1. Elob ǃoaba-aon hoana tae-e ra dī ǂgao tsî tae-i ǃaroma? (Tsoatsoas ai hâ ai-īsiba mû re.)

JESUB XRISTUB ge ǁîb saosabena ge mîmā în ‘ǃgûǂoa tsî hoa ǁaede ǁkhāǁkhāsabedī.’ (Mat. 28:19) Hoa ǂgomǂgomsa ǃoaba-aon Elob din ge ra ǁkhāǁkhāsen ǂgao matin ǁîn “ǃoabasa” nî ‘dīǀoaǀoasa’. (2Tim. 4:5) Nē sîsenni ge kaise ǂoaǂamsa tsî ǁgariǁgarisa nau sîsenan hoan ǂam-ai. Xawe i ge ǀnî ǁaeb ai a ǃgom ǁkhā nē sîsenni ǃnâ khōraǂuisensa.

2. Mâ ǃgomsina da ra hōǃâ sida ǃoabasa da ra dīǀoaǀoa hîna?

² ǀNî hâ ǂhâǂhâsa xūn ge hâ sida ǁaeb tsî ǀgaib tsîna ǂhâ hâna. ǀNîsi da ge ǂgui ǁaeba ra sîsen sida tsî sida omaris di ǂhâsigu tsîna kōǃgâs ǃgao. ǀNî hâ ǃgomsin tsîna da ge ǀnîsi ūhâ sida ǁgaumâidi, ǀaegu, ǂâiǂhansendi tsî kairasis xa ra ǃaromahe ǃgomsigu. Mati da sida ǃoabasa a dīǀoaǀoa ǁkhā nē ǃgomsina da ra hōǃâ hîna?

3. Tae-e da a mî ǁkhā Jesub mîdi hîna Mateub 13:23 tawa ra hō-e di xa?

³ Sida mâsib ga mā-am tama io Jehovab ǃoabas ǃnâ ǃnāsase dīsa, o da ge tā nî ǂkhabuǂâi. Jesub ge ge ǂan i mâ khoe-i hoa-i ge ǀnōsa ǁaeba aoǁnâ sîsenni ǃnâ ūhâ tide. (Khomai re Mateub 13:23.) Jehovab ge sida ǃoabas ǃnâ da ra dī xūn hoana ra ǃgôaǃgâ nēsa da ga sada ǁkhāsib hoab ǀkha dī o. (Heb. 6:10-12) Xawe da ge a ǂâi ǁkhā sida mâsib nî mā-am dasa ǃnāsase dīsa. Nē ǁkhāǁkhāǃâs ǃnâ da ge nî mû mati da sida ǃoabasa ǂgurose mâi, ǂhani da ra xūna xu ǂgōsen tsî aoǁnâ sîsenni tsî ǁkhāǁkhā ǀgaub tsîna nî ǃgâiǃgâi ǀgausa. ǂGurose sida ǃoabasa dīǀoaǀoasa tae-e ra ǂâibasen?

4. Sida ǃoabasa dīǀoaǀoasa tae-e ra ǂâibasen?

 ⁴ Sida ǃoabasa dīǀoaǀoas ǃgao da ge ǀoasase aoǁnâs tsî ǁkhāǁkhās ǃnâ nî ǁguiǂgāsen. Xawe nēs ge ǁaeba xu hâ tama hâ. Aoǁnâ da ra ǃaromas ge Jehovaba kaise a ǂhâǂhâsaba. Jehovab tsî sida ǀgūkhoen tsîna da a ǀnam amaga da ge sida ǂgaob hoab ǀkha Xristeǁî ǃoabas ǃnâ ra ǁhao. * (Markub 12:30, 31; Kol. 3:23) Eloba ǂgaob hoab ǀkha ǃoabas ge ra ǂâibasen nēsa da sida ǁkhāsib tsî ǀgaib hoab ǀkha nî dīsa. Aoǁnâ sîsenni ǃnâ ǁhaos di aiǂhanuba da ga ǃgôaǃgâ o, o da ge ǃgâiǂhôasa ǂgui khoen ǀkha ra ǀgoragu.

5-6. ǂKhō re mati i khoe-i hîna ǃnāsa ǁaeba ūhâ tama hâ-e aoǁnâ sîsen-e ǂgurose nî mâi ǀgausa.

