1, 2. Mîǁguiga da ga sada ûib ǃnâ di o, o i tae-i ǃaroma a ǃgâi Eloba ǃoa ǃgâsa? (Tsoatsoas ǃnâ hâ ai-īsiga mû re.)

ǂKHAMKHOETS ga ra o ,ots ge ǀnai ǂgui ǀapemāde sa ûib xa hānîǁaeb ǃgao ge hō. ǁGauǃnâ-aon, ǀapemā-aon, tamas ka io ǀnī khoen ge ra ǂkhâǃnâ tsi, îts ǀgapi ǁkhāǁkhāsa ôa tsî ǂgui mari-ets nî hō xu sîsenni tsîna. Xawe Jehovab ge ra ǂkhâǃnâ tsi îts ǀnî hâ daoba sao. ǃGâi ûiba ūhâs ǃaromab ge ǁîba ra ǂhâba its sa skol sîsen-e ǂhâǂhâsase ū. Skoli ǀkhats ga toa ots ǃgâi sîsen-e nî hōse. (Kol. 3:23) Xawe sa ûibats ga ǀguiǀgui o, ob ge ra ǂkhâǃnâ tsi its huitsi nî ǁgaragu xa daoǁgauhe. Nēs ge ǁîb ǂâibasens tsî ǁîb ǂâis tsîna ǃkhōǂgā hâ nē ǀuni tsēdi ǃnâ.—Mat. 24:14.

² ǂÂis ǃnâ ūhâ re Jehovab hoa xūna a ǂansa, ǁîb hānîǁaeb xa a ǂan amaga tsî mâǁaeb nē ǃhūbaiba nî ǀams tsîna. (Jes. 46:10; Mat. 24:3, 36) ǁÎb ge hoada a ǂan—tae-i ama ǂkhîba ra mā das tsî tae-i ra tsûaǂgao tsî ǂkhîoǃnâ kai das tsîna. ǁNā-amaga matikōse di ga khoen  ǀapemāde a ǃgâi xawe di ga Elobmîs ǀkha ǃgûǀhao tama io, o i ge gā-aisiba a ǀkhai.—ǂKhm. 19:21.

3, 4. ǃGâi tama mîǁguiba mati Adammi, Evas tsî ǁîra surib tsîna ge tsâǀkhā?

³ Tsū mîǁguigu ge khoen tsoatsoas ǃnâ ǃgâi tama ǀamǂoasa ge ūhâ i ǁGâuab ge ǁnâs ǃnâ ǃâ-i amaga. ǀGapi ǃgôasen aob ǁGâuab ge Evas tsî ǁîs aob tsîna ge mîba ǂkhîba ra ge nî ūhâ aitsama ra ga ǁhûibasen o. (Gen. 3:1-6) Xawe amabes ǃnâb ge ǁGâuaba ǁîb ǃgâib xa ǀgui gere ǂâi. ǁÎb ge Adammi, Evas—tsî ǁîra surib—tsîn ǁîba Elob ǃoa-ai nî ǀgoreǀî ǃkhaisa ge ǂhâba hâ-i. Xawe tae-eb ge khoesiba dība? Jehovab ge khoena ǂhân hâ xūn hoana ge a mā—ǁî-aogu ra tsî îsa ǃhanab tsî ǀoasa sorodi ǀamose nî ûidi.

⁴ Xawe ra ge Adammi tsî Evas tsîra Elob ǃoa-ai ge ǁnâuǀnamoǃnâ. ǀAmǂoas ge ǂan da ase ge ǃaoxa-i. Hais hîna ǁhâǁnâhe hâs khami ra ge ǁîra ǂaub ǀkha ge ǁō tsoatsoa. ǁÎra surib tsîn ge nēs xa ge tsâǀkhāhe. (Rom. 5:12) Xawen ge ǂgui khoena noxoba ra ǁhûi Eloba ǃoaba tama isa. ǁÎn ge ǁîn ûiga ǁîn ǂhâba hâ khami ra ûi ǂgao. (Efe. 2:1-3) ǀAmǂoas ge ra ǁgau ‘gā-aisi-i xare-i . . .ge ǃkhūb ǃoa-ai a ǀkhai.’—ǂKhm. 21:30.

