2 Korinteǁîn 12:2, 3 tawab ge Pauluba ǀnî khoeb hîna ge ‘ǃnonaǁî ǀhommi kōse a ǂgaeǃapaheb’ xa ra ǃhoa. Nēba ge ham-i? Korinteǁîn ǀhaohâba ǃoab ge xoa o, ob ge apostel Pauluba ge ǁgau Elob ge ǁîba aposteli ase gere sîsen-ūsa. (2Kor. 11:5, 23) ǁÎb ge ǁnāpaxū ge mî “aidi tsî ǂhaiǂhaidi ǃKhūb didi.” Paulub ge nē xoas ǃnâ ǀnî hâ ǃgâsagu xa ǃhoa tama hâ. ǁÎb ge aitsama aidi tsî ǂhaiǂhaidi tsîna ge mû khoeb ase ra ǂgaisen.​—2Kor. 12:1, 5.

ǁNās ǀkhab ge Pauluba “ǃnonaǁî ǀhommi kōse ge ǂgaeǃapahe” tsî “paradais ǃnâ ge ǂgaeǃapahe.” (2Kor. 12:2-4) “ǂHaiǂhaidi” di hâ mîsab ge ge sîsen-ū ǁgau rase tae-i hānîǁaeb ǃnâ nî īsa.

Pauluba tae-e “ǃnonaǁî ǀhommi” ase ge mû?

Elobmîs ǃnâ î ge “ǀhomma” ama ǀhomma ǃoa a ǁnaeǁgau ǁkhā. (Gen. 11:4; 27:28; Mat. 6:26) Xawe “ǀhommi” di hâ mîs ge ǀnî hâ ǀgaub ǃnâs tsîna a sîsen-ūhe ǁkhā. ǀNî ǁaeb ai î ge khoesi ǂgaeǂguisa ǃoa ra ǁnaeǁgau. (Dan. 4:20-22) Tamas ka io Elob xa ǁîb Gaosib ǃnâ-ū ǂgaeǂguihesa ǃoa ra ǁnaeǁgau.​—J.ǂHa. 21:1.

Paulub ge “ǃnonaǁî ǀhomma” ge mû. ǁÎba tae-e gere ǂâibasen? Elobmîs ge xū-e ǃnona ǃnāde ra ǁguiǃā, nēs ge ǀarosa ǀgaiba ra ǁgau. (Jes. 6:3; Ese. 21:27; J.ǂHa. 4:8) Paulub ge “ǃnonaǁî ǀhommi” dib ge mî o, o kaise ǀgapi ǂgaeǂguisa ǃoa gere ǁnaeǁgau—nēb ge Mesiab Gaosiba hîna Jesub tsî 144 000 ǂkhauhesa ǃgâsan xa nî ǂgaeǂguiheba. (Insight on the Scriptures, Vol. 1, 1059 tsî 1062ǁî ǂhawega mû re.) Apostel Paulub ge mî khami da ge “ǀasa ǀhommi” ǃoa ra mûǂui hînab ge Eloba a mîmâiba.​—2Pet. 3:13.

O Paulub ge mî “paradais”?

Paradais di hâ mîs ge ǂgui xūna a ǂâibasen ǁkhā: (1)Khoesib mûǁae î ge “paradaisa” ǃhūbaib ǁan ǃkhaisa ǃoa ra ǁnaeǁgau. (2)Elob khoen hānîǁaeb ǃnâ nî hōǃâ mâsigu. (3)Tamas ka io ǀhommi ǃnâ nî hâ ǀkhaegu, “paradais Elob dis” hîna ǂHaiǂhais 2:7 tawa ra mîhes.​—The Watchtower, Julib 15, 2015, 8ǁî ǂhaweb, 8ǁî xoaǀgorasa mû re.

Īǁkhā as ge Paulub ge 2 Korinteǁîn 12:4 tawab gere ǃhoa o, o nē ǃnona ǀgauga ǃoa gere ǁnaeǁgausa.

Nēsa ǁguiǃās ǃgao:

“ǃNonaǁî ǀhommi” hîna 2 Korinteǁîn 12:2 tawa ra mîheb ge ǀnîsi a Mesiab Gaosib hîna Jesub tsî 144 000 ǂkhauhesa ǃgâsan xa nî ǂgaeǂguiheba.​—2Pet. 3:13.

Nēb ge “ǃnonaǁî ǀhommi” di ra ǂgaihe nē Gaosib kaise a ǀgapi amaga.

“Paradais” hînab ge Pauluba a ‘ǂgaeǃapas’ ge sao ra xūna ǃoa a ǁnaeǁgau ǁkhā (1)ǃhūbaib-ai nî hâ paradais (2)gagasi paradais hîna nēsi hâ gagasi paradaisa nî gaoǂams tsî (3)‘Elob di paradais’ hîna ǀhommi ǃnâ nî hâs.

ǁNās ǀkha î ge ǀasa ǃhūbaiba ǀasa ǀhommi tsî ǀasa ǃhūbaib tsîna nî ūhâ. Nēs ge ǀhommi Gaosib tsî khoesib hîna ǃhūbaib-ai Jehovaba ra ǃoaban tsîna nî ǃkhōǂgā.