⁵ ǂÂi re ǂkhamkhoeb hîna gitarsa ǀhurus xa a ǃgâibaheba. ǁÎb ge mâ ǁaxasib hoab tawa musik-e ǀhurus xa a ǁkhoaxabahe. ǁAeb ǀkhab ge sâǁaeb ǃnâ gitarsa ǀhurus sîsen-e ge hō. Xaweb ge ǂâusa mari-e kuru tama hâ ǁîb ǂhâsiga kōǃgâs ǃgao. ǁÎb ge ǁamaxū ǃkhaib tawa mariǃkhōǃoa-aob ase ra sîsen Mantaxtsēsa xu Fraitaxtsēs kōse. ǃNāsa ǁaebab ǁamaxū ǃkhais tawa hâ xaweb ge noxoba musik-e a ǀnam. ǁÎb musik ǀgaubab ge ra ǃgâiǃgâi ǂgao, îb ǀoasase musik-e dī. ǁÎb ge mâ ǃēs hoasa musik-e ra ǀhuru, gaxu ǁae tamab ga ra i xawe.

⁶ ǁNās ǁkhās khami du ge ǀoro ǁaeba ǀnîsi aoǁnâ sîsenni ǃnâ ra ǁhao. Xawe du ge nēsa dīsa kaise a ǀnam. Sadu ǀgauba du ge ra ǃgâiǃgâi khoen ǂgaoga ǃgâiǂhôas ǀkha tsâǀkhās ǃgao. ǂGui xūn hîna da nî dīna da ūhâ xawe da ge aoǁnâ sîsen-e ǂgurose nî mâi.

7-8. Mati da Jesub ge aoǁnâ sîsenni ǃoagu ūhâ i ǀgauba a ǁgae ǁkhā?

⁷ Jesub ge ǃgâi aiǁgausa ge ǁgau ǁîb ge aoǁnâ sîsenni ǃoagu ūhâ i ǀgaub ǃnâ. ǁÎb ûib ǃnâ ge ǂhâǂhâsa i xū-i ge Elob  Gaosib xa hoaǁae ǃhoasa. (Johaneb 4:34, 35) ǁÎb ge ǃnū daoba gere ǃgû ǂgui khoena aoǁnâbas ǃaroma. Hoaǁaeb ge ǃēsa gere sîsen-ū khoena aoǁnâbasa ǁîn omdi ǃnâs tsî khoenab gere ǀhao-ūba. Jesub ge ǁîb ûib ǃnâ gere dī xūn hoan ge ǁîb ǃoabasa gere ǂkhâǃnâ.

⁸ Xristuba da ge a ǁgae ǁkhā tsî mâ ǃēs hoasa nî sîsen-ū khoena ǃgâiǂhôasa aoǁnâbasa. Sida ǁaeb tsî ǁkhāsib tsîna da ge ra mā aoǁnâ sîsenni ǃnâ ǁhaos ǃaroma. (Markub 6:31-34; 1Pet. 2:21) ǀNîn ge ǀhaohâb ǃnâ ǀō-aisa aimâba-aon, ǁnaetisa aimâba-aon tamas ka io huiǃnâra aimâba-aon ase ra sîsen. ǀNîn ge ǀni hâ gowaba ge ǁkhāǁkhāsen tamas ka io aoǁnâ-aon di ǂhâsib hâ ǃāsa ǃoa ge doe. ǃNāsa aoǁnâ sîsenni ge aoǁnâ-aon hîna ǁkhāsiban ūhâ tama hâ xawe ra aoǁnân xa ra dīǀoaǀoa-e. ǃNāsase da ga dīs tamas ka io ǀorose xaweb ge Jehovaba ǂgaoǀkhā da tama hâ î da dīǁkhā da as xa ǃnāsase dī. ǁÎb ge ra ǂgao î da hoada sida ǃoabas ǃnâ ǃgâiaǂgao ‘ǃgâiǂhôas ǃgâiǃō hâ Elob disa’ da ra aoǁnâ hîna.​—1Tim. 1:11; Deu. 30:11.