5. Jehovaba tae-i ǂgomǃgâsiba ǁîb kurusaben ǃnâ ge ūhâ i tsî nē ǂgomǃgâsiba mati ge ǁgauhe?

⁵ Xaweb ge Jehovaba ge ǂan i ǀnî ǃgâi ǂgaoga ūhâ khoen ǂkhamkhoena ǃkhōǂgā hâse nî ôa bi tsî ǃoaba bi ǃkhaisa. (Psa. 103:17, 18; 110:3) ǁNā ǃnoa khoen ge ǁîba kaise ra ǂkhî kai. Nē khoen ǁaeguts da ǃgôasen? Di-i nî is ga o, ots ge satsa ǂgui ‘ǃgâi xūna’ Eloba xu ra ǃkhōǃoa ǂkhîba ra mā tsi na. (Khomai re Psalmdi 103:5; ǂKhm. 10:22) Nēsi da nî mûsen ge nē ‘ǃgâi xūna’ ǂgui gagasi ǂûn, ǃgâi ǀhōsan, ǃgâi sîsen ra mîǁguigu tsî ama ǃnorasasib tsîna ǃkhōǂgā hâ.

6. Mati iots sa gagasi ǂhâsiga nî kōǃgâ tsî Jehovaba mati ra kōǃgâ tsi?

⁶ Xamanina xu da ge a ǀkhara gagasi ǂhâsiga da ūhâ amaga. (Mat. 4:4) ǃGâi ǂgaob ǀkhats ga Eloba ǃgâ o, ots ge gā-aisib tsî ǂkhîb tsîna nî hō. “ǃGâiǃōn ge hâ gagas ǃnâ ǀgâsana” dib ge Jesuba ge mî. (Mat. 5:3) Elob ge sa gagasi ǂhâsiga ǁîb mîs tsî “ǂgomǂgomsa tsî gā-ai ǃgāb” ra mā ǂû-i ǃnâ-ū ra dīǀoaǀoa. (Mat. 24:45) Nē ǂû-i ge kaise a ǀō-aisa.—Jes. 65:13, 14.

7. Matits a ǀama ǁkhā gagasi ǂûn Elob da māna xu?

⁷ Eloba xu ra hā gagasi ǂû-i ge gā-aisib tsî ǃgâi ǂâi ǀgaub tsîna ra mā, nēs ge ǂgui ǀgaugu ǃnâ a ǁkhauba tsi ǁkhā. (Khomai re ǂKhoamîdi 2:10-14.) Aiǁgause, nēs ge ǂhumi ǁkhāǁkhān Kuru-ao î ge a ǀkhai di ra mîs tsîna ra mûǂan kai da. Mari-i tsî ǃkhūsis tsîn ge ǂkhîba ra mā di ra mî ǂhumib tsîna xu ra ǁkhauba tsi. Nēs ge ra hui îts ǃgâi tama tanisen ǀgaub tsî turagu tsîna mûǂan tsî ǁnāga xu ǂgōsen. Elosi  gā-aisib tsî ǂâi ǀgaub tsîna ôa tsî nēna ǀō-aisase mû re. Nē ǀgaugats ga ra omkhâi o, ots ge nî mû Jehovab ge a ǀnam tsi tsî ǃgâib ǀguiba sa ǃgao ra ǂgao.—Psa. 34:8; Jes. 48:17, 18.

8. Tae-i ǃaromats nēsi Eloba ǃoa nî ǀgū tsî nēsa xuts mati hānîǁaeb ǃnâ nî ǀama?

⁸ ǀGūǁae î ge ǁGâuab ǃhūbaiba ǀamsa nî hō tsîb ge Jehovab ǀguiba nî sa sâu ǃkhai-i. ǁAeb ge nî hā ǁîb ai da nî ǂgomaiǂnûiba sida ǂû-i hoa i ǃgao. (Hab. 3:2, 12-19) Nēsits ge sa ǀhomsi ǁGûb ǃoa nî ǀgū tsî sa ǂgomǃgâsiba ǁîb ǃnâ nî ǀgaiǀgai. (2Pet. 2:9) Nēsats ga dī o, ots ge psalmdi xoa-aob Davib gere tsâ khami nî tsâ: “ǃKhūba ta ge hugaǀgui ti aiǃâ ūhâ, ti amǀkhāb tawab hâ amaga ta ǁnobe tide.”—Psa. 16:8.

9. (a) Johaneb 6:44 ǃoagub Jehovaba tae-e ra dī? (b) Nau ǀHûǀguitimî-aona ǀhao-ūsa tae-i ǃaroma a ǀō-aisa?

