 23:46) Jesub ge Jehovaba mâ xū-i hoa i ǃnâ ǁnā ǀuniga tsēs ai ge ǃâ kai.

5. Tae-e ge ǃaroma i ǁkhāǁkhāsabegu di ǂgoms ge ǂkhabusa?

⁵ ǀGui ǃaromas hînab ge Jesuba ǁîb ǃgomsigu ǃnâ a mâǀgaibas ge ǁîb ge ǁîb di ǁGûb ai gere ǂgomaiǂnûi. Xawe gu ge ǁîb di ǁkhāǁkhāsabega ǁnā ǃui ǀgores ǃnâ ge mâ ǀgara tama hâ i. Tsî nēs xa ǃaroma-e hâses ge ǁîgu ǂgomsa ge ǂkhabu ǃâitsâb ǁaeb ge ǀgū o. (Mat. 26:40, 41, 43, 45, 56) ǃGomsina da ga ūhâ o, o da ge ǁîn ǃnâ a mâǀgai ǁkhā Jesub di aiǁgausa da ga sao tsî “ǀgores” ǃnâ ǃkhōǀgara o. Tae-e da nî ǀgoreba?

6. ǀGaisa ǂgomsa mati nî huida mâǀgaibes ǃnâ?

⁶ Jehovaba da ge a ǂgan ǁkhā îb “ǂgomsa ǀaroba” da. (Luk. 17:5; Jhn. 14:1) ǀGaisa ǂgomsa da ge ǂhâ hâ ǁGâuab ǁnān hîna Jesuba ra saona ra saoǃgon amaga. (Luk. 22:31) Matis  ǀgaisa ǂgomsa ūhâsa nî hui da ǂgui ǃgomsina da ga ǃkharu ǃnâ xawe? Dī ǁkhā da an hoana da ga dī o nē ǃgomsina ǀamsa hōbas ǃnâ os ge ǀgaisa ǂgomsa nî hui da nē ǃgomsina Jehovab ǃomgu ǃnâ ǁnāxūsa. ǁÎb sada xa ǃgomsina ǃgâise ra sîsenǂam ǃkhaisa ǂans ge sâsa ǂâis tsî ǂgaob tsîna ra mā da.—1Pet. 5:6, 7.

7. Roberti aiǁgausa xu da tae-e ra ǁkhāǁkāsen?

⁷ ǀGores ge ra hui da sada ǂkhîba ūhâsa ǂgui ǃgomsina da ga ūhâ xawe. ǃGâsab Roberti aiǁgaus xa ǂâi re nēsi ǁîb 80 kurigu ǃnâ hâba. ǁÎb ge ra mî: “Filipeǁîn 4:6, 7 ǃnâ hâ daoǁgaus ge ge huite ti ǃgomsina tani ǁkhāsa ti ûib hoaba. Tita ge mari ǃgomsina ge ūhâ i. Tsî ǁaeroba ǀhaohâb ǃûi-aosisa xu ge ūǁnâhe.” Tae-e Roberta ge hui îb ǁîb ti ǂkhîba ūhâ ǀgara? “ǃGomsina ta gere hōǃâ o, o ta ge gere ǀgore tsoatsoa” tib ge ra mî. “Tita ge ra ǂgom ǀûs ose ta gere ǀgore o, o ta kai ǂkhîba gere hōǃâsa.”

8. Johaneb 8:29 ǃnâ i ra ǁgauhe khami i tae-e Jesuba noxoba ǂkhîba gere mā?

⁸ Khomai re Johaneb 8:29. Jesub ge ǂkhîba ge ūhâ i ǃgomsinab gere hōǃâ xawe ǂan ni ge i amaga ǁîb ǁGûbab ra ǂkhî kaisa. ǁÎb ge ǂgomǂgomsase ge hâ ǃgom i ge i xawe. ǁÎb ge ǁîb ǁGûba ge ǀnam i tsî Jehovaba hoaǁae gere ǂkhîǂkhî ǂgao. ǃHūbaiba ǃoab nî hās aiǃâb ge ge Elob di ‘dana sîsenǀhao-ao’ i. (ǂKhm. 8:30) Tsî ǃhūbaib aib ge hâ io, ob ge khoena ôasase ǁîb ǁGûb xa  gere ǁkhāǁkā. (Mat. 6:9; Jhn. 5:17) Nē sîsenni ge Jesuba kai ǂkhîba gere mā.—Jhn. 4:34-36.