9. (a) Pauluba mati aoǁnâ sîsen-e ǂgurose gere mâi ǀnî hâ sîsengab gere dī xawe? (b) ǃNaeǃkhaidi 28:16, 30, 31 sa tae-e Paulub ge aoǁnâ sîsenni ǃoagu ūhâ i ǀgaub xa ra ǁgau?

⁹ Apostel Paulub ge ǃgâi aiǁgausa ge ǁgau aoǁnâ sîsen-e ǁîb ûib ǃnâ ǂgurose mâis ǃnâ. Korintes ǃnâb ge hâ io, ob ge ǀoro mari-e ge ūhâ i tsî ǁnās ǀkha tente gere kuru îb mari-e hō ǁkhā. Xawe nē tente kurus sîsen-eb ge ǂgurose ge mâi tama hâ i. Nē sîsenni ge aoǁnâ sîsenni ǃgao gere huibi îb Korinteǁîna ‘xū o ǃnâse’ ǃgâiǂhôasa aoǁnâba. (2Kor. 11:7) ǀNî hâ sîsengab gere dī xaweb ge Pauluba aoǁnâ sîsen-e hoaǁae ǂgurose gere mâi tsî sâtsēs ais tsîna gere aoǁnâ. ǁÎb mâsib ge dawa o, ob ge Pauluba ǃnāsa ǁaeba aoǁnâ sîsenni ǃnâ gere ǁhao. ǁÎb ge “mîs ǀkha ge ǀhawe i, Jodeǁînab nî Jesub a Xristu ǃkhaisa ǃkhō-ambase.” (ǃNǃkh. 18:3-5; 2Kor. 11:9) Egab ge ǀgam kurikha Romes ǃnâ oms ǃkhōsis ǃnâ a ūhe o, ob ge sari-aona gere aoǁnâba tsî sîǂkhanide gere xoa. (Khomai re ǃNaeǃkhaidi 28:16, 30, 31.) Paulub ge ǀnî hâ xūna ǁîb aoǁnâ sîsenni ǂam-ai ge mâi tama hâ i. ǁÎb ge ge xoa: “Nēti ī ǃoaba-e ge . . . . ūhâ amaga ge tsânaǁkhui tama hâ.” (2Kor. 4:1) Paulub khami da ga ǀnî hâ sîsenga dī xawe da ge Gaosib sîsenga ǂgurose sida ûib ǃnâ nî mâi.

10-11. Mati da sida ǃoabasa a dīǀoaǀoa ǁkhā sida ǂurusib ga mā-am tama i xawe?

¹⁰ Omsa xu oms ǀkha da ga aoǁnâ hō tama io sida ǂurusib xa ǃaroma-e hâse, o da ge ǀnî hâ ǀgaugu aoǁnâs digu ǃnâ a ǁhao ǁkhā. ǃKharu ge ǁaeb Xristeǁîn ge khoenan gere ǀhao-ū ǃkhais hoas tawa gere aoǁnâ. ǁÎn ge mâ ǃēs hoasa gere sîsen-ū amab xa ǃhoasa, omsa xu oms ǀkhas, ǃgangu ǃnâs tsî khoenan gere ǀhao-ū ǃkhais hoas tawas tsîna. (ǃNaeǃkhaidi 17:17; 20:20) ǀHapese da ga ǃgû hō tama io, o da ge khoen ǂguise ra ǃgû ǃkhaib tawa ǂnû tsî a aoǁnâ ǁkhā. Sîǂkhanide xoas tamas ka io ǁâǁâpab ǃnâ-ūs tsîna da ge a aoǁnâ ǁkhā. ǂGui aoǁnâ-aon hîna omsa xu oms ǀkha a aoǁnâ ǁoan ge noxoba ra ǃgâiaǂgao ǀnî hâ ǀgaugu ǃnân ra aoǁnâ o.