⁹ Jehovab ge ǁîb ra mā-am khoena ra ǂgae în ǁîb gagasi omaris ǁanin ǃâ kai. (Khomai re Johaneb 6:44.) ǂGuro ǃnās asets ga khoe-i hîna Jehovaba ǃoaba tama hâ-i ǀkhā ǀhao o, ots tae-e nē khoe-i xa a ǂan? Nēs ge Jehovab a ǂan tsî ǀnam khoe-ets ra ǀhao-ūsa xu ra ǀkhara. Nē khoe-i ga ǀnî hâ khaoǃhūb, ǃhaos tamas ka io ǃāsa xu ga ra hās tsîna da ge ǀnai ǁî-i xa a ǂan tsî ǁî-e sida xa.

10, 11. Jehovab ǃoaba-aona tae-e ǀguiǃnâxase ūhâ tsî nēsa xu da mati ra ǀama?

¹⁰ Aiǁgausets ge ǀnai nau khoe-i “gowaba” ra mûǂan, nēb ge “ǃanu amǁgauga” amab di gowaba. (Sef. 3:9) Tsîts ge ǁnās ǀkha a ǂan nau khoe-i tae-e ra ǂgomsa, Elob, ǀgaugu tsî hānîǁaeb xas tsîna. Nēn ge kaise a ǂhâǂhâsa ǂansa, nēs ǂgomǃgâsiba ra omkhâi amaga. Tsî hâ hâ nî ǀō-aisa ǀhōsagusis tsîna.

¹¹ Tsū tama î ge hâ Jehovab ǃoaba-aosets ge kaise a ǀō-aisa ǀhōsana ūhâ hîna ǃhūbaib ǂhawase hâna di mîsa. ǂGuinats ge noxoba nî ǀhao-ū.  Jehovab ǃoaba-aon ǂam-ai i ham-i tsîna nē ǀō-aisa ǀkhaeba ūhâ?

12. Mâ gagasi mîǁguigats a dī ǁkhā?

¹² Khomai re Aoǁnâ-aob 11:9–12:1. ǀGui tamas ka io ǃnāsa gagasi mîǁguigats ūhâ dīǀoaǀoa ǂgaots ra ga? ǀNîsits ge Elobmîs ǃâ-e tsēs hoasa ra khomai ǂgao. Tamas ka io sa ǃhoa ǀgaub tsî ǁkhāǁkhā ǀgaub tsîna ra ǃgâiǃgâi ǂgao. ǀNîsits ga nēn ǃnâ ǃgâise dī o tsîn ga khoena koa tsi o, ots mati ra tsâ? Nēs ge kaise ǃgâise ra tsâ kai tsi xū-ets go dīǀoaǀoa amaga. Nētits ge tsâ tide Jehovab ǂâisats ǂgurose ra mâi amaga Jesuba ǁgaes ǃnâ-ū.—Psa. 40:8; ǂKhm. 27:11.

13. Eloba ǃoabasa mâ ǀgaub ǃnâ a ǀō-aisa?

¹³ Gagasi mîǁguigu ai ǂgomaiǂnûis ǃnâ-ūts ge ǃgâiaǂgaoxa sîsen-e ra dī, nēs a dīǀoaǀoasa amaga. Apostel Paulub ge ge xoa: “Mâhō, ǁnobeǁoasase, î du ǃaruǀîǀgui ǀaro ǃKhūb di sîsenni ǃnâ, sadu sîsenni ǃKhūb ǃnâ ǁau tama ǃkhaisa du a ǂan xuige.” (1Kor. 15:58) Ûib hîna ǀgapi ǁkhāǁkhāsens tsî ǃkhūsis tsîna ūhâb ge a ǁau, ǃgâiǃō tama i hâ amaga. (Luk. 9:25) Khoeb hîna ge nēsa a ǁgaub ge Gao-aob Salomoba.—Rom. 15:4.