9. Aoǁnâ sîsenni ǃnâ ǁhaosa mati nî huida ǂkhîba ūhâs ǀkha?

⁹ Jesuba da ge ra ǁgae Jehovaba da ga ǁnâuǀnam o tsî ‘ǃaruǀîǀgui ǀaro, o ǃKhūb di sîsenni ǃnâ.’ (1Kor. 15:58) Hoaǁae da ga “mîs ǀkha” ǀhape o, o da ge sada ǃgomsina nî tani ǁkhā. (ǃNǃkh. 18:5) Aiǁgause, ǁnān hîna da aoǁnâ sîsenni ǃnâ ra ǀhao-ūn ge ǀnî ǁaen ai ǂgui ǃgomsina sada xa ūhâ. Xawen ga Jehovab xa ǁkhāǁkhāsen tsî ǁîb daoǁgaude ǁîn ûigu ǃnâ ûiǂui o, on ge ǂkhî ûiga ra ūhâ tsoatsoa. Nēsa da ra mû ǁaeb hoaba da ge ra ǂkhî tsî ǂgomǃgâsiba ra omkhâi Jehovab nî kōǃgâ dasa. Tsî nē ǂgomǃgâsib ge ra hui da sida ǂkhîba ūhâ ǀgarasa. ǃGâsas hîna ǂgui kurina xū-ose tsâsen tsî ǂgui ǃgomsin tsîna ge ūhâ is ge nē amaba ge mûǂan. “Aoǁnâ sîsenni ǃnâ ta ga ǀhape o” tis gere ra mî “O ta ge ti ǃgomsina a tani ǁkhā tsî a ǂkhî. Tita ge ra ǂâi aoǁnâ sîsenni ǃnâ ta ga ǀhape o, o ta Jehovab ǀgūse ra tsâsa.”

10. Brendas aiǁgausa xu da tae-e ǁkhāǁkhāsen?

¹⁰ Brenda di ǀon hâ ǃgâsas aiǁgaus ǃoas tsîna kō re. ǁÎs tsî ǁîs ǀgôas tsîra hoara ge ǀgaisase ge ǀaesen hâ i. Brendas ge ǃhora khoen stuls ai ra ǂnû tsî ǃnāsa ǁaeba ǂkhabusase ra tsâ. Omsa xu oms ǀkhas ge ǃgâises ga tsâ o ra aoǁnâ tsî ǃnāsa ǁaeba sîǂkhanide ra xoa. ǁÎs ge ra mî: “Ūs hâ ǃgomsibas ge ūǃoa tsî a mûǂan o nē ǀaeb ǂuruǂuruhe ǁoasa nē ǁaeb ǃnâ, os ge ǁîs aoǁnâ sîsenni ai ǂâisa ge ǂnûi. Aoǁnâ sîsenna dīs ge ra hui te ti ǃgomsina tanis ǀkha. ǁGari-e ta ge ra ǁnān hîna ta aoǁnâ sîsenni ǃnâ ra ǀhao-ūna huisa. Tsîs ge nēsa ra hui te ǃgôaxa ǁaeb ǃgao ta ūhâ ǃâubasens ai ti ǂâisa ǂnûisa.”

11-13. (a) Matigu ge apostelgu tsî naun tsîna ama ǀhōsan a ǃkhaisa Jesuba ǁgau? (b) Jesub ǀhōsana mâ sîsenǂûiba ǁîb ai ge ūhâ i?