¹¹ Sida ǂurusib ǂam-ai da ge noxoba sida ǃoabasa a dīǀoaǀoa ǁkhā. Apostel Paulub aiǁgausa ǃoa ǁkhawa kō re. ǁÎb  ge ge mî: “Hoana ta a ǁkhā ǁîb, tita ra ǀgaiǀgaib, Xristub ǃnâ.” (Fil. 4:13) Paulub ge ǀgaiba ge ǂhâ hâ i ǁîb ǃnarimâ sîsenni ǃnâb ge ǀaesen o. ǁÎb ge Galateǁîna ge ǁguiǃāba: “ǁGans di ǂkhabusasib ǃnâ ta ǂguro ǃnāsa ǃgâiǂhôasa gere aoǁnâba dusa.” (Gal. 4:13) ǁNās ǁkhās khami i ge sida ǂurusib mâsiba ǃēsa nî mā da î da nau khoena ǃgâiǂhôasa aoǁnâba aiǁgause, ǀaeǃkhō-aob, ǀaedī-aob tsî ǀnî hâ khoen hîna ra kōǃgâ dan. ǂGui khoen ge sîsenni tawa hâ ǁîn omdi tawa î ra aoǁnâ-e o.

12. ǀGuiǃgupu ûiba ūhâsa tae-e ra ǂâibasen?

¹² Jesub ge ge mî: “Mûs ge soros di ǃamamǀaesa, tsîs ga mûs âtsa ǂhauǃnâo, os ge sa soros hoaragasa nî ǃnâ.” (Mat. 6:22) Tae-eb gere ǂâibasen? ǁÎb ge ge mî î da sida ûiga ǀguiǃgubuse ūhâ, tamas ka io ǀgui mîǁguib ai ǀgui sida ǂâisa ǂnûi. Jesub ge aitsama aiǁgausa ge mā ǁîb ûiba aoǁnâ sîsenni ai mâis ǃnâ-ū tsî ǁîb ǁkhāǁkhāsabega ge ǁkhāǁkhā îgu Jehovaba ǃoabas tsî ǁîb Gaosib tsîn ai ǁîgu ǂâide ǂnûi. Jesuba da ge ra ǁgae tsî aoǁnâ sîsen-e ǂgurose sida ûib ǃnâ ra mâi tsî ‘ǂgurose ǁnâi Elob di gaosib tsî ǁîb di ǂhanu-aisib tsîkha ra ôa.’​—Mat. 6:33.

13. Tae-e nî hui da sida Xristeǁî ǃoabas ai ǂâide ǂnûisa?

¹³ ǀGui ǀgaub hîna da sida ǃoabas ai sida ǂâisa a ǂnûi ǁkhās ge sida ûiba ǀguiǃgubuse ūhâs ǃnâ-ū, nēs ge nî hui da  î da khoena hui în Jehovaba ǂan tsî ǀnam. * Aiǁgause sida sîsen ǁaeba da a ǀoroǀoro ǁkhā î da ǃnāsase wekheb ǃnâ aoǁnâ sîsenni ǃnâ ǁhao? Sâǁaeb ǃnâ da ra dī xūn tsîna da a ǀoro kai ǁkhā?

14. ǀNî khoe-aogura mâ ǀkharaǀkharana ge dī î ra ǃnāsa ǁaeba aoǁnâ sîsenni ǃnâ ǁhao ǁkhā?

¹⁴ ǀNî ǀhaohâb ǃûi-aob hîna Elias di ǀon hâb tsî ǁîb taras tsîn ge sao ra-e ge dī. ǁÎb ge ra ǁguiǃā: “ǁNā ǁaeb aim ge aimâba-ao sîsen-e ge dī ǁoa i xawem ge xū-e ge dīǁkhā i, im ǃnāsa ǁaeba aoǁnâ sîsenni ǃnâ ǁhao. ǂKhari xūronam ge ge dī tsoatsoa im ǃnāsa ǁaeba aoǁnâ sîsenni ǃnâ ǁhao. Aiǁgause, sim mari-e ra sîsen-ū ǀgaubam ge ge ǀoro kai, sâǁaeb ǃnâm ra dī xūn tsînam ge ǀoroǀoro tsî sim ǀhonkhoeba ge ǂgan î-i sim sîsen ǁaeba ǀkharaǀkharahe îm ǃnāsa ǁaeba aoǁnâ sîsenni ǃnâ ǁhao ǁkhā. Nēs ge ge dī îm ǃui ǁaeb ai aoǁnâ ǁkhā, Elobmîsa khoena ǁkhāǁkhā ǁkhā tsî ǀgam ǃnāra ǁkhâb ǃnâ wekheb ǁaegu aoǁnâ sîsenni ǃnâ ǁhao ǁkhā. Nēs ge kaise ge ǁkhoaxa i.”