14. Salomob ge turaga dītsâ ǀgauba xuts tae-e a ǁkhāǁkhāsen ǁkhā?

¹⁴ Salomob hîna ge ǃkhū hâ îb ge ‘ǃgâiaǂgaoba ge ǃâitsâ îb ǃgâiba kōǀî.’ (Aoǁn. 2:1-10) ǁÎb ge ǂgui omdi tsî ǃhanagu tsîna gere om tsî ǁîb turab ǃnâ ge hâ i xūn hoana gere dī. ǁNās khaoǃgâb ge mati tsâ? ǂÂu hâse? Dīǀoaǀoasase? Tāts ge nî ǂâi tsâ. Salomob ge nēsa aitsama ge mîba da. ǁÎb ge ge xoa: “ǃNubai ta ge ge kōǀî ti sîsengu, ti ǃomkha ge dīgu hoaga tsî ǁnā xūreb, sîsen rase ta ge dība, tsî mû ǁîn hoan ge ǁau tsî ǂoaba ǃkhoeǃgons ase ge ī, tsî ǁîn ǃnâ i ge harebe-i xare-e hâ tama ge hâ i sores ǃnaga.” (Aoǁn. 2:11) Nēs ge kaise ǂoaǂamsa. Nēsats ǂgaoba ǃoa nî ū?

15. ǂGomsa tae-i ǃaroma a ǂhâǂhâsa tsî matits nēsa xu a ǀama ǁkhā Psalmdi 32:8 ǃnâ i ra mîhe khami?

¹⁵ Jehovab ge ûib ǃnâts ǃgom ǀgaub ǃnâ nî ǁkhāǁkhāsensa ǂgao tama hâ. ǂGomsats ge ǂhâ hâ Eloba ǁnâuǀnamsa tsî ǁîb ǂâisa sa ûib ǃnâ ǂgurose mâis ǃgao. Nē ǂgoms ge ǀō-aisa tsî tātsēs tsîna tsûaǂgao kai tama. Jehovab ge tātsēs tsîna “ǀnammi ǁîb ǀons ǃnâ du ge ǁgauba” ǀuru tide. (Heb. 6:10) ǁNā-amaga ǁgūtsâ re ǀgaisa ǂgomsa omkhâisa tsî mû sa ǀhomsi ǁGûb sats ǃnâ ǃgâiǃgâibasensa ūhâsa.—Khomai re Psalmdi 32:8.

16. Tae-i ǃaromats ǃnorasasiba nî ǃgôaǃgâ tsî ǃgâi ǀgaub ǃnâ nî sîsen-ū?

¹⁶ “ǃKhūb di Gagab hâpa, ǁnāpab ǃnorasiba hâ” dib ge Pauluba ge xoa. (2Kor. 3:17) Jehovab ge ǃnorasasiba a ǀnam tsî nē ǀnamma sa ǂgaob ǃnâ ge ǂgā. ǁÎb ge sa ǃnorasasibats ǃgâi ǀgaub ǃnâ nî sîsen-ūsa ra ǂgao, nēs nî ǁkhauba tsi amaga. ǀNîsits ge ǂkhamkhoen hîna ǃgâi tama ai-īsiga ra kōn, ǁgauoǃnâ ûi ǀgauba ūhân tsî ǀhubuǀhubu xūna ra sîsen-ūna a ǂan. ǁÎn ge  nē xūn ǃnâ ǀoro ǁaerob ǃgâib ǀguiba ra hō. Xawe nēs ge ǁgai ǀamǂoasa a hau ǁkhā, aiǁgause ǀaeb tsî ǁōb. (Gal. 6:7, 8) ǁÎn ǃnorasasib ge ǁîn xa ǀgui ra ǂâi kai nî.—Titub 3:3.

17, 18. (a) Eloba ǁnâuǀnamsa mati a sâu tsi ǁkhā? (b) Adammi tsî Evas tsîn ge ūhâ i ǃnorasasiba mati nētsēs khoen ūhâ ǃnorasasib ǀkha a ǀgopeǀnōhe ǁkhā?

¹⁷ Matikō khoenats a ǂan hîna ge ǀaesena Elobmîs ǁgaragan ge sao amaga? Jehovaba ǁnâuǀnams ge sida ǂurusib ǃgao a ǃgâi. (Psa. 19:7-11) Sa ǃnorasasibats ga gā-ai ǀgaub ǃnâ sîsen-ū o, Elob ǂhanugu tsî ǁgaragu ǃoagu, ots ge Elob tsî sa ǁgûn tsîna ra ǁgau ǂgomǃgâhe ǁkhāts asa. Elob ǂgaoǀkhās ge ǁîb ǂgomǂgomsa ǃoaba-aona ǀoasa ǃnorasasiba māsa, Elobmîs “Elob ôan ǂkhaisib di ǃnorasis” di ra ǁguiǃāba.—Rom. 8:21.