¹¹ Jesub di ǃgomǀgausa ǁaegu hoagu ǃnâgu ge ǁîb ǂgomǂgomsa apostelga ǁîb ǀhōsagu ase ge ī i. ǁÎgu ge ǂKhoamîdi mîde ge amakai mî ra de: “xaweb ge ǁkhāti ǀnamsabeba ǃgâsa-i ǃgâ-ai ra ǂae-ai tsi.” (ǂKhm. 18:24) Jesub ge nē ǀhōsaga gere ǃgôaǃgâ. ǃHūbaib aib ge hâ io, o i ge ǁîb omaris ǃgâsana ǁîb ǃnâ ge ǂgom tama hâ i. (Jhn. 7:3-5) ǁAe i ǃnân ge ǁîb ǀgūkhoen tsîna gere ǂâi ǃkhaub hâ di. (Mrk. 3:21) Nēs ǃaromab ge Jesuba ǁîb apostelgu xa ge mî ǁkhā i: “Tsî sago ge ǁîgo, tita ǀkha ti ǃâitsâdi ǃnâ ge hâǃganugo.”​—Luk. 22:28.

¹² ǁAen ai gu ge apostelga Jesuba gere tsûtsû xaweb ge ǁîgu ǃnubusiga kō ǃkharu tsî ǁîgu ǂgomǂgomsasiba gere mû. (Mat. 26:40; Mrk. 10:13, 14; Jhn. 6:66-69) ǁÎb di ǀuniga ǃui ǀgoraǃgâheb nîs aiǃâb ge Jesuba nē ǂgomǂgomsa khoegu ǃoa ge mî: “Xawe ta ge sago “khoego” ti ge ǂgai, ti Îba xu ta ge ǁnâun hoana ta ge sago ge ǂanǂan xui-ao.” (Jhn. 15:15) Jesub di ǀhōsagu ge amabes ǃnâ ǂkhâǃnâs ase ǁîb ǃoa-ai ge ī i. ǁÎgu ge aoǁnâ sîsenni ǃnâ gere mābi ǂkhâǃnâs ge kai ǂkhîba gere mābi.​—Luk. 10:17, 21.

¹³ Jesub ge ǁîb apostelgu xōǀkhā noxoba ǀnî hâ ǀhōsana ge ūhâ i hîna ge ǁîb aoǁnâ sîsenni tsî ǀnî hâ xūn tsîn ǀkha  gere huibi na. ǀNîn ge ǁîn dao-amde gere ǁkhowa-ambabi îb ǁnāpa ǂû ǁkhā. (Luk. 10:38-42; Jhn. 12:1, 2) Tsî ǀnîn ge ǁîb ǀkha gere ǃnarimâ tsî ǁîn xūna ǁîb ǀkha gere ǀgoragu. (Luk. 8:3) Jesub ge ǃgâi ǀhōsana ge ūhâ i ǁîb ge ǃgâi ǀhōsa i amaga. Jesub ge ǀoasa kurusa ge ūhâ i xaweb ge ǁîb ǀhōsan hîna ǀoasa kurusa ūhâ tama hân gere mābi huiba gere ǃgôaǃgâ. ǁÎn ge ǁîba ǁîb ǂkhîba ūhâ ǀgaras ǀkha gere hui.

14-15. Mati da ǃgâi ǀhōsana nî kuru tsî matin ǁîna sada nî hui?

¹⁴ ǃGâi ǀhōsan ge nî hui da î da ǂgomǂgomsase Jehovab ǃoagu hâ. ǃGâsa-i di ǃgâi ǀhōsa kai ǂgao da ga o, o da ge nî ǃgâi ǀhōsa i. (Mat. 7:12) Aiǁgause Elobmîs ge ra ǂkhâǃnâ da î da khoraǂuisen ǃgâsan hîna ǂhâsib ‘ǃnâ hân’ ǃoa-ai. (Efe. 4:28) ǃGâsa-i hîna sada ǀhaohâb ǃnâ hâ i hui ǁkhā da a i xa ǂâi re? ǀAesen hâ tamas ka io kaira ǃgâsa-e da ǂhân hâ xūna ǁamaxū ǃkhais tawa sī a ǁamaba ǁkhā? Mari ǃgomsiba ūhâ omaris ǁanina da ǂûǀhaos amsi a ǁkhau ǁkhā? Mati da jw.org^® tamas ka io JW Librariba da ga sîsen-ū ǁkhā o, o sada ǃgâsana a hui ǁkhā în ǂan matin gagasi xūna a ôaǃnâ ǁkhāsa? Nau ǃgâsana huis ǀkha da ga ǀhape o, o da ge ǂkhîba nî ūhâ.​—ǃNǃkh. 20:35.