15-16. 1 Timoteub 4:13, 15 ǃoagu da mati sida ǀgauga aoǁnâ-aon ase nî ǃgâiǃgâi? (Mû re “ Mîǁguigu hîna ti aoǁnâs sîsenni ǃnâ a hui te ǁkhāgu” di hâ boksisa.)

¹⁵ ǀNî hâ ǀgaub hîna da sida ǃoabasa a dīǀoaǀoa ǁkhāb ge sida di aoǁnâ ǀgauga ǃgâiǃgâis ǃnâ-ū. Khoen hîna ǀnî sîsena ra dīn ge ǁkhāǁkhāhesa ǂhâ hâ, în ǁîn sîsen-e ǃgâi ǀgaub ǃnâ dī ǁkhā. Nēs ge Gaosib aoǁnâ-aon xas tsîna a ama. Aoǁnâ ǀgauga da mati nî ǃgâiǃgâi  ǀgausa da ge hoaǁae nî ǁkhāǁkhāsen.​—ǂKhm. 1:5; khomai re 1 Timoteub 4:13, 15.

¹⁶ Xawe mati da sida ǃoabas ǃnâ nî ǃgâiǃgâisen? Xristeǁî ûib tsî aoǁnâ sîsenni wekheb ǁaegu hâ ǀhaos tawa da ra ǁkhāǁkhāsen xūna da ge nî ǃgaoǃgâ. Nē ǀhaos ge ǂûǂûsa xūna ra ǁkhāǁkhā da aoǁnâ sîsenni ǃnâ da a sîsen-ū ǁkhāna. Aiǁgause, aiǂnû-aob ga ǃhoasa goro mā ǃgâsa-e ga ra ǁnama o, o da ge ǁnāpa xus tsîna hui da ǁkhā a xūna a ǁkhāǁkhāsen ǁkhā. Nēsa da ge khoe-i ǀkha da ga ǃgâiǂhôasa ǀgoragu ǁaeb ǃnâs tsîna a sîsen-ū ǁkhā. Sida aoǁnâ sîsenni ǂnūbis mûǂam-aoba da ge huiba a ǂgan ǁkhā tamas ka io ǂansa ūhâ aoǁnâ-ao i, aimâba-ao i tsî ǃnarimâra mûǂam-aob tsîn ǀkha aoǁnâ sîsenni ǃnâ a sîsen ǁkhā. Nē xūna da nî sîsen-ū ǀgauba da ga ǂan o, o da ge sida aoǁnâs tsî ǁkhāǁkhās sîsenni xa nî ǃgâibahe.

17. Tae-e da nî hōǃâ sida aoǁnâ sîsen-e da ga dīǀoaǀoa o?

¹⁷ Kaise i ge a ǃgâi Jehovab ǁîb ‘ǀhaosîsenao da’ ase ra mû da o. (1Kor. 3:9) ‘ǂHâǂhâsa xūna da ga mûǂan’ tsî Xristeǁî ǃoabas ai ǂgomaiǂnûi o, o da ge Jehovaba ‘ǃgâiaǂgaob ǀkha’ ra ǃoaba. (Fil. 1:10; Psa. 100:2) Elob ǃoaba-aon ase da ge ǂgomǃgâsiba nî ūhâ ǁîb ǀgaiba nî mā da ǃkhaisa sada ǃoabasa dīǀoaǀoas ǃnâ sada ǃgomsin ǂam-ai. (2Kor. 4:1, 7; 6:4) Sada mâsib ga ra mā-am da o kaises tamas ka io ǂkharirose aoǁnâsa, o da ge ǃaromasa nî ūhâ ‘ǃgâiaǂgaos’ disa sada ǃoabas ǃnâ da a ǀoasa amaga. (Gal. 6:4) Sada ǃoabasa da ga dīǀoaǀoa o, o da ge ra ǁgau Jehovab tsî sada ǀgūkhoen tsîna da a ǀnam ǃkhaisa. “Nēnats ga dīo, ots kom sa-aitsama tsî ǁnâu tsi ran tsîna nîra ǃgâiǃō kaio.”​—1Tim. 4:16.