¹⁸ Adammi tsî Evas tsîn ge nē ǃnorasasiba ge hōǃâ. Edenni ǃhanas ǃnâb ge Eloba matikō ǁgaraga mā? ǀGuib ǀguiba. ǁÎra ge ǀgui hais ǂû-e xū ge ǂû ǁoa i. (Gen. 2:9, 17) Nē ǀgui ǃkhâikhomsa ǁgâiǀāb ase ge ī-i? Nēti î ge ge ī tama hâ i. Nēsa khoen aitsama kuru hâ ǁgaragu ǀkha ǀgopeǀnō re, hînan ǁîna ra ǁnâuǀnamga.

19. Mâ ǀgaugu ǃnâ da ǃnorasasib khoe kaisa ra ǁkhāǁkhāhe?

¹⁹ Jehovab ge ǁîb ǃoaba-aona ǃgâi ǀgaub ǃnâ ra hui. ǁÎb ge ǂgui ǁgaraga mā da tama hâ xawe ra ǁkhāǁkhā da î da ǀnammi di ǂhanuba sao. ǁÎb ge ra ǂgao î da Elob ǁgaragu ǃoagu ûi tsî ǁgai xūna ǃhui. (Rom. 12:9) Jesub ǃhommi aoǁnâs ge a ǃgâi aiǁgau ǁkhāǁkhās ǃgao, nēs ǁoreb ra tsoatsoa ǀgausa ra ǁgau amaga. (Mat. 5:27, 28) Elob Gaosib Gao-aob aseb ge Xristuba ǀasa ǃhūbaib ǃnâ noxoba nî ǁkhāǁkhā da, î-i sida tanisen ǀgauba ǁîb ǂhanu-aisib ǀkha ǀguiǃnâxa. (Heb. 1:9) ǁÎb ge ǀoasa kurus tsî ǂurusib tsîna nî mā da. ǁKhawa da ge ǁoreb tsî ǁîb ǀamǂoadi tsîna hōǃâ tide. Tsî da ge ‘ǂkhaisib di ǃnorasib’ Jehovab mîmâiba da hâba nî hōǃâ.

20. (a) Jehovaba ǁîb ǃnorasasiba mâ ǀgaub ǃnâ ra sîsen-ū? (b) Elob aiǁgausa xu da mati a ǀama ǁkhā?

²⁰ Sida ǃnorasasib ge ǀoasa tide. Nēs ge Elob tsî ǀgūkhoena ǀnamsa xu nî hâ. Jehovab ge ǁîba da nî ǁgaesa ra ǂgan. ǁÎb ge ǀoasa ǃnorasasiba ūhâ tsî ǀnammi xa ǂgaeǂguihesa ge ǁhûi ǁîb kurusaben ǀkhab ra hâ ǀgaus ǃnâ. (1Jhn. 4:7, 8) ǁNā-amaga da ge a mî ǁkhā sida ǃnorasasib ge Elob ǀnammi xa î ga daoǁgauhe o, o ǀgui sîsenǂuiba a ūhâ ǁkhā.

21. (a) Daviba Jehovab xa mati gere tsâ? (b) Tae-e da sao ra ǁkhāǁkhāǃâs ǃnâ nî ǃhoaǃgao?

²¹ Jehovab ge mā tsi ‘ǃgâi xūn’ ǂguinats ra ǃgôaǃgâ aiǁgause, gagasi ǂû-i, ǃgâi ǀhōsan, ǃgâi mîǁguigu tsî ǀoasa ǃnorasasiba ūhâs? (Psa. 103:5) ǁNās ga ra ama io, o i Psalmdi 16:11 tawa hâ ǂâide sa kai re: “Sats ge ûib di daoba nîra ǂanǂan te; ǀoasasib ǃgâiaǂgaob dib ge sa ais aiǃâ hâ, ǀnamǀnamsasigu ge sa amǀkhābǁôab ǃnâ hâ, ǀamos kōse.” Sao ra ǁkhāǁkhāǃâs ge ǃnāsase Psalmdi 16 ǃnâ hâ gagasi xūn xa nî ǃhoa. Nēs ge mati da dīǀoaǀoasa ûiba a ūhâ ǁkhā ǀgaus tsîna nî ǁgau.