¹⁵ ǀHōsan hîna da ra kurun ge nî hui da ǃgomsina da ga hōǃâ o, nēs ge ǂkhîba nî mā da. Elihub ge Jobi ǃgomsina gere ǃgâ khamin ge sada ǀhōsan tsîna sada ǃgomsina ra ǃgâ mîba nî da ra ǁaeb ai.  (Job. 32:4) Sada ǀhōsan sada mîmâiga nî dīsa da ge ǂgao tama hâ. Xawe da ge ǃgâise ra dī ǁîn ra mā Elobmîs ai a ǃgaoǃgaosa ǁgaumâide ǃgâs ǃnâ. (ǂKhm. 15:22) Gao-aob Davib ge tsamtsiǃnâsib ǀkha huiba ǁîb ǀhōsana xu a ūǃoas ǁkhās khami da ge sada tsîna ǃgomsina da ga ūhâ on sada ǀhōsana ra mā huiba nî ūǃoa. (2Sam. 17:27-29) Nē ǃnoa ǃgâi ǀhōsan ge ǀkhaeba Jehovaba xu.​—Jak. 1:17.

16. Filipeǁîn 4:6, 7 ǃoagu i tae-i ǀgui-e ǂkhîba nî mā da? ǁGuiǃā re.

¹⁶ Khomai re Filipeǁîn 4:6, 7. Tae-i ǃaromab Jehovaba ra mî ǂkhîb hîna da “Xristub Jesub ǃnâ-ū” ra hōbab nî mā da di? Jesub Jehovab mîǁguigu ǃnâ ra ǀhuru ǃâba da ga ǁnâuǃā tsî ǂgomǃgâsiba ūhâ o, o ǀgui da hâhâ ra ǂkhîba sada ǂâiǀgaub tsî tsâsigu tsîn ǃnâ nî ūhâ amaga. Aiǁgause, Jesub xoremarib ǃnâ-ūn ge sada ǁorena a ǀûba-e ǁkhā. (1Jhn. 2:12) Nē ǂâis ge ǂkhîba ra hauba da. Elob Gaosib di Gao-aob aseb ge Jesuba hoaraga ǃgomsin hîna ǁGâuab xa ra ǃaroma-ena nî ūbē. (Jes. 65:17; 1Jhn. 3:8; J.ǂHa. 21:3, 4) Nēs ge ǃgâi ǃâubasensa ra mā da. Tsî Jesub ge ǃgom sîsen-e a mā da xaweb ge ra huida nē ǀuniga tsēdi ǃnâ ra ǂkhâǃnâ dase. (Mat. 28:19, 20) Nēs ge ǁkhoaǂgaosiba sada ǃnâ ra omkhâi. Sâsasib, mûǂuigu tsî ǁkhoaǂgaosib tsîn ge xūn hîna da ǃgaoǃgaodi ase sada ǂkhîb ǃaroma ūhâna.

17. (a) Matin Xristeǁîna ǁîn ǂkhîba a ūhâ ǀgara ǁkhā? (b) Johaneb 16:33 ǃnâ i a mîsa khami da tae-e nî dī ǁkhā?

¹⁷ Nēs ǃoagu da mati sada di ǂkhîba a ūhâ ǀgara ǁkhā ǂgui ǃgomsina da ga hōǃâ o? Jesub ge dī xūna ǁgaes ǃnâ-ū da ge nēsa a dī ǁkhā. ǂGurose, ǀgores ǃnâ mâǀgaibe re. ǀGamǁîse, Jehovaba ǁnâuǀnam tsî ǁkhoaǂgaosib ǀkha aoǁnâ re mâsigu ga ǃgom xawe. Tsî ǃnonaǁîse sa ǀhōsan di huiba ôa re în sadu ǃgomsin ǀkha hui du. Ob ge Jehovab ǂkhîba sada ǂâidi tsî ǂgaogu tsîna sâsasiba nî mā. Tsî da ge Jesub khami hoa ǃgomsina nî mâǃoa.​—Khomai re Johaneb 16:33.